CSK ತಂಡದ ಮೊದಲ ಆಯ್ಕೆ ಧೋನಿ ಆಗಿರಲಿಲ್ಲ: ಹಾಗಿದ್ರೆ ಮತ್ಯಾರು?

ಚೆನ್ನೈ ಸೂಪರ್ ಕಿಂಗ್ಸ್ ಅಂದರೆ ಮಹೇಂದ್ರ ಸಿಂಗ್ ಧೋನಿ. ಐಪಿಎಲ್​ನಲ್ಲಿ ಧೋನಿ ಅಂದ್ರೆ ಚೆನ್ನೈ ಸೂಪರ್ ಕಿಂಗ್ಸ್​. ಇಂಡಿಯನ್ ಪ್ರೀಮಿಯರ್​ ಲೀಗ್​ನಲ್ಲಿ ಇಂತಹದೊಂದು ಪ್ರಭಾವ ಬೀರಿದ ಯಾವುದೇ ತಂಡದ ನಾಯಕನಿಲ್ಲ.

ಹೀಗಾಗಿಯೇ ಧೋನಿ ಕಳೆದ 12 ಸೀಸನ್​ಗಳಿಂದಲೂ ಸಿಎಸ್​ಕೆ ತಂಡವನ್ನು ಯಶಸ್ವಿಯಾಗಿ ಮುನ್ನಡೆಸುತ್ತಿದ್ದಾರೆ. ಹಾಗೆಯೇ ಐಪಿಎಲ್​ನಲ್ಲಿ ದೀರ್ಘಕಾಲದವರೆಗೆ ಒಂದೇ ತಂಡದ ನಾಯಕನಾಗಿ ಮೆರೆದ ದಾಖಲೆಯನ್ನೂ ನಿರ್ಮಿಸಿದ್ದಾರೆ. ಆದರೆ...

ಆದರೆ ಚೊಚ್ಚಲ ಐಪಿಎಲ್ ಹರಾಜಿಗೂ ಮುನ್ನ ಸಿಎಸ್​ಕೆ ಫ್ರಾಂಚೈಸಿಯ ಆಯ್ಕೆ ಧೋನಿ ಆಗಿರಲಿಲ್ಲ. ಬದಲಿಗೆ ವೀರೇಂದ್ರ ಸೆಹ್ವಾಗ್ ಅವರನ್ನು ಆಯ್ಕೆ ಮಾಡಿ ನಾಯಕ ಪಟ್ಟ ನೀಡುವ ಪ್ಲ್ಯಾನ್​ನಲ್ಲಿತ್ತು ಎಂಬುದನ್ನು ಚೆನ್ನೈ ತಂಡದ ಮಾಜಿ ಆಟಗಾರ ಎಸ್​.ಬದ್ರಿನಾಥ್ ತಿಳಿಸಿದ್ದಾರೆ.

ಸಂದರ್ಶನವೊಂದರಲ್ಲಿ ಮಾತನಾಡಿದ ಬದ್ರಿನಾಥ್, ಅಂದು ಸೆಹ್ವಾಗ್ ತವರು ರಾಜ್ಯವಾದ ದೆಹಲಿ ಪರ ಕಣಕ್ಕಿಳಿಯಲು ನಿರ್ಧರಿಸಿದ್ದರಿಂದ ಧೋನಿಯನ್ನು ಸಿಎಸ್​ಕೆ ಖರೀದಿಸಲು ನಿರ್ಧರಿಸಿತು ಎಂಬ ವಿಷಯ ಬಹಿರಂಗಪಡಿಸಿದ್ದಾರೆ.

ಸಿಎಸ್​ಕೆ ಮ್ಯಾನೇಜ್ಮೆಂಟ್ ಸೆಹ್ವಾಗ್ ಅವರನ್ನು ಆಯ್ಕೆ ಮಾಡಲು ನಿರ್ಧರಿಸಿತು. ಆದರೆ ವೀರು ದೆಹಲಿ ಡೇರ್ ಡೆವಿಲ್ಸ್ ತಂಡದ ಪರ ಆಸಕ್ತಿ ಹೊಂದಿದ್ದರು. ಈ ವೇಳೆ ಉತ್ತಮ ಆಯ್ಕೆಯ ಹುಡುಕಾಟದಲ್ಲಿದ್ದ ಸಿಎಸ್​ಕೆಗೆ 2007 ರ ಟಿ20 ನಾಯಕ ಧೋನಿ ಅವರು ಕಾಣಿಸಿದ್ದರು. ಹೀಗಾಗಿ ಅವರನ್ನು ಖರೀದಿಸಲು ನಿರ್ಧರಿಸಲಾಯಿತು ಎಂದು ಬದ್ರಿನಾಥ್ ಹೇಳಿದರು.

ಈ ಒಂದು ನಿರ್ಧಾರ, ಸಿಎಸ್​ಕೆ ಒಂದೇ ಏಟಿಗೆ ಮೂರು ಹಕ್ಕಿ ಸಿಕ್ಕಂತಾಯಿತು. ಮೊದಲನೆಯದಾಗಿ ಅವರು ಅತ್ಯುತ್ತಮ ನಾಯಕರಲ್ಲಿ ಒಬ್ಬರು. ಎರಡನೆದು ಧೋನಿ ಪ್ರಚಂಡ ಫಿನಿಶರ್. ಟಿ 20 ಯಲ್ಲಿ ಫಿನಿಶರ್​ಗಳಿಗೆ ಬಹಳ ಮುಖ್ಯವಾದ ಪಾತ್ರವಿದೆ. ಮೂರನೆಯದಾಗಿ ಅವರು ಉತ್ತಮ ವಿಕೆಟ್ ಕೀಪರ್ ಕೂಡ ಹೌದು. ಹೀಗಾಗಿ ಸಿಎಸ್​ಕೆ ತಂಡದ ಅಂದಿನ ತೀರ್ಮಾನ ಅತ್ಯುತ್ತಮವಾಗಿತ್ತು ಎಂದು ಬದ್ರಿನಾಥ್ ಹೇಳಿದರು.

ಸದ್ಯ ಧೋನಿ ನಾಯಕತ್ವದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡವು ಮೂರು ಬಾರಿ ಐಪಿಎಲ್ ಕಿರೀಟವನ್ನು ತನ್ನದಾಗಿಸಿಕೊಂಡಿದೆ. ಇದೀಗ ನಾಲ್ಕನೇ ಬಾರಿ ಐಪಿಎಲ್ ಟ್ರೋಫಿ ಮೇಲೆ ಕಣ್ಣಿಟ್ಟಿರುವ ಯೆಲ್ಲೊ ಆರ್ಮಿ ದುಬೈನಲ್ಲಿ ಕಠಿಣ ಅಭ್ಯಾಸದಲ್ಲಿ ನಿರತವಾಗಿದೆ.