UPSC Success Story: ಪಿಯು ಫೇಲ್ ಆಗಿ ಟೆಂಪೋ ಓಡಿಸುತ್ತಿದ್ದ, ಗರ್ಲ್​​ಫ್ರೆಂಡ್​ ಹಾಕಿದ ಷರತ್ತಿಗೆ IPS ಆದ ಯುವಕ

ಐಪಿಎಸ್ ಮನೋಜ್ ಕುಮಾರ್ ಶರ್ಮಾ ಮಧ್ಯಪ್ರದೇಶದ ಮೊರೆನಾ ಜಿಲ್ಲೆಯ ನಿವಾಸಿ. ಬಾಲ್ಯದಿಂದಲೂ ಅವರು ಓದಿನಲ್ಲಿ ಚುರುಕಾಗಿ ಇರಲಿಲ್ಲ. ಬಡ ಕುಟುಂಬದಲ್ಲಿ ಬೆಳೆದಿರುವ ಅವರು ಇಂದು ದೇಶದ ಅತ್ಯಂತ ಕಠಿಣ ಸ್ಪರ್ಧಾತ್ಮಕ ಪರೀಕ್ಷೆಯಾದ UPSCಯಲ್ಲಿ ಉತ್ತೀರ್ಣರಾಗುವ ಮೂಲಕ ಕುಟುಂಬಕ್ಕೆ ಹೆಮ್ಮೆ ತಂದಿದ್ದಾರೆ.

ಐಪಿಎಸ್ ಮನೋಜ್ ಕುಮಾರ್ ಶರ್ಮಾ ಓದಿನಲ್ಲಿ ಹಿಂದುಳಿದ ವಿದ್ಯಾರ್ಥಿಯಾಗಿದ್ದರು. ಹಿಂದಿ ಹೊರತುಪಡಿಸಿ ಉಳಿದೆಲ್ಲಾ ವಿಷಯಗಳಲ್ಲಿ 12ನೇ ತರಗತಿಯಲ್ಲಿ ಅನುತ್ತೀರ್ಣರಾಗಿದ್ದರು. 9 ಮತ್ತು 10ನೇ ತರಗತಿಯಲ್ಲಿ ಜಸ್ಟ್ ಪಾಸ್ ಆಗಿದ್ದರು. ಬಾಲ್ಯದಿಂದಲೂ ಓದಿನ ವೈಫಲ್ಯಗಳನ್ನು ನೋಡಿದ್ದರು. ಇದರ ಹೊರತಾಗಿಯೂ ಮನೋಜ್ ಎಂದಿಗೂ ಛಲ ಬಿಡಲಿಲ್ಲ.

ಮನೋಜ್ ಬಡವರಾದ ಕಾರಣ ತಮ್ಮ ಅಧ್ಯಯನವನ್ನು ಪೂರ್ಣಗೊಳಿಸಲು ಟೆಂಪೋ ಓಡಿಸುತ್ತಿದ್ದರು. ಹಲವು ಬಾರಿ ರಾತ್ರಿ ಭಿಕ್ಷುಕರ ಮಧ್ಯೆ ರಸ್ತೆಯಲ್ಲೇ ಮಲಗುತ್ತಿದ್ದರಂತೆ.

ಇನ್ನು ಮನೋಜ್ 12ನೇ ತರಗತಿಯಲ್ಲಿ ಓದುತ್ತಿದ್ದಾಗ ಪ್ರೀತಿಯಲ್ಲಿ ಬಿದ್ದಿದ್ದರು. ಫೇಲ್ ಆದ ಕಾರಣ ಹುಡ್ಗಿಯ ಬಳಿ ಪ್ರೀತಿ ವ್ಯಕ್ತಪಡಿಸಲು ಹಿಂದೇಟು ಹಾಕಿದ್ದರು.

ಕೊನೆಗೆ ಪ್ರೀತಿಯನ್ನು ಹೇಳಿಕೊಂಡಾಗ ಶ್ರದ್ಧಾ ಅವರು ಮನೋಜ್ ಬಾಳಿನ ಬೆಳಕಾದರು. ಅವರು ಹಾಕಿದ ಷರತ್ತಿನ ಮೇಲೆಯೇ ಮನೋಜ್ ಯುಪಿಎಸ್ ಸಿ ಪರೀಕ್ಷೆಗೆ ತಯಾರಿ ಆರಂಭಿಸಿದರು. ಈಗ ಅವರ ಪತ್ನಿ ಆಗಿರುವ ಶ್ರದ್ಧಾ ಪರೀಕ್ಷಾ ತಯಾರಿ ಸಮಯದಲ್ಲಿ ಮನೋಜ್ ಅವರಿಗೆ ಸಾಕಷ್ಟು ಸಹಾಯ ಮಾಡಿದ್ದರು.

UPSC ಪರೀಕ್ಷೆಯ 3 ಪ್ರಯತ್ನಗಳಲ್ಲಿ ಮನೋಜ್ ಕುಮಾರ್ ಶರ್ಮಾ ವಿಫಲರಾಗಿದ್ದರು. ನಂತರ ನಾಲ್ಕನೇ ಪ್ರಯತ್ನದಲ್ಲಿ 121ನೇ ರ್ಯಾಂಕ್ ಗಳಿಸಿ ಐಪಿಎಸ್ ಅಧಿಕಾರಿಯಾದರು.

ಪ್ರಸ್ತುತ ಮನೋಜ್ ಶರ್ಮಾ ಮುಂಬೈ ಪೊಲೀಸ್ ನಲ್ಲಿ ಹೆಚ್ಚುವರಿ ಕಮಿಷನರ್ ಆಗಿ ನೇಮಕಗೊಂಡಿದ್ದಾರೆ. ಅವರ ಜೀವನದ ಹೋರಾಟಗಳು ಯಾರನ್ನಾದರೂ ಪ್ರೇರೇಪಿಸುತ್ತವೆ.