UPSC Success Story: ಪ್ರೀತಿಸಿದ ಹುಡ್ಗಿಯ ಮೋಸದಿಂದ ನೊಂದ ಹುಡ್ಗ, ಮುಂದೆ IAS ಆಗಿ ಜೀವನದಲ್ಲಿ ಗೆದ್ದ!

ಈ ಕಥೆಯ ನಾಯಕ ಅಭಿಷೇಕ್ ಸಿಂಗ್, ಈಗ ಐಎಎಸ್ ಅಧಿಕಾರಿಯಾಗಿರುವ ಈತ ಒಂದು ಕಾಲದಲ್ಲಿ ಥೇಟ್ ದೇವದಾಸ್ ರೀತಿ ಇರುತ್ತಿದ್ದರಂತೆ. ಪ್ರಿತಿಸಿದವಳು ಮೋಸ ಮಾಡಿದಳೆಂದು ತನ್ನ ಜೀವನವನ್ನೇ ಕೊನೆಗಾಣಿಸಿಕೊಳ್ಳಲು ಯೋಚಿಸಿದ್ದ. ಆದರೆ ಜೀವನ ಆತನಿಗಾಗಿ ಬೇರೆಯದ್ದೇ ಪ್ಲಾನ್ ಮಾಡಿತ್ತು. ನೋವಿನಿಂದ ಧೈರ್ಯವಾಗಿ ಹೊರ ಬಂದ ಯುವಕ ದೊಡ್ಡ ಸಾಧನೆಯನ್ನೇ ಮಾಡಿದ್ದಾನೆ.

IAS ಅಭಿಷೇಕ್ ಸಿಂಗ್ ಅವರು ಉತ್ತರ ಪ್ರದೇಶದ ಜೌನ್ಪುರ್ ಜಿಲ್ಲೆಯಲ್ಲಿ 22 ಫೆಬ್ರವರಿ 1983 ರಂದು ಜನಿಸಿದರು. ಅಭಿಷೇಕ್ ದೆಹಲಿ ವಿಶ್ವವಿದ್ಯಾಲಯದಲ್ಲಿ ಬಿಕಾಂ ಓದಿದ್ದಾರೆ. ಅವರ ತಂದೆ ಐಪಿಎಸ್ ಅಧಿಕಾರಿಯಾಗಿದ್ದು, ಚಿಕ್ಕಪ್ಪ ಯುಪಿ ಪೊಲೀಸ್ ನಲ್ಲಿ ಡೆಪ್ಯುಟಿ ಎಸ್ಪಿ ಹುದ್ದೆಯಿಂದ ನಿವೃತ್ತರಾಗಿದ್ದಾರೆ.

ಅಭಿಷೇಕ್ ಅವರ ಕಿರಿಯ ಸಹೋದರಿ ದಂತವೈದ್ಯರಾಗಿದ್ದಾರೆ. ಸಹೋದರ MNC ನಲ್ಲಿ ಕೆಲಸ ಮಾಡುತ್ತಾರೆ. ಐಎಎಸ್ ಅಭಿಷೇಕ್ ಸಿಂಗ್ ಅವರ ಪತ್ನಿ ದುರ್ಗಾ ಶಕ್ತಿ ನಾಗ್ಪಾಲ್ ಕೂಡ ಐಎಎಸ್ ಅಧಿಕಾರಿಯಾಗಿದ್ದಾರೆ.

ಐಎಎಸ್ ಅಭಿಷೇಕ್ ಸಿಂಗ್ ಕಾಲೇಜು ದಿನಗಳಲ್ಲಿ ಒಬ್ಬರನ್ನು ಗಾಢವಾಗಿ ಪ್ರೀತಿಸುತ್ತಿದ್ದರು. ಆಕೆಯಿಂದ ಮೋಸ ಹೋದ ನಂತರ ಆತ್ಮಹತ್ಯೆ ಮಾಡಿಕೊಳ್ಳುವ ಯೋಚನೆಯೂ ಬಂದಿತ್ತು. ಹೇಗೋ ತನ್ನನ್ನು ತಾನು ನಿಭಾಯಿಸಿಕೊಂಡು UPSC ಪರೀಕ್ಷೆಗೆ ತಯಾರಿ ಆರಂಭಿಸಿದರು.

ಅಭಿಷೇಕ್ ಸಿಂಗ್ 2011ರಲ್ಲಿ ಯುಪಿಎಸ್ಸಿ ಪರೀಕ್ಷೆಯಲ್ಲಿ 94ನೇ ರ್ಯಾಂಕ್ ಗಳಿಸಿದ್ದರು. ಅವರಿಗೆ ಉತ್ತರ ಪ್ರದೇಶ ಕೇಡರ್ ಸಿಕ್ಕಿತು. ಜಂಟಿ ಮ್ಯಾಜಿಸ್ಟ್ರೇಟ್ ಆಗಿ ಕಾನ್ಪುರದಲ್ಲಿ (ಗ್ರಾಮೀಣ) ಅವರ ಮೊದಲ ಪೋಸ್ಟಿಂಗ್ ಆಗಿತ್ತು. ಪ್ರಸ್ತುತ, ಐಎಎಸ್ ಅಭಿಷೇಕ್ ಸಿಂಗ್ ದೆಹಲಿ ಸರ್ಕಾರದಲ್ಲಿ ಡೆಪ್ಯೂಟಿ ಕಮಿಷನರ್ ಆಗಿದ್ದಾರೆ.

ಅಭಿಷೇಕ್ ಅವರ ಪತ್ನಿ ದುರ್ಗಾ ಶಕ್ತಿ ನಾಗ್ಪಾಲ್ ಪ್ರಸ್ತುತ ಭಾರತ ಸರ್ಕಾರದ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವಾಲಯದ ವಾಣಿಜ್ಯ ಇಲಾಖೆಯಲ್ಲಿದೆ. ಅವರು ಕೂಡ ಅಭಿಷೇಕ್ ಸಿಂಗ್ ಅವರಂತೆ ಅತ್ಯಂತ ಜನಪ್ರಿಯ ವ್ಯಕ್ತಿತ್ವ.

ಐಎಎಸ್ ಆದ ನಂತರವೂ ಅಭಿಷೇಕ್ ಸಿಂಗ್ ಅವರ ಆಸಕ್ತಿ ನಟನೆ ಮತ್ತು ಸಂಗೀತದಲ್ಲಿಯೇ ಇತ್ತು. ಲ್ಯಾಕ್ಮೆ ಫ್ಯಾಶನ್ ವೀಕ್ನಲ್ಲಿ ರ್ಯಾಂಪ್ ವಾಕ್ ಮಾಡುವ ಮೂಲಕ ಗ್ಲ್ಯಾಮರ್ ಜಗತ್ತಿಗೆ ತಮ್ಮನ್ನು ತಾವು ತೆರೆದುಕೊಂಡರು.

ಅಭಿಷೇಕ್ ಅವರು ಸಾಮಾಜಿಕ ಜಾಲತಾಣ Instagramನಲ್ಲಿ 3 ಮಿಲಿಯನ್ ಫಾಲೋವರ್ಸ್ ಅನ್ನು ಹೊಂದಿದ್ದಾರೆ. ಬಿ ಪ್ರಾಕ್ ಜೊತೆ ‘ದಿಲ್ ತೋಡ್ ಕೆ’ ಹಾಡಿನಲ್ಲಿ ಕಾಣಿಸಿಕೊಂಡಿದ್ದಾರೆ. ಇದಲ್ಲದೆ, ಅವರು ಜುಬಿನ್ ನೌಟಿಯಾಲ್ ಅವರ ‘ತುಜೆ ಭೂಲ್ನಾ ತೋ ಚಾಹಾ...' ಹಾಡಿನಲ್ಲೂ ಕೆಲಸ ಮಾಡಿದ್ದಾರೆ. ನೆಟ್ ಫ್ಲಿಕ್ಸ್ ಸರಣಿಯ ದೆಹಲಿ ಕ್ರೈಮ್ ನ ಸೀಸನ್ 2 ನಲ್ಲಿಯೂ ಅವರು ಕಾಣಿಸಿಕೊಂಡಿದ್ದಾರೆ.