IPL 2020 SRH vs RCB: ಆರ್​ಸಿಬಿ ಗೆಲುವಿಗೆ ಕಾರಣವಾಯ್ತು ಈ ಐದು ಅಂಶಗಳು

ಮೊದಲ ಮ್ಯಾಚ್ ದೇವರಿಗೆ ನೀಡುತ್ತಿದ್ದ ಸಂಪ್ರದಾಯವನ್ನು ಮುರಿದು ಮೊದಲ ಮ್ಯಾಚ್ಅನ್ನು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಅಭಿಮಾನಿ ದೇವರುಗಳಿಗೆ ಅರ್ಪಿಸಿದೆ.

ಇನ್ನು, ಉತ್ತಮ ರನ್ ರೇಟ್ ಹೊಂದುವ ಮೂಲಕ ಆರ್​ಸಿಬಿ ರನ್ ರೇಟ್ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿದೆ. ಬ್ಯಾಟಿಂಗ್ ಹಾಗೂ ಬೌಲಿಂಗ್ನಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದು ಆರ್​ಸಿಬಿಗೆ ವರದಾನಾವಾಯ್ತು.

ಹಾಗಾದರೆ ಆರ್​ಸಿಬಿ ಗೆಲುವಿಗೆ ಸಹಕಾರಿಯಾದ ಪ್ರಮುಖ ಅಂಶಗಳು ಯಾವವು? ಆ ಬಗ್ಗೆ ಇಲ್ಲಿದೆ ಪುಟ್ಟ ವಿಮರ್ಷೆ.

ವರದಾನವಾದ ಕನ್ನಡಿಗ ದೇವದತ್ ಪಡಿಕ್ಕಲ್: ದೇವದತ್ ಪಡಿಕ್ಕಲ್ ವಯಸ್ಸು ಕೇವಲ 20. ಈ ಯುವಕನ್ನು ಬೇಗನೆ ಪೆವಿಲಿಯನ್ಗೆ ಅಟ್ಟಬಹುದು ಎಂಬುದು ಹೈದರಾಬಾದ್ ಬೌಲರ್ಗಳ ಲೆಕ್ಕಾಚಾರವಾಗಿತ್ತು. ಆದರೆ, ದೇವದತ್ ಪಡಿಕ್ಕಲ್ ಬ್ಯಾಟ್ ಬೀಸುವ ಶೈಲಿ ನೋಡಿ ಎಲ್ಲರೂ ಮಂತ್ರ ಮುಗ್ಧರಾದರು. ಎಲ್ಲಾ ಬಾಲ್ಗಳನ್ನು ಅತ್ಯುತ್ತಮವಾಗಿ ಎದುರಿಸುವ ಮೂಲಕ ಸೈ ಎನಿಸಿಕೊಂಡರು. ಮೊದಲ ಪಂದ್ಯದಲ್ಲೇ ಅರ್ಧ ಶತಕ ಬಾರಿಸಿದರು. 42 ಬಾಲ್ಗಳಿಗೆ 56 ರನ್ ಬಾರಿಸಿ ತಂಡಕ್ಕೆ ಆಸರೆಯಾದರು.

ಡಿವಿಲಿಯರ್ಸ್ ಅರ್ಧಶತಕ: 2 ಸಿಕ್ಸ್ ಹಾಗೂ 4 ಬೌಂಡರಿಗಳನ್ನು ಹೊಡೆಯುವ ಮೂಲಕ ಎಬಿ ಡಿವಿಲಿಯರ್ಸ್ ತಂಡಕ್ಕೆ ಆಸರೆ ಆದರು. ಕೇವಲ 30 ಬಾಲ್ಗಳಲ್ಲಿ 51 ರನ್ ಹೊಡೆಯುವ ಮೂಲಕ ಆರ್ಸಿಬಿ ಸ್ಕೋರ್ 150ರ ಗಡಿ ದಾಟಲು ಸಹಕಾರಿಯಾದರು.

ಮಿಚೆಲ್ ಮಾರ್ಷ್ ಗಾಯಾಳು: ಸನ್ ರೈಸರ್ಸ್ ಹೈದಾರಾಬಾದ್ ತಂಡದ ಪ್ರಮುಖ ಬಾಲರ್ ಮಿಚೆಲ್ ಮಾರ್ಷ್ ಮೊದಲ ಓವರ್ನಲ್ಲೇ ಗಾಯಗೊಂಡು ಹೊರ ನಡೆದರು. ಇದು ನೇರವಾಗಿ ಆರ್ ಸಿಬಿಗೆ ವರದಾನಾವಯ್ತು ಎನ್ನಬಹುದು. ಐಪಿಎಲ್ನಲ್ಲಿ ಅವರು ಈವರೆಗೆ 21 ಪಂದ್ಯಗಳನ್ನಾಡಿದ್ದು, 20 ವಿಕೆಟ್ ತೆಗೆದಿದ್ದಾರೆ. 225 ರನ್ ಬಾರಿಸಿದ್ದಾರೆ. ಹೀಗಾಗಿ, ಅವರು ನಿನ್ನೆ ಇದ್ದಿದ್ದರೆ ಹೈದರಾಬಾದ್ಗೆ ಬೌಲಿಂಗ್ ಹಾಗೂ ಬ್ಯಾಟಿಂಗ್ ಎರಡಲ್ಲೂ ಆಧಾರವಾಗುತ್ತಿದ್ದರು.

ಅಭಿಷೇಕ್ ಶರ್ಮಾ ರನ್ ಔಟ್: ಗೆಲುವಿನ ಸಮೀಪ ಇದ್ದ ಹೈದರಾಬಾದ್ ತಂಡಕ್ಕೆ ಅಭಿಷೇಕ್ ಶರ್ಮಾ ಹಾಗೂ ರಶೀದ್ ಖಾನ್ ಆಸರೆಯಾಗಲು ಮುಂದಾಗಿದ್ದರು. ಆದರೆ, ರನ್ ಗಳಿಸುವಾಗ ಒಬ್ಬರಿಗೊಬ್ಬರು ಡಿಕ್ಕಿ ಹೊಡೆದುಕೊಂಡರು. ಇದರಿಂದ ಅಭಿಷೇಕ್ ಶರ್ಮಾ ರನ್ಔಟ್ ಆದರು. ಅಲ್ಲದೆ, ರಶೀದ್ ಖಾನ್ ಕೂಡ ಗಾಯಗೊಂಡಂತೆ ಕಂಡು ಬಂದರು.

ಚಹಾಲ್ ಕಮಾಲ್: ಸನ್ ರೈಸರ್ಸ್ ಹೈದರಾಬಾದ್ ತಂಡ ವಿಕೆಟ್ಗಳನ್ನು ಉಳಿಸಿಕೊಂಡು ಗೆಲುವಿನತ್ತ ಹೆಜ್ಜೆ ಹಾಕಿತ್ತು. ಈ ವೇಳೆ ಚಹಾಲ್ ಕಮಾಲ್ ಮಾಡಿದರು. ಪ್ರಮುಖ ಮೂರು ವಿಕೆಟ್ ಗಳನ್ನು ಕೀಳುವ ಮೂಲಕ ಆರ್ ಸಿಬಿಗೆ ವರದಾನವಾದರು.