IPL 2020: ಮುಂಬೈ ತಂಡದಲ್ಲಿ ಅರ್ಜುನ್ ತೆಂಡೂಲ್ಕರ್..?

IPL ಸೀಸನ್ 13 ಗಾಗಿ ಎಲ್ಲಾ ತಂಡಗಳು ಭರ್ಜರಿ ತಯಾರಿಯಲ್ಲಿದೆ. ಒಂದೆಡೆ ಕಠಿಣ ಅಭ್ಯಾಸ ಮತ್ತೊಂದೆಡೆ ಮೋಜು ಮಸ್ತಿಯೊಂದಿಗೆ ಆಟಗಾರರು ಸಮಯ ಕಳೆಯುತ್ತಿದ್ದಾರೆ.

ಇದರ ನಡುವೆ ಮುಂಬೈ ಇಂಡಿಯನ್ಸ್ ತಂಡ ಹಂಚಿಕೊಂಡ ಫೋಟೋವೊಂದು ಇದೀಗ ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆಗೆ ಕಾರಣವಾಗಿದೆ. ಇದಕ್ಕೆ ಕಾರಣ ಫೋಟೋದಲ್ಲಿ ಸಚಿನ್ ತೆಂಡೂಲ್ಕರ್ ಪುತ್ರ ಅರ್ಜುನ್ ತೆಂಡೂಲ್ಕರ್ ಕಾಣಿಸಿಕೊಂಡಿರುವುದು.

ಇದರಿಂದ ಅರ್ಜುನ್ ತೆಂಡೂಲ್ಕರ್ ಮುಂಬೈ ಇಂಡಿಯನ್ಸ್ ತಂಡಕ್ಕೆ ಸೇರ್ಪಡೆಯಾದ್ರಾ ಎಂಬ ಅನುಮಾನ ಹುಟ್ಟಿಕೊಂಡಿತ್ತು. ಅಲ್ಲದೆ 20ರ ಹರೆಯದ ಅರ್ಜುನ್​ ರೋಹಿತ್ ಪಡೆಯಲ್ಲಿ ಸ್ಥಾನಗಿಟ್ಟಿಸಿಕೊಂಡಿದ್ದಾರೆ ಎಂಬ ಸುದ್ದಿಗಳು ಹರಿದಾಡಿದ್ದವು.

ಆದರೆ ಈಗ ಅರ್ಜುನ್ ಮುಂಬೈ ತಂಡದಲ್ಲಿ ಸ್ಥಾನ ಪಡೆದಿರುವುದು ನೆಟ್ ಬೌಲರ್ ಆಗಿ ಎಂಬ ವಿಚಾರ ಬಹಿರಂಗವಾಗಿದೆ. ರೋಹಿತ್ ಪಡೆಯ ಬ್ಯಾಟ್ಸ್​ಮನ್​ಗಳಿಗೆ ಅಭ್ಯಾಸದ ವೇಳೆ ಬೌಲಿಂಗ್ ಮಾಡಲು ಅರ್ಜುನ್ ತೆಂಡೂಲ್ಕರ್ ಯುಎಇ ಗೆ ಹಾರಿದ್ದಾರೆ.

ಹೀಗಾಗಿ ಮುಂಬೈ ಇಂಡಿಯನ್ಸ್ ತಂಡದ ವಿಶ್ರಾಂತಿ ವೇಳೆ ತೆಗೆದುಕೊಂಡ ಫೋಟೋದಲ್ಲಿ ಅರ್ಜುನ್ ಕೂಡ ಕಾಣಿಸಿಕೊಂಡಿದ್ದರು.  ಈ ಹಿಂದೆ ಕೂಡ ಐಪಿಎಲ್​ನಲ್ಲಿ ಮುಂಬೈ ಇಂಡಿಯನ್ಸ್ ಅಭ್ಯಾಸದ ವೇಳೆ ಅರ್ಜುನ್ ನೆಟ್ ಬೌಲರ್​ ಆಗಿ ಬೌಲಿಂಗ್ ಮಾಡಿದ್ದರು

ಇದೀಗ ವಿದೇಶದಲ್ಲಿ ಐಪಿಎಲ್​ ನಡೆಯುತ್ತಿದ್ದರೂ ಬಯೋ ಬಬಲ್ ಸೆಕ್ಯುರ್ ಕಾರಣದಿಂದ ಸ್ಥಳೀಯ ಕ್ರಿಕೆಟಿಗರನ್ನು ಬಳಸಿಕೊಳ್ಳುವಂತಿಲ್ಲ. ಹೀಗಾಗಿ ಮುಂಬೈ ಫ್ರಾಂಚೈಸಿ ತಂಡದ ಮುಂಬೈ ಕ್ರಿಕೆಟಿಗರನ್ನು ಕರೆಸಿಕೊಂಡಿದ್ದಾರೆ.

ಇದೇ ಶನಿವಾರ ಐಪಿಎಲ್ 13ನೇ ಸೀಸನ್ ಆರಂಭವಾಗಲಿದ್ದು, ಹಾಲಿ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ರನ್ನರ್ ಅಪ್ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಮೊದಲ ಪಂದ್ಯವನ್ನಾಡಲಿದೆ.