ಈ ಮೂವರು ಆಟಗಾರರನ್ನು ಕೈಬಿಟ್ಟಿರುವುದು KKR ತಂಡಕ್ಕೆ ಮುಳುವಾದೀತೇ?

ಐಪಿಎಲ್ ಹೊಸ ಸೀಸನ್ ಆರಂಭಕ್ಕೆ ದಿನಗಣನೆ ಶುರುವಾಗಿದೆ. ಈಗಾಗಲೇ ಎಲ್ಲಾ ತಂಡಗಳು ಯುಎಇ ನಲ್ಲಿ ಬೀಡು ಬಿಟ್ಟಿದೆ. ಕಳೆದ ಸೀಸನ್​ಗೆ ಹೋಲಿಸಿದ್ರೆ ಈ ಬಾರಿ ರೋಚಕ ಕಾದಾಟಕ್ಕೆ ಐಪಿಎಲ್ ಸಾಕ್ಷಿಯಾಗಲಿದೆ ಎನ್ನಲಾಗುತ್ತಿದೆ.

ಇತ್ತ ಪ್ರತಿಯೊಂದು ತಂಡಗಳ ಬಲಾಬಲಗಳು ಕೂಡ ಚರ್ಚೆಯಲ್ಲಿದೆ. ಅದರಲ್ಲೂ ಪ್ರಬಲ ತಂಡಗಳಲ್ಲಿ ಗುರುತಿಸಿಕೊಂಡಿರುವ ಕೊಲ್ಕತ್ತಾ ನೈಟ್ ರೈಡರ್ಸ್ ಕಳೆದ ಸೀಸನ್​ನಲ್ಲಿ ನಿರೀಕ್ಷೆಗೆ ತಕ್ಕಂತೆ ಪ್ರದರ್ಶನ ನೀಡಿರಲಿಲ್ಲ.

ಹೀಗಾಗಿ ದಿನೇಶ್ ಕಾರ್ತಿಕ್ ನೇತೃತ್ವದ ತಂಡದ ಪ್ರಮುಖ ಆಟಗಾರರನ್ನು ಈ ಬಾರಿ ಕೈ ಬಿಡಲಾಗಿತ್ತು. ಮುಖ್ಯವಾಗಿ ತಂಡದ ಸ್ಪೋಟಕ ಆರಂಭಿಕ ಕ್ರಿಸ್ ಲಿನ್​ರನ್ನು ಕೆಕೆಆರ್​ ಕೈ ಬಿಟ್ಟಿರುವುದು ಚರ್ಚೆಗೆ ಕಾರಣವಾಗಿತ್ತು. ಹಾಗೆಯೇ ಅನುಭವಿ ರಾಬಿನ್ ಉತ್ತಪ್ಪ ಅವರಿಗೂ ಕೊಕ್ ನೀಡಿದ್ದರು.

ಇತ್ತ ಕೆಕೆಆರ್ ಕೈಬಿಟ್ಟರೂ ಕ್ರಿಸ್ ಲಿನ್ ಅವರನ್ನು ಮುಂಬೈ ಇಂಡಿಯನ್ಸ್ ತನ್ನ ತೆಕ್ಕೆಗೆ ತೆಗೆದುಕೊಂಡಿತು. ಹಾಗೆಯೇ ರಾಜಸ್ಥಾನ್ ರಾಯಲ್ಸ್ ರಾಬಿನ್ ಉತ್ತಪ್ಪರನ್ನು ಬರಮಾಡಿಕೊಂಡಿತು. ಇನ್ನು ಸ್ಪಿನ್ನರ್ ಪಿಯುಷ್ ಚಾವ್ಲಾ ರನ್ನು ಸಿಎಸ್​ಕೆ ಖರೀದಿಸಿತು.

ಇದೀಗ ಈ ಮೂವರು ಸ್ಟಾರ್ ಕ್ರಿಕೆಟಿಗರನ್ನು ಕೈ ಬಿಟ್ಟಿರುವುದು ಕೆಕೆಆರ್​ ತಂಡಕ್ಕೆ ಮುಳುವಾಗಲಿದೆ ಎಂದೇ ವಿಶ್ಲೇಷಿಸಲಾಗುತ್ತಿದೆ. ಗೌತಮ್ ಗಂಭೀರ್ ನಿರ್ಗಮನದ ನಂತರ ವೈಫಲ್ಯದತ್ತ ಮುಖ ಮಾಡಿರುವ ಕೆಕೆಆರ್ ಮತ್ತಷ್ಟು ಸಂಕಷ್ಟಕ್ಕೆ ಒಳಗಾಗಲಿದೆ ಎನ್ನಲಾಗುತ್ತಿದೆ. ಏಕೆಂದರೆ...

ರಾಬಿನ್ ಉತ್ತಪ್ಪ: ರಾಬಿನ್ ಉತ್ತಪ್ಪ ಅವರು ಕೆಕೆಆರ್ ಪರ ಆರು ವರ್ಷಗಳ ಕಾಲ ಆಡಿದ್ದರು. ಕೆಕೆಆರ್ ಪರ ಆಡುವಾಗ ರಾಬಿನ್ ಉತ್ತಪ್ಪ 84 ಇನ್ನಿಂಗ್ಸ್‌ಗಳಲ್ಲಿ 2400 ಕ್ಕೂ ಹೆಚ್ಚು ರನ್ ಗಳಿಸಿದ್ದಾರೆ. 2014 ರಲ್ಲಿ ಕೆಕೆಆರ್ ಪ್ರಶಸ್ತಿ ಗೆದ್ದ ಸಮಯದಲ್ಲಿ ಉತ್ತಪ್ಪ ಅವರು ಪರ್ಪಲ್ ಕ್ಯಾಪ್ ಪಡೆದಿದ್ದರು. ಒಂದಾರ್ಥದಲ್ಲಿ ಆಂಡ್ರೆ ರಸೆಲ್ ನಂತರದ ಕೆಕೆಆರ್​​ನ ಬ್ಯಾಟಿಂಗ್​ ಬೆನ್ನೆಲುಬಾಗಿ ಉತ್ತಪ್ಪ ಕಾಣಿಸಿಕೊಂಡಿದ್ದರು.

ಕ್ರಿಸ್ ಲಿನ್: ಕೆಕೆಆರ್ ಪರ ಆರಂಭಿಕ ಬ್ಯಾಟ್ಸ್‌ಮನ್ ಆಗಿ ಕ್ರಿಸ್ ಲಿನ್ 40 ಪಂದ್ಯಗಳಲ್ಲಿ 1200 ರನ್ ಗಳಿಸಿದ್ದಾರೆ. ಸುನಿಲ್ ನರೈನ್ ಅವರೊಂದಿಗೆ, ಕೆಕೆಆರ್ ಪರ ಸ್ಪೋಟಕ ಇನಿಂಗ್ಸ್ ಆರಂಭಿಸುತ್ತಿದ್ದರು. ಲಿನ್ ಕೈ ಬಿಟ್ಟ ಬಳಿಕ ಕೆಕೆಆರ್ ತಂಡ ಓಪನರ್ ಆಗಿ ಯಾರು ಕಣಕ್ಕಿಳಿಯಲಿದ್ದಾರೆ ಎಂಬ ಪ್ರಶ್ನೆ ಕೂಡ ಹುಟ್ಟಿಕೊಂಡಿದೆ. ಇತ್ತ ಮುಂಬೈ ಇಂಡಿಯನ್ಸ್ ಪರ ಕ್ರಿಸ್ ಲಿನ್ ಆರಂಭಿಕರಾಗಿ ಬ್ಯಾಟ್ ಬೀಸಲಿದ್ದಾರೆ ಎಂಬ ಮಾತುಗಳು ಜೋರಾಗಿ ಕೇಳಿ ಬರುತ್ತಿದೆ.

ಪಿಯೂಷ್ ಚಾವ್ಲಾ: ಕೋಲ್ಕತಾ ನೈಟ್ ರೈಡರ್ಸ್ ಪರ ಪಿಯುಷ್ ಚಾವ್ಲಾ 66 ವಿಕೆಟ್ ಪಡೆದಿದ್ದಾರೆ. ಅದರಲ್ಲೂ ಈಡನ್ ಗಾರ್ಡನ್‌ನಲ್ಲಿ ಪಿಯೂಷ್ ಉತ್ತಮ ಪ್ರದರ್ಶನ ನೀಡಿದ್ದಾರೆ. ಯುಎಇಯಲ್ಲಿ ನಡೆಯುತ್ತಿರುವ ಈ ಐಪಿಎಲ್ ಸೀಸನ್​ನಲ್ಲಿ ಚಾವ್ಲಾ ಚೆನ್ನೈ ಸೂಪರ್ ಕಿಂಗ್ಸ್ ಪರ ಆಡಲಿದ್ದಾರೆ. ಕೆಕೆಆರ್ ಕೈ ಬಿಟ್ಟರೂ ಯಶಸ್ವಿ ನಾಯಕ ಮಹೇಂದ್ರ ಸಿಂಗ್ ಧೋನಿ ಚಾವ್ಲಾ ಮೇಲೆ ವಿಶ್ವಾಸವಿರಿಸಿದ್ದಾರೆ. ಹೀಗಾಗಿ ಸಿಎಸ್​ಕೆ ಪರ ಮಿಂಚಿದ್ರೆ ಕೆಕೆಆರ್ ಪಶ್ಚಾತ್ತಾಪ ಪಡಬೇಕಾಗಬಹುದು.

ಒಟ್ಟಿನಲ್ಲಿ ಕೆಕೆಆರ್ ತಂಡವು ಮೂವರು ಅನುಭವಿ ಕ್ರಿಕೆಟಿಗರನ್ನು ಒಂದೇ ಸೀಸನ್​ನಲ್ಲಿ ಕೈ ಬಿಟ್ಟಿರುವುದು ತಂಡಕ್ಕೆ ಮುಳುವಾಗಲಿದೆ ಎಂದೇ ವಿಶ್ಲೇಷಿಸಲಾಗುತ್ತಿದ್ದು, ಇದು ನಿಜವಾಗಲಿದೆಯೇ ಕಾದು ನೋಡೋಣ.