IPL 2020: ಆತನ ಭವಿಷ್ಯವಾಣಿ ಸುಳ್ಳಾಗಿರಬಹುದು, ಆದರೆ ಡೆಲ್ಲಿ ಬಗ್ಗೆ ಆತ ಹೇಳಿದ ಭವಿಷ್ಯ ನಿಜವಾಗಿದೆ..!

ಇಂಡಿಯನ್ ಪ್ರೀಮಿಯರ್ ಲೀಗ್​  ನಡೆಯುವುದು ಅನುಮಾನವಾಗಿತ್ತು. ಆದರೆ ಅದಕ್ಕೂ ಮುನ್ನವೇ ಈ ಬಾರಿ  ಚೆನ್ನೈ ಸೂಪರ್ ಕಿಂಗ್ಸ್​ ಪ್ಲೇ ಆಫ್ ಪ್ರವೇಶಿಸಲ್ಲ ಎಂದರೆ ಯಾರಾದರೂ ನಂಬುತ್ತಿದ್ದರೆ? ಖಂಡಿತವಾಗಿಯೂ ಇಲ್ಲ. ಅಷ್ಟೇ ಅಲ್ಲ, ಈ ಬಾರಿ ರಾಜಸ್ಥಾನ್ ರಾಯಲ್ಸ್ ಅಂಕ ಪಟ್ಟಿಯಲ್ಲಿ ಅಂತಿಮ ಸ್ಥಾನ ಪಡೆಯಲಿದೆ ಎಂದು 4 ತಿಂಗಳುಗಳ ಹಿಂದೆಯೇ ಭವಿಷ್ಯ ನುಡಿದಿದ್ರೆ....ಇದರೊಂದಿಗೆ ಆರ್​ಸಿಬಿ ಪ್ಲೇ ಆಫ್ ಪ್ರವೇಶಿಸಲಿದೆ ಎಂದೂ ಕೂಡ ತಿಳಿಸಿದ್ದರೆ..!

ಹೌದು, ಅಚ್ಚರಿ ಎನಿಸಿದರೂ ಇದು ಸತ್ಯ. ಯಾವ ತಂಡಗಳು ಪ್ಲೇ ಆಫ್ ಆಡಲಿದೆ. ಯಾವ ತಂಡ ಹೊರಬೀಳಲಿದೆ. ಯಾವ ತಂಡಕ್ಕೆ ಯಾವ ಸ್ಥಾನ ಎಂಬುದನ್ನು ಜುಲೈ 27 ರಂದೇ ತಿಳಿಸಿ ಯುವಕನೊಬ್ಬ ಸೋಷಿಯಲ್ ಮೀಡಿಯಾದಲ್ಲಿ ಆಧುನಿಕ ಜ್ಯೋತಿಷಿ ಎನಿಸಿಕೊಂಡಿದ್ದರು.

ಐಪಿಎಲ್ ನಡೆಯಲಿದೆಯಾ ಎಂಬ ಮಿಲಿಯನ್ ಡಾಲರ್ ಪ್ರಶ್ನೆ ಚಾಲ್ತಿಯಲ್ಲಿದ್ದ ವೇಳೆ ಅಹಮದಾಬಾದ್​ನ ಮಿತುಲ್ ಎಂಬ 26ರ ಹರೆಯದ ಯುವಕ ಐಪಿಎಲ್​ 2020ಯ ಭವಿಷ್ಯವನ್ನು ನುಡಿದಿದ್ದನು.

ಈ ಭವಿಷ್ಯದಲ್ಲಿ ವಿರಾಟ್ ಕೊಹ್ಲಿ ಈ ಬಾರಿ ಐಪಿಎಲ್ ಸಾಧಾರಣ ಸರಾಸರಿಯಲ್ಲಿ ಬ್ಯಾಟ್ ಬೀಸಲಿದ್ದಾರೆ. ಚೆನ್ನೈ ಸೂಪರ್ ಕಿಂಗ್ಸ್ ತಂಡ ಪ್ಲೇ ಆಫ್ ಪ್ರವೇಶಿಸುವುದಿಲ್ಲ. ರಾಜಸ್ಥಾನ್ ರಾಯಲ್ಸ್​ ಅಂಕಪಟ್ಟಿಯಲ್ಲಿ ಕೊನೆಯ ಸ್ಥಾನ ಪಡೆಯಲಿದೆ. ಕಿಂಗ್ಸ್ ಇಲೆವೆನ್ ಪಂಜಾಬ್ ಪ್ಲೇ ಆಫ್ ಅವಕಾಶ ಪಡೆಯುವುದಿಲ್ಲ ಎಂದು ಟ್ವಿಟರ್​ನಲ್ಲಿ ತಿಳಿಸಿದ್ದರು.

ಅದರಂತೆ ಇದುವರೆಗಿನ ಈತನ ಊಹೆ ಎಲ್ಲವೂ ನಿಜವಾಗಿತ್ತು. ರಾಜಸ್ಥಾನ್​ ಕೊನೆಯ ಸ್ಥಾನದೊಂದಿಗೆ ಐಪಿಎಲ್​ ಕೊನೆಗೊಳಿಸಿದೆ. ಅಂಕಪಟ್ಟಿಯಲ್ಲಿ 4ನೇ ಸ್ಥಾನ ಪಡೆದಿದ್ದ ಕಿಂಗ್ಸ್ ಇಲೆವೆನ್ ಪಂಜಾಬ್ ಕೊನೆಯ 2 ಪಂದ್ಯಗಳನ್ನು ಸೋಲುವ ಮೂಲಕ ಹೊರಬಿದ್ದಿದೆ. ಸಿಎಸ್​ಕೆ ಪ್ಲೇ ಆಫ್ ಪ್ರವೇಶಿಸದೇ ಇದೇ ಮೊದಲ ಬಾರಿಗೆ ಐಪಿಎಲ್ ಅಭಿಯಾನ ಅಂತ್ಯಗೊಳಿಸಿದೆ.

ಇನ್ನು ವಿರಾಟ್ ಕೊಹ್ಲಿ ಅವರ ಬ್ಯಾಟಿಂಗ್ ಸ್ಟ್ರೈಕ್ ರೇಟ್​ ಇಳಿದಿದ್ದು, ಇದುವರೆಗೂ ಸ್ಪೋಟಕ ಇನಿಂಗ್ಸ್ ಮೂಡಿಬಂದಿಲ್ಲ. ಇಷ್ಟೇ ಅಲ್ಲದೆ ಈತ ತಿಳಿಸಿದ ತಂಡಗಳೇ ಪ್ಲೇ ಆಫ್​ ಅರ್ಹತೆಯನ್ನು ಗಿಟ್ಟಿಸಿಕೊಂಡಿದೆ. ಅದರಂತೆ ಮುಂಬೈ ಇಂಡಿಯನ್ಸ್ , ಡೆಲ್ಲಿ ಕ್ಯಾಪಿಟಲ್ಸ್, ಸನ್​ರೈಸರ್ಸ್ ಹೈದರಾಬಾದ್ ಹಾಗೂ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಅಂತಿಮ ನಾಲ್ಕು ತಂಡಗಳಾಗಿ ಕಾಣಿಸಿಕೊಂಡಿದೆ.

ಇಲ್ಲಿ ಸನ್​ರೈಸರ್ಸ್ ಹೈದರಾಬಾದ್ ಕೊನೆಯ ಪಂದ್ಯವನ್ನು ಗೆಲ್ಲುವ ಕೆಕೆಆರ್​ ತಂಡವನ್ನು ಹೊರ ಕಳಿಸಿ ಅರ್ಹತೆ ಪಡೆದರೆ, ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ರನ್ ರೇಟ್ ಆಧಾರದಲ್ಲಿ ಪ್ಲೇ ಆಫ್​ನಲ್ಲಿ ಉಳಿದುಕೊಂಡಿತ್ತು ಎಂಬುದು ವಿಶೇಷ.

ಇನ್ನು ಈ ನಾಲ್ಕು ತಂಡಗಳಲ್ಲಿ ಈ ಬಾರಿ ಯಾವ ತಂಡ ಚಾಂಪಿಯನ್ ಪಟ್ಟ ಅಲಂಕರಿಸಲಿದೆ ಎಂಬುದನ್ನು ತಿಳಿಸಿದ್ದನು. ಆದರೆ ಚಾಂಪಿಯನ್ ಪಟ್ಟ ಅಲಂಕರಿಸಲಿದೆ ಎಂದು ತಿಳಿಸಿದ್ದ ಸನ್​ರೈಸರ್ಸ್ ಹೈದರಾಬಾದ್ ತಂಡವು ಕ್ವಾಲಿಫೈಯರ್-2 ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ಸೋತು ಹೊರಬಿದ್ದಿದೆ. ಇದರೊಂದಿಗೆ ಆತನ ಒಂದು ಊಹೆ ತಪ್ಪಾಗಿದೆ.

ಅಂದರೆ ಮಿತುಲ್ ತಿಳಿಸಿದ 6 ಭವಿಷ್ಯಗಳಲ್ಲಿ 5 ನಿಜವಾಗಿದೆ. ಆದರೆ ಡೆಲ್ಲಿ ತಂಡದಲ್ಲಿ ಅದ್ಭುತ ಸಂಭವಿಸಲಿದೆ ಎಂಬ ಮತ್ತೊಂದು ಭವಿಷ್ಯವನ್ನೂ ಇದೇ ಮಿತುಲ್ ಮಾಡಿದ್ದರು ಎಂಬುದೇ ಈಗ ಅಚ್ಚರಿ.

ಏಕೆಂದರೆ ಅಕ್ಟೋಬರ್-31 ರಂದು ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಮಾರ್ಕಸ್ ಸ್ಟೋಯಿನಿಸ್ ಅವರನ್ನು ಆರಂಭಿಕರಾಗಿ ಕಣಕ್ಕಿಳಿಸಿದರೆ ಅದ್ಭುತ ಸಂಭವಿಸಲಿದೆ ಎಂದು ಮಿತುಲ್ ತಿಳಿಸಿದ್ದರು.

ಅಚ್ಚರಿ ಎಂಬಂತೆ  ಡೆಲ್ಲಿ ಕ್ಯಾಪಿಟಲ್ಸ್ ಸನ್​ರೈಸರ್ಸ್ ಹೈದರಾಬಾದ್ ವಿರುದ್ಧದ ಪಂದ್ಯದಲ್ಲಿ ಬ್ಯಾಟಿಂಗ್ ಕ್ರಮಾಂಕದಲ್ಲಿ ಬದಲಾವಣೆ ಮಾಡಿತ್ತು. ಅದರಲ್ಲೂ ಸ್ಟೋಯಿನಿಸ್ ಅವರನ್ನು ಆರಂಭಿಕರಾಗಿ ಕಣಕ್ಕಿಳಿಸಿದ್ದರು.

ಅದರಂತೆ ಡೆಲ್ಲಿ ಪಾಲಿನ ಚಿಂತೆಗೆ ಕಾರಣವಾಗಿದ್ದ ಸ್ಪೋಟಕ ಆರಂಭವನ್ನು ಸ್ಟೋಯಿನಿಸ್ ಒದಗಿಸಿದ್ದರು. ಶಿಖರ್ ಧವನ್ ಜೊತೆಗೂಡಿ ಕೇವಲ 8 ಓವರ್​ಗಳಲ್ಲಿ ತಂಡದ ಮೊತ್ತವನ್ನು 80ರ ಗಡಿದಾಟಿಸಿದ್ದರು. ಬ್ಯಾಟಿಂಗ್​ನಲ್ಲಿ ಬಿರುಸಿನ 38 ರನ್ ಹಾಗೂ ಬೌಲಿಂಗ್​ನಲ್ಲಿ 3 ವಿಕೆಟ್ ಪಡೆಯುವ ಮೂಲಕ ಡೆಲ್ಲಿ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದರು.

ಇದೀಗ ಮತ್ತದೇ ಮಿತುಲ್ ಹೇಳಿದ ಭವಿಷ್ಯದ ಬಗ್ಗೆ ಚರ್ಚೆಗಳು ಶುರುವಾಗಿದೆ. ಸನ್​ರೈಸರ್ಸ್ ಹೈದರಾಬಾದ್ ಚಾಂಪಿಯನ್ ಪಟ್ಟ ಅಲಂಕರಿಸಲಿದೆ ಎಂದಿದ್ದ ಮಿತುಲ್, ಅಕ್ಟೋಬರ್ 31 ರಂದು ಸ್ಟೋಯಿನಿಸ್ ಆರಂಭಿಕರಾಗಿ ಕಣಕ್ಕಿಳಿದರೆ ಅಚ್ಚರಿ ನಡೆಯಲಿದೆ ಎಂದಿದ್ದರು. ಅದರಂತೆ ಸನ್​ರೈಸರ್ಸ್​ ವಿರುದ್ದ ಸ್ಟೋಯಿನಿಸ್ ಓಪನರ್ ಆಗಿ ಕಣಕ್ಕಿಳಿದರು, ಡೆಲ್ಲಿ ಕ್ಯಾಪಿಟಲ್ಸ್​ ಚೊಚ್ಚಲ ಬಾರಿ ಫೈನಲ್ ಪ್ರವೇಶಿಸಿದೆ. ಒಟ್ಟಿನಲ್ಲಿ ಮಿತುಲ್ ಹೇಳಿದ ಭವಿಷ್ಯಗಳಲ್ಲಿ ಒಂದು ಸುಳ್ಳಾದರೂ, ಅದರ ಬಗ್ಗೆಯೂ ಆತ ಮುನ್ಸೂಚನೆ ನೀಡಿರುವುದು ಅಚ್ಚರಿಗೆ ಕಾರಣವಾಗಿದೆ.