Workplace Stress: ಉದ್ಯೋಗಿಗಳೇ ಕೆಲಸದ ಒತ್ತಡದಲ್ಲೇ ನರಳಬೇಡಿ, ಜಸ್ಟ್ ಈ ಟಿಪ್ಸ್ ಫಾಲೋ ಮಾಡಿ

ಆಫೀಸ್ ಅಥವಾ ಕೆಲಸದಲ್ಲಿ ಉಂಟಾಗುವ ಒತ್ತಡವು ಉದ್ಯೋಗಿಯ ಜೀವನದ ಮೇಲೆ ಹಲವು ರೀತಿಯಲ್ಲಿ ಪರಿಣಾಮ ಬೀರುತ್ತದೆ. ಸಾಮಾನ್ಯವಾಗಿ ಒತ್ತಡದ ವಾತಾವರಣದಲ್ಲಿ ಕೆಲಸ ಮಾಡುವಾಗ ಕಾರ್ಟಿಸೋಲ್ ಎಂಬ ಒತ್ತಡದ ಹಾರ್ಮೋನ್ ಗಳು ದೇಹದಲ್ಲಿ ಸ್ರವಿಸುತ್ತದೆ. ಇದು ಒತ್ತಡವನ್ನು ನಿಯಂತ್ರಿಸಲು ಸಹಾಯ ಮಾಡುತ್ತದೆ. ಆದರೆ ಈ ಕಾರ್ಟಿಸೋಲ್ ಗಳ ಸ್ರವಿಸುವಿಕೆಯು ಅಧಿಕವಾದರೆ ದೇಹಕ್ಕೆ ಹಾನಿಯನ್ನು ಉಂಟು ಮಾಡುತ್ತದೆ.

ಯಾವುದರಿಂದ ಸ್ಟ್ರೆಸ್ ಆಗುತ್ತಿದೆ: ನಿಮ್ಮ ಒತ್ತಡವನ್ನು ಪ್ರಚೋದಿಸುವ ಅಂಶವನ್ನು ಕಂಡುಹಿಡಿಯುವುದು ಯಾವಾಗಲೂ ಒತ್ತಡವನ್ನು ಕಡಿಮೆ ಮಾಡುವ ಮೊದಲ ಹೆಜ್ಜೆಯಾಗಿದೆ. ನಿಮ್ಮ ಒತ್ತಡಕ್ಕೆ ಕಾರಣವೇನು ಎಂಬುದನ್ನು ನೀವು ಕಂಡು ಹಿಡಿಯಬೇಕು. ಅದನ್ನು ಸರಿಪಡಿಸಬಹುದು ಅಥವಾ ಭವಿಷ್ಯದಲ್ಲಿ ಸಂಭವಿಸದಂತೆ ತಡೆಯಬಹುದು.

ಟೀ ಮತ್ತು ಕಾಫಿ ಕುಡಿಯಿರಿ: ಆಫೀಸ್ ವಿರಾಮದ ಸಮಯದಲ್ಲಿ ಬಿಸಿ ಕಾಫಿ ಅಥವಾ ಟೀ ಕುಡಿಯುವುದು ಒತ್ತಡವನ್ನು ಕಡಿಮೆ ಮಾಡುತ್ತದೆ. ಆದರೆ ಅತಿಯಾದ ಅಭ್ಯಾಸ ಬೇಡ. ಟೀ ಮತ್ತು ಕಾಫಿ ಕುಡಿಯುವುದು ಮುಖ್ಯವಾಗಿ ನಿರಂತರ ಕಾಲ್ಸ್ ಮತ್ತು ಮೀಟಿಂಗ್ಸ್ ನಿಂದ ಉಂಟಾಗುವ ಒತ್ತಡ-ಆಯಾಸವನ್ನು ಕಡಿಮೆ ಮಾಡುತ್ತೆ

ಅರೋಮಾಥೆರಪಿ ಬಳಸಿ: ಅರೋಮಾಥೆರಪಿ ಮನಸ್ಸು ಶಾಂತವಾಗಿರಲು ಸಹಾಯ ಮಾಡುತ್ತದೆ. ನಿಮ್ಮ ಆಫೀಸ್ ಡೆಸ್ಕ್ ಮೇಲೆ ಸುಗಂಧ ಬೀರುವ ವಸ್ತುಗಳನ್ನು ಇಡಿ. ಲ್ಯಾವೆಂಡರ್, ಗುಲಾಬಿ, ಶ್ರೀಗಂಧದಂತಹ ಸುಗಂಧ ದ್ರವ್ಯಗಳು ಮನಸ್ಸಿಗೆ ಮುದವನ್ನು ನೀಡುತ್ತವೆ.

ವಿರಾಮಗಳನ್ನು ತೆಗೆದುಕೊಳ್ಳಿ: ವರ್ಕ್ ಬ್ರೇಕ್ ಗಳು ನಿಮ್ಮ ಮನಸ್ಸು ಮತ್ತು ದೇಹವನ್ನು ಒತ್ತಡ ಮುಕ್ತವಾಗಿಸಲು ಸಹಾಯಕಾರಿ. ಕೆಲಸದ ಮಧ್ಯೆ ಸ್ಮಾಲ್ ಬ್ರೇಕ್ ತೆಗೆದುಕೊಂಡು ನಿಮ್ಮ ನೆಚ್ಚಿನ ಹಾಡನ್ನು ಕೇಳಲು ಅಥವಾ ಉಸಿರಾಟದ ವ್ಯಾಯಾಮ, ಧ್ಯಾನವನ್ನು ಮಾಡಲು ಸಹ ನೀವು ಪ್ರಯತ್ನಿಸಬಹುದು.

ವಾಕಿಂಗ್ ಮಾಡಿ: ಸ್ವಲ್ಪ ದೂರ ನಡಿಯುವುದು ದೇಹ ಮತ್ತು ಮನಸ್ಸನ್ನು ಉಲ್ಲಾಸಗೊಳಿಸಬಹುದು. ಇದು ನಿಮ್ಮ ಒತ್ತಡವನ್ನು ನಿವಾರಿಸುತ್ತದೆ. ಕೆಲಸವನ್ನು ಉತ್ತಮವಾಗಿ ನಿರ್ವಹಿಸಲು ಸಹಾಯ ಮಾಡುತ್ತದೆ.

ಯೋಗ ಮಾಡಬಹುದು: ದೀರ್ಘಕಾಲ ಕುಳಿತುಕೊಳ್ಳುವುದರಿಂದ ಉಂಟಾಗುವ ದೇಹದ ನೋವನ್ನು ಹೋಗಲಾಡಿಸಲು ನೀವು ಕೆಲವು ಸರಳವಾದ ಸ್ಟ್ರೆಚಿಂಗ್ ವ್ಯಾಯಾಮಗಳನ್ನು ಮಾಡಬಹುದು. ಯೋಗಾಸನಗಳನ್ನು ಮಾಡುವುದರಿಂದ ನಿಮ್ಮ ಮನಸ್ಸು ಮತ್ತು ದೇಹ ಆರಾಮದಾಯವಾಗಿರುತ್ತೆ

4-7-8 ಉಸಿರಾಟದ ವ್ಯಾಯಾಮ: ನಿಮ್ಮ ಬಾಯಿಯ ಮುಂಭಾಗದಲ್ಲಿರುವ ಮೇಲಿನ ಹಲ್ಲಿನ ಮೇಲೆ ನಿಮ್ಮ ನಾಲಿಗೆಯ ತುದಿಯನ್ನು ಒತ್ತಿ ಮತ್ತು 4 ಸೆಕೆಂಡುಗಳ ಕಾಲ ನಿಮ್ಮ ಮೂಗಿನ ಮೂಲಕ ಉಸಿರಾಡಿ. ನಂತರ 7 ಸೆಕೆಂಡುಗಳ ಕಾಲ ಉಸಿರನ್ನು ಹಿಡಿದುಕೊಳ್ಳಿ ಮತ್ತು ನಂತರ 8 ಸೆಕೆಂಡುಗಳ ಕಾಲ ಬಾಯಿಯ ಮೂಲಕ ಬಿಡಿ. ಇದನ್ನು ನಿಯಮಿತವಾಗಿ ಮಾಡುವುದರಿಂದ ದೇಹವು ಹೆಚ್ಚು ಆಮ್ಲಜನಕವನ್ನು ಪಡೆಯುತ್ತದೆ. ದೇಹ ಮತ್ತು ಮನಸ್ಸು ಉಲ್ಲಾಸಗೊಳ್ಳುತ್ತದೆ.