UPSC Success Story: ಯುಪಿಎಸ್​ಸಿ ಪರೀಕ್ಷೆ ಮೊದಲ ಪ್ರಯತ್ನದಲ್ಲೇ 2ನೇ Rank ಪಡೆದ ಪ್ರತಿಭಾವಂತ ಈತ

ಐಎಎಸ್ ಅಥರ್ ಅಮೀರ್ ಖಾನ್ ದೇಶದ Young and Intelligent ಐಎಎಸ್ ಅಧಿಕಾರಿಗಳಲ್ಲಿ ಒಬ್ಬರು. ಜಮ್ಮು-ಕಾಶ್ಮೀರದ ನಿವಾಸಿಯಾದ ಅಥರ್ ಅವರು 2015 ರಲ್ಲಿ ಯುಪಿಎಸ್ ಸಿ ಪರೀಕ್ಷೆಯಲ್ಲಿ 2ನೇ ರ್ಯಾಂಕ್ ಪಡೆಯುವ ಮೂಲಕ ಟಾಪರ್ ಎನಿಸಿಕೊಂಡರು.

ಇವರ ಕುಟುಂಬದಲ್ಲೇ ಐಎಎಸ್ ಅಧಿಕಾರಿಯಾದ ಮೊದಲಿಗ ಇವರು. ಅಥರ್ ಅಮೀರ್ ಖಾನ್ ಕೇವಲ 23ನೇ ವಯಸ್ಸಿನಲ್ಲೇ ಅತ್ಯಂತ ಕಠಿಣವಾದ ಪರೀಕ್ಷೆಯಲ್ಲಿ ಉತೀರ್ಣರಾಗಿದ್ದಾರೆ. ಈಗ ಅಥರ್ ಅವರಿಗೆ 29 ವರ್ಷ.

ಅನಂತನಾಗ್ ಜಿಲ್ಲೆಯ ದೇವಿಪುರ-ಮಟ್ಟನ್ ಗ್ರಾಮದ ನಿವಾಸಿ ಇವರು. ಇವರ ತಂದೆ ಮೊಹಮ್ಮದ್ ಶಫಿ ಖಾನ್ ಶಿಕ್ಷಕರಾಗಿದ್ದರು. ಅಥರ್ ಅಮೀರ್ ಖಾನ್ ತಮ್ಮ ಶಾಲಾ ಶಿಕ್ಷಣವನ್ನು ಅನಂತನಾಗ್, ಶ್ರೀನಗರದ ಶಾಲೆಗಳಲ್ಲಿ ಪೂರೈಸಿದ್ದಾರೆ.

ಐಎಎಸ್ ಅಥರ್ ಅಮೀರ್ ಖಾನ್ 12ನೇ ತರಗತಿಯ ನಂತರ ಐಐಟಿಗೆ ಪ್ರವೇಶ ಪಡೆದರು. ಹಿಮಾಚಲ ಪ್ರದೇಶದ ಐಐಟಿ ಮಂಡಿಯಿಂದ ಎಲೆಕ್ಟ್ರಿಕಲ್ ಎಂಜಿನಿಯರಿಂಗ್ ನಲ್ಲಿ ಬಿ.ಟೆಕ್ ಪದವಿ ಪಡೆದಿದ್ದಾರೆ. ಎಂಜಿನಿಯರಿಂಗ್ ನಂತರ, ಅವರು ನಾಗರಿಕ ಸೇವೆಗೆ ಸೇರಲು ನಿರ್ಧರಿಸಿದ್ದರು. ಇದಕ್ಕಾಗಿ ಅವರು 2009 ರಲ್ಲಿ UPSC ಟಾಪರ್ ಆಗಿದ್ದ ಶಾ ಫೈಸಲ್ ಅವರಿಂದ ಸಲಹೆ ಪಡೆದಿದ್ದರು.

ಐಎಎಸ್ ಅಥರ್ ಅಮೀರ್ ಖಾನ್ ಅವರಿಗೆ ಭಾರತೀಯ ರೈಲ್ವೆ ಸಂಚಾರ ಸೇವೆಯಿಂದ ಕೆಲಸ ನೀಡಲಾಯಿತು. ಆದರೆ ಅವರು ಐಎಎಸ್ ಆಗಬೇಕೆಂದು ನಿರ್ಧರಿಸಿದ್ದರು, ಅದಕ್ಕಾಗಿ ತಯಾರಿ ನಡೆಸುತ್ತಿದ್ದರು. UPSC ಪರೀಕ್ಷೆಯ ಮೊದಲ ಪ್ರಯತ್ನದಲ್ಲಿಯೇ ಎರಡನೇ ರ್ಯಾಂಕ್ ಪಡೆಯುವ ಮೂಲಕ ಐಎಎಸ್ ಅಧಿಕಾರಿಯಾದರು. ಐಎಎಸ್ ತರಬೇತಿ ಮುಗಿದ ನಂತರ ರಾಜಸ್ಥಾನ ಕೇಡರ್ ನಲ್ಲಿ ಪೋಸ್ಟಿಂಗ್ ಸಿಕ್ಕಿತು.

IAS ಅಥರ್ ಅಮೀರ್ ಖಾನ್ ತಮ್ಮ ಯಶಸ್ಸಿನ ತಂತ್ರಗಳನ್ನು ಹಲವು ಬಾರಿ ಹಂಚಿಕೊಂಡಿದ್ದಾರೆ. UPSC ಪರೀಕ್ಷೆಯ ತಯಾರಿಯ ಸಮಯದಲ್ಲಿ, ಅವರು ಪ್ರತಿದಿನ ಕನಿಷ್ಠ ಎರಡು ಪತ್ರಿಕೆಗಳನ್ನು ಓದುತ್ತಿದ್ದರು, ಟಿಪ್ಪಣಿಗಳನ್ನು ಮಾಡುತ್ತಿದ್ದರಂತೆ.

ಐಎಎಸ್ ಅಥರ್ ಅಮೀರ್ ಖಾನ್ ಅವರು ತಮ್ಮ ವೈಯಕ್ತಿಕ ವಿಷಯಗಳಿಂದಲೂ ಸಾಕಷ್ಟು ಚರ್ಚೆಯಲ್ಲಿದ್ದರು. 2018 ರಲ್ಲಿ ಐಎಎಸ್ ಟೀನಾ ದಾಬಿ ಅವರನ್ನು ವಿವಾಹವಾಗಿದ್ದರು. ಇವರು ಮೊದಲ ರ್ಯಾಂಕ್ ಪಡೆದಿದ್ದರು. ಮೊದಲು ಮತ್ತು 2ನೇ ರ್ಯಾಂಕ್ ಪಡೆದವರು ಮದುವೆಯಾಗಿದ್ದು ದೊಡ್ಡ ಸುದ್ದಿಯಾಗಿತ್ತು. ಆದರೆ 2021 ರಲ್ಲಿ, ಇಬ್ಬರೂ ಪರಸ್ಪರ ಒಪ್ಪಿಗೆಯೊಂದಿಗೆ ಡಿವೋರ್ಸ್ ಪಡೆದರು.

ಇತ್ತೀಚೆಗೆ, ಅಥರ್ ಅವರು ನವದೆಹಲಿಯ ರಾಜೀವ್ ಗಾಂಧಿ ಕ್ಯಾನ್ಸರ್ ಇನ್ಸ್ಟಿಟ್ಯೂಟ್ ಮತ್ತು ಸಂಶೋಧನಾ ಕೇಂದ್ರದಲ್ಲಿ ಕೆಲಸ ಮಾಡುತ್ತಿರುವ ಮೆಹ್ರೀನ್ ಖಾಜಿ ಅವರನ್ನು 2ನೇ ಮದುವೆಯಾಗಿದ್ದಾರೆ.