UPSC Success Story: ಮೊದಲ ಪ್ರಯತ್ನದಲ್ಲೇ 5ನೇ Rank: ಕನ್ನಡಿಗ ಅಧಿಕಾರಿಯ ಕೈ ಹಿಡಿದ IAS ಸೃಷ್ಟಿ ಸಾಧನೆಯ ಕಥೆ ಇದು

ಐಎಎಸ್ ಸೃಷ್ಟಿ ದೇಶಮುಖ್ 2018ರಲ್ಲಿ ತಮ್ಮ ಮೊದಲ ಪ್ರಯತ್ನದಲ್ಲೇ ಯುಪಿಎಸ್ ಸಿ ಪರೀಕ್ಷೆಯಲ್ಲಿ ತೇರ್ಗಡೆಯಾಗಿದ್ದಾರೆ. 5ನೇ ರ್ಯಾಂಕ್ ಪಡೆದಿರುವ ಸೃಷ್ಟಿ, ಮಹಿಳಾ ಅಭ್ಯರ್ಥಿಗಳಲ್ಲಿ ಅಗ್ರ ಸ್ಥಾನಕ್ಕೆ ಪಾತ್ರರಾಗಿದ್ದಾರೆ. ಇವರು ಇಂಜಿನಿಯರಿಂಗ್ ಓದುತ್ತಿರುವಾಗಲೇ UPSC ಪರೀಕ್ಷೆಗೆ ತಯಾರಿ ಆರಂಭಿಸಿದ್ದರು. ಅವರ ಹಿನ್ನೆಲೆ, ಕುಟುಂಬ ಮತ್ತು ಯಶಸ್ಸಿನ ಮಾಹಿತಿ ಇಲ್ಲಿದೆ.

ಐಎಎಸ್ ಸೃಷ್ಟಿ ದೇಶಮುಖ್ ಅವರು 28 ಮಾರ್ಚ್ 1996 ರಂದು ಭೋಪಾಲ್ ನಲ್ಲಿ ಜನಿಸಿದರು. ಅವರ ತಂದೆ ಜಯಂತ್ ದೇಶಮುಖ್ ಖಾಸಗಿ ಕಂಪನಿಯಲ್ಲಿ ಇಂಜಿನಿಯರ್ ಆಗಿದ್ದರೆ, ತಾಯಿ ಸುನೀತಾ ದೇಶಮುಖ್ ಖಾಸಗಿ ಶಾಲೆಯೊಂದರಲ್ಲಿ ಶಿಕ್ಷಕಿಯಾಗಿದ್ದಾರೆ. ತಮ್ಮ ಸಾಧನೆಯ ಕ್ರೆಡಿಟ್ ಅನ್ನು ಸೃಷ್ಟಿ ಅವರು ಕುಟುಂಬಕ್ಕೆ ನೀಡುತ್ತಾರೆ.

ಸೃಷ್ಟಿ ದೇಶಮುಖ್ ಎಂಜಿನಿಯರಿಂಗ್ ಪದವಿಯ ಮೂರನೇ ವರ್ಷದಲ್ಲಿ UPSC ಪರೀಕ್ಷೆಗೆ ತಯಾರಿ ಆರಂಭಿಸಿದರು. ಆಗ ಪೋಷಕರು ಕೂಡ ಇವರ ನೆರವಿಗೆ ನಿಂತರಂತೆ. ಯುಪಿಎಸ್ ಸಿ ಹಾದಿ ಅಷ್ಟು ಸುಲಭವಾಗಿರಲಿಲ್ಲ. ಸೆಮಿಸ್ಟರ್ ಪರೀಕ್ಷೆಯ ಸಮಯದಲ್ಲಿ ಮಾತ್ರ ಇಂಜಿನಿಯರಿಂಗ್ ಸಿಲಬಸ್ ಓದುತ್ತಿದ್ದರು.ಉಳಿದ ಸಮಯವನ್ನು ಯುಪಿಎಸ್ಸಿ ಪರೀಕ್ಷೆಗೆ ಸಿದ್ಧಪಡಿಸಲು ಮೀಸಲಿಟ್ಟಿದ್ದರು.

ಈ ಹಿನ್ನೆಲೆಯಲ್ಲಿ ಇಂಜಿನಿಯರಿಂಗ್ ಪರೀಕ್ಷೆಗೆ ಒಂದರಿಂದ ಒಂದೂವರೆ ತಿಂಗಳು ಮಾತ್ರ ತಯಾರಿ ನಡೆಸುತ್ತಿದ್ದರು. ಈ ಸಮಯದಲ್ಲಿ, ಅವರು ತಮ್ಮ ಸೋಷಿಯಲ್ ಮೀಡಿಯಾ ಅಕೌಂಟ್ ಗಳಿಂದ ಸಹ ದೂರ ಉಳಿದಿದ್ದರಂತೆ.

UPSC ಪರೀಕ್ಷೆಗೆ ತಯಾರಿ ನಡೆಸುವಾಗ ನಿಮ್ಮ ಏಕಾಗ್ರತೆಯನ್ನು ಕಾಪಾಡಿಕೊಳ್ಳುವುದು ಮುಖ್ಯ ಎಂದು ಸೃಷ್ಟಿ ದೇಶಮುಖ್ ಸಲಹೆ ನೀಡುತ್ತಾರೆ. ಮೊದಲ ಪ್ರಯತ್ನವು ತಮ್ಮ ಕೊನೆಯ ಪ್ರಯತ್ನವಾಗಿರಲಿ ಎಂದು ಅವರು ನಿರ್ಧರಿಸಿದ್ದರು. ಯುಪಿಎಸ್ ಸಿ ಪರೀಕ್ಷೆಗೆ ತಯಾರಿ ನಡೆಸುತ್ತಿದ್ದಾಗ ದಿನಪತ್ರಿಕೆ ಓದುತ್ತಿದ್ದರು. ರಾಜ್ಯಸಭಾ ಟಿವಿ ಮತ್ತು ಆನ್ ಲೈನ್ ಸ್ಟಡಿ ಮೆಟೀರಿಯಲ್ ನಿಂದಲೂ ಅವರಿಗೆ ಸಾಕಷ್ಟು ಸಹಾಯ ಸಿಕ್ಕಿತ್ತಂತೆ.

ಐಎಎಸ್ ಸೃಷ್ಟಿ ಜಯಂತ್ ದೇಶಮುಖ್ ಅವರು ತಮ್ಮದೇ ಬ್ಯಾಚ್ ಮೇಟ್ ಕನ್ನಡಿಗ ಐಎಎಸ್ ಡಾ. ನಾಗಾರ್ಜುನ ಬಿ.ಗೌಡ ಅವರೊಂದಿಗೆ ಪ್ರೇಮ ವಿವಾಹವಾಗಿದ್ದಾರೆ. ಸಿವಿಲ್ ಸರ್ವೀಸ್ ಟ್ರೈನಿಂಗ್ ಅಕಾಡೆಮಿ LBSNA ಅಂದರೆ ಲಾಲ್ ಬಹದ್ದೂರ್ ಶಾಸ್ತ್ರಿ ಟ್ರೈನಿಂಗ್ ಅಕಾಡೆಮಿಯಲ್ಲಿ ಇಬ್ಬರು ಭೇಟಿಯಾದರು. 24 ಏಪ್ರಿಲ್ 2022 ರಂದು ವಿವಾಹವಾದರು. ಅವರ ಮದುವೆಯ ಫೋಟೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಸಾಕಷ್ಟು ವೈರಲ್ ಆಗಿವೆ.

ಐಎಎಸ್ ಸೃಷ್ಟಿ ದೇಶಮುಖ್ ಕೆಲ ಸಮಯದ ಹಿಂದೆ ಒಂದು ಪುಸ್ತಕ ಬರೆದಿದ್ದಾರೆ. ಅದರ ಹೆಸರು 'ದಿ ಆನ್ಸರ್ ರೈಟಿಂಗ್ ಮ್ಯಾನ್ಯುಯಲ್'. ಈ ಪುಸ್ತಕವು ದೇಶದ ವಿವಿಧ ರಾಜ್ಯಗಳ ಗ್ರಂಥಾಲಯಗಳಲ್ಲಿ ಉಚಿತವಾಗಿ ಲಭ್ಯವಿದೆ. ಇದು UPSC ಪರೀಕ್ಷೆಯ ಆಕಾಂಕ್ಷಿಗಳ ತಯಾರಿಗೆ ಸಹಾಯವಾಗಿದೆ.