Interview Tips-16: ನಿಮ್ಮ ಪ್ರಕಾರ ಆಫೀಸ್ ವಾತಾವರಣ ಹೇಗಿರಬೇಕು? ಈ ಇಂಟರ್​ವ್ಯೂ ಪ್ರಶ್ನೆಗೆ ಉತ್ತರ ಹೀಗಿರಲಿ

ಅಂತಹ ಟ್ರಿಕ್ಕಿ ಪ್ರಶ್ನೆ ಹಾಗೂ ಅದಕ್ಕೆ ಸರಿಯಾಗಿ ಉತ್ತರಿಸುವುದು ಹೇಗೆ ಎಂಬ ವಿವರದೊಂದಿಗೆ ನಾವು ಬಂದಿದ್ದೇವೆ. ಇತ್ತೀಚಿನ ದಿನಗಳಲ್ಲಿ ಬಹುತೇಕ ಜಾಬ್ ಇಂಟರ್ ವ್ಯೂಗಳಲ್ಲಿ ಹೇಳುವ ಪ್ರಶ್ನೆ, ನೀವು ಯಾವ ರೀತಿಯ ಆಫೀಸ್ ವಾತಾವರಣವನ್ನು ಬಯಸುತ್ತೀರಿ? ನಿಮ್ಮ ಪ್ರಕಾರ ಯಾವ ರೀತಿ ಇದ್ದರೆ ಬೆಸ್ಟ್? (ಪ್ರಾತಿನಿಧಿಕ ಚಿತ್ರ)

ಹೌದು, ಈ ಪ್ರಶ್ನೆ ನಿಜಕ್ಕೂ ಟ್ರಿಕ್ಕಿ ಎನಿಸುತ್ತೆ. ಈ ಪ್ರಶ್ನೆ ಮೂಲಕ ಅಭ್ಯರ್ಥಿ ಎಂತಹ ಆಫೀಸ್ ವಾತಾವರಣವನ್ನು ಬಯಸುತ್ತಿದ್ದಾರೆ. ನಮ್ಮ ಕಚೇರಿಯಲ್ಲಿ ಯಾವ ರೀತಿ ಇರಲಿದ್ದಾರೆ. ಟೀಂ ಸದಸ್ಯರಾಗಿ ಹೇಗೆ ಕಾರ್ಯ ನಿರ್ವಹಿಸಲಿದ್ದಾರೆ. ಅಭ್ಯರ್ಥಿ ಟೀ ಪ್ಲೇಯರ್ ಹೌದೋ, ಅಲ್ಲವೋ ಎಂಬುದನ್ನು ತಿಳಿಯಲು ಈ ಪ್ರಶ್ನೆಯನ್ನು ಕೇಳಲಾಗುತ್ತೆ.

ಪ್ರಶ್ನೆಯನ್ನು ಪೂರ್ತಿಯಾಗಿ ಕೇಳಿಸಿಕೊಂಡು, ಜಾಣತನದಿಂದ ಉತ್ತರ ನೀಡಿದರೆ ಸಂದರ್ಶಕರು ನಿಮ್ಮಿಂದ ಇಂಪ್ರೆಸ್ ಆಗುತ್ತಾರೆ. ಯದ್ವಾ-ತದ್ವಾ ಉತ್ತರ ಇಲ್ಲವೇ ಕಾಟಾಚಾರಕ್ಕೆ ಉತ್ತರ ನೀಡಿದರೆ ನಿಮಗೆ ಕೆಲಸ ಸಿಗುವ ಅವಕಾಶ ಕುಂಠಿತವಾಗುತ್ತೆ ಅಂತಲೇ ಹೇಳಬಹುದು.

ಹಾಗಾದರೆ ಸರಿಯಾಗಿ ಉತ್ತರ ನೀಡುವುದು ಹೇಗೆ? ಉದಾಹರಣೆಗೆ ಈ ರೀತಿ ಉತ್ತರಿಸಬಹುದು. ಉದ್ಯೋಗಿಯಾಗಿ ಮೇಲಧಿಕಾರಿಗಳ ಸೂಚನೆಗಳನ್ನು ಪಾಲಿಸುತ್ತೇನೆ, ಆ ಬಗ್ಗೆ ನನಗೆ ಯಾವುದೇ ತೊಂದರೆ ಇಲ್ಲ. ಆದರೆ ನಾನು ಕೆಲಸ ಮಾಡುವಾಗ ಅತಿಯಾದ ಮೇಲ್ವಿಚಾರಣೆಯನ್ನು ಇಷ್ಟಪಡುವುದಿಲ್ಲ. ಮೈಕ್ರೋ ಮ್ಯಾನೇಜಿಂಗ್ ಇಷ್ಟವಾಗುವುದಿಲ್ಲ. ನಂಬಿಕೆ ಇಟ್ಟು ಕೆಲಸಗಳನ್ನು ಕೊಡಬೇಕು ಎಂದು ಹೇಳಿ.

ತಂಡದ ಭಾಗವಾಗಿ ಕೆಲಸ ಮಾಡಲು ಇಷ್ಟಪಡುತ್ತೇನೆ. ಇದರಿಂದ ಕೆಲಸದ ಗುಣಮಟ್ಟವೂ ಹೆಚ್ಚಾಗುತ್ತದೆ, ಕೆಲಸದ ಒತ್ತಡವೂ ಕಡಿಮೆ ಆಗುತ್ತದೆ. ಸಹೋದ್ಯೋಗಿಗಳಿಂದ ಹೊಸತನ್ನು ಕಲಿಯಬಹುದು ಎಂದು ಸಹ ಉತ್ತರಿಸಬಹುದು.

ತಂಡದಲ್ಲಿರುವ ಇತರೆ ಸದಸ್ಯರ ಅಭಿಪ್ರಾಯಗಳಿಗೆ ಬೆಲೆ ಕೊಡುತ್ತೇವೆ. ಜೊತೆಗೆ ನನ್ನ ಅಭಿಪ್ರಾಯಕ್ಕೂ ಬೆಲೆ ಇರಬೇಕು ಎಂದು ಬಯಸುತ್ತೇನೆ ಎನ್ನಬಹುದು. ಆ ಮೂಲಕ ನೀವೊಬ್ಬರು ಟೀಂ ಪ್ಲೇಯರ್ ಎಂಬುದನ್ನು ಮನವರಿಕೆ ಮಾಡಿಕೊಟ್ಟಂತೆ ಆಗುತ್ತೆ.

ಆಫೀಸ್ ನಲ್ಲಿ ಒಳ್ಳೆಯ ಟೀ, ಲಂಚ್ ವ್ಯವಸ್ಥೆ ಇರಬೇಕು. ಲೈಟ್-ಚೇರು ಆರಾಮಾದಾಯಕವಾಗಿರಬೇಕು. ಎಸಿ ಕಡಿಮೆ ಇರಬೇಕು ಅಂತೆಲ್ಲಾ ಉತ್ತರಿಸಬೇಡಿ. ಇದು ನಿಜಕ್ಕೂ ಕ್ಷಲ್ಲಕವೆನಿಸುತ್ತೆ, ಎಚ್ಚರ.