IPL ಇತಿಹಾಸದಲ್ಲೇ ಅತೀ ಹೆಚ್ಚು ಮೇಡಿನ್ ಓವರ್ ಎಸೆದ ಬೌಲರ್ ಯಾರು ಗೊತ್ತಾ?

ಚುಟುಕು ಕ್ರಿಕೆಟ್​ನಲ್ಲಿ ಬ್ಯಾಟ್ಸ್​ಮನ್​ಗಳದ್ದೇ ಪ್ರಾಬಲ್ಯ. ಇದಕ್ಕೆ ಇಂಡಿಯನ್ ಪ್ರೀಮಿಯರ್ ಲೀಗ್​ ಕೂಡ ಹೊರತಾಗಿಲ್ಲ. ಐಪಿಎಲ್​ನಲ್ಲಿ ಬ್ಯಾಟ್ಸ್​ಮನ್​ಗಳ ಅಬ್ಬರದ ನಡುವೆ ಅನೇಕ ಬೌಲರುಗಳು ಹಲವು ದಾಖಲೆಗಳನ್ನು ಬರೆದಿದ್ದಾರೆ.

ಅದರಲ್ಲೂ ಒಂದೇ ಒಂದು ರನ್ ನೀಡದೇ ಹಲವು ಬೌಲರುಗಳು ಮೇಡಿನ್ ಓವರ್ ಎಸೆದಿದ್ದಾರೆ. ಹೊಡಿಬಡಿ ಆಟದಲ್ಲಿ ಮೇಡಿನ್ ಓವರ್ ಮಾಡುವುದೇ ದೊಡ್ಡ ಸಾಧನೆ. ಅಂತದ್ರಲ್ಲಿ ಐಪಿಎಲ್​ನಲ್ಲಿ ನಾಲ್ವರು ಬೌಲರುಗಳು ಅತೀ ಹೆಚ್ಚು ಮೇಡಿನ್ ಓವರ್ ಎಸೆದು ಗುರುತಿಸಿಕೊಂಡಿದ್ದಾರೆ.

ಆ ನಾಲ್ವರು ವೇಗಿಗಳ ಪರಿಚಯ ಇಲ್ಲಿದೆ ನೋಡಿ.

#4 ಡೇಲ್ ಸ್ಟೇನ್: ವಿಶ್ವದಾದ್ಯಂತದ ಬ್ಯಾಟ್ಸ್‌ಮನ್‌ಗಳಿಗೆ ತನ್ನ ವೇಗದ ಮತ್ತು ಸ್ವಿಂಗ್ ಬೌಲಿಂಗ್‌ನೊಂದಿಗೆ ಪೆವಿಲಿಯನ್ ಹಾದಿ ತೋರಿಸಿದ ಸ್ಟೇನ್ ಐಪಿಎಲ್‌ನಲ್ಲಿ ಬ್ಯಾಟ್ಸ್‌ಮನ್‌ಗಳಿಗೆ ಸುಲಭವಾಗಿ ರನ್​ಗಳಿಸಲು ಅವಕಾಶ ನೀಡಿಲ್ಲ. ಇದುವರೆಗೆ 358.4 ಓವರ್‌ಗಳನ್ನು ಎಸೆದಿರುವ ಸ್ಟೇನ್ 7 ಮೇಡಿನ್ ಓವರ್​ನೊಂದಿಗೆ 97 ವಿಕೆಟ್ ಪಡೆದಿದ್ದಾರೆ.

#3 ಧವಲ್ ಕುಲಕರ್ಣಿ: ಈ ಸೀಸನ್​ನಲ್ಲಿ ಇಲ್ಲಿಯವರೆಗೆ ಒಂದೇ ಒಂದು ಪಂದ್ಯವನ್ನು ಆಡದ ಧವಲ್ ಕುಲಕರ್ಣಿ, ಹೊಸ ಚೆಂಡಿನೊಂದಿಗೆ ಐಪಿಎಲ್‌ನಲ್ಲಿ ಹಲವಾರು ಬಾರಿ ಬೌಲಿಂಗ್ ಮಾಡಿದ್ದರು. ಅಷ್ಟೇ ಅಲ್ಲದೆ ಆರಂಭದಲ್ಲೇ ಬ್ಯಾಟ್ಸ್‌ಮನ್‌ಗಳು ರನ್ ಗಳಿಸದಂತೆ ತಡೆಯುವಲ್ಲಿ ಯಶಸ್ವಿಯಾಗಿದ್ದರು. ಮುಂಬೈ ಇಂಡಿಯನ್ಸ್ ಪರ ಆಡುತ್ತಿರುವ ಕುಲಕರ್ಣಿ 90 ಐಪಿಎಲ್​ ಪಂದ್ಯಗಳಲ್ಲಿ ಬೌಲಿಂಗ್ ಮಾಡಿದ್ದಾರೆ. ಅದರಲ್ಲಿ 8 ಬಾರಿ ಮೇಡಿನ್ ಓವರ್ ಎಸೆದ ಈ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿದ್ದಾರೆ.

#2 ಇರ್ಫಾನ್ ಪಠಾಣ್: ಐಪಿಎಲ್ ಇತಿಹಾಸದಲ್ಲಿ ಅತಿ ಹೆಚ್ಚು ಮೇಡಿನ್ ಓವರ್‌ಗಳ ವಿಷಯದಲ್ಲಿ ಇರ್ಫಾನ್ ಪಠಾಣ್ ಎರಡನೇ ಸ್ಥಾನದಲ್ಲಿದ್ದಾರೆ. ಪಠಾಣ್ 103 ಐಪಿಎಲ್ ಪಂದ್ಯಗಳಿಂದ 80 ವಿಕೆಟ್ ಪಡೆದಿದ್ದು, ಇದರಲ್ಲಿ 10 ಮೇಡಿನ್ ಓವರ್‌ಗಳನ್ನು ಎಸೆದಿದ್ದರು ಎಂಬುದು ವಿಶೇಷ.

#1 ಪ್ರವೀಣ್ ಕುಮಾರ್: ಐಪಿಎಲ್ ವೃತ್ತಿಜೀವನದಲ್ಲಿ ಹಲವಾರು ತಂಡಗಳ ಪರ ಆಡಿರುವ ಪ್ರವೀಣ್ ಕುಮಾರ್, ಅತಿ ಹೆಚ್ಚು ಮೇಡಿನ್ ಓವರ್‌ಗಳನ್ನು ಎಸೆದ ಬೌಲರ್ ಎನಿಸಿಕೊಂಡಿದ್ದಾರೆ. ಐಪಿಎಲ್‌ನಲ್ಲಿ 119 ಪಂದ್ಯಗಳನ್ನಾಡಿರುವ ಪ್ರವೀಣ್ ಕುಮಾರ್ 420.4 ಓವರ್‌ಗಳನ್ನು ಎಸೆದಿದ್ದು, ಇದರಲ್ಲಿ 14 ಮೇಡಿನ್ ಓವರ್​ಗಳೊಂದಿಗೆ 90 ವಿಕೆಟ್‌ಗಳನ್ನು ಪಡೆದಿದ್ದಾರೆ.