IPL ಇತಿಹಾಸದಲ್ಲೇ ಅತ್ಯಧಿಕ ಸ್ಕೋರ್​ಗಳಿಸಿದ ತಂಡಗಳ ಪಟ್ಟಿ ಇಲ್ಲಿದೆ..!

ಇಂಡಿಯನ್ ಪ್ರೀಮಿಯರ್ ಲೀಗ್​ನ 13 ಸೀಸನ್​ಗಳು ಯಶಸ್ವಿಯಾಗಿ ನಡೆದಿದೆ. 8 ತಂಡಗಳ ನಡುವಣ ಚುಟುಕು ಕ್ರಿಕೆಟ್​ ಕದನದಲ್ಲಿ ಅನೇಕ ದಾಖಲೆಗಳು ನಿರ್ಮಾಣವಾಗಿವೆ. ಪ್ರತಿ ಸೀಸನ್​ನಲ್ಲೂ ಒಂದೊಂದು ವಿಶೇಷ ರೆಕಾರ್ಡ್​ಗಳು ನಿರ್ಮಾಣವಾಗುತ್ತಿವೆ. ಅದು ಈ ಬಾರಿ ಕೂಡ ಮುಂದುವರೆಯಲಿದೆ.

ಇಲ್ಲಿ ಬಲಿಷ್ಠ ತಂಡ ಎನಿಸಿಕೊಂಡ ಟೀಮ್ ಮುಗ್ಗರಿಸಿದ್ದೂ ಇದೆ, ಯುವ ಆಟಗಾರರನ್ನೊಳಗೊಂಡ ತಂಡ ಚಾಂಪಿಯನ್ ಪಟ್ಟ ಅಲಂಕರಿಸಿದ ನಿದರ್ಶನಗಳೂ ಕೂಡ ಇವೆ. ಹೀಗಾಗಿಯೇ ಪ್ರತಿ ಬಾರಿ ಐಪಿಎಲ್ ಆರಂಭವಾಗುವಾಗಲೂ ಈ ಬಾರಿ ಯಾರಾಗಲಿದ್ದಾರೆ ಚಾಂಪಿಯನ್ ಎಂಬ ಪ್ರಶ್ನೆಯೊಂದು ಅಭಿಮಾನಿಗಳಲ್ಲಿ ಹುಟ್ಟಿಕೊಳ್ಳುತ್ತವೆ.

ಹಾಗೆಯೇ ಇಲ್ಲಿ ಹಲವು ರೆಕಾರ್ಡ್ ಮಾಡಿದ ತಂಡಗಳು ಪ್ರಶಸ್ತಿ ಗೆಲ್ಲಲಾಗದೆ ಉಳಿದಿದೆ. ಹಾಗೆಯೇ ರೆಕಾರ್ಡ್ ಪಟ್ಟಿಗೆಯಿಂದ ದೂರವೇ ಉಳಿದಿರುವಂತಹ ರಾಜಸ್ಥಾನ್ ರಾಯಲ್ಸ್​ನಂತಹ ತಂಡಗಳು ಚಾಂಪಿಯನ್ ಪಟ್ಟ ಅಲಂಕರಿಸಿದೆ. ಕೆಲವು ತಂಡಗಳು ಚೇಸಿಂಗ್​ನಲ್ಲಿ ಹೆಚ್ಚಾಗಿ ಮಿಂಚಿದ್ರೆ ಮತ್ತೆ ಕೆಲವು ಮೊದಲ ಬ್ಯಾಟಿಂಗ್​ನಲ್ಲಿ ಪ್ರಚಂಡ ಇನಿಂಗ್ಸ್ ಆಡಿವೆ.

ಅದರಲ್ಲೂ ಐಪಿಎಲ್​ನಲ್ಲಿ ಅತಿ ಕಡಿಮೆ ಸ್ಕೋರ್ ಮಾಡಿದ ದಾಖಲೆ ಬಲಿಷ್ಠ ಬ್ಯಾಟಿಂಗ್ ಪಡೆಯನ್ನು ಹೊಂದಿರುವ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಹೆಸರಿನಲ್ಲಿರುವುದು ವಿಶೇಷ. ಹಾಗಿದ್ರೆ ಐಪಿಎಲ್ ಇತಿಹಾಸದಲ್ಲೇ ಅತ್ಯಧಿಕ ರನ್ ಗಳಿಸಿದ ಮೂರು ಟೀಮ್​ಗಳು ಯಾವುವು ಎಂಬುದನ್ನು ನೋಡೋಣ...

3- ಚೆನ್ನೈ ಸೂಪರ್‌ಕಿಂಗ್ಸ್

2010 ರಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ರಾಜಸ್ಥಾನ್ ರಾಯಲ್ಸ್ ವಿರುದ್ಧ 246 ರನ್ ಗಳಿಸಿತ್ತು. ಇದು ಸಿಎಸ್​ಕೆ ಕಲೆಹಾಕಿದ ಅತ್ಯಧಿಕ ಮೊತ್ತ. ಈ ಪಂದ್ಯದಲ್ಲಿ ಆರಂಭಿಕರಾಗಿ ಕಣಕ್ಕಿಳಿದ ಮುರಳಿ ವಿಜಯ್ 127 ರನ್ ಬಾರಿಸಿದ್ದರು. ಈ ಬೃಹತ್ ಮೊತ್ತವನ್ನು ರಾಜಸ್ಥಾನ್ ರಾಯಲ್ಸ್ ಕೂಡ ಅದ್ಭುತವಾಗಿ ಬೆನ್ನಟ್ಟಿತು. ಆದರೆ ಕೊನೆ ಘಳಿಗೆಯಲ್ಲಿ ವಿಕೆಟ್ ಕೈ ಚೆಲ್ಲುವ ಮೂಲಕ 20 ಓವರ್​ಗಳಲ್ಲಿ ಐದು ವಿಕೆಟ್​ಗೆ 223 ರನ್ ಗಳಿಸಲಷ್ಟೇ ಶಕ್ತರಾದರು.

2- ರಾಯಲ್ ಚಾಲೆಂಜರ್ಸ್ ಬೆಂಗಳೂರು

2016 ರ ಐಪಿಎಲ್‌ನಲ್ಲಿ ಗುಜರಾತ್ ಲಯನ್ಸ್ ವಿರುದ್ಧ ಆರ್‌ಸಿಬಿ 248 ರನ್ ಗಳಿಸಿತ್ತು. ಈ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ ಮತ್ತು ಎಬಿ ಡಿವಿಲಿಯರ್ಸ್ ಅದ್ಭುತ ಶತಕಗಳನ್ನು ಸಿಡಿಸಿದ್ದರು. ಆ ಸಮಯದಲ್ಲಿ ಸುರೇಶ್ ರೈನಾ ಗುಜರಾತ್ ಲಯನ್ಸ್ ತಂಡದ ನಾಯಕರಾಗಿದ್ದರು. ಈ ಗುರಿಯನ್ನು ಬೆನ್ನತ್ತಿದ ಲಯನ್ಸ್ ತಂಡ ಕೇವಲ 104 ರನ್​ಗೆ ಆಲೌಟ್​ ಆಯಿತು. ಕೊಹ್ಲಿ-ಎಬಿಡಿ ಬ್ಯಾಟಿಂಗ್ ಹೊರತಾಗಿ ಈ ಪಂದ್ಯದಲ್ಲಿ ಕ್ರಿಸ್ ಜೋರ್ಡಾನ್ 4 ಮತ್ತು ಯುಜ್ವೇಂದ್ರ ಚಹಲ್ 3 ವಿಕೆಟ್ ಪಡೆದು ಮಿಂಚಿದ್ದರು.

1- ರಾಯಲ್ ಚಾಲೆಂಜರ್ಸ್ ಬೆಂಗಳೂರು

2013 ರ ಐಪಿಎಲ್​ನಲ್ಲಿ ಪುಣೆ ವಾರಿಯರ್ಸ್ ಇಂಡಿಯಾ ವಿರುದ್ಧ ರಾಯಲ್ ಚಾಲೆಂಜರ್ಸ್ ಬ್ಯಾಟ್ಸ್​ಮನ್​ಗಳು ಅಕ್ಷರಶಃ ಸಿಡಿದಿದ್ದರು. 5 ವಿಕೆಟ್ ಕಳೆದುಕೊಂಡು ಆರ್‌ಸಿಬಿ 263 ರನ್ ಗಳಿಸಿತ್ತು. ಇದು ಆರ್​ಸಿಬಿ ತಂಡದ ಮತ್ತು ಐಪಿಎಲ್ ಇತಿಹಾಸದ ಗರಿಷ್ಠ ಸ್ಕೋರ್ ಆಗಿದೆ. ಈ ಪಂದ್ಯದಲ್ಲಿ ಕ್ರಿಸ್ ಗೇಲ್ ಅಜೇಯ 175 ರನ್ ಗಳಿಸಿರುವುದು ದಾಖಲೆಯಾಗಿ ಉಳಿದಿದೆ. ಇನ್ನು ಬೌಲಿಂಗ್​ನಲ್ಲೂ ಮಿಂಚಿದ ಆರ್​ಸಿಬಿ ಪುಣೆ ವಾರಿಯರ್ಸ್ ಇಂಡಿಯಾ 130 ರನ್‌ಗಳ ಅಂತರದಿಂದ ಜಯಗಳಿಸಿತು.