IPL 2020: ಈ ಮೂವರಲ್ಲಿ ಯಾರಾಗಲಿದ್ದಾರೆ ಈ ಬಾರಿಯ IPL ರನ್ ಸರದಾರ..!

ಐಪಿಎಲ್ ಹೊಸ ಆಟಗಾರರಿಗೆ ಉತ್ತಮ ವೇದಿಕೆಯಂತು ಹೌದು. ಆದರೆ ಕಳೆದ 12 ಸೀಸನ್​ಗಳಲ್ಲಿ ಪಂದ್ಯದ ಫಲಿತಾಂಶದ ಮೇಲೆ ಪ್ರಭಾವ ಬೀರಿರುವುದು ಅನುಭವಿ ಆಟಗಾರರು ಎಂದರೆ ತಪ್ಪಾಗಲಾರದು. ಅದರಲ್ಲೂ ವಿದೇಶಿ ಬೌಲರ್​ಗಳ ವಿರುದ್ಧ ಆಡಿರುವ ಆಟಗಾರರೇ ಹೆಚ್ಚು ಪ್ರಾಬಲ್ಯ ಸಾಧಿಸಿದ್ದಾರೆ. ಈ ಬಾರಿ ಟೂರ್ನಿ ನಡೆಯುತ್ತಿರುವುದು ಕೂಡ ವಿದೇಶಿ ಪಿಚ್​ನಲ್ಲಿ ಎಂಬುದು ವಿಶೇಷ.

ಸ್ಪಿನ್​ಗೆ ಸಹಕಾರಿ ಹಾಗೂ ಎರಡನೇ ಬ್ಯಾಟಿಂಗ್​ಗೆ ಸವಾಲಾಗಿರುವ ಯುಎಇ ಪಿಚ್​ಗಳಲ್ಲಿ ವಿಜೃಂಭಿಸಲು ಅನುಭವ ಧಾರೆಯೆರಯಬೇಕಾಗಬಹುದು. ಹೀಗೆ ವಿದೇಶಿ ಪಿಚ್​ನಲ್ಲಿ ಪ್ರಬಲ ಬ್ಯಾಟಿಂಗ್ ಸಾಮರ್ಥ್ಯ ಪ್ರದರ್ಶಿಸಿರುವ ಮೂವರು ಕ್ರಿಕೆಟಿಗರಿದ್ದಾರೆ.

ಇವರು ಐಪಿಎಲ್​ನಲ್ಲೂ ಅತ್ಯುತ್ತಮ ಪ್ರದರ್ಶನವನ್ನು ಕೂಡ ನೀಡಿದ್ದಾರೆ. ಈ ಮೂವರು ಅವರವರ ತಂಡವನ್ನು ಮುನ್ನೆಡೆಸುತ್ತಿರುವುದರಿಂದ ಈ ಬಾರಿ ಜವಾಬ್ದಾರಿ ಕೂಡ ಹೆಚ್ಚಿದೆ. ಅಂದಹಾಗೆ ಐಪಿಎಲ್‌-2020 ನಲ್ಲಿ ಹೆಚ್ಚು ರನ್ ಗಳಿಸುವ ಮೂಲಕ ಆರೆಂಜ್ ಕ್ಯಾಪ್ ಗೆಲ್ಲಬಲ್ಲ ಮೂವರು ಆಟಗಾರರ ಪರಿಚಯ ಇಲ್ಲಿದೆ.

ಡೇವಿಡ್ ವಾರ್ನರ್

ಆಸ್ಟ್ರೇಲಿಯಾ ಕ್ರಿಕೆಟಿಗ ಡೇವಿಡ್ ವಾರ್ನರ್ ಸನ್‌ರೈಸರ್ಸ್ ಹೈದರಾಬಾದ್‌ನ ಪ್ರಮುಖ ಆಟಗಾರ ಮತ್ತು ನಾಯಕ. ಆರಂಭಿಕನಾಗಿ ಐಪಿಎಲ್​ನಲ್ಲಿ ಕಮಾಲ್ ಮಾಡಿರುವ ಅತ್ಯುತ್ತಮ ಬ್ಯಾಟ್ಸ್​ಮನ್. ವಿದೇಶಿ ಪಿಚ್​ಗಳಲ್ಲಿ ಹೆಚ್ಚಾಗಿರುವ ಆಡಿರುವ ವಾರ್ನರ್‌ಗೆ ಐಪಿಎಲ್‌ನಲ್ಲಿ ಸಾಕಷ್ಟು ಅನುಭವವಿದೆ.

ಈವರೆಗೆ  126 ಐಪಿಎಲ್​ ಪಂದ್ಯಗಳಿಂದ ವಾರ್ನರ್ ಕಲೆ ಹಾಕಿರುವುದು ಬರೋಬ್ಬರಿ 4706 ರನ್. ಇದರಲ್ಲಿ ಎಡಗೈ ದಾಂಡಿಗನ ಬ್ಯಾಟ್​ನಿಂದ 4 ಶತಕಗಳು ಮತ್ತು 44 ಅರ್ಧಶತಕಗಳು ಸಿಡಿದಿವೆ. ವಾರ್ನರ್ ಸಿಡಿಲಬ್ಬರದ ಬ್ಯಾಟಿಂಗ್​ಗೆ ಈ ಅಂಕಿ ಅಂಶಗಳೇ ಸಾಕ್ಷಿ. ಹೀಗಾಗಿ ಈ ಬಾರಿಯ ಐಪಿಎಲ್​ನಲ್ಲಿ ಅತೀ ಹೆಚ್ಚು ರನ್ ಸಿಡಿಸುವ ಅಗ್ರ ಆಟಗಾರರ ಪಟ್ಟಿಯಲ್ಲಿ ಆಸೀಸ್ ದಾಂಡಿಗನ ಹೆಸರೂ ಕೂಡ ಮುಂಚೂಣಿಯಲ್ಲಿದೆ.

ವಿರಾಟ್ ಕೊಹ್ಲಿ

ರಾಯಲ್ ಚಾಲೆಂಜರ್ಸ್ ಬೆಂಗಳೂರು ನಾಯಕ ವಿರಾಟ್ ಕೊಹ್ಲಿ ಅವರ ಐಪಿಎಲ್ ಸಾಧನೆಯನ್ನು ಅಲ್ಲಗೆಳೆಯುವಂತಿಲ್ಲ. ಈ ಸೀಸನ್​ನಲ್ಲಿ ಅತೀ ಹೆಚ್ಚು ರನ್ ಗಳಿಸುವವರ ಪಟ್ಟಿಯಲ್ಲಿ ಕೊಹ್ಲಿ ಹೆಸರು ಕೂಡ ಅಗ್ರಸ್ಥಾನದಲ್ಲಿದೆ.

ಇದುವರೆಗೆ 177 ಐಪಿಎಲ್ ಪಂದ್ಯಗಳನ್ನಾಡಿರುವ ಟೀಮ್ ಇಂಡಿಯಾ ನಾಯಕ ಬರೋಬ್ಬರಿ 5412 ರನ್ ಕಲೆಹಾಕಿದ್ದಾರೆ. ಇದರಲ್ಲಿ 5 ಶತಕಗಳು ಮತ್ತು 36 ಅರ್ಧಶತಕಗಳು ಮೂಡಿ ಬಂದಿವೆ. ದುಬೈ ಪಿಚ್​ಗಳಲ್ಲೂ ಕೊಹ್ಲಿ ಪ್ರಚಂಡ ಬ್ಯಾಟಿಂಗ್ ಪ್ರದರ್ಶಿಸುವುದರಲ್ಲಿ ಸಂಶಯವೇ ಇಲ್ಲ.

ರೋಹಿತ್ ಶರ್ಮಾ

ಹಿಟ್​ಮ್ಯಾನ್ ಖ್ಯಾತಿಯ ರೋಹಿತ್ ಶರ್ಮಾ ವಿದೇಶಿ ಪಿಚ್​ಗಳಲ್ಲಿ ಭರ್ಜರಿ ಬ್ಯಾಟಿಂಗ್ ನಡೆಸುತ್ತಾರೆ. ಹೀಗಾಗಿ 2020 ಐಪಿಎಲ್​ನಲ್ಲೂ ಹಿಟ್​ಮ್ಯಾನ್ ಬ್ಯಾಟ್ ಝಳಪಳಿಸಲಿದ್ದಾರೆ. 188 ಐಪಿಎಲ್ ಪಂದ್ಯಗಳನ್ನಾಡಿರುವ ರೋಹಿತ್ 4898 ರನ್ ಕಲೆ ಹಾಕಿದ್ದಾರೆ.

ಹಿಟ್​ಮ್ಯಾನ್ ಖ್ಯಾತಿಯ ರೋಹಿತ್ ಶರ್ಮಾ ವಿದೇಶಿ ಪಿಚ್​ಗಳಲ್ಲಿ ಭರ್ಜರಿ ಬ್ಯಾಟಿಂಗ್ ನಡೆಸುತ್ತಾರೆ. ಹೀಗಾಗಿ 2020 ಐಪಿಎಲ್​ನಲ್ಲೂ ಹಿಟ್​ಮ್ಯಾನ್ ಬ್ಯಾಟ್ ಝಳಪಳಿಸಲಿದ್ದಾರೆ. 188 ಐಪಿಎಲ್ ಪಂದ್ಯಗಳನ್ನಾಡಿರುವ ರೋಹಿತ್ 4898 ರನ್ ಕಲೆ ಹಾಕಿದ್ದಾರೆ. ಇದರಲ್ಲಿ ಒಂದು ಶತಕ ಮತ್ತು 36 ಅರ್ಧಶತಕಗಳನ್ನು ಗಳಿಸಿದ್ದಾರೆ.

ಅದಕ್ಕಿಂತಲೂ ಹೆಚ್ಚಾಗಿ ಇಂಡಿಯನ್ ಪ್ರೀಮಿಯರ್ ಲೀಗ್​ನ ಅತ್ಯುತ್ತಮ ನಾಯಕ ಎಂದೆನಿಸಿಕೊಂಡಿದ್ದಾರೆ. ಹೀಗಾಗಿ ಈ ಬಾರಿ ಮುಂಬೈ ಇಂಡಿಯನ್ಸ್​ ತಂಡವು ಯಶಸ್ಸಿನ ಪರಾಕಾಷ್ಠೆಯನ್ನು ತಲುಪುವ ವಿಶ್ವಾಸದಲ್ಲಿದ್ದಾರೆ ರೋಹಿತ್. ಹಾಗೆಯೇ ಕಳೆದ ಕೆಲ ತಿಂಗಳಿಂದ ಮೈದಾನದಿಂದ ದೂರ ಉಳಿದಿದ್ದ ರೋಹಿತ್ ಐಪಿಎಲ್​ ಮೂಲಕ ಮತ್ತೆ ಬ್ಯಾಟ್ ಬೀಸಲು ಸಜ್ಜಾಗಿ ನಿಂತಿದ್ದಾರೆ. ಈ ಮೂವರು ಅನುಭವಿ ಆಟಗಾರರ ಹೊರತಾಗಿ ಮತ್ಯಾರೂ ಐಪಿಎಲ್​-2020ಯಲ್ಲಿ ರನ್​ ಮಳೆ ಹರಿಸಲಿದ್ದಾರೆ ಕಾದು ನೋಡಬೇಕಿದೆ.