Success Story: ಉದ್ಯೋಗ ಮಾಡ್ತೀನಿ ಅಂದಿದ್ದಕ್ಕೆ ಮನೆಯಿಂದ ಹೊರ ಹಾಕಿದ್ರು; ಹಳ್ಳಿ ಹುಡ್ಗಿ ಈಗ ದುಬೈನಲ್ಲಿ ಗಗನಸಖಿ

ಇದೇ ರೀತಿ ಹೆತ್ತವರ ನಿರೀಕ್ಷೆಗಳಿಗೆ ವಿರುದ್ಧವಾಗಿ ಹೋಗಿ ಜೀವನದಲ್ಲಿ ಗೆದ್ದ ಹಳ್ಳಿ ಹುಡುಗಿಯ ಕಥೆಯನ್ನು ನಾವಿಂದು ಹೇಳುತ್ತಿದ್ದೇವೆ. ಈಕೆಯ ಹೆಸರು ಮಮತಾ ಚೌಧರಿ, ರಾಜಸ್ಥಾನದ ಸಣ್ಣ ಹಳ್ಳಿಯ ನಿವಾಸಿ ಈ ಹುಡುಗಿ. ಈಕೆಯ ಹೋರಾಟದ ಬದುಕಿನ ಕಥೆ ಈಗ ನೆಟ್ಟಿಗರ ಮನ ಗೆದ್ದಿದೆ.

ಹೆಣ್ಣು ಹೀಗೆ ಇರಬೇಕು ಎಂದು ಭಾವಿಸುವ ಕುಟುಂಬದಲ್ಲಿ ಜನಿಸಿದ ಮಮತಾ ದೊಡ್ಡ ಕನಸು ಕಂಡಿದ್ದಳು. ಹಳ್ಳಿ ಆಚೆಗೆ ನಗರಕ್ಕೆ ಹೋಗಿ ಉದ್ಯೋಗ ಮಾಡಬೇಕೆಂದು ಬಯಸಿದ್ದಳು. ಆದರೆ ಮಮತಾ ತಂದೆ ಮಾತ್ರ ಈಕೆಗೆ ಗಂಡು ಹುಡುಕಿ ಮದುವೆ ಮಾಡಿ ಗಂಡನ ಮನೆಗೆ ಕಳುಹಿಸುವ ಅವಸರದಲ್ಲಿ ಇದ್ದರು.

ಮಮತಾ ಧೈರ್ಯ ಮಾಡಿ ತಂದೆಯ ಬಳಿ ತನ್ನ ಗುರಿ, ಕನಸ್ಸಿನ ಬಗ್ಗೆ ಹೇಳಿದ್ದಳು. ತಾನು ನಗರಕ್ಕೆ ಹೋಗಿ ಕೆಲಸ ಮಾಡುತ್ತೇನೆ, ಸದ್ಯಕ್ಕೆ ಮದುವೆ ಬೇಡ ಅಂದಿದ್ದಳು. ನಿನ್ನ ಆಸೆಯಂತೆ ಆಗಬೇಕು ಎಂದರೆ ನೀನು ನಗರಕ್ಕೆ ಹೋಗಬಹುದು. ಆದರೆ ಈ ಮನೆಯ ಋಣ ಇಲ್ಲಿಗೆ ಮುಗಿಯಿತು. ನಮ್ಮೆಲ್ಲರ ಸಂಬಂಧ ಮುರಿದುಕೊಂಡು ಮನೆಯಿಂದ ಹೊರಗೆ ಕಾಲಿಡು ಎಂದು ತಂದೆ ಅಬ್ಬರಿಸಿದ್ದರು.

ಗಟ್ಟಿ ಮನಸ್ಸು ಮಾಡಿಕೊಂಡು ಮಮತಾ ಮನೆಯಿಂದ ಹೊರ ನಡೆದಿದ್ದಳು. ಹಳ್ಳಿಯನ್ನು ತೊರೆದ ಮಮತಾ ದೆಹಲಿಯನ್ನು ತಲುಪಿದಳು, ಆದರೆ ಇಲ್ಲಿಯೂ ಆಕೆಗೆ ಕಷ್ಟಗಳು ಕಡಿಮೆಯಾಗಲಿಲ್ಲ. ಇಂಗ್ಲಿಷ್ ಬರುತ್ತಿರಲಿಲ್ಲ, ಹಳ್ಳಿ ಹುಡುಗಿಯ ಬಟ್ಟೆಗಳನ್ನು ನೋಡಿ ಜನ ಜಡ್ಜ್ ಮಾಡುತ್ತಿದ್ದರು.

ಮಮತಾ ನಿರಂತರವಾಗಿ ಜಾಬ್ ಇಂಟರ್ ವ್ಯೂಗಳನ್ನು ನೀಡಿದರು, ಆದರೆ ಯಾವುದರಲ್ಲೂ ಯಶಸ್ವಿಯಾಗಲಿಲ್ಲ. ನಂತರ ಮಮತಾ ತನ್ನನ್ನು ತಾನು ಸುಧಾರಿಸಿಕೊಂಡರು. 2018 ರಲ್ಲಿ, ಅವರು ಕ್ಯಾಬಿನ್ ಸಿಬ್ಬಂದಿಯ ಕೆಲಸವನ್ನು ಪಡೆದರು. ಕೆಲಸ ಸಿಕ್ಕಿರುವ ವಿಚಾರವನ್ನು ತಿಳಿಸಲು ಮನೆಗೆ ಕರೆ ಮಾಡಿದಾಗ ಯಾರಿಂದಲೂ ಒಳ್ಳೆಯ ಪ್ರತಿಕ್ರಿಯೆ ಸಿಕ್ಕಿರಲಿಲ್ಲ. ಮಗಳು ಸಿಟಿಗೆ ಹೋಗಿ ಮಾನ ಕಳೆಯುತ್ತಾಳೆ ಎಂದು ಹಳ್ಳಿಗರು ಮಮತಾ ಹೆತ್ತವರಿಗೆ ಎಚ್ಚರಿಸಿದ್ದರು.

ಇನ್ನು ಇತ್ತ ಪಾಸ್ ಪೋರ್ಟ್ ಇಲ್ಲದ ಕಾರಣ ಮಮತಾ ಕೆಲಸ ಕಳೆದುಕೊಂಡಿದ್ದರು. ಈ ಸಮಯದಲ್ಲಿ, ಅವರು ಸಾಕಷ್ಟು ತೊಂದರೆಗಳನ್ನು ಎದುರಿಸಬೇಕಾಯಿತು. ಮತ್ತೆ ದೆಹಲಿಗೆ ಬಂದು ಮಾಡೆಲಿಂಗ್ ಆರಂಭಿಸಿದರು. 2022 ರಲ್ಲಿ ಅಬುಧಾಬಿಯಲ್ಲಿ ಕ್ಯಾಬಿನ್ ಸಿಬ್ಬಂದಿಯಾಗಿ ಕೆಲಸ ಪಡೆದರು.

ಮಮತಾ ಚೌಧರಿ ಅವರ ಹಳ್ಳಿಯಲ್ಲೇ ವಿದೇಶದಲ್ಲಿ ಕೆಲಸ ಮಾಡಿದ ಮೊದಲ ಮಹಿಳೆ ಎನಿಸಿಕೊಂಡಿದ್ದಾರೆ. ಅವರು ಪ್ರಸ್ತುತ ವಿಮಾನಯಾನ ಸಿಬ್ಬಂದಿ ಸದಸ್ಯರಾಗಿ ಕೆಲಸ ಮಾಡುತ್ತಿದ್ದಾರೆ. ಅವರ ಹೋರಾಟದ ಕಥೆ ಅಂತರ್ಜಾಲದಲ್ಲಿ ಜನರ ಹೃದಯವನ್ನು ಗೆದ್ದಿದೆ. ಇಂದು ಅವರ ಯಶಸ್ಸು ಎಲ್ಲರಿಗೂ ಸ್ಫೂರ್ತಿಯಾಗಿದೆ.