UPSC Success Story: ಹೊಲಗದ್ದೆಗಳಲ್ಲಿ ಕೆಲಸ ಮಾಡುತ್ತಿದ್ದ ಹುಡ್ಗಿ ಈಗ IPS ಆಫೀಸರ್

ಐಪಿಎಸ್ ಇಲ್ಮಾ ಅಫ್ರೋಜ್ ಅವರ ಜೀವನವು ಹೋರಾಟಗಳಿಂದ ತುಂಬಿದೆ. ಚಿಕ್ಕ ವಯಸ್ಸಿನಲ್ಲೇ ತಂದೆಯನ್ನು ಕಳೆದುಕೊಂಡರು. ಆಗ ಮನೆ, ಹೊಲ, ಮಕ್ಕಳ ಜವಾಬ್ದಾರಿ ಅಮ್ಮನ ಮೇಲೆ ಬಿತ್ತು. ಅಮ್ಮನ ಜೊತೆ ಕಷ್ಟಗಳಿಗೆ ಹೆಗಲು ಕೊಟ್ಟವರು ಈ ಇಲ್ಮಾ. ಎಲ್ಲಾ ಕಷ್ಟಗಳ ನಡುವೆ, ಅವರು ತಮ್ಮ ಅಧ್ಯಯನವನ್ನು ಮುಂದುವರೆಸಿದರು. ಇಂದು ಲಕ್ಷಾಂತರ ಮಂದಿ ಕನಸು ಕಾಣುವ UPSC ಪರೀಕ್ಷೆಯಲ್ಲಿ ಯಶಸ್ವಿಯಾಗಿ, ಐಪಿಎಸ್ ಅಧಿಕಾರಿಯಾಗಿದ್ದಾರೆ.

ಉತ್ತರಪ್ರದೇಶದ ಮೊರಾದಾಬಾದ್ ನ ಕುಂದರ್ಕಿ ಎಂಬ ಸಣ್ಣ ಪಟ್ಟಣದ ನಿವಾಸಿ ಇಲ್ಮಾ ಅಫ್ರೋಜ್ ಬಾಲ್ಯದಿಂದಲೂ ಜೀವನದಲ್ಲಿ ಸಾಕಷ್ಟು ಕಷ್ಟಪಟ್ಟಿದ್ದಾರೆ. ತಂದೆ ತೀರಿಕೊಂಡಾಗ ಆಕೆಗೆ ಕೇವಲ 14 ವರ್ಷ. ಇಲ್ಮಾ ಅಫ್ರೋಜ್ ತನ್ನ ಅಧ್ಯಯನದ ಜೊತೆಗೆ ತನ್ನ ತಾಯಿಗೆ ಹೊಲಗಳಲ್ಲಿ ಸಹಾಯ ಮಾಡುತ್ತಿದ್ದರು.

ಮೊರಾದಾಬಾದ್ ನಲ್ಲಿ ಶಾಲಾ ಶಿಕ್ಷಣವನ್ನು ಪೂರ್ಣಗೊಳಿಸಿದ ನಂತರ, ಇಲ್ಮಾ ಅಫ್ರೋಜ್ ದೆಹಲಿಯ ಸೇಂಟ್ ಸ್ಟೀಫನ್ಸ್ ಗೆ ಪ್ರವೇಶ ಪಡೆದರು. ಅಲ್ಲಿಂದ ಅವರು ಫಿಲಾಸಫಿಯಲ್ಲಿ ಪದವಿ ಪಡೆದರು. ಇಲ್ಮಾ ಸೇಂಟ್ ಸ್ಟೀಫನ್ಸ್ ನಲ್ಲಿ ಕಳೆದ ವರ್ಷಗಳನ್ನು ತನ್ನ ಜೀವನದ ಅತ್ಯುತ್ತಮ ಸಮಯವೆಂದು ಬಣ್ಣಿಸುತ್ತಾರೆ.

ನಂತರ ಕಠಿಣ ಪರಿಶ್ರಮದಿಂದಾಗಿ ಅವರು ಆಕ್ಸ್ ಫರ್ಡ್ ವಿಶ್ವವಿದ್ಯಾಲಯದಿಂದ ವಿದ್ಯಾರ್ಥಿವೇತನವನ್ನು ಪಡೆದರು. ಆ ಮೂಲಕ ಸ್ನಾತಕೋತ್ತರ ಪದವಿ ಪಡೆದರು. ಆ ಸಮಯದಲ್ಲಿ ವಿದೇಶಕ್ಕೆ ಹೋಗಲು ಇಲ್ಮಾ ಬಳಿ ಟಿಕೆಟ್ಗೆ ಹಣವಿರಲಿಲ್ಲ. ನಂತರ ಗ್ರಾಮದ ಮುಖ್ಯಸ್ಥರೊಬ್ಬರ ಸಹಾಯ ಪಡೆದರು.

ಆಕ್ಸ್ ಫರ್ಡ್ ವಿಶ್ವವಿದ್ಯಾನಿಲಯದಲ್ಲಿ ಸ್ಕಾಲರ್ ಶಿಪ್ ಸಿಕ್ಕರೂ ಉಳಿದ ಖರ್ಚಿಗೆ ಅಲ್ಲಿಯೇ ಮಕ್ಕಳಿಗೆ ಟ್ಯೂಷನ್ ನೀಡುವ ಮೂಲಕ ಹಣ ಗಳಿಸುತ್ತಿದ್ದರು. ಈ ಸಮಯದಲ್ಲಿ ನಿಮ್ಮ ಮಗಳು ವಿದೇಶಕ್ಕೆ ಹೋಗಿದ್ದಾಳೆ. ಅಲ್ಲಿಯೇ ಇರುತ್ತಾರೆ ಮತ್ತೆ ಮರಳುವುದಿಲ್ಲ ಎಂದು ತಾಯಿಗೆ ನೆರೆಹೊರೆಯವರು ಹೇಳುತ್ತಿದ್ದರು. ಆದರೆ ಅವರ ಮಾತನ್ನು ಇಲ್ಮಾ ಸುಳ್ಳಾಗಿಸಿ ವಿದೇಶದಿಂದ ಮರಳಿ ದೇಶಕ್ಕಾಗಿ ದುಡಿಯುತ್ತಿದ್ದಾರೆ.

ಸ್ನಾತಕೋತ್ತರ ಪದವಿಯ ನಂತರ, ಇಲ್ಮಾ ಅಫ್ರೋಜ್ ಅವರಿಗೆ ಫೈನಾನ್ಶಿಯಲ್ ಎಸ್ಟೇಟ್ ಕಂಪನಿಯಲ್ಲಿ ಅತ್ಯುತ್ತಮ ಉದ್ಯೋಗಾವಕಾಶ ಸಿಕ್ಕಿತು. ಅದನ್ನು ತೊರೆದು ಭಾರತಕ್ಕೆ ಬಂದ ನಂತರ ಅವರು UPSC ಪರೀಕ್ಷೆಗೆ ತಯಾರಿ ಆರಂಭಿಸಿದರು.

2017 ರಲ್ಲಿ, ಇಲ್ಮಾ ನಾಗರಿಕ ಸೇವೆಗಳ ಪರೀಕ್ಷೆಯಲ್ಲಿ 217 ನೇ ರ್ಯಾಂಕ್ ಗಳಿಸಿದರು. ಆಗ ಅವರ ವಯಸ್ಸು 26 ವರ್ಷ. ಪ್ರಸ್ತುತ ಅವರನ್ನು ಶಿಮ್ಲಾದಲ್ಲಿ ಎಸ್ ಪಿ ಎಸ್ ಡಿಆರ್ಎಫ್ ಆಗಿ ನಿಯೋಜಿಸಲಾಗಿದೆ.