IPL 2020: ಈ ಬಾರಿಯ ಐಪಿಎಲ್​ನಲ್ಲಿ ಈ ತಂಡ ಅದಾಗಲೇ ಅರ್ಧ ಟೂರ್ನಿ ಗೆದ್ದಾಗಿದೆ: ಹೀಗೆ ಹೇಳಿದ್ಯಾರು?

ಕ್ರಿಕೆಟ್ ಅಭಿಮಾನಿಗಳಲ್ಲಿ ಈಗಾಗಲೇ ಐಪಿಎಲ್ ಫೀವರ್ ಶುರುವಾಗಿದೆ. ಹೊಡಿಬಡಿ ಟೂರ್ನಿಗೆ ಇನ್ನೇನು ಕೇವಲ ಐದು ದಿನಗಳಷ್ಟೆ ಬಾಕಿಯಿದೆ. ಆಟಗಾರರಿಂದ ಅಭ್ಯಾಸ ಪಂದ್ಯ ಶುರುವಾಗಿದ್ದು, ಮೈದಾನದಲ್ಲಿ ಬೆವರು ಹರಿಸುತ್ತಿದ್ದಾರೆ.

ಈಗಾಗಲೇ ಅಭಿಮಾನಿಗಳು ಐಪಿಎಲ್ 2020 ಗೆಲುವಿನ ಲೆಕ್ಕಾಚಾರ ಹಾಕುತ್ತಿದ್ದಾರೆ. ಹೀಗಿರುವಾಗ ಐಪಿಎಲ್ 2020 ರಲ್ಲಿ ಈ ತಂಡ ಈಗಾಗಲೇ ಅರ್ಧ ಟೂರ್ನಿಯನ್ನ ಗೆದ್ದಿದೆ ಎಂದು ಭಾರತದ ಮಾಜಿ ಆಟಗಾರ ಹೇಳಿದ್ದಾರೆ.

ಭಾರತ ಕ್ರಿಕೆಟ್ ತಂಡದ ಮಾಜಿ ಆಟಗಾರ, ಕಾಮೆಂಟೆಟರ್ ಆಕಾಶ್ ಚೋಪ್ರಾ ಅವರು ಮುಂಬೈ ಇಂಡಿಯನ್ಸ್ ತಂಡ ಐಪಿಎಲ್ ಹರಾಜು ಪ್ರಕ್ರಿಯೆಯಲ್ಲೇ ಅರ್ಧ ಟೂರ್ನಿಯನ್ನು ಗೆದ್ದಾಗಿದೆ ಎಂದು ಹೇಳಿದ್ದಾರೆ.

ಇದಕ್ಕೆ ಕಾರಣವನ್ನೂ ತಿಳಿಸಿರುವ ಚೋಪ್ರಾ, ವರ್ಷದಿಂದ ವರ್ಷಕ್ಕೆ ಮುಂಬೈ ಅತ್ಯಂತ ಬಲಿಷ್ಠ ತಂಡವಾಗಿ ಹೊರಹೊಮ್ಮುತ್ತಿದೆ. ಹರಾಜು ಪ್ರಕ್ರಿಯೆ ವೇಳೆ ತಮಗೆ ಬೇಕಾದ ಆಟಗಾರರನ್ನು ಎಷ್ಟೇ ಹಣಕೊಟ್ಟು ಮುಲಾಜಿಲ್ಲದೆ ಪಡೆದುಕೊಳ್ಳುತ್ತಾರೆ ಎಂದು ಹೇಳಿದ್ದಾರೆ.

ಮುಂಬೈ ತಂಡದಲ್ಲಿ ನಾಯಕ ರೋಹಿತ್ ಶರ್ಮಾ ಬಲ ಒಂದುಕಡೆಯಾದರೆ, ಹಾರ್ದಿಕ್ ಪಾಂಡ್ಯ, ಜಸ್ಪ್ರೀತ್ ಬುಮ್ರಾ ಮತ್ತು ಕೀರೊನ್ ಪೊಲಾರ್ಡ್ ಮುಂಬೈ ಯಶಸ್ಸಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದಾರೆ.

ಅಷ್ಟೇ ಅಲ್ಲದೆ ಮುಂಬೈ ತಂಡ ಯುವ ಆಟಗಾರರನ್ನು ಅತ್ಯುತ್ತಮ ಪ್ಲೇಯರ್​ಗಳನ್ನಾಗಿ ಮಾಡುವ ಸಾಮರ್ಥ್ಯ ಹೊಂದಿದೆ. ಪಾಂಡ್ಯ ಮತ್ತು ಬುಮ್ರಾ ಮುಂಬೈ ತಂಡದಲ್ಲೇ ಬೆಳೆದವರಾಗಿದ್ದಾರೆ.

ಇನ್ನೂ ಮಾತು ಮುಂದುವರೆಸಿದ ಆಕಾಶ್ ಚೋಪ್ರಾ, ಮುಂಬೈ ತಂಡದಲ್ಲಿ ಅನೇಕ ಮ್ಯಾಚ್ ವಿನ್ನಿಂಗ್ ಆಟಗಾರರಿದ್ದಾರೆ ಎಂದಿದ್ದಾರೆ.

ಒಬ್ಬ ಆಟಗಾರ ಔಟ್ ಆದರೆ ಅಥವಾ ಒಬ್ಬ ಅಲಭ್ಯರಾದರೆ ಅವರ ಜಾಗವನ್ನು ಅರ್ಥಪೂರ್ಣವಾಗಿ ತುಂಬಲು ಮತ್ತೊಬ್ಬ ತಂಡದಲ್ಲಿದ್ದಾರೆ ಎಂಬುದು ಚೋಫ್ರಾ ಅಭಿಪ್ರಾಯ.

ಐಪಿಎಲ್ 2020 ಉದ್ಘಾಟನಾ ಪಂದ್ಯದಲ್ಲೇ ಮುಂಬೈ ಇಂಡಿಯನ್ಸ್ ತಂಡ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಸೆಣೆಸಾಟ ನಡೆಸಲಿದೆ.

ಮುಂಬೈ ಇಂಡಿಯನ್ಸ್ ತಂಡದಲ್ಲಿ ರೋಹಿತ್ ಶರ್ಮಾ ಜೊತೆ ಸ್ಫೋಟಕ ಆಟಗಾರರ ಸಾಲೇ ಇದೆ. ಕ್ವಿಂಟನ್ ಡಿಕಾಕ್, ಕ್ರಿಸ್ ಲಿನ್, ಯುವ ಆಟಗಾರ ಇಶಾನ್ ಕಿಶನ್ ಹಾಗೂ ಸ್ಟಾರ್ ಆಲ್ರೌಂಡರ್​ಗಳಾದ ಕಿರೊನ್ ಪೊಲಾರ್ಡ್ ಮತ್ತು ಹಾರ್ದಿಕ್ ಪಾಂಡ್ಯ ಎಲ್ಲರೂ ಸಿಕ್ಸರ್ ಕಿಂಗ್​ಗಳೇ..

ಜೊತೆಗೆ ಬೌಲಿಂಗ್​ನಲ್ಲಿ ಟ್ರೆಂಟ್ ಬೌಲ್ಟ್ ಮತ್ತು ಜಸ್​ಪ್ರೀತ್ ಬುಮ್ರಾ ಅವರಂತಹ ಸ್ಟಾರ್​ಗಳಿದ್ದಾರೆ.

ರೋಹಿತ್ ಶರ್ಮಾ ಐಪಿಎಲ್​ನ ಅತ್ಯಂತ ಯಶಸ್ವಿ ಕ್ಯಾಪ್ಟನ್ ಆಗಿದ್ದಾರೆ. ಅವರ ನೇತೃತ್ವದಲ್ಲಿ ಮುಂಬೈ ಇಂಡಿಯನ್ಸ್ 2013, 2015, 2017 ಹಾಗೂ 2019ರ ಆವೃತ್ತಿಗಳಲ್ಲಿ ಟ್ರೋಫಿ ಎತ್ತಿ ಹಿಡಿದಿತ್ತು.