IPL 2020: ಈ ಬಾರಿಯ ಐಪಿಎಲ್​ನಲ್ಲಿ ಗೇಲ್ ಶತಕದ ದಾಖಲೆ ಪುಡಿಮಾಡುವವರು ಇವರಲ್ಲಿ ಯಾರು?

ಇಂಡಿಯನ್ ಪ್ರೀಮಿಯರ್ ಲೀಗ್ 13ನೇ ಆವೃತ್ತಿಗೆ ಕೊನೆಗೂ ಮುಹೂರ್ತ ಕೂಡಿಬಂದಿದೆ. 51 ದಿನಗಳ ಕಾಲ ಯುಎಇನಲ್ಲಿ ರಂಗು ರಂಗಿನ ಮಿಲಿಯನ್ ಡಾಲರ್ ಟೂರ್ನಿ ಹಬ್ಬ ಆಯೋಜನೆಯಾಗಿದೆ.

ಸೆಪ್ಟೆಂಬರ್ 19 ರಿಂದ ಟೂರ್ನಿ ಆರಂಭವಾಗಲಿದ್ದು ನವೆಂಬರ್ 8ರಂದು ಫೈನಲ್ ಪಂದ್ಯ ನಡೆಯಲಿದೆ.

2008 ರಿಂದ ಆರಂಭವಾದ ಐಪಿಎಲ್​ನಲ್ಲಿ ಈವರೆಗೆ ಅನೇಕ ದಾಖಲೆಗಳು ಸೃಷ್ಟಿಯಾಗಿವೆ.

ಐಪಿಎಲ್ ದಾಖಲೆಗಳ ಪೈಕಿ ವೆಸ್ಟ್ ಇಂಡೀಸ್ ದಿಗ್ಗಜ ಕ್ರಿಸ್ ಗೇಲ್ ಸೃಷ್ಟಿಸಿದ ಇತಿಹಾಸ ಈವರೆಗೆ ಯಾರಿಂದಲೂ ಮುರಿಯಲು ಸಾಧ್ಯವಾಗಿಲ್ಲ.

2013ರ ಐಪಿಎಲ್​ನಲ್ಲಿ ಪುಣೆ ವಾರಿಯರ್ಸ್ ವಿರುದ್ಧದ ಪಂದ್ಯದಲ್ಲಿ ಆರ್​ಸಿಬಿ ತಂಡದಲ್ಲಿದ್ದ ಗೇಲ್ ಕೇವಲ 66 ಎಸೆತಗಳಲ್ಲಿ 13 ಬೌಂಡರಿ, 17 ಸಿಕ್ಸರ್ ಸಿಡಿಸಿ ಅಜೇಯ 175 ರನ್ ಚಚ್ಚಿದರು.

ಅಲ್ಲದೆ ಗೇಲ್ ಕೇವಲ 30 ಎಸೆತಗಳಲ್ಲಿ ಶತಕ ಸಿಡಿಸಿ ಮಿಂಚಿದ್ದರು. ಇದು ಐಪಿಎಲ್​ನಲ್ಲಿ ಈವರೆಗೆ ದಾಖಲಾದ ಅತಿ ವೇಗದ ಶತಕವಾಗಿದೆ.

ಈ ಶತಕದ ದಾಖಲೆಯನ್ನು ಐಪಿಎಲ್​ನಲ್ಲಿ ಈವರೆಗೆ ಯಾರೂ ಬ್ರೇಕ್ ಮಾಡಲು ಸಾಧ್ಯವಾಗಿಲ್ಲ. ಹಾಗಾದ್ರೆ ಈ ಬಾರಿ ಈ ದಾಖಲೆ ಪುಡಿಮಾಡಿ ಇತಿಹಾಸ ಸೃಷ್ಟಿಸಬಹುದಾದ ಆಟಗಾರ ಯಾರು ಎಂಬುವುದನ್ನು ನೋಡುವುದಾದರೆ…

ರೋಹಿತ್ ಶರ್ಮಾ: ಟೀಂ ಇಂಡಿಯಾದ ಸಿಕ್ಸರ್ ಸರದಾರ ರೋಹಿತ್ ಶರ್ಮಾ ಈ ಬಾರಿ ಅತಿ ವೇಗವಾಗಿ ಶತಕ ಸಿಡಿಸಿ ಗೇಲ್ ದಾಖಲೆ ಮುರಿಯುತ್ತಾರೆ ಎಂಬವರಲ್ಲಿ ಮೊದಲನೆಯವರು.

ಈಗಾಗಲೇ ಅಂತರಾಷ್ಟ್ರೀಯ ಟಿ-20 ಕ್ರಿಕೆಟ್​ನಲ್ಲಿ ಹಿಟ್​ಮ್ಯಾನ್​​ ಕೇವಲ 35 ಎಸೆತಗಳಲ್ಲಿ ಶತಕ ಬಾರಿಸಿ ಮಿಂಚಿದ್ದಾರೆ. ಹೀಗಾಗಿ ರೋಹಿತ್ ಈ ಬಾರಿಯ ಐಪಿಎಲ್​​ನಲ್ಲಿ ಗೇಲ್ ದಾಖಲೆ ಅಳಿಸಿ ಹಾಕಲಿದ್ದಾರೆ ಎಂದು ಹೇಳಲಾಗುತ್ತಿದೆ.

ಎಬಿ ಡಿವಿಲಿಯರ್ಸ್: ಮಿಸ್ಟರ್ 360 ಖ್ಯಾತಿಯ ಎಬಿ ಡಿವಿಲಿಯರ್ಸ್​ಗೆ 30 ಎಸೆತಗಳ ಒಳಗೆ ಶತಕ ಸಿಡಿಸುವುದು ದೊಡ್ಡ ವಿಚಾರವೇನಲ್ಲ. ಆರ್​ಸಿಬಿ ತಂಡದ ಪ್ರಮುಖ ಬ್ಯಾಟ್ಸ್​ಮನ್​ ಆಗಿರುವ ಇವರು ಈ ಹಿಂದೆ 52 ಎಸೆತಗಳಲ್ಲಿ 129 ರನ್ ಚಚ್ಚಿದ್ದರು.

ಜಾನಿ ಬೈರ್​ಸ್ಟೋ: ಸದ್ಯ ಟಿ-20 ಕ್ರಿಕೆಟ್​ನ ಸ್ಟಾರ್ ಬ್ಯಾಟ್ಸ್​ಮನ್​ ಆಗಿರುವ ಇಂಗ್ಲೆಂಡ್​ನ ಜಾನಿ ಬೈರ್​ಸ್ಟೋ ಕಳೆದ ಬಾರಿ ಸನ್​ರೈಸರ್ಸ್​​ ಪರ ಸ್ಪೋಟಕ ಬ್ಯಾಟ್ಸ್​ಮನ್​ ಆಗಿದ್ದರು. ಹೀಗಾಗಿಯೆ ಹೈದರಾಬಾದ್ ತಂಡವನ್ನು ಇವರನ್ನು ತನ್ನಲ್ಲೇ ಉಳಿಸಿಕೊಂಡಿದೆ.

ತಾನಾಡಿದ ಮೂರನೇ ಐಪಿಎಲ್ ಪಂದ್ಯದಲ್ಲೇ 56 ಎಸೆತಗಳಲ್ಲಿ 114 ರನ್ ಸಿಡಿಸಿ ಅಮೋಘ ಪ್ರದರ್ಶನ ನೀಡಿದ್ದರು. ಅಲ್ಲದೆ ಕಳೆದ ಸೀಸನ್​ನಲ್ಲಿ ವಾರ್ನರ್ ಜೊತೆಗೂಡಿ ದಾಖಲೆಯ 185 ರನ್​ಗಳ ಜೊತೆಯಾಟ ಆಡಿದ್ದರು.

ಆ್ಯಂಡ್ರೊ ರಸೆಲ್: ರಸೆಲ್ ಮೇನಿಯಾ ಈ ಬಾರಿಯ ಐಪಿಎಲ್​ನಲ್ಲೂ ಅಭಿಮಾನಿಗಳಿಗೆ ರಂಜಿಸದಿರದು. ಕಳೆದ ಸೀಸನ್​ನಲ್ಲಿ ರಸೆಲ್ ಆರ್ಭಟ ತುಸು ಜೋರಾಗಿಯೆಯಿತ್ತು. ಹೀಗಾಗಿ ಈ ಬಾರಿ ಇವರಿಂದ ಮತ್ತಷ್ಟು ನಿರೀಕ್ಷಿಸಲಾಗಿದ್ದು, ಗೇಲ್ ದಾಖಲೆಯ ಮುರಿದರೂ ಅಚ್ಚರಿಯಿಲ್ಲ.