Interview Tips-1: ನಿಮ್ಮ ವೀಕ್ನೆಸ್ ಏನು ಎಂದು ಕೇಳಿದ್ರೆ, ಸಂದರ್ಶನದಲ್ಲಿ ಹೀಗೆ ಉತ್ತರಿಸೋದು ಸೂಕ್ತ

ನಿಮ್ಮ ವೀಕ್ನೆಸ್ ಏನು? ಅಥವಾ ಉದ್ಯೋಗಿಯಾಗಿ ನಿಮ್ಮಲ್ಲಿರುವ ಒಂದು ಮೈನಸ್ ಪಾಯಿಂಟ್ ಹೇಳಿ? ಎಂದು ಸಂದರ್ಶಕರು ಕೇಳುತ್ತಾರೆ. ನೀವೇ ನಿಮ್ಮನ್ನು ಯಾವ ದೃಷ್ಟಿಯಿಂದ ನೋಡುತ್ತೀರಿ ಎಂದು ತಿಳಿಯುವುದು ಈ ಪ್ರಶ್ನೆಯ ಹಿಂದಿನ ಉದ್ದೇಶವಾಗಿರುತ್ತದೆ.

ಉದ್ಯೋಗಿಯೊಬ್ಬನ ಪ್ರಕಾರ ಯಾವ ವಿಷಯ ಮೈನಸ್ ಅಥವಾ ನೆಗೆಟಿವ್ ಪಾಯಿಂಟ್ ಆಗಬಹುದು. ಅದನ್ನು ನೀವು ಎಷ್ಟು ಯಶಸ್ವಿಯಾಗಿ ನಿಭಾಯಿಸಿದ್ರಿ ಎಂದು ತಿಳಿಯಲು ಸಂದರ್ಶನಕರು ಈ ಪ್ರಶ್ನೆಯನ್ನು ಕೇಳುತ್ತಾರೆ ಎಂಬುವುದನ್ನು ಮರೆಯದಿರಿ.

ನಾನು ಬೆಸ್ಟ್, ನನ್ನಲ್ಲಿ ಯಾವುದೇ ವೀಕ್ನೆಸ್ ಪಾಯಿಂಟ್ ಇಲ್ಲ ಎಂದು ಉತ್ತರಿಸಬೇಡಿ. ನಾನು ಎಮೋಷನಲ್, ಯಾರದರೂ ಬೈದರೆ, ಜೋರಾಗಿ ಮಾತನಾಡಿದ್ರೆ ಅಳು ಬರುತ್ತದೆ ಎಂದೆಲ್ಲಾ ಉತ್ತರಿಸುವುದು ಕೂಡ ಸೂಕ್ತವಲ್ಲ. ನಾನು ಪರ್ಫೆಕ್ಷನಿಸ್ಟ್, ಎಲ್ಲವೂ ಕಟ್ಟುನಿಟ್ಟಾಗಿ ಸರಿಯಾಗಿ ಇರಬೇಕು ಎಂದು ಕೆಲಸ ಮಾಡುತ್ತೇನೆ. ಇದರಿಂದ ಒತ್ತಡ ಎದುರಿಸುತ್ತೇನೆ ಎಂದು ಉತ್ತರಿಸುವುದು ಕೂಡ ಒಳ್ಳೆಯ ಉತ್ತರ ಅಲ್ಲ.

ಹಾಗಾದರೆ ಸರಿಯಾಗಿ ಉತ್ತರಿಸುವುದು ಹೇಗೆ. ಮೊದಲಿಗೆ ನನ್ನಲ್ಲಿ ಯಾವುದೇ ವೀಕ್ನೆಸ್ ಅಥವಾ ಮೈನಸ್ ಪಾಯಿಂಟ್ ಇಲ್ಲ ಎಂದು ಹೇಳಬೇಡಿ. ಸಂದರ್ಶಕರು ಆ ಉತ್ತರದಿಂದ ಸಂತುಷ್ಟರಾಗುವುದಿಲ್ಲ. ನಿಮ್ಮಲ್ಲಿನ ಯಾವುದಾದರೂ ಒಂದು ಅಂಶವನ್ನು ಹೇಳಿ, ಜೊತೆಗೆ ಅದರಿಂದ ನೀವೇ ಹೇಗೆ ಹೊರ ಬಂದ್ರಿ ಎಂದು ಹೇಳಬೇಕು ಎಂದು ಸಂದರ್ಶಕರು ನಿರೀಕ್ಷಿಸುತ್ತಾರೆ.

ಉದಾಹರಣೆಗೆ ಈ ರೀತಿ ಉತ್ತರಿಸುವುದು ಸೂಕ್ತ. ವೃತ್ತಿಯ ಆರಂಭದಲ್ಲಿ ಡೆಡ್ ಲೈನ್ ಒಳಗೆ ಕೆಲಸ ಮಾಡುವುದು ನನಗೆ ಒತ್ತಡ ಎನಿಸುತ್ತಿತ್ತು. ಆದರೆ ಈಗ ನನ್ನನ್ನು ನಾನು ಈ ನಿಟ್ಟಿನಲ್ಲಿ ಸಾಕಷ್ಟು ಸುಧಾರಿಸಿಕೊಂಡಿದ್ದೇನೆ. ಕೊಟ್ಟ ಟಾಸ್ಕ್ ನಲ್ಲಿ ಯಾವುದು ಹೆಚ್ಚು ಮುಖ್ಉ, ಯಾವುದನ್ನು ಮೊದಲ ಮಾಡಬೇಕು ಎಂದು ಅರಿತಿದ್ದೇನೆ ಎಂದು ಉತ್ತರಿಸಿ.

2ನೇ ಒಳ್ಳೆಯ ಉತ್ತರವೆಂದರೆ, ಮೊದಮೊದಲು ನನ್ನ ಕೆಲಸವನ್ನು ವಿಮರ್ಶೆ ಮಾಡಿದರೆ ಹತಾಷೆಯಾಗುತ್ತಿತ್ತು. ಆದರೆ ಈಗ ಟೀಕೆಗಳನ್ನು ನನ್ನ ವೃತ್ತಿ ಬೆಳವಣಿಗೆಗೆ ಪೂರಕವಾಗಿ ಬಳಸಿಕೊಳ್ಳುವುದನ್ನು ಕಲಿತಿದ್ದೇನೆ. ಯಾವ ಟೀಕೆಯನ್ನು ಎಷ್ಟು ಗಂಭೀರವಾಗಿ ಪರಿಗಣಿಸಬೇಕು ಎಂದು ಅರಿವು ಬಂದಿದೆ ಎಂದು ಉತ್ತರಿಸಿ.

ಮೇಲೆ ಹೇಳಿದಂತೆ ಉದ್ಯೋಗಿಯಾಗಿ ನಿಮ್ಮಲ್ಲಿನ ಮೈನಸ್ ಪಾಯಿಂಟ್ ಅನ್ನು ಹೇಳುವ ಜೊತೆಗೆ ಈಗ ನೀವು ಅದನ್ನು ಸುಧಾರಿಸಿಕೊಂಡಿದ್ದೀರಿ ಎಂದು ಹೇಳುವುದು ಸ್ಮಾರ್ಟ್ ವಿಧಾನವಾಗಿದೆ.

ನಿಮ್ಮ ಉತ್ತರದಲ್ಲಿ ಪ್ರಾಮಾಣಿಕತೆ ಇದ್ದರೆ, ವಾಸ್ತವಕ್ಕೆ ಹತ್ತಿರವಾಗಿದ್ದರೆ, ಸಂದರ್ಶಕರು ನಿಜಕ್ಕೂ ಇಂಪ್ರೆಸ್ ಆಗುತ್ತಾರೆ. ಆಗ ನಿಮಗೆ ಕೆಲಸ ಸಿಗುವ ಸಾಧ್ಯತೆಗಳು ಹೆಚ್ಚಾಗುತ್ತದೆ. ಸಾಂಕೇತಿಕ ಚಿತ್ರ