UPSC Success Story: ಕಲಬುರಗಿ ಎಸ್​ಪಿ IPS ಇಶಾ ಪಂತ್ ಜೀವನಕಥೆ ಇದು, ಇವರ ಪತಿ IAS ಆಫೀಸರ್

ದೇಶದ ಅತ್ಯಂತ ಸಮರ್ಥ ಐಪಿಎಸ್ ಅಧಿಕಾರಿಗಳಲ್ಲಿ ಇಶಾ ಪಂತ್ ಅವರ ಹೆಸರನ್ನು ತೆಗೆದುಕೊಳ್ಳಲಾಗುತ್ತೆ. ಇವರು 23 ಜೂನ್ 1984 ರಂದು ಭೋಪಾಲ್ನಲ್ಲಿ ಜನಿಸಿದರು. ಇವರ ತಂದೆ ಭಗವತ್ ಪಂತ್ ಉತ್ತರಾಖಂಡದ ಅಲ್ಮೋರಾ ನಿವಾಸಿ. ಬಿಎಚ್ ಇಎಲ್ ನಲ್ಲಿ ಎಂಜಿನಿಯರ್ ಆಗಿದ್ದರು. ಅವರ 4 ಹೆಣ್ಣು ಮಕ್ಕಳಲ್ಲಿ ಇಶಾ ಕಿರಿಯವರು.

ಇಶಾ ಅವರ ಎಲ್ಲಾ ಸಹೋದರಿಯರು ಅತ್ಯಂತ ಪ್ರತಿಷ್ಠಿತ ಹುದ್ದೆಗಳಲ್ಲಿ ಕೆಲಸ ಮಾಡುತ್ತಿದ್ದಾರೆ. ಅವರ ಹಿರಿಯ ಸಹೋದರಿ IFS ಅಧಿಕಾರಿಯಾಗಿದ್ದಾರೆ, ಎರಡನೆಯವರು HR ವೃತ್ತಿಯಲ್ಲಿದ್ದಾರೆ ಮೂರನೆಯವರು ಭಾರತೀಯ ವಾಯುಪಡೆಯಲ್ಲಿ ಸ್ಕ್ವಾಡ್ರನ್ ಲೀಡರ್ ಆಗಿದ್ದಾರೆ. ಇಶಾ ಪೊಲೀಸ್ ಸೇವೆಗೆ ಸೇರಲು ಬಯಸಿರಲಿಲ್ಲ. ಯಾವುದಾದರೂ ಸರ್ಕಾರಿ ಕೆಲಸ ಸಿಗಲಿ ಎಂದು ತಯಾರಿ ನಡೆಸಿದ್ದರು. ಐಪಿಎಸ್ ಅನ್ನು ಕೊನೆಯ ಆದ್ಯತೆ ಆಗಿ ಇರಿಸಿದ್ದರು.

ಇಶಾಗೆ ಪೊಲೀಸ್ ಸೇವೆಗೆ ಸೇರಲು ಇಷ್ಟವಿರಲಿಲ್ಲ. ಆದರೆ ತನ್ನ ಸ್ನೇಹಿತೆಯೊಂದಿಗೆ ನಡೆದ ಘಟನೆ ಅವರ ಜೀವನ ಮತ್ತು ಆಲೋಚನೆಯನ್ನು ಬದಲಾಯಿಸಿತು. ಸ್ನೇಹಿತೆಯನ್ನು ಒಬ್ಬ ವ್ಯಕ್ತಿ ಚಡಾಯಿಸುತ್ತಿದ್ದ, ಪೊಲೀಸರಿಗೆ ಮನವಿ ಮಾಡಿದರೂ ಯಾರೂ ಸಹಾಯಕ್ಕೆ ಮುಂದಾಗಲಿಲ್ಲ. ಈ ಘಟನೆಯ ನಂತರ, ಇಶಾ ಐಪಿಎಸ್ ಅಧಿಕಾರಿಯಾಗಲು ನಿರ್ಧರಿಸಿದರು.

2011 ರಲ್ಲಿ ಅವರ ಕನಸು ನನಸಾಯಿತು. ಆ ಸಮಯದಲ್ಲಿ ಇಶಾ ಅವರಿಗೆ 27 ವರ್ಷ. ಅವರು UPSC ಪರೀಕ್ಷೆಯಲ್ಲಿ ಅಖಿಲ ಭಾರತ 191 ರ್ಯಾಂಕ್ ಗಳಿಸಿದರು. ತರಬೇತಿಯ ನಂತರ, ಜಬಲ್ಪುರ್ ಜಿಲ್ಲೆಯಲ್ಲಿ ಎಸ್ ಎಸ್ಪಿಯಾಗಿ ಮೊದಲ ಪೋಸ್ಟಿಂಗ್ ಮಾಡಲಾಯಿತು.

2012 ರಲ್ಲಿ, ಅವರಿಗೆ ಅತ್ಯುತ್ತಮ ಆಲ್ ರೌಂಡರ್ ಭಾರತೀಯ ಪೊಲೀಸ್ ಸೇವಾ ಪ್ರೊಬೇಷನ್ ಪ್ರಶಸ್ತಿಯನ್ನು ನೀಡಲಾಯಿತು. ಜಬಲ್ಪುರದಲ್ಲಿ, ಇಶಾ ಡ್ರಗ್ ಮಾಫಿಯಾ ಮತ್ತು ಅಕ್ರಮ ಮದ್ಯ ಮಾರಾಟಗಾರರನ್ನು ನಿಗ್ರಹಿಸಿದರು.

ಇಶಾ ಅವರ ಅದ್ಭುತ ಸಾಹಸಗಳ ಸುದ್ದಿ ಸಿನಿಮಾ ನಿರ್ದೇಶಕ ಪ್ರಕಾಶ್ ಝಾ ಅವರಿಗೆ ತಲುಪಿತ್ತು. ಅವರು ಐಪಿಎಸ್ ಇಶಾ ಪಂತ್ ಅವರನ್ನು ಭೇಟಿ ಮಾಡಲು ಜಬಲ್ಪುರಕ್ಕೆ ಹೋಗಿದ್ದರು. ಝಾ ಅವರು ಇಶಾ ಅವರೊಂದಿಗೆ 4 ಗಂಟೆಗಳ ಕಾಲ ಇದ್ದರು. ಅವರ ಮೆಥಡಾಲಜಿಯಿಂದ ಹಿಡಿದು ಹಾವಭಾವದವರೆಗೆ ಎಲ್ಲವನ್ನೂ ರೆಕಾರ್ಡ್ ಮಾಡಿ ಮುಂಬೈಗೆ ಹೋದರು. ಪ್ರಿಯಾಂಕಾ ಚೋಪ್ರಾ ಈ ರೆಕಾರ್ಡಿಂಗ್ ಮೂಲಕ ‘ಜೈ ಗಂಗಾಜಲ್’ ಸಿನಿಮಾಗೆ ಸಿದ್ಧರಾದರು.

2016 ರಲ್ಲಿ ಐಎಎಸ್ ಅನಿರುದ್ಧ್ ಶ್ರವಣ್ ಅವರನ್ನು ವಿವಾಹವಾದ ನಂತರ ಐಪಿಎಸ್ ಇಶಾ ಪಂತ್ ತಮ್ಮ ಕೇಡರ್ ಅನ್ನು ಬದಲಾಯಿಸಿದರು. ಅನಿರುದ್ಧ್ ಶ್ರವಣ್ ಅವರು ಕರ್ನಾಟಕ ಕೇಡರ್ ಅಧಿಕಾರಿಯಾಗಿದ್ದರು. ಹಾಗಾಗಿ ಇಶಾ ಕೂಡ ಕರ್ನಾಟಕ ಕೇಡರ್ ಪಡೆದರು. ಪ್ರಸ್ತುತ ಇಶಾ ಅವರು ಕಲಬುರಗಿಯಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದಾರೆ.