UPSC Success Story: ಯಾವುದೇ ಕೋಚಿಂಗ್ ಸಹಾಯವಿಲ್ಲದೆ ಮೊದಲ ಪ್ರಯತ್ನದಲ್ಲೇ IAS ಆದ ಸೌಮ್ಯ ಶರ್ಮಾ

ಯುಪಿಎಸ್ ಸಿ ಸಾಧಕರ ಸರಣಿಯ ನಮ್ಮ ಇಂದಿನ ಅಥಿತಿ ಐಎಎಸ್ ಸೌಮ್ಯ ಶರ್ಮಾ ಅಂತಹ ಅಪರೂಪದ ಸಾಧನೆ ಮಾಡಿದ್ದಾರೆ. ಯುಪಿಎಸ್ ಸಿ ಪರೀಕ್ಷೆಗಾಗಿ ಯಾವುದೇ ಕೋಚಿಂಗ್ ಪಡೆಯದೇ ಅಖಿಲ ಭಾರತ ಮಟ್ಟದಲ್ಲಿ 9ನೇ ರ್ಯಾಂಕ್ ಗಳಿಸಿದ್ದಾರೆ. ಅವರ ಯಶಸ್ಸಿನ ಹಾದಿಯ ಬಗ್ಗೆ ತಿಳಿಯೋಣ ಬನ್ನಿ.

ದೆಹಲಿಯ ನಿವಾಸಿ ಸೌಮ್ಯ ಶರ್ಮಾ 16 ನೇ ವಯಸ್ಸಿನಲ್ಲಿ ಇದ್ದಕ್ಕಿದ್ದಂತೆ ತನ್ನ ಶ್ರವಣ ಸಾಮರ್ಥ್ಯವನ್ನು ಕಳೆದುಕೊಂಡರು. ವೈದ್ಯಕೀಯ ಸಹಾಯ ಪಡೆದರೂ ಯಾವುದೇ ಪ್ರಯೋಜನವಾಗಲಿಲ್ಲ. ಕೊನೆಗೆ ಶ್ರವಣ ಸಾಧನವನ್ನು ಅವಲಂಬಿಸಬೇಕಾಯಿತು. ಆದರೆ ಇದು ಸೌಮ್ಯ ಸಾಧನೆಗೆ ಅಡ್ಡಿ ಬರಲೇ ಇಲ್ಲ.

2017 ರಲ್ಲಿ ಸಿವಿಲ್ ಸರ್ವೀಸಸ್ ಪರೀಕ್ಷೆಯಲ್ಲಿ ತೇರ್ಗಡೆಯಾದಾಗ ಸೌಮ್ಯಗೆ ಕೇವಲ 23 ವರ್ಷ ವಯಸ್ಸಾಗಿತ್ತು. ಯಾವುದೇ ಕೋಚಿಂಗ್ ಸಹಾಯ ಪಡೆಯದೇ ಐಎಎಸ್ ಅಧಿಕಾರಿಯಾದರು. ಪರೀಕ್ಷೆಯ ದಿನದಂದು ಸೌಮ್ಯಾ ವೈರಲ್ ಜ್ವರದಿಂದ ಬಳಲುತ್ತಿದ್ದರು. ಯಾವುದನ್ನೂ ಲೆಕ್ಕಿಸದೆ ಸೌಮ್ಯ ತಮ್ಮ ಗುರಿ ಮುಟ್ಟಿದರು.

UPSC ಗಾಗಿ ತಯಾರಿ ನಡೆಸುವ ಮೊದಲು ಅವರು ದೆಹಲಿಯ ರಾಷ್ಟ್ರೀಯ ಕಾನೂನು ವಿಶ್ವವಿದ್ಯಾಲಯದಿಂದ LLB ಪೂರ್ಣಗೊಳಿಸಿದರು. ಅವರು 2017 ರಲ್ಲಿ UPSC ಗೆ ತಯಾರಿ ಆರಂಭಿಸಿದರು. ಅದೇ ವರ್ಷದಲ್ಲಿ ಅವರು ಪ್ರಿಲಿಮ್ಸ್ ಪರೀಕ್ಷೆಗೆ ಹಾಜರಾಗಿದ್ದರು. ಅವರು ಸಾಮಾನ್ಯ ವರ್ಗದ ಅಡಿಯಲ್ಲಿ ಅರ್ಜಿಯನ್ನು ಭರ್ತಿ ಮಾಡಿದ್ದರು, ಅಂಗವಿಕಲ ಕೋಟಾದಡಿ ಮಾಡಲಿಲ್ಲ.

UPSC CSE ಪರೀಕ್ಷೆಯಲ್ಲಿ ಯಶಸ್ವಿಯಾಗಲು ಸೌಮ್ಯ ಪ್ರಕಾರ ಸರಿಯಾದ ಯೋಜನೆ, ಕಾರ್ಯತಂತ್ರ ಎರಡು ಪ್ರಮುಖ ಅಂಶಗಳಾಗಿವೆ. ಶ್ರಮದ ಜೊತೆಗೆ ಜಾಣತನವೂ ಬಹಳ ಎಂದು ಸೌಮ್ಯ ಹೇಳುತ್ತಾರೆ.

UPSC ಆಕಾಂಕ್ಷಿಗಳಿಗೆ ಅವರ ಸಲಹೆಯೆಂದರೆ ಬರವಣಿಗೆಯನ್ನು ಅಭ್ಯಾಸ ಮಾಡುವುದರ ಜೊತೆಗೆ ಪತ್ರಿಕೆಗಳನ್ನು ಓದಬೇಕು. ಐಚ್ಛಿಕ ವಿಷಯದ ಮೇಲೆ ಹಿಡಿತ ಸಾಧಿಸಬೇಕು ಎನ್ನುತ್ತಾರೆ.

ಪ್ರಿಲಿಮ್ಸ್ ಜೊತೆಜೊತೆಗೆ ಮುಖ್ಯ ಪರೀಕ್ಷೆಗಳಿಗೂ ಒಟ್ಟಿಗೆ ತಯಾರಿ ಮಾಡಬೇಕು. ಟಾಪರ್ ಗಳ ಸಂದರ್ಶನಗಳನ್ನು ಆಲಿಸಿ ನಂತರ ನಿಮಗೆ ಸೂಕ್ತವಾದ ತಂತ್ರವನ್ನು ಅಳವಡಿಸಿಕೊಳ್ಳಿ ಎಂದು ಸೌಮ್ಯಾ ಅಭ್ಯರ್ಥಿಗಳಿಗೆ ಸಲಹೆ ನೀಡಿದರು. ಸೌಮ್ಯ ಶರ್ಮಾ ಪ್ರಸ್ತುತ ನಾಗ್ಪುರದ ಜಿಲ್ಲಾ ಪರಿಷತ್ ನಲ್ಲಿ ಸಿಇಒ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ.