Virender Sehwag: IPLನ ಅತ್ಯಂತ ಕಳಪೆ ಆಟಗಾರರನ್ನು ಹೆಸರಿಸಿದ ಸೆಹ್ವಾಗ್

ಕೊರೋನಾ ಭೀತಿ ನಡುವೆ ಇಂಡಿಯನ್ ಪ್ರೀಮಿಯರ್ ಲೀಗ್ 13ನೇ ಸೀಸನ್​ನ್ನು ಬಿಸಿಸಿಐ ಯಶಸ್ವಿಯಾಗಿ ಆಯೋಜಿಸಿದೆ. ಯುಎಇ ನಲ್ಲಿ ನಡೆದ ಈ ಟೂರ್ನಿಯಲ್ಲಿ ಹಲವು ಆಟಗಾರರು ಮಿಂಚಿದ್ರೆ, ಕೆಲವರು ಹೀನಾಯ ಪ್ರದರ್ಶನ ನೀಡಿದ್ದರು.

ಅದರಲ್ಲೂ ಮರಳುಗಾಡಿನ ಪಿಚ್​ನಲ್ಲಿ ಯುವ ದಾಂಡಿಗರು ಅಬ್ಬರಿಸಿದ್ರೆ, ಅನುಭವಿ ಆಟಗಾರರು ಮಕಾಡೆ ಮಲಗಿದ್ದರು. ಇದರಿಂದ ಹಲವು ತಂಡಗಳ ಲೆಕ್ಕಚಾರಗಳು ತಲೆಕೆಳಗಾಗಿದ್ದವು. ಅತ್ತ ಭಾರೀ ಮೊತ್ತ ನೀಡಿದ ಖರೀದಿಸಿದ ಆಟಗಾರರ ಕಳಪೆ ಪ್ರದರ್ಶನ ಕೂಡ ಫ್ರಾಂಚೈಸಿಯ ಚಿಂತೆಯನ್ನು ಹೆಚ್ಚಿಸಿತ್ತು.

ಐಪಿಎಲ್ ಆರಂಭದಿಂದಲೇ ಟೂರ್ನಿಯ ಕುರಿತು ಸಕ್ರೀಯರಾಗಿದ್ದ ಟೀಮ್ ಇಂಡಿಯಾ ಡ್ಯಾಶಿಂಗ್ ಓಪನರ್ ವಿರೇಂದ್ರ ಸೆಹ್ವಾಗ್, ಹಲವು ಕ್ರಿಕೆಟಿಗರನ್ನು ತರಾಟೆಗೆ ತೆಗೆದುಕೊಂಡಿದ್ದರು. ಕೆಲ ಪಂದ್ಯಗಳ ಸೋಲು-ಗೆಲುವನ್ನು ವಿಮರ್ಶಿಸಿದ್ದರು.

ಅಷ್ಟೇ ಅಲ್ಲದೆ ಇದೀಗ 2020 ಐಪಿಎಲ್​ನ ಅತ್ಯಂತ ಕಳಪೆ ಪ್ರದರ್ಶನ ನೀಡಿದ ಐವರು ವಿದೇಶಿ ಸ್ಟಾರ್ ಆಟಗಾರರನ್ನು ಹೆಸರಿಸಿದ್ದಾರೆ. ಈ ಪಟ್ಟಿಯಲ್ಲಿ ಇಬ್ಬರು ಆರ್​ಸಿಬಿ ಆಟಗಾರರು ಇರುವುದು ಮತ್ತೊಂದು ವಿಶೇಷ. ಹಾಗಿದ್ರೆ ಸೆಹ್ವಾಗ್ ತಿಳಿಸಿದ ಅತ್ಯಂತ ಕಳಪೆ ಆಟಗಾರರು ಯಾರು ನೋಡೋಣ.

ಆಂಡ್ರೆ ರಸ್ಸೆಲ್ (ಕೊಲ್ಕತ್ತಾ ನೈಟ್ ರೈಡರ್ಸ್): ಸ್ಪೋಟಕ ಆಟಕ್ಕೆ ಹೆಸರುವಾಸಿಯಾಗಿರುವ ರಸೆಲ್ ಈ ಬಾರಿಯ ಸೀಸನ್​ನಲ್ಲಿ 10 ಪಂದ್ಯಗಳಿಂದ ಗಳಿಸಿದ್ದು ಕೇವಲ 117 ರನ್ ಮಾತ್ರ. ಹಾಗೆಯೇ ಬೌಲಿಂಗ್​ನಲ್ಲಿ 6 ವಿಕೆಟ್ ಪಡೆದಿದ್ದರು.

ಗ್ಲೆನ್ ಮ್ಯಾಕ್ಸ್​ವೆಲ್ (ಕಿಂಗ್ಸ್ ಇಲೆವೆನ್ ಪಂಜಾಬ್): 13 ಪಂದ್ಯಗಳಲ್ಲಿ ಕಣಕ್ಕಿಳಿದ ಗ್ಲೆನ್ ಮ್ಯಾಕ್ಸ್​ವೆಲ್ ಬ್ಯಾಟ್​ನಿಂದ ಸಿಡಿದದ್ದು ಕೇವಲ 108 ರನ್​ ಮಾತ್ರ.

ಶೇನ್ ವಾಟ್ಸನ್ (ಚೆನ್ನೈ ಸೂಪರ್ ಕಿಂಗ್ಸ್): 11 ಪಂದ್ಯಗಳಲ್ಲಿ ಚೆನ್ನೈ ಪರ ಬ್ಯಾಟ್ ಬೀಸಿದ ಶೇನ್ ವಾಟ್ಸನ್ ಈ ಬಾರಿ ಕಲೆಹಾಕಿದ್ದು 299 ರನ್​.

ಆರೋನ್ ಫಿಂಚ್ (ರಾಯಲ್ ಚಾಲೆಂಜರ್ಸ್ ಬೆಂಗಳೂರು): ಆರ್​ಸಿಬಿ ಪರ 12 ಪಂದ್ಯಗಳಲ್ಲಿ ಬ್ಯಾಟ್ ಮಾಡಿದ್ದ ಫಿಂಚ್ 268 ರನ್​ಗಳಿಸಲಷ್ಟೇ ಶಕ್ತರಾಗಿದ್ದರು.

ಡೇಲ್ ಸ್ಟೇನ್ (ರಾಯಲ್ ಚಾಲೆಂಜರ್ಸ್ ಬೆಂಗಳೂರು): ಆರ್​ಸಿಬಿ ಬೌಲಿಂಗ್​ ಲೈನ್​ನಲ್ಲಿ ಜಾದು ಮಾಡಲಿದ್ದಾರೆ ಎಂದು ನಿರೀಕ್ಷೆಯಲ್ಲಿದ್ದ ಅಭಿಮಾನಿಗಳಿಗೆ ಸ್ಟೇನ್ ನಿರಾಸೆ ಮೂಡಿಸಿದ್ದರು. 3 ಪಂದ್ಯಗಳಲ್ಲಿ ಕಣಕ್ಕಿಳಿದ ಸ್ಟೇನ್ 133 ರನ್​ ನೀಡಿ 1 ವಿಕೆಟ್ ಪಡೆಯಲಷ್ಟೇ ಶಕ್ತರಾಗಿದ್ದರು.