IPL 2021: ಈ ಮೂರು ಶ್ರೇಷ್ಠ ದಾಖಲೆಗಳನ್ನು ಮುರಿಯುವವರು ಯಾರು?

ಐಪಿಎಲ್ ಆರಂಭಕ್ಕೆ ದಿನಗಣನೆ ಶುರುವಾಗಿದೆ. ಅದರೊಂದಿಗೆ ತಂಡಗಳ ಬಲಾಬಲ ಮತ್ತು ಸಾಮರ್ಥ್ಯದ ಬಗೆಗಿನ ಚರ್ಚೆಗಳು ಕೂಡ ಆರಂಭವಾಗಿದೆ. ಈ ಬಾರಿ  ಭಾರತದಲ್ಲೇ ಪಂದ್ಯಾವಳಿ ನಡೆಯುವುದರಿಂದ ಅನೇಕ ಹೊಸತನಗಳನ್ನು ನಿರೀಕ್ಷಿಸಬಹುದು.

ಭಾರತದ ಪಿಚ್​ಗಳಲ್ಲಿ ಬಿರುಗಾಳಿಯ ಬ್ಯಾಟಿಂಗ್, ಬೌಂಡರಿ ಮತ್ತು ಸಿಕ್ಸರ್​ಗಳ ಸುರಿಮಳೆಯಾಗುವ ಸಾಧ್ಯತೆಯಿದೆ. ಅದರ ಜೊತೆ ಬೌಲಿಂಗ್ ವಿಭಾಗವು ಕೂಡ ಈ ಬಾರಿ ಇಡೀ ಪಂದ್ಯಾವಳಿ ಮೇಲೆ ಪ್ರಭಾವ ಬೀರಲಿದೆ ಎಂಬ ಅಭಿಪ್ರಾಯಗಳು ಸಹ ಬಲವಾಗಿ ಕೇಳಿ ಬರುತ್ತಿವೆ. ಅದರಲ್ಲೂ  ಈ ಬಾರಿಯ ಐಪಿಎಲ್​ ಹೊಸ ಹೊಸ ದಾಖಲೆಗಳಿಗೆ ಸಾಕ್ಷಿಯಾಗಲಿದೆ ಎನ್ನಲಾಗುತ್ತಿದೆ.

ಐಪಿಎಲ್​ನಲ್ಲಿ ಕಳೆದ ಒಂದು ದಶಕದ ಅವಧಿಯಲ್ಲಿ ಅನೇಕ ರೆಕಾರ್ಡ್​ಗಳು ಮೂಡಿಬಂದಿದೆ. ಈ ದಾಖಲೆಗಳಲ್ಲಿ ಕೆಲವೊಂದು ದಾಖಲೆಗಳು ಅಚ್ಚರಿಯ ಮತ್ತು ಅತ್ಯಂತ ಶ್ರೇಷ್ಠ ರೆಕಾರ್ಡ್ ಪಟ್ಟಿಯಲ್ಲಿ ಸ್ಥಾನ ಪಡೆದುಕೊಂಡಿವೆ. ಅಂತಹ ಮೂರು ದಾಖಲೆಗಳು ಯಾವುವು? ಎಂದು ನೋಡೋಣ...

ವಿರಾಟ್ ಕೊಹ್ಲಿ ಬ್ಯಾಟಿಂಗ್ ದಾಖಲೆ:

ಐಪಿಎಲ್ ಇತಿಹಾಸದಲ್ಲೇ ಸೀಸನ್​ವೊಂದರಲ್ಲಿ ಅತ್ಯಧಿಕ ರನ್ ಬಾರಿಸಿದ ದಾಖಲೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ನಾಯಕ ವಿರಾಟ್ ಕೊಹ್ಲಿ ಹೆಸರಿನಲ್ಲಿದೆ. 2016ರಲ್ಲಿ ನಡೆದ ಐಪಿಎಲ್​ನಲ್ಲಿ ಕೊಹ್ಲಿ ಸಿಡಿಲಬ್ಬರದ ಬ್ಯಾಟಿಂಗ್ ಮೂಲಕ ಒಟ್ಟಾರೆ ಸೀಸನ್​ನಲ್ಲಿ ಗಳಿಸಿದ್ದು 973 ರನ್​ಗಳು. ಕೊಹ್ಲಿಯ ಈ ಏಕಾಂಗಿ ಪ್ರದರ್ಶನದ ಹೊರತಾಗಿಯೂ ಆರ್​ಸಿಬಿಗೆ ಫೈನಲ್​ ಗೆಲ್ಲಲಾಗಲಿಲ್ಲ. ಹಾಗೆಯೇ ಕಳೆದ ಮೂರು ಸೀಸನ್​ಗಳಿಂದಲೂ ಈ ದಾಖಲೆಯ ಅಸುಪಾಸಿನಲ್ಲಿ ಯಾವುದೇ ಬ್ಯಾಟ್ಸ್​ಮನ್​ ರನ್​ಗಳಿಸಿಲ್ಲ ಎಂಬುದು ವಿಶೇಷ.

3 ಬಾರಿ ಹ್ಯಾಟ್ರಿಕ್ ದಾಖಲೆ:

ಐಪಿಎಲ್​ನಲ್ಲಿ 3 ಬಾರಿ ಹ್ಯಾಟ್ರಿಕ್ ವಿಕೆಟ್ ಉರುಳಿಸಿದ ಏಕೈಕ ಬೌಲರ್ ಅಮಿತ್ ಮಿಶ್ರಾ. ದೆಹಲಿ ಕ್ಯಾಪಿಟಲ್ಸ್ ಪರ ಬೌಲಿಂಗ್ ಮಾಡುತ್ತಿರುವ ಹಿರಿಯ ಸ್ಪಿನ್ನರ್ 2008, 2011 ಮತ್ತು 2013ರ ಸೀಸನ್​ನಲ್ಲಿ ಹ್ಯಾಟ್ರಿಕ್ ವಿಕೆಟ್ ಪಡೆದಿದ್ದರು. ಐಪಿಎಲ್​ನಲ್ಲಿ ಒಟ್ಟು 15 ಬೌಲರ್​ಗಳು ಹ್ಯಾಟ್ರಿಕ್ ವಿಕೆಟ್ ಸಾಧನೆ ಮಾಡಿದ್ರೂ, ಅಮಿತ್ ಮಿಶ್ರಾ ಅವರ ಈ ದಾಖಲೆಯನ್ನು ಮುರಿಯಲಾಗಲಿಲ್ಲ. ಹೀಗಾಗಿ  ಈ ಬಾರಿ ಈ ದಾಖಲೆಯನ್ನು ಯಾರಾದರೂ ಅಳಿಸಿ ಹಾಕಲಿದ್ದಾರಾ ಎಂಬುದನ್ನು ಕಾದು ನೋಡಬೇಕಿದೆ.

ಅಲ್ಜಾರಿ ಜೋಸೆಫ್ ಬೌಲಿಂಗ್ ದಾಖಲೆ:

ರಾಜಸ್ಥಾನ್ ರಾಯಲ್ಸ್ ಪರ ಚೊಚ್ಚಲ ಐಪಿಎಲ್ ಸೀಸನ್​ನಲ್ಲಿ ಕಣಕ್ಕಿಳಿದಿದ್ದ ಸೊಹೈಲ್ ತನ್ವೀರ್ ಅವರ 14 ರನ್​ಗೆ 6 ವಿಕೆಟ್ ದಾಖಲೆಯನ್ನು ಕಳೆದ ಬಾರಿ ಮುಂಬೈ ಇಂಡಿಯನ್ಸ್ ಬೌಲರ್ ಅಲ್ಜಾರಿ ಜೋಸೆಫ್ ಮುರಿದ್ದರು. ಸನ್‌ರೈಸರ್ಸ್ ಹೈದರಾಬಾದ್ ವಿರುದ್ಧದ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ಪರ ಬೌಲಿಂಗ್ ಮಾಡಿದ್ದ ಅಲ್ಜಾರಿ ಜೋಸೆಫ್ 12 ರನ್‌ಗಳಿಗೆ 6 ವಿಕೆಟ್ ಉರುಳಿಸಿದ್ದರು. ಅಂದರೆ ಸೊಹೈಲ್ ತನ್ವೀರ್ ದಾಖಲೆ ಬರೆದು 11 ವರ್ಷಗಳ ಬಳಿಕ ರೆಕಾರ್ಡ್​ನ್ನು ಅಲ್ಜಾರಿ ಅಳಿಸಿ ಹಾಕಿದ್ದರು. ಹೀಗಾಗಿ ಈ ದಾಖಲೆಯನ್ನು ಮುರಿಯುವುದು ಅಷ್ಟು ಸುಲಭವಲ್ಲ ಎನ್ನಲಾಗುತ್ತಿದೆ.

IPL