Success Story: 10ನೇ ಕ್ಲಾಸ್ ಫೇಲ್ ಆಗಿದ್ದ ಹಳ್ಳಿ ಹುಡ್ಗ 3 ಸಲ UPSC ಪರೀಕ್ಷೆಯಲ್ಲಿ ಪಾಸ್ ಆಗಿದ್ದೇ ಒಂದು ಪವಾಡ!

ಯುಪಿಎಸ್ ಸಿ ಸಾಧಕರ ಸರಣಿಯ ಇಂದಿನ ನಮ್ಮ ಅತಿಥಿ ಐಆರ್ ಎಸ್ ಅಧಿಕಾರಿ ದೇವ್ ಪ್ರಕಾಶ್ ಮೀನಾ ಕೂಡ ಜೀವನದಲ್ಲಿ ಸೋತು ಗೆದ್ದವರು. ಅವರ ಯಶಸ್ಸಿನ ಹಾದಿ ಅನೇಕ ಆ್ಯವರೇಜ್ ವಿದ್ಯಾರ್ಥಿಗಳಿಗೆ ನಿಜಕ್ಕೂ ಸ್ಪೂರ್ತಿ.

2008ರ ಬ್ಯಾಚ್ ಐಆರ್ ಎಸ್ ಅಧಿಕಾರಿಯಾಗಿರುವ ದೇವ್ ಪ್ರಕಾಶ್ ಮೀನಾ 10ನೇ ತರಗತಿಯಲ್ಲಿ ಒಮ್ಮೆ ಫೇಲ್ ಆಗಿದ್ದರು. ನಂತರ ಶೇ.43ರಷ್ಟು ಅಂಕಗಳ ಮೂಲಕ ಪಾಸ್ ಆದರು. ಸೆಕೆಂಡ್ ಪಿಯುನಲ್ಲಿ ಶೇ.56ರಷ್ಟು ಅಂಕಗಳು ಹಾಗೂ ಬಿಎ ಪದವಿಯಲ್ಲಿ ಶೇ.48ರಷ್ಟು ಮಾತ್ರ ಅಂಕಗಳನ್ನು ಗಳಿಸುವ ಮೂಲಕ ಸಾಮಾನ್ಯ ವಿದ್ಯಾರ್ಥಿ ಎನಿಸಿಕೊಂಡರು.

ಆದರೆ 10ನೇ, 12ನೇ, ಪದವಿ ಅಥವಾ ಯಾವುದೇ ತರಗತಿಯಲ್ಲಿನ ಅಂಕಗಳು ಒಬ್ಬರ ಭವಿಷ್ಯವನ್ನು ನಿರ್ಧರಿಸುವುದಿಲ್ಲ. IRS ಅಧಿಕಾರಿ ದೇವ್ ಪ್ರಕಾಶ್ ಮೀನಾ ಅವರು ತಮ್ಮ ಕಠಿಣ ಪರಿಶ್ರಮದ ಮೂಲಕ ಅದನ್ನು ಸಾಧಿಸಿ ತೋರಿಸಿದ್ದಾರೆ.

ಅವರು ಜುಲೈ 1, 1978 ರಂದು ರಾಜಸ್ಥಾನದ ದೌಸಾ ಜಿಲ್ಲೆಯ ಮಾಹ್ವಾ ತಹಸಿಲ್ ನ ಬಿರ್ಸಾನಾ ಗ್ರಾಮದಲ್ಲಿ ಜನಿಸಿದರು. ದೇವ್ ಪ್ರಕಾಶ್ ಅವರಿಗೆ ಗ್ರಾಮೀಣ ಪ್ರದೇಶದಲ್ಲಿ ಶಿಕ್ಷಣ ಪಡೆಯಲು ಸಾಕಷ್ಟು ತೊಂದರೆಗಳಿದ್ದವು. ತರಗತಿಗಳಿಗೆ ಹಾಜರಾಗಲು ರಸೀದ್ ಪುರ ಗ್ರಾಮಕ್ಕೆ ಮೈಲುಗಟ್ಟಲೆ ನಡೆದು ಹೋಗುತ್ತಿದ್ದರು. ವ್ಯಾಸಂಗದ ಜೊತೆಗೆ ಮನೆಕೆಲಸದ ಜವಾಬ್ದಾರಿಯನ್ನೂ ನಿಭಾಯಿಸುತ್ತಿದ್ದರು.

ರಾಜಸ್ಥಾನ ವಿಶ್ವವಿದ್ಯಾಲಯದಿಂದ ಇಂಗ್ಲಿಷ್ ಸಾಹಿತ್ಯದೊಂದಿಗೆ ಬಿಎ ಪೂರ್ಣಗೊಳಿಸಿದರು. ಅಲ್ಲಿ ತಂಗಿದ್ದಾಗಲೇ ಅವರಿಗೆ ಯುಪಿಎಸ್ ಸಿ ಸಿವಿಲ್ ಸರ್ವಿಸಸ್ ಬಗ್ಗೆ ತಿಳಿಯಿತು. ನಂತರ UPSC ಯ ನಾಗರಿಕ ಸೇವೆಗಳ ಪರೀಕ್ಷೆಗೆ ತಯಾರಿ ಆರಂಭಿಸಿದರು.

ಈ ಪರೀಕ್ಷೆಯಲ್ಲಿ ಅವರು ಒಂದಲ್ಲ ಎರಡಲ್ಲ 3 ಬಾರಿ ಪಾಸ್ ಆಗಿದ್ದಾರೆ. ಅಂತಿಮವಾಗಿ ಅವರು 2008ರ ಬ್ಯಾಚ್ ನ IRS ಅಧಿಕಾರಿಯಾದರು. ಪ್ರಸ್ತುತ ಕಾಂಡ್ಲಾದಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ.

10ನೇ ಕ್ಲಾಸ್ ಫೇಲ್ ಆಗಿದ್ದ ಹಳ್ಳಿ ಹುಡ್ಗ 3 ಸಲ ಯುಪಿಎಸ್ ಸಿ ಪರೀಕ್ಷೆಯಲ್ಲಿ ಪಾಸ್ ಆಗಿದ್ದು ನಿಜಕ್ಕೂ ಪವಾಡವೇ ಸರಿ. ಶೈಕ್ಷಣಿಕವಾಗಿ ಕಡಿಮೆ ಅಂಕಗಳನ್ನು ಪಡೆದವರು ಸಹ ಜೀವನದಲ್ಲಿ ಉತ್ತಮ ಸಾಧನೆ ಮಾಡಬಹುದು ಎಂದು ದೇವ್ ಪ್ರಕಾಶ್ ಅವರು ತೋರಿಸಿಕೊಟ್ಟಿದ್ದಾರೆ.