IPL 2021- ಈತ ಭಾರತದ ಕ್ರಿಸ್ ಗೇಲ್; ಅಜ್ಜಿಯಿಂದ ಕ್ರಿಕೆಟಿಗನಾಗಿ ಬೆಳೆದ ಫ್ಯೂಚರ್ ಸ್ಟಾರ್

ಮಹಿಪಾಲ್ ಲೊಮ್ರೋರ್ ಹೆಚ್ಚು ಮಂದಿ ಕೇಳಿರುವ ಸಾಧ್ಯತೆ ಕಡಿಮೆ. ಈ ಐಪಿಎಲ್ನಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡದಲ್ಲಿದ್ದ ಇವರು ಆಡಿದ್ದು ಕೇವಲ 4 ಪಂದ್ಯ ಮಾತ್ರ. ಆದರೆ ಈತನ ಬೆಳವಣಿಗೆಯನ್ನ ಮೊದಲಿಂದಲೂ ಕಂಡವರು ಮತ್ತು ಇವರ ಬ್ಯಾಟಿಂಗ್ ಆರ್ಭಟ ಕಂಡವರು ಬಹಳ ನಿರೀಕ್ಷೆ ಇಟ್ಟುಕೊಂಡಿದ್ದಾರೆ. ಇವರು ಭಾರತದ ಕ್ರಿಸ್ ಗೇಲ್ ಎಂದೇ ಪರಿಗಣಿತವಾಗಿದ್ದಾರೆ.

ಮಹಿಪಾಲ್ ಲೊಮ್ರೋರ್ ಜೂನಿಯರ್ ವಿಶ್ವಕಪ್ ಕ್ರಿಕೆಟ್ ಗೆದ್ದ ಭಾರತ ತಂಡದ ಸದಸ್ಯರಾಗಿದ್ದವು. ಆ ಕಿರಿಯರ ವಿಶ್ವಕಪ್ ಭಾರತಕ್ಕೆ ದಕ್ಕಲು ಕಾರಣವಾದ ಸಂಗತಿಗಳಲ್ಲಿ ಮಹಿಪಾಲ್ ಲೊಮ್ರೋರ್ ಅವರ ಸ್ಫೋಟಕ ಬ್ಯಾಟಿಂಗ್ ಕೂಡ ಒಂದು. ಮಧ್ಯಮ ಕ್ರಮಾಂಕದಲ್ಲಿ ಬರುತ್ತಿದ್ದ ಇವರು ಮ್ಯಾಚ್ ಫಿನಿಶರ್ ಕೂಡ ಆಗಿದ್ದವರು.

ಈಗ 21 ವರ್ಷದ ಆಲ್ರೌಂಡರ್ ಆಗಿರುವ ಮಹಿಪಾಲ್ ಅವರು ಕಿರಿಯ ಕ್ರಿಕೆಟಿಗನಾಗಿದ್ದಾಗ ಜೂನಿಯರ್ ಕ್ರಿಸ್ ಗೇಲ್ ಎಂದೇ ಹೆಸರುವಾಸಿಯಾಗಿದ್ದರು. ಅದಕ್ಕೆ ಕಾರಣ ಅವರು ಸಿಡಿಸುತ್ತಿದ್ದ ಸತತ ಸಿಕ್ಸರ್ಗಳು. ಈಗಲೂ ಅದೇ ಆಟದ ಸೊಗಡು ಅವರಲ್ಲಿದೆ. ಮನಸೋ ಇಚ್ಛೆ ಸಿಕ್ಸರ್ ಸಿಡಿಸುವ ಅಭಿರುಚಿಯನ್ನ ಉಳಿಸಿಕೊಂಡಿದ್ದಾರೆ.

ಮಹಿಪಾಲ್ ಲೊಮ್ರೋರ್ ಅಂಡರ್-14 ಟೂರ್ನಿಯೊಂದರಲ್ಲಿ 250 ರನ್ ಭಾರಿಸುತ್ತಾರೆ. ಆಗ ಭಾರತದ ಮಾಜಿ ಕ್ರಿಕೆಟಿಗ ಚಂದ್ರಕಾಂತ್ ಪಂಡಿತ್ ಅವರು ಈ ಹುಡುಗನ ಬ್ಯಾಟಿಂಗ್ ಕಂಡು ಭಾರತದ ಕ್ರಿಸ್ ಗೇಲ್ ಎಂದು ಕರೆಯುತ್ತಾರೆ. ಮಹಿಪಾಲ್ ಅವರು ಸ್ಪಿನ್ ಬೌಲಿಂಗ್ ಕೂಡ ಮಾಡಬಲ್ಲ ಆಟಗಾರ.

ಈ ಐಪಿಎಲ್​ನಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡದ ಪರ ಇವರು ಆಡಿದ್ದು ನಾಲ್ಕು ಪಂದ್ಯ ಮಾತ್ರ. ಮೊದಲ ಪಂದ್ಯದಲ್ಲೇ ಇವರು 17 ಎಸೆತದಲ್ಲಿ 43 ರನ್ ಚಚ್ಚಿದರು. ಬರೋಬ್ಬರಿ ನಾಲ್ಕು ಸಿಕ್ಸರ್ಗಳು ಇವರ ಬ್ಯಾಟಿಂದ ಚಿಮ್ಮಿದ್ದವು. ದುರದೃಷ್ಟವೆಂದರೆ ಅದೊಂದೇ ಪಂದ್ಯದಲ್ಲಿ ಇವರು ಅಷ್ಟು ಆರ್ಭಟ ತೋರಲು ಸಾಧ್ಯವಾಗಿದ್ದು. ನಂತರ ಮೂರು ಪಂದ್ಯಗಳಲ್ಲಿ ಇವರಿಂದ ಗಮನಾರ್ಹ ಪ್ರದರ್ಶನ ಬರಲಿಲ್ಲ. ಒಟ್ಟು ನಾಲ್ಕು ಪಂದ್ಯಗಳಿಂದ 73 ಬಾಲ್​ನಲ್ಲಿ ಇವರು 94 ರನ್ ಗಳಿಸಿದ್ದಾರೆ. ಆದರೆ, 6 ಸಿಕ್ಸರ್ ಹಾಗೂ ಒಂದು ಬೌಂಡರಿಯನ್ನೂ ಸಿಡಿಸಿದ್ದಾರೆ.

ಅಜ್ಜಿಯಿಂದ ಬೆಳೆದ ಕ್ರಿಕೆಟಿಗ: ಮಹಿಪಾಲ್ ಲೊಮ್ರೋರ್ ಅವರು ರಾಜಸ್ಥಾನದ ನಾಗೌರ್ನವರು. ಚಿಕ್ಕಂದಿನಿಂದಲೇ ಕ್ರಿಕೆಟಿಗನಾಗಬೇಕೆಂದು ಕನಸು ಕಂಡು ಬೆಳೆದವರು. ಅಜ್ಜಿ ಸಿಂಗಾರಿ ದೇವಿ ಅವರಿಂದ ಮಹಿಪಾಲ್ಗೆ ಬಹಳಷ್ಟು ನೆರವು ಪಡೆದಿದ್ದಾರೆ. ಮಹಿಪಾಲ್ ಚಿಕ್ಕ ಹುಡುಗನಿದ್ದಾಗ ಅಜ್ಜಿ ಒಂದು ಬ್ಯಾಟ್ ತಂದುಕೊಡುತ್ತಾರೆ. ಅದು ಸಿಕ್ಕಿದ್ದೇ ತಡ ತನ್ನ ಮನೆಯ ಮುಂಭಾಗದ ರಸ್ತೆಯನ್ನೇ ಕ್ರಿಕೆಟ್ ಗ್ರೌಂಡ್ ಆಗಿ ಮಾಡಿಕೊಂಡ ಮಹಿಪಾಲ್, ತನ್ನ ತಂಗಿಯಿಂದ ಬೌಲಿಂಗ್ ಮಾಡಿಸಿಕೊಂಡು ಬ್ಯಾಟಿಂಗ್ ಮಾಡುತ್ತಿದ್ದರಂತೆ. ಹಾಗಂತ ಸಿಂಗಾರಿ ದೇವಿ ಇತ್ತೀಚೆಗೆ ಸಂದರ್ಶನವೊಂದರಲ್ಲಿ ಹೇಳಿಕೊಂಡಿದ್ಧಾರೆ.

ಮಹಿಪಾಲ್ ಲೊಮ್ರೋರ್ ಚಿಕ್ಕ ವಯಸ್ಸಿನಲ್ಲೇ ತಮ್ಮ ಊರು ಬಿಟ್ಟು ಬೇರೆಡೆ ಹೋಗುತ್ತಾರೆ. ನಾಗೌರ್​ನಲ್ಲಿ ಕ್ರಿಕೆಟ್ ಫೆಸಿಲಿಟಿ ಸಮರ್ಪಕವಾಗಿರದ ಹಿನ್ನೆಲೆಯಲ್ಲಿ 11ನೇ ವಯಸ್ಸಿನಲ್ಲಿ ಜೈಪುರಕ್ಕೆ ಅವರು ಹೋಗುತ್ತಾರೆ. ಅವರ ಜೊತೆ ಅಜ್ಜಿ ಸಿಂಗಾರಿ ದೇವಿಯೂ ಹೋಗಿ ಈತನ ಕ್ರಿಕೆಟ್ ಬೆಳವಣಿಗೆಗೆ ಬೆಂಬಲವಾಗಿ ನಿಲ್ಲುತ್ತಾರೆ.

ಮಹಿಪಾಲ್ ಲೊಮ್ರೋರ್ ಮತ್ತು ರಿಷಭ್ ಪಂತ್ ಇಬ್ಬರೂ ಜೂನಿಯರ್ ಕ್ರಿಕೆಟ್ನಲ್ಲಿ ಒಂದೇ ತಂಡದಲ್ಲಿದ್ದವರು. ರಾಜಸ್ಥಾನದ ಅಂಡರ್-14 ಮತ್ತು ಅಂಡರ್-16 ತಂಡಗಳಲ್ಲಿ ಇಬ್ಬರೂ ಒಟ್ಟಿಗೆ ಆಡಿದ್ದಾರೆ. ನಂತರದ ದಿನಗಳಲ್ಲಿ ಪಂತ್ ಅವರು ದೆಹಲಿಗೆ ವಲಸೆ ಹೋಗುತ್ತಾರೆ. ಲೊಮ್ರೋರ್ ಅವರು 19ನೇ ವಯಸ್ಸಿಗೆ ರಾಜಸ್ಥಾನ್ ತಂಡದ ನಾಯಕರಾಗುತ್ತಾರೆ. ಮಹಿಪಾಲ್​ಗೆ ಕ್ರಿಕೆಟ್​ನಲ್ಲಿ ರೋಲ್ ಮಾಡೆಲ್ ಎಂದರೆ ಆಸ್ಟ್ರೇಲಿಯಾದ ಲೆಜೆಂಡ್ ಅಡಂ ಗಿಲ್​ಕ್ರಿಸ್ಟ್. ಆದರೆ, ಬೌಲಿಂಗ್​ನಲ್ಲಿ ಇವರಿಗೆ ರವೀಂದ್ರ ಜಡೇಜಾ ಹೀರೋ.