UPSC Success Story: 8 ತಿಂಗಳ ತುಂಬು ಗರ್ಭಿಣಿಯಾಗಿದ್ದಾಗ ಯುಪಿಎಸ್​​ಸಿ ಸಂದರ್ಶನ ನೀಡಿ ಯಶಸ್ವಿಯಾದ ಬುಶ್ರಾ

ಡಾ. ಬುಶ್ರಾ ಬಾನೋ ಅವರು ತಮ್ಮ ಶೈಕ್ಷಣಿಕ ಜೀವನದಲ್ಲಿ ಸದಾ ಟಾಪರ್ ಆಗಿದ್ದರು. ಗಣಿತದಲ್ಲಿ ಬಿಎಸ್ಸಿ ಪದವಿ ಪಡೆದ ನಂತರ, 20 ನೇ ವಯಸ್ಸಿಗೆ ಬುಶ್ರಾ ಎಂಬಿಎ ಮುಗಿಸಿದರು. ನಂತರ ಅವರು ಅಲಿಘರ್ ಮುಸ್ಲಿಂ ವಿಶ್ವವಿದ್ಯಾಲಯದಿಂದ ಮ್ಯಾನೇಜ್ ಮೆಂಟ್ ನಲ್ಲಿ ಪಿಎಚ್ಡಿ ಗಾಗಿ ಅರ್ಜಿ ಸಲ್ಲಿಸಿದರು. ಮರುವರ್ಷವೇ ಅವರು ಜೆಆರ್ ಎಫ್ ಗೆ ಅರ್ಹತೆ ಪಡೆದರು. ಅವರು ತಮ್ಮ ಪಿಎಚ್ಡಿ ಯನ್ನು ಕೇವಲ 2 ವರ್ಷಗಳಲ್ಲೇ ಪೂರ್ಣಗೊಳಿಸಿದರು.

ನಂತರ ಬುಶ್ರಾ ಬಾನೋ ಅವರು ಸೌದಿ ಅರೇಬಿಯಾದ ವಿಶ್ವವಿದ್ಯಾಲಯದಲ್ಲಿ ಬೋಧಿಸುತ್ತಿದ್ದ ಅಸ್ಮರ್ ಹುಸೇನ್ ಅವರನ್ನು ವಿವಾಹವಾದರು. ಮದುವೆಯ ನಂತರ ಬುಶ್ರಾ ಕೂಡ ಸೌದಿ ಅರೇಬಿಯಾಕ್ಕೆ ಹೋಗಿ ಸಹಾಯಕ ಪ್ರಾಧ್ಯಾಪಕರಾಗಿ ಕಲಿಸಲು ಪ್ರಾರಂಭಿಸಿದರು.

ಅಲ್ಲಿ 2 ವರ್ಷಗಳನ್ನು ಕಳೆದ ನಂತರ ತನ್ನ ದೇಶಕ್ಕೆ ಮರಳಿ ಏನಾದರೂ ಮಾಡಬೇಕೆಂದು ಬಯಸಿದ್ದರು. ಈ ಬಗ್ಗೆ ಪತಿಯೊಂದಿಗೆ ಸಮಾಲೋಚಿಸಿದ ನಂತರ ಭಾರತಕ್ಕೆ ಮರಳಿದರು. ಅಷ್ಟೊತ್ತಿಗಾಗಲೇ ಅವರು ಮಗುವಿನ ತಾಯಿಯಾಗಿದ್ದರು.

ಭಾರತಕ್ಕೆ ಬಂದ ನಂತರ, ಅವರು AMU ನಲ್ಲಿ ಪೋಸ್ಟ್ ಡಾಕ್ಟರೇಟ್ ಕಾರ್ಯಕ್ರಮಕ್ಕೆ ಅರ್ಜಿ ಸಲ್ಲಿಸಿದ್ದರು. ಇದರೊಂದಿಗೆ ಸರ್ಕಾರಿ ಉದ್ಯೋಗಕ್ಕಾಗಿ ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ತಯಾರಿ ನಡೆಸುತ್ತಿದ್ದರು. ಕುಟುಂಬ ಮತ್ತು ಮಗುವಿನ ಜವಾಬ್ದಾರಿಯೊಂದಿಗೆ, ಅವರು 10 ಗಂಟೆಗಳ ಕಾಲ ಓದುತ್ತಿದ್ದರು. 2017ರಲ್ಲಿ ಯುಪಿಎಸ್ಸಿ ಪರೀಕ್ಷೆಯಲ್ಲಿ ಅನುತ್ತೀರ್ಣರಾದ ನಂತರವೂ ಛಲ ಬಿಡಲಿಲ್ಲ.

ಅಂತಿಮವಾಗಿ 2018ರಲ್ಲಿ 277ನೇ ರ್ಯಾಂಕ್ ಗಳಿಸಿದ್ದರು. ನಂತರ ಅವರಿಗೆ ಐಆರ್ ಟಿಎಸ್ ನಲ್ಲಿ ಕೆಲಸ ನೀಡಲಾಗಿತು. ಆದರೆ ಅವರು ಮತ್ತೆ ಯುಪಿಎಸ್ ಸಿ ಪರೀಕ್ಷೆಗೆ ಹಾಜರಾದರು. ಈ ಪ್ರಯತ್ನದಲ್ಲಿ 234ನೇ ರ್ಯಾಂಕ್ ಪಡೆದು ಐಪಿಎಸ್ ಅಧಿಕಾರಿಯಾದರು.

ಡಾ. ಬುಶ್ರಾ ಬಾನೋ ಪ್ರಸ್ತುತ ತುಂಡ್ಲಾದಲ್ಲಿ ಎಸ್ ಡಿಎಂ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಹೋಮ್ ಕೇಡರ್ ಸಿಗುವವರೆಗೂ ಐಪಿಎಸ್ ಕೆಲಸಕ್ಕೆ ಸೇರುವುದಿಲ್ಲ ಎಂದು ನಿರ್ಧರಿಸಿದ್ದಾರೆ. UPSC ಸಂದರ್ಶನದ ವೇಳೆ ಬುಶ್ರಾ 8 ತಿಂಗಳ ಗರ್ಭಿಣಿಯಾಗಿದ್ದರು.

ಈಗ ಬುಶ್ರಾ ಅವರಿಗೆ ಇಬ್ಬರು ಮಕ್ಕಳಿದ್ದು, ಸರ್ಕಾರಿ ಕೆಲಸ ನಿರ್ವಹಿಸುತ್ತಿದ್ದಾರೆ. ಪತಿ ಸೌದಿ ಅರೇಬಿಯಾದಲ್ಲಿ ಕೆಲಸ ಬಿಟ್ಟು ಭಾರತಕ್ಕೆ ಬಂದಿದ್ದು, ಆಕೆಯೊಂದಿಗೆ ವಾಸವಾಗಿದ್ದಾರೆ.