Success Story: 5ನೇ ಪ್ರಯತ್ನದಲ್ಲಿ UPSC ಪಾಸ್ ಆಗಿ IPS ಆದ ಹಾಸನ SP ಹರಿರಾಮ್ ಶಂಕರ್

ಹರಿರಾಮ್ ಶಂಕರ್ ಕೇರಳದ ತ್ರಿಶೂರ್ ಮೂಲದವರು. ಅವರ ತಂದೆ ವೆಂಕಟಾಚಲಂ ವಿ ಎಚ್, ಐಎಂಜಿ ಕೊಚ್ಚಿಯಲ್ಲಿ ಸೆಕ್ಷನ್ ಆಫೀಸರ್. ಅವರ ತಾಯಿ ತ್ರಿಶೂರ್ ದ ವೈದ್ಯರತ್ನಂ ಆಯುರ್ವೇದ ಕಾಲೇಜಿನಲ್ಲಿ ಆಯುರ್ವೇದ ವೈದ್ಯರಾಗಿದ್ದಾರೆ. ಅವರಿಗೆ ಐಐಟಿ ಬಾಂಬೆಯಲ್ಲಿ ಓದಿದ ಕಿರಿಯ ಸಹೋದರನಿದ್ದಾನೆ.

ಶಂಕರ್ ಎನ್ ಐಟಿ ಕ್ಯಾಲಿಕಟ್ ನಿಂದ ಮೆಕ್ಯಾನಿಕಲ್ ಎಂಜಿನಿಯರಿಂಗ್ ಪದವೀಧರರಾಗಿದ್ದಾರೆ. ಅವರು ತಮ್ಮ ಪ್ರಾಥಮಿಕ ಶಿಕ್ಷಣವನ್ನು ತ್ರಿಶೂರ್ ದ ಸೇಂಟ್ ಪಾಲ್ಸ್ ಶಾಲೆಯಲ್ಲಿ ಮತ್ತು ಮಾಧ್ಯಮಿಕ ಶಾಲೆಯನ್ನು ತ್ರಿಶೂರ್ ಜಿಲ್ಲೆಯ ಪೂಚಟ್ಟಿಯಲ್ಲಿರುವ ಭಾರತೀಯ ವಿದ್ಯಾಭವನದ ವಿದ್ಯಾ ಮಂದಿರದಲ್ಲಿ ಪೂರೈಸಿದ್ದಾರೆ.

ಮಾಧ್ಯಮ ವರದಿಗಳ ಪ್ರಕಾರ ಅವರು, ಪದವಿ ಓದಿದ ಬಳಿಕ ಸಿವಿಲ್ ಸರ್ವಿಸ್ ಪರೀಕ್ಷೆಗೆ ಪ್ರಯತ್ನಿಸಿದರು. 2 ಬಾರಿ ವಿಫಲರಾದ ಬಳಿಕ ಉದ್ಯೋಗ ಮಾಡಿಕೊಂಡು ಪರೀಕ್ಷೆಗೆ ತಯಾರಿ ನಡೆಸಲು ಮುಂದಾದರು. ಈ ವೇಳೆ ಬ್ಯಾಂಕ್ ನಲ್ಲಿ ಉದ್ಯೋಗವನ್ನೂ ಮಾಡಿದರು. ಆದರೆ ಸಮಯದ ಅಭಾವದಿಂದ ಕೆಲಸ ಬಿಟ್ಟು ಮತ್ತೆ ಪೂರ್ಣ ಪ್ರಮಾಣದಲ್ಲಿ ಪರೀಕ್ಷೆಗೆ ತಯಾರಿ ನಡೆಸಲು ಮುಂದಾದರು.

ಯುಪಿಎಸ್ ಸಿ ಪರೀಕ್ಷೆಯಲ್ಲಿ ಮೊದಲ ಎರಡು ಬಾರಿ ವಿಫಲರಾದ ಬಳಿಕ ಅವರು 4ನೇ ಬಾರಿ ಐಎಎಎಸ್ ಹುದ್ದೆ ಪಡೆದರು. ನಂತರ 5ನೇ ಪ್ರಯತ್ನದಲ್ಲಿ ತಾವು ಬಯಸಿದಂತೆ ಐಪಿಎಸ್ ಹುದ್ದೆ ಪಡೆದುಕೊಂಡರು. ಅವರಂತೆ ಯುಪಿಎಸ್ ಸಿ ಪರೀಕ್ಷೆಗೆ ತಯಾರಿ ನಡೆಸುತ್ತಿರುವ ಅಭ್ಯರ್ಥಿಗಳಿಗೆ ಅನೇಕ ಉಪಯುಕ್ತ ಸಲಹೆಗಳನ್ನು ಹಂಚಿಕೊಂಡಿದ್ದಾರೆ.

ಪರೀಕ್ಷೆಯಲ್ಲಿ ಪಾಸ್ ಆಗಲು ಕೋಚಿಂಗ್ ಪಡೆಯಲೇಬೇಕು ಅಂತೇನು ಇಲ್ಲ ಅಂತಾರೆ ಹರಿರಾಮ್ ಶಂಕರ್. ನಾನು ಕೂಡ ಕೋಚಿಂಗ್ ಗಾಗಿ ದೆಹಲಿ, ಚೆನ್ನೈಗೆ ಹೋಗಿದ್ದೆ. ಆದರೆ ಅದರಿಂದ ಹೆಚ್ಚಿನ ಪ್ರಯೋಜನವಾಗಿಲ್ಲ. ಸ್ವಯಂ ಅಧ್ಯಯನದಿಂದಲೇ ನನಗೆ ಯಶಸ್ಸು ಸಿಕ್ಕಿತು. ಹಾಗಾಂತ ಕೋಚಿಂಗ್ ಪಡೆಯುವುದು ತಪ್ಪು ಅಂತೇನು ಇಲ್ಲ, ಐಚ್ಛಿಕ ವಿಷಯಗಳಿಗೆ ಕೋಚಿಂಗ್ ಪಡೆಯಬಹುದು ಎಂದಿದ್ದಾರೆ.

ಇನ್ನು ಮೊದಲ ಬಾರಿಯೇ ಪರೀಕ್ಷೆಯಲ್ಲಿ ಪಾಸ್ ಆಗುವುದು ಕಷ್ಟ. ವರ್ಷಗಳ ಪರಿಶ್ರಮದ ಬಳಿಕವೇ ಅನೇಕರು ಯಶಸ್ಸು ಕಾಣುತ್ತಾರೆ. ನಿರಂತರ ಪ್ರಯತ್ನದಿಂದ ಮಾತ್ರ ಸ್ಪರ್ಧಾತ್ಮಕ ಪರೀಕ್ಷೆಗಳಲ್ಲಿ ಯಶಸ್ಸು ಸಾಧಿಸಲು ಸಾಧ್ಯ ಎಂದು ಅವರು ಅಭ್ಯರ್ಥಿಗಳಿಗೆ ಸಲಹೆ ನೀಡಿದ್ದಾರೆ.

ಉದ್ಯೋಗ ಮಾಡುತ್ತಲೇ ಪರೀಕ್ಷೆಗೆ ತಯಾರಿ ನಡೆಸಬಹುದು. ಇನ್ನು ಸಂದರ್ಶನಕದಲ್ಲಿ ಪಾಸ್ ಆಗಲು ಧೈರ್ಯವೇ ದೊಡ್ಡ ಅಸ್ತ್ರ. ಧೈರ್ಯದಿಂದ ಇಂಟರ್ ವ್ಯೂ ನೀಡಿದರೆ ಯುಪಿಎಸ್ ಸಿ ಪಾಸ್ ಆಗುವುದು ಸುಲಭ ಎಂದು ಹರಿರಾಮ್ ಶಂಕರ್ ಅವರು ಹೇಳಿದ್ದಾರೆ.