IPL 2021: RCB ಖರೀದಿಸಲು ಕಣ್ಣಿಟ್ಟಿರುವ ಐವರು ಆಟಗಾರರು ಇವರೇ..!

ಇಂಡಿಯನ್ ಪ್ರೀಮಿಯರ್ ಲೀಗ್ ಸೀಸನ್ 13 ಮುಕ್ತಾಯದ ಬೆನ್ನಲ್ಲೇ 2021 ರ ಐಪಿಎಲ್ ಸಿದ್ಧತೆಗಳು ಶುರುವಾಗಿದೆ. ಈಗಾಗಲೇ ಬಿಸಿಸಿಐ ಮಾರ್ಚ್-ಮೇ ನಡುವೆ ಐಪಿಎಲ್ 14ನೇ ಆವೃತ್ತಿಯನ್ನು ನಡೆಸುವುದಾಗಿ ಘೋಷಿಸಿದೆ. ಹೀಗಾಗಿ ಅದಕ್ಕೆ ಬೇಕಾದ ತಯಾರಿಗಳನ್ನು ಮಾಡಿಕೊಳ್ಳುವಂತೆ ಫ್ರಾಂಚೈಸಿಗೆ ಸೂಚನೆ ನೀಡಿದೆ.

ಇದರ ಬೆನ್ನಲ್ಲೇ ಈ ಬಾರಿ ಮೆಗಾ ಹರಾಜು ನಡೆಯಲಿದೆ ಎಂಬ ಮಾತುಗಳು ಕೇಳಿ ಬರುತ್ತಿವೆ. ಹೀಗಾಗಿ ಪ್ರತಿ ತಂಡಗಳಲ್ಲಿ ದೊಡ್ಡ ಬದಲಾವಣೆ ಆಗುವ ಸಾಧ್ಯತೆ ಹೆಚ್ಚಿದೆ. ಅದರಲ್ಲೂ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದಲ್ಲೂ ಕೆಲ ಬದಲಾವಣೆ ಮಾಡಿಕೊಳ್ಳುವುದಾಗಿ ಇತ್ತೀಚೆಗೆ ಆರ್​ಸಿಬಿ ನಿರ್ದೇಶಕರು ತಿಳಿಸಿದ್ದರು.

ಅದರಂತೆ ಒಂದೆರೆಡು ತಿಂಗಳಲ್ಲಿ ಹರಾಜು ನಡೆಯಲಿದ್ದು, ಹೀಗಾಗಿ ಹೊಸ ಆಟಗಾರರ ಆಯ್ಕೆ ಬಗ್ಗೆ ಆರ್​ಸಿಬಿ ಚಿಂತಿಸಿದೆ. ಅದರಲ್ಲೂ ತಂಡದಲ್ಲಿರುವ ಹಿರಿಯ ಆಟಗಾರರನ್ನು ಕೈಬಿಟ್ಟು ದೇಶೀಯ ಯುವ ಪ್ರತಿಭೆಗಳಿಗೆ ಅವಕಾಶ ನೀಡಲು ಆರ್​ಸಿಬಿ ಫ್ರಾಂಚೈಸಿ ನಿರ್ಧರಿಸಿದೆ. ಹಾಗೆಯೇ ಈ ಬಾರಿ ವಿಫಲರಾದ ವಿದೇಶಿ ಆಟಗಾರರನ್ನು ಕೈ ಬಿಡಲಿದೆ.

ಬದಲಾಗಿ ಪ್ರಮುಖ 5 ಆಟಗಾರರ ಮೇಲೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಕಣ್ಣಿಟ್ಟಿದೆ ಎಂಬ ಮಾಹಿತಿಯೊಂದು ಹೊರಬಿದ್ದಿದೆ. ಈ ಪಟ್ಟಿಯಲ್ಲಿ ಕನ್ನಡಿಗನಿರುವುದು ವಿಶೇಷ. ಮುಂದಿನ ಹರಾಜಿನಲ್ಲಿ ಆರ್​ಸಿಬಿ ಫ್ರಾಂಚೈಸಿ ಖರೀದಿಸಲು ಬಯಸಿರುವ ಐವರು ಕ್ರಿಕೆಟಿಗರ ಪಟ್ಟಿ ಹೀಗಿದೆ.

ಸುರೇಶ್ ರೈನಾ: ಈಗಾಗಲೇ ರೈನಾ ಚೆನ್ನೈ ಸೂಪರ್ ಕಿಂಗ್ಸ್ ಜೊತೆಗಿನ ಒಪ್ಪಂದವನ್ನು ರದ್ದು ಮಾಡಿದ್ದಾರೆ. ಹೀಗಾಗಿ ಮುಂದಿನ ಬಿಡ್ಡಿಂಗ್​ನಲ್ಲಿ ಎಲ್ಲಾ ಫ್ರಾಂಚೈಸಿಗಳು ಎಡಗೈ ದಾಂಡಿಗನನ್ನು ಖರೀದಿಸಲು ಪೈಪೋಟಿ ನಡೆಸಲಿದೆ. ಹಾಗೆಯೇ ತಂಡದ ಮಧ್ಯಮ ಕ್ರಮಾಂಕವನ್ನು ಬಲಪಡಿಸಲು ಸುರೇಶ್ ರೈನಾ ಅವರನ್ನು ತನ್ನ ತೆಕ್ಕೆಗೆ ತೆಗೆದುಕೊಳ್ಳಲು ಆರ್​ಸಿಬಿ ಯೋಚಿಸಿದೆ. ಹೀಗಾಗಿ ರೈನಾ ಅವರನ್ನು ಖರೀದಿಸಲು ಬೆಂಗಳೂರು ಫ್ರಾಂಚೈಸಿ ಹೆಚ್ಚಿನ ಒಲವು ತೋರಲಿದೆ. ಇದರ ಹೊರತಾಗಿ ಐಪಿಎಲ್​ನಲ್ಲಿ 9ನೇ ಟೀಮ್ ಕೂಡ ಇರಲಿದ್ದು, ಹೊಸ ಫ್ರಾಂಚೈಸಿ ರೈನಾ ಅವರನ್ನು ನಾಯಕರನ್ನಾಗಿಸುವ ಯೋಜನೆಯಲ್ಲಿದೆ. ಹೀಗಾಗಿ ಆರ್​ಸಿಬಿ ಪಾಲಿಗೆ ಸುರೇಶ್ ರೈನಾ ಸಿಗಲಿದ್ದಾರಾ ಎಂಬುದೇ ಯಕ್ಷ ಪ್ರಶ್ನೆ.

ಕ್ರಿಸ್ ಲಿನ್: ಕೊಲ್ಕತ್ತಾ ನೈಟ್ ರೈಡರ್ಸ್ ಪರ ಸಿಡಿಲಬ್ಬರ ಬ್ಯಾಟಿಂಗ್ ಮೂಲಕ ಗಮನ ಸೆಳೆದಿದ್ದ ಕ್ರಿಸ್ ಲಿನ್ ಈ ಬಾರಿ ಮುಂಬೈ ಇಂಡಿಯನ್ಸ್ ತಂಡದಲ್ಲಿ ಕಾಣಿಸಿಕೊಂಡಿದ್ದರು. ಆದರೆ ಕ್ವಿಂಟನ್ ಡಿ ಕಾಕ್ ಅವರ ಅದ್ಭುತ ಪ್ರದರ್ಶನದಿಂದ ಒಂದೇ ಒಂದು ಪಂದ್ಯದಲ್ಲೂ ಆರಂಭಿಕರಾಗಿ ಕಣಕ್ಕಿಳಿಯಲಾಗಿರಲಿಲ್ಲ. ಹೀಗಾಗಿ ಮುಂದಿನ ಸೀಸನ್​ನಲ್ಲಿ ಮುಂಬೈ ಕ್ರಿಸ್ ಲಿನ್​ ಅವರನ್ನು ಬಿಡುಗಡೆ ಮಾಡುವುದು ಬಹುತೇಕ ಖಚಿತ. ಇತ್ತ ಸ್ಪೋಟಕ ಆರಂಭಿಕನ ಹುಡುಕಾಟದಲ್ಲಿರುವ ರಾಯಲ್ ಚಾಲೆಂಜರ್ಸ್​ ಬೆಂಗಳೂರು ತಂಡದ ಮೊದಲ ಆಯ್ಕೆ ಕ್ರಿಸ್ ಲಿನ್ ಆಗಿರಲಿದೆ.

ಮನೀಶ್ ಪಾಂಡೆ: ಮಾಜಿ ಆರ್​ಸಿಬಿ ಆಟಗಾರ ಮನೀಶ್ ಪಾಂಡೆ ಸದ್ಯ ಸನ್​ರೈಸರ್ಸ್ ಹೈದರಾಬಾದ್ ತಂಡದ ಆಟಗಾರ. ಮುಂದಿನ ಸೀಸನ್​ನಲ್ಲಿ ಡೇವಿಡ್ ವಾರ್ನರ್, ಕೇನ್ ವಿಲಿಯಮ್ಸನ್ ಹಾಗೂ ರಶೀದ್ ಖಾನ್​ರನ್ನು ಸನ್​ರೈಸರ್ಸ್ ಬಿಟ್ಟು ಕೊಡುವುದು ಬಹುತೇಕ ಅನುಮಾನ. ಅಲ್ಲದೆ ಬೌಲರ್​ಗಳಾಗಿ ಸಂದೀಪ್ ಶರ್ಮಾ ಹಾಗೂ ಭುವನೇಶ್ವರ್ ಕುಮಾರ್ ಅವರನ್ನು ಉಳಿಸಿಕೊಳ್ಳುವ ಸಾಧ್ಯತೆಯಿದೆ. ಹೀಗಾಗಿ ಹರಾಜಿನಲ್ಲಿ ಪಾಂಡೆ ಲಭ್ಯವಾಗಲಿದ್ದಾರೆ ಎಂಬುದು ಫ್ರಾಂಚೈಸಿಗಳ ಲೆಕ್ಕಚಾರ. ಹೀಗಾಗಿ ಆರ್​ಸಿಬಿ ತಂಡದ ಮಧ್ಯಮ ಕ್ರಮಾಂಕವನ್ನು ಬಲಪಡಿಸಲು ಮನೀಶ್ ಪಾಂಡೆಯ ಖರೀದಿಗೆ ಬೆಂಗಳೂರು ತಂಡದ ಮಾಲೀಕರು ಹೆಚ್ಚಿನ ಒಲವು ಹೊಂದಿದ್ದಾರೆ.

ಮಿಚೆಲ್ ಸ್ಟಾರ್ಕ್: ಈ ಹಿಂದೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಪರ ಆಡಿದ್ದ ಮಿಚೆಲ್ ಸ್ಟಾರ್ಕ್ ಮುಂದಿನ ಸೀಸನ್​ನಲ್ಲಿ ಐಪಿಎಲ್ ಆಡುವ ಸಾಧ್ಯತೆಯಿದೆ. 2020ರ ಹರಾಜಿನಲ್ಲೇ ಸ್ಟಾರ್ಕ್​ ಖರೀದಿಗೆ ಆರ್​ಸಿಬಿ ಬಿಗ್ ಪ್ಲ್ಯಾನ್ ಹಾಕಿಕೊಂಡಿತ್ತು. ಆದರೆ ಆಸೀಸ್ ವೇಗಿ ಟೂರ್ನಿಯಿಂದ ಹಿಂದೆ ಸರಿದಿದ್ದರು. ಇದೀಗ ಮತ್ತೆ ಆಸ್ಟ್ರೇಲಿಯಾ ಹಾಗೂ ಬಿಗ್​ ಬ್ಯಾಷ್​ ಲೀಗ್​ಗೆ ಸ್ಟಾರ್ಕ್ ಮರಳಿದ್ದಾರೆ. ಹೀಗಾಗಿ ಮುಂದಿನ ಐಪಿಎಲ್​ನಲ್ಲಿ ಕಾಣಿಸಿಕೊಳ್ಳುವುದು ಬಹುತೇಕ ಖಚಿತ. ಇತ್ತ ಆರ್​ಸಿಬಿ ಡೇಲ್ ಸ್ಟೇನ್ ಅವರನ್ನು ಕೈ ಬಿಡಲಿರುವುದು ಕನ್ಫರ್ಮ್. ಹೀಗಾಗಿ ತಂಡದ ಪ್ರಮುಖ ವೇಗಿಯಾಗಿ ಮಿಚೆಲ್ ಸ್ಟಾರ್ಕ್​ರನ್ನು ಖರೀದಿಸಲು ಆರ್​ಸಿಬಿ ಹೆಚ್ಚಿನ ಹಣ ವ್ಯಯಿಸುವ ಸಾಧ್ಯತೆಯಿದೆ.

ಇಶಾನ್ ಕಿಶನ್: ಮುಂಬೈ ಇಂಡಿಯನ್ಸ್ ತಂಡದ ಪಾಕೆಟ್ ಡೈನಾಮೋ ಇಶಾನ್ ಕಿಶನ್ ಅವರು ಕೂಡ ಹರಾಜಿಗೆ ಲಭ್ಯರಾಗಲಿದ್ದಾರೆ. ಏಕೆಂದರೆ ರೋಹಿತ್ ಶರ್ಮಾ, ಜಸ್​ಪ್ರೀತ್ ಬುಮ್ರಾ, ಪೊಲಾರ್ಡ್​​, ಸೂರ್ಯಕುಮಾರ್ ಯಾದವ್ ಹಾಗೂ ಹಾರ್ದಿಕ್ ಪಾಂಡ್ಯರನ್ನು ಮುಂಬೈ ಉಳಿಸಿಕೊಳ್ಳಲಿದೆ. ಹೀಗಾಗಿ ಪಾಕೆಟ್ ಡೈನಾಮೋವನ್ನು ತನ್ನ ತೆಕ್ಕೆಗೆ ತೆಗೆದುಕೊಳ್ಳಲು ಆರ್​ಸಿಬಿ ಆಸಕ್ತಿ ಹೊಂದಿದೆ. ಇದರಿಂದ ಡೆತ್ ಓವರ್​ ಸ್ಪೆಷಲಿಸ್ಟ್ ಅಥವಾ ಆರಂಭಿಕರಾಗಿ ಇಶಾನ್ ಕಿಶನ್ ಅವರನ್ನು ಬಳಸಿಕೊಳ್ಳಬಹುದು ಎಂಬುದು ಆರ್​ಸಿಬಿಯ ಲೆಕ್ಕಚಾರ. ಒಟ್ಟಿನಲ್ಲಿ 2021ರಲ್ಲಿ ಕಪ್ ತನ್ನದಾಗಿಸಿಕೊಳ್ಳಲು ಆರ್​ಸಿಬಿ ಫ್ರಾಂಚೈಸಿ ಈಗಾಗಲೇ ಸಕಲ ಸಿದ್ಧತೆಯಲ್ಲಿದ್ದು, ಅಂತಿಮವಾಗಿ ಯಾರು ತಂಡದಿಂದ ಹೊರಬೀಳಲಿದ್ದಾರೆ. ಯಾರು ಸಿಗಲಿದೆ ಎಂಬುದನ್ನು ಕಾದು ನೋಡಬೇಕಿದೆ.