IPL 2020: ಐಪಿಎಲ್ ಆರಂಭಕ್ಕೂ ಮುನ್ನ ಅಶ್ವಿನ್​ಗೆ ಖಡಕ್ ಎಚ್ಚರಿಕೆ ನೀಡಿದ ಕೋಚ್: ಯಾವ ಕಾರಣಕ್ಕೆ?

ಕಳೆದ 12ನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್ ಲೀಗ್​​ನಲ್ಲಿ ಭಾರೀ ಸದ್ದು ಮಾಡಿದ್ದು ಮಂಕಡಿಂಗ್ ಹೆಸರು. ಆರ್.ಅಶ್ವಿನ್ ರಾಜಸ್ಥಾನ್ ರಾಯಲ್ಸ್​ ತಂಡದ ಜೋಸ್ ಬಟ್ಲರ್ ಅವರನ್ನು ಮಂಕಡ್ ಮಾಡಿದ್ದು ಕಳೆದ ಐಪಿಎಲ್​ನಲ್ಲಿ ಭಾರಿ ವಿವಾದಕ್ಕೀಡು ಮಾಡಿತ್ತು.

ಇದು ಕ್ರಿಕೆಟ್ ವಲಯದಲ್ಲಿ ಸಾಕಷ್ಟು ಪರ-ವಿರೋಧ ಚರ್ಚೆಗೂ ಸಾಕ್ಷಿಯಾಗಿತ್ತು. ಆದರೆ ಅಶ್ವಿನ್ ಈ ಬಾರಿ ಯಾವುದೇ ಕಾರಣಕ್ಕೂ ಮಂಕಡಿಂಗ್ ಮಾಡಲು ಅವಕಾಶ ನೀಡುವುದಿಲ್ಲ ಎಂದು ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಮುಖ್ಯ ಕೋಚ್ ರಿಕ್ಕಿ ಪಾಂಟಿಂಗ್ ಸ್ಪಷ್ಟಪಡಿಸಿದ್ದಾರೆ.

ಮಂಕಂಡಿಂಗ್ ಮಾಡುವುದು ಕ್ರೀಡಾ ಸ್ಫೂರ್ತಿಗೆ ವಿರುದ್ಧವಾಗಿದೆ ಎಂದಿರುವ ಪಾಂಟಿಂಗ್, ತಾವು ಕೋಚ್ ಮಾಡುತ್ತಿರುವ ಐಪಿಎಲ್ ಫ್ರಾಂಚೈಸಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡದಲ್ಲಿ ಆ ರೀತಿ ಆಗದಂತೆ ಎಚ್ಚರ ವಹಿಸುವುದಾಗಿ ಹೇಳಿದ್ದಾರೆ.

ರಾಜಸ್ಥಾನ ರಾಯಲ್ಸ್ ಪರ 69 ರನ್​ಗಳಿಸಿ ನಾನ್-ಸ್ಟ್ರೈಕ್​ನಲ್ಲಿದ್ದ ಜೋಸ್ ಬಟ್ಲರ್, ಅಶ್ವಿನ್ ಬೌಲಿಂಗ್ ಮಾಡುವ ಮೊದಲೇ ಕ್ರೀಸ್ ಬಿಟ್ಟಿದ್ದರು. ಈ ಅವಕಾಶ ಉಪಯೋಗಿಸಿಕೊಂಡ ಅಶ್ವಿನ್, ಬಟ್ಲರ್ ಅವರನ್ನು ರನೌಟ್ ಬಲೆಗೆ ಬೀಳಿಸಿದ್ದರು. ಅಶ್ವಿನ್ ಅವರ ನಡವಳಿಕೆ ಭಾರೀ ಟೀಕೆಗೆ ವ್ಯಕ್ತವಾಗಿತ್ತು.

ಅಂದಹಾಗೆ ಈ ಬಾರಿ ಐಪಿಎಲ್​ನಲ್ಲಿ ಅಶ್ವಿನ್ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಪರ ಆಡಲಿದ್ದು, ಕೋಚ್ ರಿಕಿ ಪಾಂಟಿಂಗ್ ಈ ಬಗ್ಗೆ ಮೊದಲು ಆಫ್ ಸ್ಪಿನ್ನರ್ ಬಳಿ ಚರ್ಚಿಸುವುದಾಗಿ ಹೇಳಿದ್ದಾರೆ.

ಕಳೆದ ವರ್ಷ ಅಶ್ವಿನ್ ನಮ್ಮ ತಂಡದಲ್ಲಿರಲಿಲ್ಲ. ನಾವು ಈ ವರ್ಷ ತಂಡಕ್ಕೆ ಕರೆತರಬೇಕೆಂದು ಉದ್ದೇಶಿಸಿದ್ದ ಆಟಗಾರರಲ್ಲಿ ಅವರೂ ಒಬ್ಬರು. ಅವರೊಬ್ಬ ಪ್ರತಿಭಾವಂತ ಬೌಲರ್. ದೀರ್ಘಕಾಲದಿಂದ ಐಪಿಎಲ್​ನಲ್ಲಿ ಉತ್ತಮ ಪ್ರದರ್ಶನ ತೋರಿದ್ದಾರೆ ಎಂದು ಹೇಳಿದ್ದಾರೆ.

ಕಳೆದ ಅಶ್ವಿನ್ ಮಾಡಿದ್ದ ರೀತಿಯನ್ನು ಗಮನಿಸಿ ತಂಡದ ಆಟಗಾರರಿಗೆ ಸೂಚನೆ ನೀಡಿದ್ದೆ. ಅಶ್ವಿನ್ ನೋಡಿ ಇತರ ಆಟಗಾರರನ್ನೇ ಇದನ್ನೇ ಮಾಡುವುದನ್ನು ಕಲಿಯುತ್ತಾರೆ. ಈ ರೀತಿ ಮಾಡಕೂಡದು ಎಂದು ಸೂಚಿಸಿದ್ದೆ ಎಂದು ಪಾಂಟಿಂಗ್ ಹೇಳಿದ್ದಾರೆ.

ಇದೇ ವೇಳೆ ಅಶ್ವಿನ್ ಮಾಡಿದ್ದರಲ್ಲಿ ಯಾವುದೇ ತಪ್ಪಿಲ್ಲ ಎಂದಿರುವ ಪಂಟರ್ ಖ್ಯಾತಿಯ ಆಸೀಸ್​ನ ಮಾಜಿ ನಾಯಕ, ಆದರೂ ಡೆಲ್ಲಿ ತಂಡದಲ್ಲಿ ಈ ರೀತಿ ಮಾಡದೇ ಇರುವಂತೆ ತಾವು ನೀಡುವ ಸಲಹೆಯನ್ನು ಆಫ್ ಸ್ಪಿನ್ನರ್ ಸ್ವೀಕರಿಸುತ್ತಾರೆಂಬ ವಿಶ್ವಾಸವಿದೆ ಎಂದಿದ್ದಾರೆ.

ಒಂದು ವೇಳೆ ಬ್ಯಾಟ್ಸ್​ಮನ್ ಬೌಲರ್ ಚೆಂಡನ್ನು ಎಸೆಯುವ ಮುನ್ನ ಕ್ರೀಸ್ ಬಿಟ್ಟು ಹೊರಟರೆ ಆತನಿಗೆ ಕೆಲವು ರನ್​ಗಳನ್ನು ಕಡಿತಗೊಳಿಸುವುದು/ಬೇರೆ ರೀತಿಯ ದಂಡ ವಿಧಿಸುವ ಹಾಗೆ ನಿಯಮಗಳನ್ನು ತಂದರೆ ಒಳ್ಳೆಯದು ಎಂಬುವುದು ಪಾಂಟಿಂಗ್ ಸಲಹೆ.