KL Rahul: ಕನ್ನಡಿಗನ ಕಮಾಲ್: ಸಿಡಿಲಬ್ಬರದ ಒಂದು ಸೆಂಚುರಿಗೆ 8 ದಾಖಲೆಗಳು ಉಡೀಸ್..!

ರಾಯಲ್ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧ ಆರ್ಭಟಿಸಿದ್ದ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದ ನಾಯಕ ಕೆಎಲ್​ ರಾಹುಲ್ ಒಂದೇ ಒಂದು ಇನಿಂಗ್ಸ್ ಮೂಲಕ ಹಲವು ದಾಖಲೆಗಳನ್ನು ಬರೆದಿದ್ದಾರೆ.

ದುಬೈ ಕ್ರಿಕೆಟ್ ಸ್ಟೇಡಿಯಂನಲ್ಲಿ ಆರ್​ಸಿಬಿ ಬೌಲರುಗಳನ್ನು ಮನಸೋ ಇಚ್ಛೆ ದಂಡಿಸಿದ ರಾಹುಲ್ 69 ಎಸೆತಗಳಲ್ಲಿ 132 ರನ್ ಚಚ್ಚಿ ಹೊಸ ದಾಖಲೆ ಬರೆದರು. ಈ ಸ್ಪೋಟಕ ಇನಿಂಗ್ಸ್​ನಲ್ಲಿ ರಾಹುಲ್ ಬ್ಯಾಟ್​ನಿಂದ ಸಿಡಿದದ್ದು ಭರ್ಜರಿ 7 ಸಿಕ್ಸರ್​ಗಳು ಹಾಗೂ 14 ಬೌಂಡರಿಗಳು. ಈ ಒಂದು ಇನಿಂಗ್ಸ್​ ಮೂಲಕ ಹಲವು ದಾಖಲೆಗಳನ್ನು ತಮ್ಮ ಹೆಸರಿಗೆ ಬರೆದುಕೊಂಡರು. ಆ ದಾಖಲೆಗಳ ಮಾಹಿತಿ ಇಲ್ಲಿದೆ.

ಬಿರುಸಿನ ಬ್ಯಾಟಿಂಗ್ ಮೂಲಕ ರಾಹುಲ್ ಐಪಿಎಲ್​ ಪಂದ್ಯವೊಂದರಲ್ಲಿ ಅತ್ಯಧಿಕ ರನ್‌ ಬಾರಿಸಿದ ನಾಯಕ, ವಿಕೆಟ್ ಕೀಪರ್‌ ಹಾಗೂ ಭಾರತದ ಆಟಗಾರ ಎನಿಸಿಕೊಂಡಿದ್ದಾರೆ. ಈ ಹಿಂದೆ ಈ ದಾಖಲೆ ವಿಕೆಟ್ ಕೀಪರ್ ರಿಷಭ್‌ ಪಂತ್‌ ಅವರದಾಗಿತ್ತು (128). ಹಾಗೆಯೇ ನಾಯಕನ ದಾಖಲೆ 119 ಬಾರಿಸಿದ್ದ ವೀರೇಂದ್ರ ಸೆಹ್ವಾಗ್ ಹೆಸರಲ್ಲಿತ್ತು.

ಇನ್ನು ಭಾರತ ಹಾಗೂ ವಿದೇಶದಲ್ಲಿ ಐಪಿಎಲ್ ಶತಕ ಬಾರಿಸಿದ 2ನೇ ಬ್ಯಾಟ್ಸ್​ಮನ್ ಎನಿಸಿಕೊಂಡರು. ಈ ಹಿಂದೆ ಎಬಿ ಡಿವಿಲಿಯರ್ಸ್ 2009 ರಲ್ಲಿ ದಕ್ಷಿಣ ಆಫ್ರಿಕಾದಲ್ಲಿ ನಡೆದ ಐಪಿಎಲ್​ನಲ್ಲಿ ಶತಕ ಬಾರಿಸಿದ್ದರು. ಹಾಗೆಯೇ ಭಾರತದಲ್ಲಿ 2015, 2016 ಸೀಸನ್​ನಲ್ಲಿ ಶತಕ ಸಿಡಿಸಿದ್ದರು. ಇದೀಗ ಈ ಪಟ್ಟಿಗೆ ರಾಹುಲ್ ಎಂಟ್ರಿ ಕೊಟ್ಟಿದ್ದಾರೆ. ಕಳೆದ ಸೀಸನ್​ನಲ್ಲಿ ರಾಹುಲ್ ಮುಂಬೈ ವಿರುದ್ಧ ಸ್ಪೋಟಕ ಸೆಂಚುರಿ ಸಿಡಿಸಿದ್ದರು. ಇದೀಗ ಆರ್​ಸಿಬಿ ವಿರುದ್ದ ದುಬೈನಲ್ಲಿ ಮಿಂಚಿದ್ದಾರೆ.

ಇದಲ್ಲದೆ ಐಪಿಎಲ್​ನಲ್ಲಿ ಭಾರತ ಹಾಗೂ ವಿದೇಶದಲ್ಲಿ ಶತಕ ಬಾರಿಸಿದ ಭಾರತೀಯ ಬ್ಯಾಟ್ಸ್​ಮನ್ ಎಂಬ ಹೆಗ್ಗಳಿಕೆಗೂ ರಾಹುಲ್ ಪಾತ್ರರಾಗಿದ್ದಾರೆ.

ಹಾಗೆಯೇ ಐಪಿಎಲ್‌ನಲ್ಲಿ ಅತೀ ಕಡಿಮೆ ಇನ್ನಿಂಗ್ಸ್‌ಗಳಿಂದ 2 ಸಾವಿರ ರನ್‌ ಪೂರ್ತಿಗೊಳಿಸಿದ ಭಾರತೀಯ ಕ್ರಿಕೆಟಿಗ ಎಂಬ ದಾಖಲೆ ಇದೀಗ ರಾಹುಲ್ ಹೆಸರಿನಲ್ಲಿದೆ. ಈ ಹಿಂದೆ ಈ ದಾಖಲೆಯು 63 ಇನಿಂಗ್ಸ್​ ಮೂಲಕ 2 ಸಾವಿರ ರನ್ ಪೂರೈಸಿದ ಸಚಿನ್ ತೆಂಡೂಲ್ಕರ್ ಹೆಸರಿನಲ್ಲಿತ್ತು. ಇದೀಗ 60 ಇನಿಂಗ್ಸ್​ನಲ್ಲಿ ರಾಹುಲ್ ಹೊಸ ದಾಖಲೆ ಬರೆದಿದ್ದಾರೆ.

ಇದರೊಂದಿಗೆ ಯುಎಇಯಲ್ಲಿ ನಡೆದ ಟಿ20 ಪಂದ್ಯವೊಂದರಲ್ಲಿ ಅತ್ಯಧಿಕ ವೈಯಕ್ತಿಕ ರನ್‌ (ಅಜೇಯ 132) ಬಾರಿಸಿದ ದಾಖಲೆಯನ್ನು ಸಹ ರಾಹುಲ್ ಸ್ಥಾಪಿಸಿದರು. ಈ ಹಿಂದೆ ಯುಎಸ್‌ಎ ವಿರುದ್ಧದ ಪಂದ್ಯದಲ್ಲಿ ಐರ್ಲೆಂಡ್‌ ತಂಡದ ವಿಲಿಯಂ ಪೋರ್ಟರ್‌ಫೀಲ್ಡ್‌ ಅಜೇಯ 127 ರನ್‌ ಬಾರಿಸಿದ್ದರು.

ಇನ್ನು ಟಿ20 ಕ್ರಿಕೆಟ್ ಪಂದ್ಯವೊಂದರಲ್ಲಿ ಅತ್ಯಧಿಕ ರನ್ ಬಾರಿಸಿದ 4ನೇ ನಾಯಕ ಎನಿಸಿಕೊಂಡರು. ಅಲ್ಲದೆ ಏಷ್ಯಾದ ಮೊದಲ ಕ್ರಿಕೆಟಿಗ ಎಂಬ ಹೆಗ್ಗಳಿಕೆ ಪಡೆದರು.

ಆರ್​ಸಿಬಿ-ಕಿಂಗ್ಸ್ ಇಲೆವೆನ್ ಪಂಜಾಬ್ ಪಂದ್ಯದಲ್ಲಿ ನಾಯಕ ರಾಹುಲ್ 132 ರನ್​ ಬಾರಿಸಿದ್ರೆ, ಕೊಹ್ಲಿ ಗಳಿಸಿದ್ದು ಕೇವಲ ಒಂದು ರನ್. ಅದು ಐಪಿಎಲ್​ ಪಂದ್ಯವೊಂದರ ನಾಯಕರಿಬ್ಬರ ಮೊತ್ತದ ಅತೀ ದೊಡ್ಡ ಅಂತರ (131 ರನ್​ಗಳ ಅಂತರ). ಈ ಹಿಂದೆ ಈ ದಾಖಲೆ ವಾರ್ನರ್ (126) ಹಾಗೂ ಗಂಭೀರ್ (11) ಹೆಸರಿನಲ್ಲಿತ್ತು. ಕೆಕೆಆರ್​ ಮಾಜಿ ನಾಯಕ ಹಾಗೂ ಎಸ್​ಆರ್​ಹೆಚ್​ ನಾಯಕನ ಅಂತರವಿದ್ದದ್ದು 115 ರನ್​ಗಳು. ಇದೀಗ ಈ ದಾಖಲೆ ರಾಹುಲ್ ಪಾಲಾಗಿದೆ.

.ಕೆಎಲ್ ರಾಹುಲ್ 132 ರನ್ ಸಿಡಿಸುವುದರೊಂದಿಗೆ ಕಿಂಗ್ಸ್ ಇಲೆವೆನ್ ಪಂಜಾಬ್ ಪರ ಅತ್ಯಧಿಕ ರನ್ ಬಾರಿಸಿದ ಆಟಗಾರ ಎನಿಸಿಕೊಂಡರು. ಈ ಹಿಂದೆ ವಿರೇಂದ್ರ ಸೆಹ್ವಾಗ್ 122 ರನ್ ಬಾರಿಸಿದ್ದು ಪಂಜಾಬ್ ತಂಡದ ಆಟಗಾರರೊಬ್ಬರ ಶ್ರೇಷ್ಠ ಸಾಧನೆಯಾಗಿತ್ತು.