IPL: ಐಪಿಎಲ್​ನಲ್ಲಿ ಅತೀ ಹೆಚ್ಚು ವಿಕೆಟ್ ಉರುಳಿಸಿದ ವೇಗಿಗಳು ಯಾರು ಗೊತ್ತೇ?

ಐಪಿಎಲ್‌ನ 13 ನೇ ಸೀಸನ್ ತಯಾರಿಗಳು ಶುರುವಾಗಿದೆ. ಈ ಬಾರಿ, ಭಾರತದಲ್ಲಿ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಈ ಗ್ಲಾಮರ್ಸ್ ಕ್ರಿಕೆಟ್ ಲೀಗ್ ಅನ್ನು ವಿದೇಶದಲ್ಲಿ, ಅಂದರೆ ಯುಎಇಯಲ್ಲಿ ಆಯೋಜಿಸಲು ಸಿದ್ಧತೆಗಳನ್ನು ಪ್ರಾರಂಭಿಸಿದೆ. ಅಂತಹ ಪರಿಸ್ಥಿತಿಯಲ್ಲಿ, ಈ ಬಾರಿ ಪಂದ್ಯಗಳ ಫಲಿತಾಂಶಗಳು ವಿಭಿನ್ನವಾಗಿರಲಿದೆ ಎಂದೇ ವಿಶ್ಲೇಷಿಸಲಾಗುತ್ತಿದೆ.

ದುಬೈ ಪಿಚ್​ಗಳು ಸ್ಪಿನ್​ ಬೌಲರ್​ಗಳಿಗೆ ಸಹಕಾರಿಯಾದರೂ, ಸ್ವಿಂಗ್​ಗೂ ಪೂರಕ ಎನ್ನಲಾಗಿದೆ. ಹೀಗಾಗಿ ಈ ಬಾರಿಯ ಟೂರ್ನಿಯಲ್ಲಿ ಬ್ಯಾಟ್ಸ್​ಮನ್​ಗಳಿಗಿಂತ ಬೌಲರುಗಳೇ ಹೆಚ್ಚು ಪಾರುಪತ್ಯ ಸಾಧಿಸಲಿದ್ದಾರೆ ಎಂದು ಹೇಳಲಾಗುತ್ತಿದೆ. ಹೀಗಾಗಿ ಭಾರತದಲ್ಲಿ ನಡೆದ ಐಪಿಎಲ್ ಪಂದ್ಯಗಳಿಗಿಂತಲೂ ಈ ಬಾರಿ ನಡೆಯಲಿರುವ ಟೂರ್ನಿ ಭಾರೀ ಪೈಪೋಟಿಗೆ ಸಾಕ್ಷಿಯಾಗುವ ಸಾಧ್ಯತೆ ಹೆಚ್ಚಿದೆ.

ಇನ್ನು ಕಳೆದ 12 ಸೀಸನ್​ಗಳಲ್ಲಿ ಕೆಲವೇ ಕೆಲವು ವೇಗಿಗಳು ಮಾತ್ರ ಐಪಿಎಲ್​ನಲ್ಲಿ ತಮ್ಮ ಮಾರಕ ಬೌಲಿಂಗ್ ಮೂಲಕ ಯಶಸ್ಸು ಸಾಧಿಸಿದ್ದರು. ಅದರಲ್ಲಿ ಕೆಲವರು ಈಗಾಗಲೇ ನಿವೃತ್ತಿ ಘೋಷಿಸಿದ್ರೆ, ಮತ್ತೆ ಕೆಲವರು ಈ ಬಾರಿ ಮತ್ತೆ ಕಣಕ್ಕಿಳಿಯಲಿದ್ದಾರೆ. ಹೀಗೆ ಐಪಿಎಲ್​ನಲ್ಲಿ ಅತೀ ಹೆಚ್ಚು ವಿಕೆಟ್ ಉರುಳಿಸಿರುವ 5 ವೇಗದ ಬೌಲರ್​ಗಳು ಯಾರು ಎಂಬುದನ್ನು ಗಮನಿಸಿದ್ರೆ...

ಲಸಿತ್ ಮಾಲಿಂಗ

ಶ್ರೀಲಂಕಾದ ಲಸಿತ್ ಮಾಲಿಂಗ ಈವರೆಗೆ ಐಪಿಎಲ್‌ನಲ್ಲಿ 122 ಪಂದ್ಯಗಳನ್ನು ಆಡಿದ್ದಾರೆ. ಮುಂಬೈ ಇಂಡಿಯನ್ಸ್ ಪರ ಕಣಕ್ಕಿಳಿಯುತ್ತಿರುವ ಮಾಲಿಂಗ ತಮ್ಮ ಯಾರ್ಕರ್ ಮೂಲಕವೇ ವಿಕೆಟ್ ಉರುಳಿಸುವಲ್ಲಿ ನಿಸ್ಸೀಮರು. ಈಗಾಗಲೇ ಐಪಿಎಲ್​ನಲ್ಲಿ 170 ವಿಕೆಟ್ ಪಡೆದಿರುವ ಮಾಲಿಂಗ ನಂಬರ್ 1 ಐಪಿಎಲ್ ಬೌಲರ್ ಎನಿಸಿಕೊಂಡಿದ್ದಾರೆ.

ಡ್ವೇನ್ ಬ್ರಾವೋ:

ವೆಸ್ಟ್ ಇಂಡೀಸ್ ಆಲ್​ರೌಂಡರ್ ಡ್ವೇನ್ ಬ್ರಾವೋ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಪ್ರಮುಖ ಬೌಲರ್​ಗಳಲ್ಲಿ ಒಬ್ಬರು. ಈಗಾಗಲೇ 134 ಪಂದ್ಯಗಳನ್ನಾಡಿರುವ ಬ್ರಾವೋ 147 ವಿಕೆಟ್‌ಗಳನ್ನು ಉರುಳಿಸಿ ಐಪಿಎಲ್​ನ ಬೆಸ್ಟ್ ವೇಗಿಯ ಪಟ್ಟಿಯಲ್ಲಿ 2ನೇ ಸ್ಥಾನದಲ್ಲಿದ್ದಾರೆ. ಇನ್ನು ಡೆತ್ ಓವರ್​ಗಳಲ್ಲಿ ಬ್ರಾವೋ ಅನ್ನು ಎದುರಿಸೋದೇ ಕಷ್ಟ. ಅಂತದ್ರಲ್ಲಿ ಯುಎಇ ಪಿಚ್​ಗಳು ವಿಂಡೀಸ್ ಬೌಲರ್​ಗೆ ಹೇಳಿ ಮಾಡಿಸಿದಂತಿದೆ. ಹೀಗಾಗಿ ಈ ಬಾರಿ ಚೆನ್ನೈ ಫಲಿತಾಂಶಗಳಲ್ಲಿ ಬ್ರಾವೋ ಪ್ರಮುಖ ಪಾತ್ರವಹಿಸಲಿದ್ದಾರೆ.

ಸ್ವಿಂಗ್ ಬೌಲಿಂಗ್ ಮೂಲಕ ಐಪಿಎಲ್​ನಲ್ಲಿ ಸನ್​ರೈಸರ್ಸ್​ ಹೈದರಾಬಾದ್​ ಪರ ಬೌಲಿಂಗ್ ವಿಭಾಗವನ್ನು ಮುನ್ನಡೆಸುವ ಭುವನೇಶ್ವರ್ ಕುಮಾರ್ ಈ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿದ್ದಾರೆ. ಇದುವರೆಗೆ ಐಪಿಎಲ್​ನಲ್ಲಿ 117 ಪಂದ್ಯಗಳನ್ನಾಡಿರುವ ಭುವಿ 133 ವಿಕೆಟ್ ಪಡೆದಿದ್ದಾರೆ. ಅವರ ಸ್ವಿಂಗ್‌ ಬಾಲ್​ಗೆ ಪ್ರತಿಕ್ರಿಯಿಸುವುದು ಬ್ಯಾಟ್ಸ್‌ಮನ್‌ಗಳಿಗೆ ದೊಡ್ಡ ಸವಾಲು. ಹೀಗಾಗಿ ಈ ಬಾರಿ ಪವರ್‌ಪ್ಲೇ ಮತ್ತು ಡೆತ್ ಓವರ್‌ಗಳ ಅತ್ಯುತ್ತಮ ಬೌಲಿಂಗ್​ನ್ನು ಭುವನೇಶ್ವರ್ ಕಡೆಯಿಂದ ನಿರೀಕ್ಷಿಸಬಹುದು.

ಉಮೇಶ್ ಯಾದವ್:

ಐಪಿಎಲ್​ನ ದುಬಾರಿ ಬೌಲರ್ ಎನಿಸಿಕೊಂಡರೂ ಉಮೇಶ್ ಯಾದವ್ ಅಪಾಯಕಾರಿ ವೇಗಿ ಎಂಬುದಕ್ಕೆ ಅವರು ಪಡೆದಿರುವ ವಿಕೆಟ್​ಗಳೇ ಸಾಕ್ಷಿ. ಕಳೆದ ಕೆಲವು ಸೀಸನ್​ಗಳಲ್ಲಿ 119 ಪಂದ್ಯಗಳನ್ನಾಡಿರುವ ಉಮೇಶ್ ಯಾದವ್, 119 ವಿಕೆಟ್​ಗಳನ್ನು ಕಬಳಿಸಿದ್ದಾರೆ. ಈ ಮೂಲಕ ಈ ಪಟ್ಟಿಯಲ್ಲಿ ನಾಲ್ಕನೇ ಸ್ಥಾನ ಪಡೆದುಕೊಂಡಿದ್ದಾರೆ.

ಆಶಿಶ್ ನೆಹ್ರಾ:

ಟೀಮ್ ಇಂಡಿಯಾ ಮಾಜಿ ವೇಗಿ ಆಶಿಶ್ ನೆಹ್ರಾ ಈಗಾಗಲೇ ಐಪಿಎಲ್​ಗೆ ನಿವೃತ್ತಿ ನೀಡಿ ಬೌಲಿಂಗ್ ಕೋಚ್​ ಆಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಆದರೆ ಒಂದು ಕಾಲದಲ್ಲಿ ಐಪಿಎಲ್​ನಲ್ಲಿ ತಮ್ಮ ಮಾರಕ ಬೌಲಿಂಗ್ ಮೂಲಕ ನೆಹ್ರಾ ಬ್ಯಾಟ್ಸ್​ಮನ್​ಗಳನ್ನು ಇಕ್ಕಟ್ಟಿಗೆ ಸಿಲುಕಿಸಿದ್ದರು ಎಂಬುದಕ್ಕೆ ಅವರು ಉರುಳಿಸಿರುವ ವಿಕೆಟ್​ಗಳೇ ಸಾಕ್ಷಿ. 88 ಐಪಿಎಲ್ ಪಂದ್ಯಗಳಿಂದ 106 ವಿಕೆಟ್ ಪಡೆದಿರುವ ಆಶಿಶ್ ನೆಹ್ರಾ ಐಪಿಎಲ್​ನಲ್ಲಿ 6 ಬಾರಿ ಮ್ಯಾನ್ ಆಫ್ ದಿ ಮ್ಯಾಚ್​ ಪ್ರಶಸ್ತಿಗೆ ಪಾತ್ರರಾಗಿದ್ದರು ಎಂಬುದು ವಿಶೇಷ.