Success Story: ವಿದೇಶದಿಂದ ಭಾರತಕ್ಕೆ ಮರಳಿದ ಪಿಯೂಷ್ ಬನ್ಸಾಲ್ ‘ಲೆನ್ಸ್​ಕಾರ್ಟ್​’ ಸೃಷ್ಟಿದ ಕಥೆಯೇ ರೋಚಕ

ಲೆನ್ಸ್ ಕಾರ್ಟ್ ನ ಸಂಸ್ಥಾಪಕ ಮತ್ತು ಸಿಇಒ ಪಿಯೂಷ್ ಬನ್ಸಾಲ್ ಅವರು 1985ರ ಏಪ್ರಿಲ್ 26ರಂದು ದೆಹಲಿಯಲ್ಲಿ ಜನಿಸಿದರು. ಪಿಯೂಷ್ ಬನ್ಸಾಲ್ ಅವರ ತಂದೆ ಚಾರ್ಟರ್ಡ್ ಅಕೌಂಟೆಂಟ್, ತಾಯಿ ಕಿರಣ್ ಬನ್ಸಾಲ್ ಗೃಹಿಣಿ. ಪಿಯೂಷ್ ಬನ್ಸಾಲ್ ಅವರ ಪತ್ನಿಯ ಹೆಸರು ನಿಮಿಷಾ ಬನ್ಸಾಲ್.

ಪಿಯೂಷ್ ಬನ್ಸಾಲ್ ಅವರು ದೆಹಲಿಯ ಡಾನ್ ಬಾಸ್ಕೋ ಶಾಲೆಯಲ್ಲಿ ತಮ್ಮ ಶಾಲಾ ಶಿಕ್ಷಣವನ್ನು ಪೂರ್ಣಗೊಳಿಸಿದರು. ಇದಾದ ಬಳಿಕ ಕೆನಡಾಕ್ಕೆ ತೆರಳಿದ್ದರು. ಅವರು ಕೆನಡಾದ ಮೆಕ್ ಗಿಲ್ ವಿಶ್ವವಿದ್ಯಾಲಯದಿಂದ ಎಲೆಕ್ಟ್ರಿಕಲ್ ಎಂಜಿನಿಯರಿಂಗ್ ನಲ್ಲಿ ಪದವಿ ಪಡೆದರು.

ಇದರ ನಂತರ ಅವರು ಭಾರತಕ್ಕೆ ಹಿಂದಿರುಗಿದರು. ಇಂಡಿಯನ್ ಇನ್ಸ್ಟಿಟ್ಯೂಟ್ ಆಫ್ ಮ್ಯಾನೇಜ್ಮೆಂಟ್ IIM ಬೆಂಗಳೂರಿನಿಂದ ತಮ್ಮ ಸ್ನಾತಕೋತ್ತರ ಪದವಿಯನ್ನು ಪೂರ್ಣಗೊಳಿಸಿದರು. ತಮ್ಮ ಶಿಕ್ಷಣವನ್ನು ಪೂರ್ಣಗೊಳಿಸಿದ ನಂತರ, ಪಿಯೂಷ್ ಬನ್ಸಾಲ್ 2007 ರಲ್ಲಿ ಯುಎಸ್ ನ ಮೈಕ್ರೋಸಾಫ್ಟ್ ನಲ್ಲಿ ಪ್ರೋಗ್ರಾಂ ಮ್ಯಾನೇಜರ್ ಆಗಿ ಕೆಲಸ ಮಾಡಲು ಪ್ರಾರಂಭಿಸಿದರು.

ಮತ್ತೆ ಭಾರತಕ್ಕೆ ಮರಳಿ ವಿಭಿನ್ನ ಆಲೋಚನೆಗಳಲ್ಲಿ ಕೆಲಸ ಮಾಡಲು ಪ್ರಾರಂಭಿಸಿದರು. ಅವರು ಅನೇಕ ಸ್ಟಾರ್ಟ್ಅಪ್ ಗಳನ್ನು ಪ್ರಾರಂಭಿಸಿದರು, ಆದರೆ ಹೆಚ್ಚಿನ ಯಶಸ್ಸನ್ನು ಪಡೆಯಲಿಲ್ಲ. ಪಿಯೂಷ್ ಬನ್ಸಾಲ್ ಅವರು ವಿದ್ಯಾರ್ಥಿಗಳಿಗಾಗಿ SearchMyCampus.com ಎಂಬ ವೆಬ್ ಸೈಟ್ ಅನ್ನು ಸಹ ರಚಿಸಿದ್ದಾರೆ. ಅಲ್ಲಿ ವಿದ್ಯಾರ್ಥಿಗಳು ಹಾಸ್ಟೆಲ್ ಗಳಿಂದ ಹಿಡಿದು ಡಿಗ್ರಿ ಮತ್ತು ಅರೆಕಾಲಿಕ ಉದ್ಯೋಗಗಳವರೆಗೆ ಎಲ್ಲವನ್ನೂ ಹುಡುಕಬಹುದು.

2010 ರಲ್ಲಿ, ಪಿಯೂಷ್ ಬನ್ಸಾಲ್ ಅವರು ಅಮಿತ್ ಚೌಧರಿ ಮತ್ತು ಸುಮಿತ್ ಕಪಾಹಿ ಅವರೊಂದಿಗೆ ಲೆನ್ಸ್ಕಾರ್ಟ್ ಎಂಬ ಆನ್ ಲೈನ್ ಪೋರ್ಟಲ್ ಅನ್ನು ಪ್ರಾರಂಭಿಸಿದರು. ಆರಂಭದಲ್ಲಿ ಅವರು ಈ ಆನ್ ಲೈನ್ ಪೋರ್ಟಲ್ ಮೂಲಕ ಲೆನ್ಸ್ ಗಳನ್ನು ಮಾರಾಟ ಮಾಡಲು ಪ್ರಾರಂಭಿಸಿದರು. ನಂತರ ಕನ್ನಡಕ ಮತ್ತು ಸನ್ ಗ್ಲಾಸ್ಗಳನ್ನು ಮಾರಾಟ ಮಾಡಲು ಪ್ರಾರಂಭಿಸಿದರು.

ಆರಂಭದಲ್ಲಿ, ಪಿಯೂಷ್ ಬನ್ಸಾಲ್ ಮತ್ತು ಅವರ ಸಹೋದ್ಯೋಗಿಗಳು ಆನ್ ಲೈನ್ ವೆಬ್ ಮತ್ತು ಅಪ್ಲಿಕೇಶನ್ ಮೂಲಕ ಮಾತ್ರ ಮಾರಾಟ ಮಾಡಿದರು. ಆದರೆ ಕ್ರಮೇಣ ಅವರು ತಮ್ಮ ವ್ಯಾಪಾರವನ್ನು ಬೆಳೆಸಲು ಲೆನ್ಸ್ ಕಾರ್ಟ್ನ ಫ್ರ್ಯಾಂಚೈಸ್ ಅನ್ನು ಸಹ ಪ್ರಾರಂಭಿಸಿದರು. ಪ್ರಸ್ತುತ ಲೆನ್ಸ್ ಕಾರ್ಟ್ ದೇಶದ ಮೂಲೆ ಮೂಲೆಯಲ್ಲಿ ಮಳಿಗೆಗಳನ್ನು ಹೊಂದಿದೆ.

2010 ರಲ್ಲಿ ಪ್ರಾರಂಭವಾದ ಲೆನ್ಸ್ ಕಾರ್ಟ್ 2019 ರಲ್ಲಿ ಯುನಿಕಾರ್ನ್ ಕಂಪನಿಯಾಯಿತು. ಯುನಿಕಾರ್ನ್ ಕಂಪನಿಯು $1 ಬಿಲಿಯನ್ ಅಥವಾ ಅದಕ್ಕಿಂತ ಹೆಚ್ಚಿನ ಮೌಲ್ಯವನ್ನು ಹೊಂದಿರುವ ಕಂಪನಿಯಾಗಿದೆ. ಲೆನ್ಸ್ ಕಾರ್ಟ್ 5000 ಕ್ಕೂ ಹೆಚ್ಚು ಜನರನ್ನು ನೇಮಿಸಿಕೊಂಡಿದೆ. ಭಾರತದಾದ್ಯಂತ 600 ಕ್ಕೂ ಹೆಚ್ಚು ಮಳಿಗೆಗಳನ್ನು ಹೊಂದಿದೆ.