IPL 2020: IPL ಮೊದಲ ವಾರದಲ್ಲಿ ಸ್ಟಾರ್ ಆಟಗಾರರು ಕಣಕ್ಕಿಳಿಯುವುದು ಡೌಟ್..!

ಇಂಡಿಯನ್ ಪ್ರೀಮಿಯರ್ ಲೀಗ್ ಯುಎಇ (ದುಬೈ)ನಲ್ಲಿ ಸೆಪ್ಟೆಂಬರ್​-19 ರಿಂದ ಪ್ರಾರಂಭವಾಗಲಿದೆ. ಈಗಾಗಲೇ ಎಲ್ಲಾ ತಂಡಗಳ ಬಹುತೇಕ ಆಟಗಾರರು ಯುಎಇನಲ್ಲಿ ಬೀಡು ಬಿಟ್ಟಿದೆ. ಹಾಗೆಯೇ ಕೆರಿಬಿಯನ್ ಪ್ರೀಮಿಯರ್ ಲೀಗ್​ ಆಡುತ್ತಿರುವ ಆಟಗಾರರು ಒಂದು ವಾರದೊಳಗೆ ತಂಡವನ್ನು ಕೂಡಿಕೊಳ್ಳಲಿದ್ದಾರೆ.

ಇತ್ತ ಆಸ್ಟ್ರೇಲಿಯಾ ಹಾಗೂ ಇಂಗ್ಲೆಂಡ್  ತಂಡದ ಆಟಗಾರರು ಮಾತ್ರ ತಂಡವನ್ನು ಸೇರುವುದು ವಿಳಂಬವಾಗಲಿದೆ. ಆಸೀಸ್​-ಆಂಗ್ಲರ ನಡುವಣ ಸರಣಿ ಸೆ.16 ರವರೆಗೆ ನಡೆಯಲಿದೆ. ಇದರಿಂದ ಈ ಎರಡು ತಂಡಗಳ ಆಟಗಾರರು ಟೂರ್ನಿಯಲ್ಲಿ ಭಾಗವಹಿಸುವುದು ಮತ್ತಷ್ಟು ತಡವಾಗಲಿದೆ.

ಐಪಿಎಲ್ ಆರಂಭಕ್ಕೂ ಮೂರು ದಿನ ಮೊದಲು ಆಸ್ಟ್ರೇಲಿಯಾದ ಇಂಗ್ಲೆಂಡ್ ಪ್ರವಾಸ ಮುಕ್ತಾಯವಾದರೂ, ಕೊರೋನಾ ನಿಯಮ ಪಾಲಿಸಬೇಕಿದೆ. ಒಂದು ವೇಳೆ ಎರಡೂ ತಂಡಗಳ ಐಪಿಎಲ್ ಆಟಗಾರರು ದುಬೈಗೆ ತಲುಪಿದರೂ ಅವರನ್ನು ತಂಡಕ್ಕೆ ಸೇರಿಸಿಕೊಳ್ಳುವಂತಿಲ್ಲ.

ಏಕೆಂದರೆ ಯುಎಇ ಸರ್ಕಾರದ ನಿರ್ದೇಶನದ ಪ್ರಕಾರ ಅವರು ಕೋವಿಡ್ 19 ಪರೀಕ್ಷೆಗೆ ಒಳಗಾಗಬೇಕಾಗುತ್ತದೆ. ಅವರು ನೆಗೆಟಿವ್ ಫಲಿತಾಂಶ ಬಂದರೆ ಮಾತ್ರ ಆಟಗಾರರಿಗೆ ಪ್ರತ್ಯೇಕ ವಲಯದಿಂದ ಹೊರಹೋಗಲು ಅವಕಾಶವಿರುತ್ತದೆ.

ಯುಎಇ ಸರ್ಕಾರದ ನಿಯಮದ ಪ್ರಕಾರ ಈ ಪ್ರಕ್ರಿಯೆಯಲ್ಲಿ ವಿದೇಶದಿಂದ ಬಂದವರು ಕನಿಷ್ಠ 48 ರಿಂದ 72 ಗಂಟೆಗಳ ಕಾಲ ಕ್ವಾರಂಟೈನ್​ನಲ್ಲಿರಬೇಕು. ಅಂದರೆ ಆಸ್ಟ್ರೇಲಿಯಾ-ಇಂಗ್ಲೆಂಡ್ ಆಟಗಾರರು ಟೀಮ್ ಸೇರಿಕೊಳ್ಳಲು ಕನಿಷ್ಠ 6 ರಿಂದ 10 ದಿನಗಳು ತೆಗೆದುಕೊಳ್ಳಲಿದೆ.

ಇದರಿಂದ ಈ ಎರಡು ದೇಶಗಳ ಆಟಗಾರರು ಐಪಿಎಲ್ ಮೊದಲ ವಾರವನ್ನು ತಪ್ಪಿಸಿಕೊಳ್ಳಲಿದೆ. ಅಂದರೆ ಕನಿಷ್ಠ ಒಂದು ಪಂದ್ಯವನ್ನಾದರೂ ಇಂಗ್ಲೆಂಡ್ - ಆಸ್ಟ್ರೇಲಿಯಾ ಆಟಗಾರರು ಮಿಸ್ ಮಾಡಿಕೊಳ್ಳಲಿದ್ದಾರೆ.

ಇದೀಗ ಸ್ಟಾರ್ ಆಟಗಾರರು ಮೊದಲ ವಾರದಲ್ಲಿ ಕಣಕ್ಕಿಳಿಯದಿರುವ ಬಗ್ಗೆ ಫ್ರಾಂಚೈಸಿಗಳು ಕೂಡ ಚಿಂತಿತರಾಗಿದ್ದಾರೆ. ಏಕೆಂದರೆ ಆಸ್ಟ್ರೇಲಿಯಾದ 17 ಆಟಗಾರರು ಮತ್ತು ಇಂಗ್ಲೆಂಡ್‌ನ  11 ಆಟಗಾರರು ಐಪಿಎಲ್ 2020 ರಲ್ಲಿ ಬಹು ಮಿಲಿಯನ್ ಡಾಲರ್ ಒಪ್ಪಂದ ಮಾಡಿಕೊಂಡಿದ್ದಾರೆ.

ಅದರಲ್ಲಿರುವುದು ಕೂಡ ಆರೋನ್ ಫಿಂಚ್, ಸ್ಟೀವ್ ಸ್ಮಿತ್, ಡೇವಿಡ್ ವಾರ್ನರ್, ಪ್ಯಾಟ್ ಕಮ್ಮಿನ್ಸ್, ಬೆನ್ ಸ್ಟೋಕ್ಸ್, ಜೋಫ್ರಾ ಆರ್ಚರ್ ಅವರಂತಹ ಸ್ಟಾರ್ ಆಟಗಾರರು. ಹೀಗಾಗಿ ಒಂದು ತಂಡದ ಬೆನ್ನಲುಬಾಗಿರುವ ಆಟಗಾರರಿಲ್ಲದೆ ತಂಡ ಕಣಕ್ಕಿಳಿದ್ರೆ ಹಿನ್ನೆಡೆಯಾಗುವ ಭಯದಲ್ಲಿದೆ ಫ್ರಾಂಚೈಸಿ.

ಈ ಸಮಸ್ಯೆಯನ್ನು ಬಿಸಿಸಿಐ ಕೂಡ ಗಂಭೀರವಾಗಿ ಪರಿಗಣಿಸಿದ್ದು, ಅದಕ್ಕಾಗಿ ಪರ್ಯಾಯ ಮಾರ್ಗದ ವ್ಯವಸ್ಥೆ ರೂಪಿಸಲು ಯೋಚಿಸುತ್ತಿದೆ ಎಂದು ಮೂಲಗಳಿಂದ ತಿಳಿದು ಬಂದಿದೆ.

ಈ ಬಗ್ಗೆ ಯುಎಇ ಕ್ರಿಕೆಟ್ ಬೋರ್ಡ್ ಜತೆ ಸಮಾಲೋಚನೆ ನಡೆಸಿದ್ದು, ಆಸ್ಟ್ರೇಲಿಯಾ-ಇಂಗ್ಲೆಂಡ್ ಆಟಗಾರರು ಈಗಾಗಲೇ ಜೈವಿಕ ಸುರಕ್ಷಾ ವಲಯದಲ್ಲೇ ಕ್ರಿಕೆಟ್ ಆಡುತ್ತಿದ್ದಾರೆ. ಹೀಗಾಗಿ ಅವರನ್ನು ದುಬೈನ ಕ್ವಾರಂಟೈನ್​ನಿಂದ ಹೊರಗಿಡಲು ಕೇಳಿಕೊಳ್ಳಲಾಗಿದೆ. ಆದರೆ ಯುಎಇ ಸರ್ಕಾರ ತನ್ನ ನಿಯಮದಲ್ಲಿ ಬದಲಾವಣೆ ಮಾಡಿಕೊಳ್ಳಲು ಸಿದ್ಧರಿಲ್ಲ ಎನ್ನಲಾಗಿದೆ.