IPL 2021 Auction: ಬದಲಾವಣೆಯತ್ತ ಮೊದಲ ಹೆಜ್ಜೆಯಿಟ್ಟ CSK: ಟ್ರೇಡ್​ನಲ್ಲಿ 3 ಸ್ಟಾರ್ ಆಟಗಾರರು ಚೆನ್ನೈ ಪಾಲು?

13ನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್ ಲೀಗ್​ನಲ್ಲಿ ಟೂರ್ನಿಯಿಂದ ಮೊದಲು ಹೊರಬಿದ್ದ ತಂಡ ಚೆನ್ನೈ ಸೂಪರ್ ಕಿಂಗ್ಸ್. ಧೋನಿ ತಂಡದ ಪಾಲಿಗೆ ಈ ಬಾರಿ ಅತ್ಯಂತ ಕಳಪೆ ಐಪಿಎಲ್ ಆಗಿತ್ತು. 14 ಪಂದ್ಯಗಳಲ್ಲಿ ಜಯ ಸಾಧಿಸಿದ್ದು ಕೇವಲ 7ರಲ್ಲಿ.

ಹೀಗಾಗಿ ಮುಂದಿನ ಆವೃತ್ತಿಗೆ ಚೆನ್ನೈ ತನ್ನ ತಂಡದಲ್ಲಿ ಮಹತ್ವದ ಬದಲಾವಣೆ ಮಾಡಲು ಮುಂದಾಗಿದೆ. ಈ ಹಿಂದೆ ಹೇಳಿರುವಂತೆ ಹಿರಿಯ ಆಟಗಾರರಿಗೆ ಗೇಟ್​ಪಾಸ್ ಕೊಟ್ಟು ಯುವಕರಿಗೆ ಮಣೆಹಾಕಲು ಚೆನ್ನೈ ಮುಂದಾಗಿದೆ.

ಸುರೇಶ್ ರೈನಾ ಹಾಗೂ ಹರ್ಭಜನ್ ಸಿಂಗ್ ಅಲಭ್ಯತೆ ಈ ಬಾರಿ ಸಿಎಸ್​ಕೆಗೆ ದೊಡ್ಡ ಹಿನ್ನಡೆಯಾಗಿದ್ದು ನಿಜ. ಆದರೆ, ಶೇನ್ ವಾಟ್ಸನ್, ಡುಪ್ಲೆಸಿಸ್, ಧೋನಿ, ಜಡೇಜಾರಂತಹ ಅನುಭವಿಗಳಿದ್ದರೂ ವಿಫಲವಾಯಿತು.

ಐಪಿಎಲ್ ಮುಗಿದ ಬೆನ್ನಲ್ಲೆ ವಾಟ್ಸನ್ ಕ್ರಿಕೆಟ್​ಗೆ ಸಂಪೂರ್ಣ ವಿದಾಯ ಘೋಷಿಸಿದರು. ಹೀಗಾಗಿ ಇವರ ಜಾಗಕ್ಕೆ ಮುಂಬೈ ತಂಡದಲ್ಲಿರುವ ಕ್ರಿಸ್ ಲಿನ್ ಅವರನ್ನು ಟ್ರೇಡ್ ಮಾಡಲು ಮುಂದಾಗಬಹುದು ಎಂದು ಹೇಳಲಾಗಿದೆ.

ಕ್ರಿಸ್ ಲಿನ್ ಐಪಿಎಲ್ 2020ರಲ್ಲಿ ಮುಂಬೈ ಇಂಡಿಯನ್ಸ್ ಪಾಲಾಗಿದ್ದರು. ಆದರೆ, ಇವರಿಗೆ ಒಂದೇ ಒಂದು ಪಂದ್ಯದಲ್ಲಿ ಆಡಲು ಅವಕಾಶ ನೀಡಲಿಲ್ಲ. ಇತ್ತ ಸಿಎಸ್​ಕೆ ತಂಡದ ಪರ ರುತುರಾಜ್ ಗಾಯಕ್ವಾಡ್ ಜೊತೆ ಸ್ಫೋಟಕ ಆರಂಭ ಒದಗಿಸುವ ಆಟಗಾರನ ಅವಶ್ಯತೆಯಿದೆ. ಹೀಗಾಗಿ ಲಿನ್ ಚೆನ್ನೈ ಪಾಲಾದರೆ ಅಚ್ಚರಿಯಿಲ್ಲ.

ಸಿಎಸ್​ಕೆಯ ಸ್ಪಿನ್ ವಿಭಾಗ ಈ ಬಾರಿ ತುಂಬಾ ದುರ್ಬಲವಾಗಿತ್ತು. 6.75 ಕೋಟಿ ನೀಡಿ ಖರೀದಿ ಮಾಡಿದ ಪಿಯೂಷ್ ಚಾವ್ಲಾ ಪರಿಣಾಮಕಾರಿಯಾಗಿ ಗೋಚರಿಸಿಲ್ಲ. ಹೀಗಾಗಿ ರಾಜಸ್ಥಾನ್ ತಂಡದಲ್ಲಿರುವ ಮಯಾಂಕ್ ಮಾರ್ಕಂಡೆ ಅವರನ್ನು ಬದಲಾವಣೆ ನಿಯಮದಡಿಯಲ್ಲಿ ಚೆನ್ನೈ ಕೊಂಡುಕೊಳ್ಳಬಹುದು.

ಸಿಎಸ್​ಕೆ ತಂಡಕ್ಕೆ ಆಲ್ರೌಂಡರ್ ಅಗತ್ಯ ತುಂಬಾನೆ ಇದೆ. ಹೀಗಾಗಿ ಸನ್​ರೈಸರ್ಸ್ ಹೈದರಾಬಾದ್ ತಂಡದಲ್ಲಿರುವ ಅಫ್ಘಾನ್ ಆಟಗಾರ ಮೊಹಮ್ಮದ್ ನಬಿ ಅವರನ್ನು ಟ್ರೇಡ್ ಮಾಡುವತ್ತ ಚೆನ್ನೈ ಕಣ್ಣು ಹಾಯಿಸುವ ಸಾಧ್ಯತೆ ಹೆಚ್ಚಿದೆ.

13ನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಗೆ ತೆರೆ ಬಿದ್ದ ಬೆನ್ನಲ್ಲೆ ಐಪಿಎಲ್ 2021ರ ಸುದ್ದಿ ಗರಿಗೆದರಿದೆ. ಬಿಸಿಸಿಐ ಕೂಡ 14ನೇ ಆವೃತ್ತಿ ಐಪಿಎಲ್​ನ ಸಿದ್ಧತೆಯಲ್ಲಿದ್ದು ಕೆಲ ಮಾಹಿತಿಯನ್ನು ಹೊರಹಾಕಿದೆ.

ಈಗಾಗಲೇ ಮುಂದಿನ ಐಪಿಎಲ್ನಲ್ಲಿ ಒಟ್ಟು 9 ತಂಡಗಳನ್ನು ಕಣಕ್ಕಿಳಿಸುವ ಬಗ್ಗೆ ಚರ್ಚೆ ನಡೆಯುತ್ತಿದೆ. ಇದರ ಜೊತೆಗೆ ತಂಡದ ಆಡುವ ಬಳಗದಲ್ಲಿ ವಿದೇಶಿ ಕ್ರಿಕೆಟಿಗರ ಸಂಖ್ಯೆಯನ್ನು ಹೆಚ್ಚಿಸುವ ಬಗ್ಗೆ ಬಿಸಿಸಿಐ ಚಿಂತನೆ ನಡೆಸುತ್ತಿದೆ.

ಈಗಿರುವ 8 ತಂಡಗಳ ಜತೆಗೆ ಒಂದು ಹೊಸ ತಂಡಗಳನ್ನು ಸೇರಿಸಲು ಈಗಿರುವ ತಂಡಗಳಿಂದ ವಿರೋಧ ವ್ಯಕ್ತವಾಗಬಹುದು ಎಂಬ ಭೀತಿ ಉಂಟಾದ ಹಿನ್ನಲೆಯಲ್ಲಿ ತಂಡಗಳ ಮನವೊಲಿಸಲು ಆಡುವ ಬಳಗದಲ್ಲಿ ಐವರು ವಿದೇಶಿ ಆಟಗಾರರನ್ನು ಕಣಕ್ಕಿಳಿಸುವತ್ತ ಚಿತ್ತ ನೆಟ್ಟಿದೆ.