IPL 2020: CSK ಫ್ಯಾನ್ಸ್​ಗೆ ಬಿಗ್ ಸರ್​ಪ್ರೈಸ್: ತಂಡ ಸೇರಿಕೊಳ್ಳಲಿರುವ ಸ್ಟಾರ್ ಬ್ಯಾಟ್ಸ್​ಮನ್​ ಯಾರು ಗೊತ್ತೇ?

13ನೇ ಆವೃತ್ತಿ ಐಪಿಎಲ್ ಆರಂಭಕ್ಕೆ ಕ್ಷಣಗಣನೆ ಶುರುವಾಗಿದೆ. ಸೆಪ್ಟೆಂಬರ್ 19 ರಿಂದ ಆರಂಭವಾಗಲಿರುವ ಈ ಮಿಲಿಯನ್ ಡಾಲರ್ ಟೂರ್ನಿಯ ಸಂಪೂರ್ಣ ವೇಳಾಪಟ್ಟಿ ಇಂದು ಸಂಜೆ ವೇಳೆಗೆ ಪ್ರಕಟವಾಗಲಿದ್ದು, ಅಭಿಮಾನಿಗಳು ಕಾದುಕುಳಿತಿದ್ದಾರೆ.

ಐಪಿಎಲ್​ನ ಬಲಿಷ್ಠ ತಂಡಗಳ ಪೈಕಿ ಪ್ರಮುಖವಾಗಿರುವ ಚೆನ್ನೈ ಸೂಪರ್ ಕಿಂಗ್ಸ್ ಟೀಂಗೆ ಈ ಬಾರಿ ಸಾಕಷ್ಟು ಕಂಟಕ ಎದುರಾಗಿದೆ.

ಮೊದಲಿಗೆ ತಂಡದ ಕೆಲ ಆಟಗಾರರಲ್ಲಿ ಕೋವಿಡ್-19 ಸೋಂಕು ಕಾಣಿಸಿಕೊಂಡ ಕಾರಣ ಪೂರ್ವಾಭ್ಯಾಸ ಶಿಬಿರಕ್ಕೆ ತೊಡಕಾಯಿತು. ಇಬ್ಬರು ಆಟಗಾರರನ್ನು ಒಳಗೊಂಡಂತೆ ಒಟ್ಟು 13 ಮಂದಿಯಲ್ಲಿ ಕೋವಿಡ್-19 ಸೋಂಕು ಪತ್ತೆಯಾಗಿತ್ತು. ದೀಪಕ್ ಚಹರ್ ಮತ್ತು ಋತುರಾಜ್ ಗಾಯಕ್ವಾಡ್ ಸೋಂಕಿಗೆ ತುತ್ತಾದ ಆಟಗಾರರು.

ಈ ನಡುವೆ ಕುಟುಂಬ ಸದಸ್ಯರ ಮೇಲೆ ನಡೆದ ಮಾರಣಾಂತಿಕ ಹಲ್ಲೆ ಸುದ್ದಿ ತಿಳಿದ ಸುರೇಶ್ ರೈನಾ ಕೂಡಲೇ ಭಾರತಕ್ಕೆ ಹಿಂದಿರುಗಿದ್ದರು. ಅಷ್ಟೇ ಅಲ್ಲದೆ ಐಪಿಎಲ್ 2020 ಟೂರ್ನಿಯಿಂದಲೇ ರೈನಾ ಹೊರನಡೆದಿದ್ದಾರೆ ಎಂದು ಸಿಎಸ್​ಕೆ ಅಧಿಕೃತ ಹೇಳಿಕೆ ಕೂಡ ಬಿಡುಗಡೆ ಮಾಡಿತ್ತು. ಇನ್ನೂ ಹಿರಿಯ ಆಫ್ ಸ್ಪಿನ್ನರ್ ಹರಭಜನ್ ಸಿಂಗ್ ಕೂಡ ವೈಯಕ್ತಿಕ ಕಾರಣಗಳಿಂದ ಟೂರ್ನಿಯಿಂದ ಹೊರ ನಡೆದರು.

ಇದರ ಬೆನ್ನಲ್ಲೇ ಸೂಪರ್ ಕಿಂಗ್ಸ್ ತಂಡದ ಟೀಂ ಮ್ಯಾನೇಜ್ಮೆಂಟ್ ಮತ್ತು ಸುರೇಶ್ ರೈನಾ ನಡುವೆ ಹೋಟೆಲ್ ರೂಮ್ ವಿಚಾರವಾಗಿ ಗಲಾಟೆ ನಡೆದಿದೆ. ಧೋನಿ ಮತ್ತು ರೈನಾ ನಡುವೆ ವೈಮನಸ್ಸು ಮೂಡಿದೆ. ಹೀಗೆ ಹಲವಾರು ಊಹಾ ಪೋಹಗಳು ತಲೆಯೆತ್ತಿದ್ದವು.

ಈ ವಿಚಾರ ದೊಡ್ಡ ಮಟ್ಟದಲ್ಲಿ ಸುದ್ದಿ ಆಗುತ್ತಿದೆ ಎಂಬೊತ್ತಿದೆ ಸ್ವತಃ ಸುರೇಶ್ ರೈನಾ ಅವರೇ , ಇದು ಸಂಪೂರ್ಣ ನನ್ನ ವೈಯಕ್ತಿಕ ನಿರ್ಧಾರ. ನನ್ನ ಕುಟುಂಬದ ಜೊತೆಗಿರುವ ಅವಶ್ಯಕತೆಯಿತ್ತು. ಸಿಎಸ್​ಕೆ ತಂಡವೂ ನನ್ನ ಕುಟುಂಬದಂತೆ ಎಂದು ಹೇಳಿದ್ದರು.

ಇದರ ಬೆನ್ನಲ್ಲೇ  ರೈನಾ ಅವರನ್ನು ಸಿಎಸ್​ಕೆ ತನ್ನ ವಾಟ್ಸ್ಆಪ್ ಗ್ರೂಪಿನಿಂದ ರಿಮೂವ್ ಮಾಡಿತು. ಸಿಎಸ್​ಕೆ ಮತ್ತು ರೈನಾ ನಡುವಿನ ಮನಸ್ತಾಪವೂ ಇದಕ್ಕೆ ಕಾರಣ ಎನ್ನಲಾಗಿದೆ.

ಹರ್ಭಜನ್ ಮತ್ತು ರೈನಾ ಟೂರ್ನಿಯಿಂದ ಹೊರ ನಡೆದು ಕೆಲವು ದಿನಗಳಾದರು ಚೆನ್ನೈ ಫ್ರಾಂಚೈಸಿ ಇನ್ನೂ ಬದಲಿ ಆಟಗಾರನನ್ನೂ ಹೆಸರಿಸಿಲ್ಲ.

ಇಷ್ಟೆಲ್ಲಾ ಬೆಳವಣಿಗೆಗಳ ನಡುವೆ ಅಭಿಮಾನಿಗಳಿಗೆ ಸಿಎಸ್​ಕೆ ತಂಡ ಸರ್​ಪ್ರೈಸ್ ನೀಡಲು ಮುಂದಾಗಿದೆ. ಏನದು?.

ಭಾರತ ಕ್ರಿಕೆಟ್ ತಂಡದ ಮಾಜಿ ವಿಕೆಟ್ ಕೀಪರ್- ಬ್ಯಾಟ್ಸ್​ಮನ್​ ದೀಪ್ ದಾಸ್​ಗುಪ್ತಾ ಅವರು, ಸಿಎಸ್​ಕೆ ತಂಡದ ಪ್ರಮುಖ ಸ್ಟಾರ್ ಬ್ಯಾಟ್ಸ್​ಮನ್​ ಸುರೇಶ್ ರೈನಾ ಅವರು ಸದ್ಯದಲ್ಲೇ ತಂಡಕ್ಕೆ ಕಮ್​ಬ್ಯಾಕ್ ಮಾಡಲಿದ್ದಾರೆ ಎಂದು ಹೇಳಿದ್ದಾರೆ.

ರೈನಾ ಯುಎಇ ಪ್ಲೈಟ್ ಏರಿ ಸದ್ಯದಲ್ಲೇ ಸಿಎಸ್​ಕೆ ತಂಡ ಸೇರಿಕೊಳ್ಳಲಿದ್ದಾರೆ. ಆದರೆ, ಅವರು ಆರಂಭದ ಕೆಲವು ಪಂದ್ಯಗಳಿಗೆ ಅಲಭ್ಯರಿರಲಿದ್ದಾರೆ ಎಂದು ದೀಪ್ ದಾಸ್​ಗುಪ್ತಾ ಹೇಳಿದ್ದಾರೆ.

ಏಕೆಂದರೆ ರೈನಾ ಭಾರತದಿಂದ ಯುಎಇಗೆ ತಲುಪಿದ ನಂತರ ಕ್ವಾರಂಟೈನ್ ನಿಯಮ ಪಾಲಿಸಬೇಕಿದೆ. ಹೀಗಾಗಿ ಆರಂಭದ ಕೆಲವು ಪಂದ್ಯಗಳಿಗೆ ರೈನಾ ಅನುಪಸ್ಥಿತಿ ಇರಲಿದೆ. ಖಂಡಿತವಾಗಿಯೂ ರೈನಾ ಮರಳಿ ತಂಡ ಸೇರಿಕೊಳ್ಳಲಿದ್ದಾರೆ ಎಂಬುದು ದೀಪ್ ದಾಸ್​ಗುಪ್ತಾ ಮಾತು.