IPL​ ಇನಿಂಗ್ಸ್​ ಒಂದರಲ್ಲಿ ಅತ್ಯಧಿಕ ಸಿಕ್ಸ್ ಬಾರಿಸಿದ ಬ್ಯಾಟ್ಸ್​ಮನ್​ಗಳ ಪಟ್ಟಿ ಇಲ್ಲಿದೆ..!

ರಂಗು ರಂಗಿನ ಕ್ರಿಕೆಟ್​ ಟೂರ್ನಿ ಐಪಿಎಲ್  14ನೇ ಸೀಸನ್​ ರಂಗೇರಲು ದಿನಗಣನೆಗೆ ಶುರುವಾಗಿದೆ. ಈಗಾಗಲೇ  ಎಲ್ಲಾ ತಂಡಗಳು ಅಭ್ಯಾಸದಲ್ಲಿ ನಿರತವಾಗಿದೆ.

ಈ ಬಾರಿ ಮೈದಾನದಲ್ಲಿ ಮಾತ್ರ  ಐಪಿಎಲ್ ನಡೆಯುತ್ತಿರುವುದರಿಂದ ಮತ್ತಷ್ಟು ರೋಚಕ ಕಾದಾಟಕ್ಕೆ ಸಾಕ್ಷಿಯಾಗಲಿದೆ.

ಭಾರತ ಪಿಚ್​ಗಳು ಬ್ಯಾಟಿಂಗ್​ಗೆ ಸಹಕಾರಿಯಾಗಿದ್ದು, ಹೀಗಾಗಿ ಬ್ಯಾಟ್ಸ್​​ಮನ್​ಗಳು ಈ ಬಾರಿ  ಕೂಡ ಮಿಂಚುವ ಸಾಧ್ಯತೆಯಿದೆ.

ಇತ್ತ ಬೌಲರುಗಳ ವಿರುದ್ಧ ಪಾರುಪತ್ಯ ಸಾಧಿಸುವ ಕೆಲ ಬ್ಯಾಟ್ಸ್​ಮನ್​ಗಳು  ಸಿಕ್ಸರ್​ಗಳ ಸುರಿಮಳೆ  ಸುರಿಸುವ ನಿರೀಕ್ಷೆಯಿದೆ. ಈಗಾಗಲೇ ಸಿಕ್ಸರ್ ಮೂಲಕ ಐಪಿಎಲ್​ನಲ್ಲಿ ಅನೇಕ ಆಟಗಾರರು ಗಮನ ಸೆಳೆದಿದ್ದಾರೆ. ಅದರಲ್ಲೂ ಒಂದೇ ಇನಿಂಗ್ಸ್​ನಲ್ಲಿ ಅತ್ಯಧಿಕ ಸಿಕ್ಸ್ ಬಾರಿಸಿದ ದಾಖಲೆ ಬರೆದ ಟಾಪ್ 5 ಆಟಗಾರರ ಪರಿಚಯ ಇಲ್ಲಿದೆ.

5- ಕ್ರಿಸ್ ಗೇಲ್ : 2012 ರಲ್ಲಿ ಗೇಲ್ ಕಿಂಗ್ಸ್ ಇಲೆವೆನ್ ವಿರುದ್ಧ 12 ಸಿಕ್ಸ್ ಸಿಡಿಸಿ 117 ರನ್ ಬಾರಿಸಿದ್ದರು.

4- ಎಬಿ ಡಿವಿಲಿಯರ್ಸ್​: 2016 ರಲ್ಲಿ ಗುಜರಾತ್ ಲಯನ್ಸ್ ವಿರುದ್ದ ಎಬಿಡಿ 129 ರನ್ ಬಾರಿಸಿದ್ದರು. ಇದರಲ್ಲಿ 12 ಸಿಕ್ಸರ್​ಗಳು ಮೂಡಿಬಂದಿದ್ದವು.

3- ಕ್ರಿಸ್ ಗೇಲ್: 2012ರಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ನಡೆದ ಪಂದ್ಯದಲ್ಲಿ ಗೇಲ್ 13 ಸಿಕ್ಸರ್​ಗಳೊಂದಿಗೆ 128 ರನ್ ಚಚ್ಚಿದ್ದರು.

2- ಬ್ರೆಂಡನ್ ಮೆಕಲಂ: 2008 ರ ಐಪಿಎಲ್​ನ ಮೊದಲ ಪಂದ್ಯದಲ್ಲಿ ಮೆಕಲಂ ಆರ್​ಸಿಬಿ ವಿರುದ್ಧ ಸಿಡಿಲಬ್ಬರ ಬ್ಯಾಟಿಂಗ್ ಮೂಲಕ 158 ಬಾರಿಸಿದ್ದರು. ಇದರಲ್ಲಿ 13 ಸಿಕ್ಸ್​ಗಳು ಸಿಡಿದಿದ್ದವು.

1- ಕ್ರಿಸ್ ಗೇಲ್: ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ  2013 ರಲ್ಲಿ ಪುಣೆ ವಾರಿಯರ್ಸ್ ವಿರುದ್ಧ ನಡೆದ ಪಂದ್ಯದಲ್ಲಿ ಗೇಲ್ ಹೊಸ ಇತಿಹಾಸ ಬರೆದಿದ್ದರು. ಪುಣೆ ಬೌಲರುಗಳನ್ನು ಬೆಂಡೆತ್ತಿದ್ದ ಗೇಲ್ 66 ಎಸೆತಗಳಲ್ಲಿ 175 ರನ್ ಬಾರಿಸಿದ್ದರು. ಈ ಭರ್ಜರಿ ಇನಿಂಗ್ಸ್​ನಲ್ಲಿ ಮೂಡಿ ಬಂದಿದ್ದು ಬರೋಬ್ಬರಿ 17 ಸಿಕ್ಸರ್​ಗಳು. ಇದು ಐಪಿಎಲ್​ನಲ್ಲಿ ದಾಖಲೆಯಾಗಿ ಉಳಿದಿದೆ.