IPL 2020: ರಂಗು ರಂಗಿನ ಐಪಿಎಲ್​ನಲ್ಲಿ ಕನ್ನಡ ಡಿಂಡಿಮ: ಈ ಬಾರಿ ಒಟ್ಟು ಎಷ್ಟು ಕನ್ನಡಿಗರಿದ್ದಾರೆ ಗೊತ್ತೇ

ಇಡೀ ವಿಶ್ವವೇ ಅನೇಕ ತಿಂಗಳುಗಳಿಂದ ಕಾತುರದಿಂದ ಕಾಯುತ್ತಿರುವ 13ನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಗೆ ಕ್ಷಣಗಣನೆ ಶುರುವಾಗಿದೆ.

ಮುಂದಿನ ತಿಂಗಳು ಸೆಪ್ಟೆಂಬರ್ 19 ರಂದು ಈ ಮಿಲಿಯನ್ ಡಾಲರ್ ಟೂರ್ನಿಗೆ ಯುಎಇನಲ್ಲಿ ಚಾಲನೆ ಸಿಗಲಿದೆ. ಮೈದಾನಕ್ಕೆ ಬಂದು ಕ್ರಿಕೆಟ್ ನೋಡಲು ಸಾಧ್ಯವಾಗಿಲ್ಲ ಎಂದಾದರೂ ಟಿವಿ ಮುಂದೆ ಕೂತು ರೋಚಕ ಪಂದ್ಯಗಳ ವೀಕ್ಷಣೆ ಮಾಡಲು ಅಭಿಮಾನಿಗಳು ತುದಿಗಾಲಿನಲ್ಲಿ ನಿಂತಿದ್ದಾರೆ.

ಈಗಾಗಲೇ ಆರ್​ಸಿಬಿ, ಚೆನ್ನೈ ಸೂಪರ್ ಕಿಂಗ್ಸ್, ಮುಂಬೈ ಇಂಡಿಯನ್ಸ್ ಸೇರಿ ಎಂಟು ಪ್ರಾಂಚೈಸಿಗಳು ಅರಬ್ ರಾಷ್ಟ್ರಕ್ಕೆ ತಲುಪಿದ್ದು ಕ್ವಾರಂಟೈನ್ ಮುಗಿಸಿ ಅಭ್ಯಾಸಕ್ಕೆ ತಯಾರಾಗುತ್ತಿದೆ.

ಈ ನಡುವೆ ಕರ್ನಾಟಕದ ಕ್ರಿಕೆಟಿಗರು ಕೂಡ ಟೂರ್ನಿಯಲ್ಲಿ ಕಣಕ್ಕಿಳಿಯಲು ತಯಾರುಮಾಡಿಕೊಳ್ಳುತ್ತಿದ್ದಾರೆ. ಕಳೆದ ಬಾರಿಗಿಂತ ಈ ಬಾರಿ ಐಪಿಎಲ್​ನಲ್ಲಿ ಕನ್ನಡಿಗರ ದಂಡೇ ಇದೆ.

ಕಿಂಗ್ಸ್ ಇಲೆವೆನ್ ತಂಡವನ್ನು ಮುನ್ನಡೆಸಲಿರುವ ಕೆಎಲ್ ರಾಹುಲ್, ತಂಡದ ಬ್ಯಾಟ್ಸ್​ಮನ್​ಗಳಾದ ಮಯಾಂಕ್ ಅಗರ್ವಾಲ್, ಕರುಣ್ ನಾಯರ್ ಒಂದುಕಡೆಯಾದರೆ, ರಾಜಸ್ಥಾನ ರಾಯಲ್ಸ್ ತಂಡವನ್ನು ಪ್ರತಿನಿಧಿಸಲಿರುವ ರಾಬಿನ್ ಉತ್ತಪ್ಪ ಮತ್ತೊಂದು ಕಡೆ.

ಇನ್ನೂ ಆರ್​ಸಿಬಿ ತಂಡದ ಪರ ಕಣಕ್ಕಿಳಿಯಲಿರುವ ದೇವದತ್ ಪಡಿಕಲ್ ಸೇರಿ ಅನೇಕ ಕನ್ನಡಿಗರು ಈ ಬಾರಿಯ ಐಪಿಎಲ್​ನಲ್ಲಿ ಅಬ್ಬರಿಸಲು ತಯಾರಾಗಿದ್ದಾರೆ.

ಇದೇ ಮೊದಲ ಬಾರಿಗೆ ಐಪಿಎಲ್ನಲ್ಲಿ ತಂಡವೊಂದರ ನಾಯಕರಾಗಿ ಕಣಕ್ಕಿಳಿಯಲು ಕೆ. ಎಲ್ ರಾಹುಲ್ ಸಜ್ಜಾಗಿದ್ದಾರೆ. ಅವರಿಗೆ ಕರ್ನಾಟಕದವರೇ ಆದ ಸ್ಪಿನ್ ದಿಗ್ಗಜ ಅನಿಲ್ ಕುಂಬ್ಳೆ ಅವರು ಕೋಚ್ ಆಗಿ ಸಾಥ್ ನೀಡಲಿದ್ದಾರೆ.

ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡ ಕರ್ನಾಟಕದ ಒಟ್ಟು 5 ಆಟಗಾರರನ್ನು ಒಳಗೊಂಡಿದೆ. ಐಪಿಎಲ್ ಟೂರ್ನಿಯಲ್ಲಿ ಈ ಬಾರಿ ಒಟ್ಟು 12 ಕನ್ನಡಿಗರು ಆಡಲಿದ್ದು, ಈ ಪೈಕಿ 5 ಆಟಗಾರರು ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದಲ್ಲಿರುವುದು ವಿಶೇಷ.

ರಾಹುಲ್ ಜೊತೆ ಮಯಾಂಕ್ ಅಗರ್ವಾಲ್, ಕರುಣ್ ನಾಯರ್, ಆಲ್ರೌಂಡರ್ ಕೆ. ಗೌತಮ್ ಮತ್ತು ಸ್ಪಿನ್ನರ್ ಜೆ. ಸುಚಿತ್ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದಲ್ಲಿರುವ ಇತರ ಕನ್ನಡಿಗರು.

ಇನ್ನೂ ಕೆಕೆಆರ್ ತಂಡದಿಂದ ಈ ಬಾರಿ ರಾಜಸ್ಥಾನ ರಾಯಲ್ಸ್ ತಂಡಕ್ಕೆ ಸೇರ್ಪಡೆಗೊಂಡಿರುವ ರಾಬಿನ್ ಉತ್ತಪ್ಪ ಕೂಡ ಕನ್ನಡವರಾಗಿದ್ದಾರೆ.

ಕಳೆದ ದೇಶೀಯ ಕ್ರಿಕೆಟ್ ಋತುವಿನಲ್ಲಿ ರನ್​ ಪ್ರವಾಹ ಹರಿಸಿ ಗಮನ ಸೆಳೆದಿದ್ದ ಯುವ ಎಡಗೈ ಬ್ಯಾಟ್ಸ್​ಮನ್​ ದೇವದತ್ ಪಡಿಕಲ್ ಈ ಬಾರಿ ಆರ್​ಸಿಬಿ ಪರ ಮಿಂಚುವ ಸಿದ್ಧತೆಯಲ್ಲಿದ್ದಾರೆ. ಮತ್ತೋರ್ವ ಕನ್ನಡಿಗ ಪವನ್ ದೇಶಪಾಂಡೆ ಕೂಡ ಈ ಬಾರಿ ಆರ್​​ಸಿಬಿ ಪರ ಆಡಲಿದ್ದಾರೆ.

ಅಷ್ಟೇ ಅಲ್ಲದೆ ಮನೀಷ್ ಪಾಂಡೆ , ಪ್ರಸಿದ್ಧಕೃಷ್ಣ, ಶ್ರೇಯಸ್ ಗೋಪಾಲ್ , ಕೃಷ್ಣಪ್ಪ ಗೌತಮ್ ಮತ್ತು ಅನಿರುದ್ಧ ಜೋಷಿ ಈ ಬಾರಿ ಐಪಿಎಲ್​ನಲ್ಲಿ ಕಣಕ್ಕಿಳಿಯಲಿರುವ ಇತರ ಕನ್ನಡಿಗರಾಗಿದ್ದಾರೆ.