IPL 2021: CSK ತಂಡದಿಂದ ಹೊರಬೀಳಲಿದ್ದಾರೆ ಈ 5 ಆಟಗಾರರು..!

ಇಂಡಿಯನ್ ಪ್ರೀಮಿಯರ್ ಲೀಗ್​ 2020 ಸೀಸನ್​ನಲ್ಲಿನ ಹೀನಾಯ ಪ್ರದರ್ಶನದ ಬಳಿಕ ಚೆನ್ನೈ ಸೂಪರ್ ಕಿಂಗ್ಸ್ ಎಚ್ಚೆತ್ತುಕೊಂಡಿದೆ. ಕಳೆದ 13 ಸೀಸನ್​ಗಳಲ್ಲಿ ಹಿರಿಯ ಆಟಗಾರರಿಗೆ ಮಣೆಹಾಕಿದ್ದ ಸಿಎಸ್​ಕೆ ಈ ಬಾರಿ ಯುವ ಆಟಗಾರರತ್ತ ಗಮನ ಹರಿಸಲಿದೆ.

ಐಪಿಎಲ್ ಸೀಸನ್ 13ನಲ್ಲಿ ಪ್ಲೇ ಆಫ್ ಪ್ರವೇಶಿಸಲು ವಿಫಲರಾಗಿದ್ದ ಸಿಎಸ್​ಕೆ ತಂಡವು ಭಾರೀ ಟೀಕೆಗೆ ಒಳಗಾಗಿತ್ತು. ಅದರಲ್ಲೂ ತಂಡದಲ್ಲಿದ್ದ ಹಿರಿಯ ಆಟಗಾರರ ಪ್ರದರ್ಶನದ ಬಗ್ಗೆ ಫ್ರಾಂಚೈಸಿ ಅಸಮಾಧಾನ ವ್ಯಕ್ತಪಡಿಸಿತ್ತು. ಹೀಗಾಗಿಯೇ ಡ್ಯಾಡೀಸ್ ಆರ್ಮಿಯಿಂದ ಬಹುತೇಕ ಹಿರಿಯ ಆಟಗಾರರನ್ನು ಸಿಎಸ್​ಕೆ ಕೈ ಬಿಡಲಿದೆ.

ಅದರಂತೆ ಚೆನ್ನೈ ತಂಡದಿಂದ ಹೊರಬೀಳಲಿರುವ ಭಾರತೀಯ ಆಟಗಾರರು ಯಾರು ಎಂದು ನೋಡುವುದಾದರೆ...

#5 ಪಿಯೂಷ್ ಚಾವ್ಲಾ: ಕಳೆದ ಸೀಸನ್​ನಲ್ಲಿ ಸಿಎಸ್​ಕೆ ತಂಡವು ಪಿಯೂಷ್ ಚಾವ್ಲಾ ಅವರಿಗೆ ನೀಡಿದ್ದು ಬರೋಬ್ಬರಿ 6.75 ಕೋಟಿ. ಆದರೆ 7 ಪಂದ್ಯಗಳಲ್ಲಿ ಕಣಕ್ಕಿಳಿದ ಚಾವ್ಲಾ ಪಡೆದಿದ್ದು ಕೇವಲ 6 ವಿಕೆಟ್ ಮಾತ್ರ. ಹೀಗಾಗಿ ಧೋನಿ ಪಡೆಯಿಂದ ಚಾವ್ಲಾ ಹೊರಬೀಳುವುದು ಬಹುತೇಕ ಖಚಿತ.

#4 ಮುರಳಿ ವಿಜಯ್: ಕಳೆದ ಸೀಸನ್​ನಲ್ಲಿ ಚೆನ್ನೈ ಪರ ಮೂರು ಇನಿಂಗ್ಸ್​ ಆಡಿದ್ದ ಮುರಳಿ ವಿಜಯ್ ಕೇವಲ 32 ರನ್​ ಮಾತ್ರ ಕಲೆಹಾಕಿದ್ದರು. ಆದರೆ ಸಿಎಸ್​ಕೆ ಫ್ರಾಂಚೈಸಿ 36 ವರ್ಷದ ವಿಜಯ್​ಗೆ ನೀಡಿರುವುದು 2 ಕೋಟಿ ರೂ. ಕಳೆದ ಸೀಸನ್​ನಲ್ಲಿ ವಿಫಲರಾಗಿರುವ ಮುರಳಿ ವಿಜಯ್​ ಅವರನ್ನು ಸಹ ಸಿಎಸ್​ಕೆ ಈ ಬಾರಿ ಕೈ ಬಿಡಲಿದೆ.

#3 ಹರ್ಭಜನ್ ಸಿಂಗ್​: ಸಿಎಸ್​ಕೆ ಪರ 2 ಕೋಟಿ ರೂ. ಮೊತ್ತಕ್ಕೆ ಆಡುತ್ತಿರುವ ಹರ್ಭಜನ್ ಸಿಂಗ್ ವೈಯುಕ್ತಿಕ ಕಾರಣಗಳಿಂದಾಗಿ ಐಪಿಎಲ್ ಸೀಸನ್ 13ನಲ್ಲಿ ಭಾಗವಹಿಸಿರಲಿಲ್ಲ. ಇದೀಗ ಭಜ್ಜಿಗೆ 40 ವರ್ಷ. ಹೀಗಾಗಿ ಹಿರಿಯ ಸ್ಪಿನ್ನರ್​ನ್ನು ಚೆನ್ನೈ ಸೂಪರ್ ಕಿಂಗ್ಸ್ ತಂಡದಲ್ಲಿ ಉಳಿಸಿಕೊಳ್ಳುವುದು ಅನುಮಾನ.

#2 ಮೋನು ಕುಮಾರ್: ಚೆನ್ನೈ ಸೂಪರ್ ಕಿಂಗ್ಸ್ ಪರ ಕಳೆದ ಸೀಸನ್​ನಲ್ಲಿ ಕಣಕ್ಕಿಳಿದಿದ್ದ ಮೋನು ಕುಮಾರ್ ಕಳಪೆ ಪ್ರದರ್ಶನದ ಮೂಲಕ ಭಾರೀ ಟ್ರೋಲ್​ಗೆ ಒಳಗಾಗಿದ್ದರು. ಮೂಲ ಬೆಲೆ ರೂ. 20 ಲಕ್ಷ. ರೂ.ನಲ್ಲಿ ತಂಡದಲ್ಲಿದ್ದ ಮೋನು ಐಪಿಎಲ್ 2020ಯಲ್ಲಿ ಆಡಿದ್ದು ಒಂದು ಪಂದ್ಯ ಮಾತ್ರ. ಹೀಗಾಗಿ ಮೋನು ಕುಮಾರ್ ಅವರನ್ನು ಸಹ ಸಿಎಸ್​ಕೆ ಕೈಬಿಡಲಿದೆ.

#1 ಕೇದರ್ ಜಾಧವ್: ಸಿಎಸ್​ಕೆ ಫ್ರಾಂಚೈಸಿಯು ಕೇದರ್ ಜಾಧವ್​ ಅವರನ್ನು ಖರೀದಿಸಿದ್ದು ಬರೋಬ್ಬರಿ 7.8 ಕೋಟಿ ರೂ.ಗೆ ಎಂದರೆ ನಂಬಲೇಬೇಕು. 2019 ರಲ್ಲಿ 14 ಪಂದ್ಯಗಳನ್ನಾಡಿದ್ದ ಜಾಧವ್ ಕಲೆಹಾಕಿದ್ದು ಮಾತ್ರ 162 ರನ್​ಗಳು. ಇದಾಗ್ಯೂ 2020 ರಲ್ಲೂ ಸಿಎಸ್​ಕೆ ಕೇದರ್ ಜಾಧವ್ ಅವರನ್ನು ಉಳಿಸಿಕೊಂಡಿತ್ತು. ಆದರೆ ಕಳೆದ ಸೀಸನ್​ನಲ್ಲಿ 8 ಪಂದ್ಯಗನ್ನಾಡಿದ ಜಾಧವ್ ಬರೀ 62 ರನ್ ಗಳಿಸಿ ಹೀನಾಯ ಪ್ರದರ್ಶನ ನೀಡಿದ್ದರು. ಹೀಗಾಗಿ ಕೇದರ್ ಜಾಧವ್ ಅವರನ್ನೂ ಸಹ ಚೆನ್ನೈ ಸೂಪರ್ ಕಿಂಗ್ಸ್ ಕೈ ಬಿಡಲಿರುವುದು ಬಹುತೇಕ ಖಚಿತ.