IPL 2020: ಕ್ವಾರಂಟೈನ್ ಮುಗಿಸಿದ ಆರ್​ಸಿಬಿ: ಇಂದಿನಿಂದ ಅಭ್ಯಾಸಕ್ಕಿಳಿಯಲಿದೆ ಕೊಹ್ಲಿ ಪಡೆ

ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಆಟಗಾರರು ಇಂಡಿಯನ್ ಪ್ರೀಮಿಯರ್ ಲೀಗ್ 13ನೇ ಆವೃತ್ತಿಗಾಗಿ ಯುಎಇಗೆ ತಲುಪಿ ಆರು ದಿನಗಳು ಕಳೆದಿದ್ದು, ಕ್ವಾರಂಟೈನ್ ಅವಧಿಯನ್ನು ಪೂರ್ಣಗೊಳಿಸಿದೆ.

ಹೀಗಾಗಿ ಇಂದಿನಿಂದ ಮೂರು ವಾರಗಳ ಕಾಲ ತಂಡದ ತರಬೇತಿ ಶಿಬಿರ ನಡೆಯಲಿದೆ. ಕೋವಿಡ್-19 ಹಿನ್ನೆಲೆಯಲ್ಲಿ ವಿಶೇಷವಾಗಿ ನಿರ್ಮಿಸಲಾಗಿರುವ ಬಯೋ ಸೆಕ್ಯೂರ್ ವಾತಾವರಣದ ಅಡಿಯಲ್ಲಿ ಆಟಗಾರರು ಕಠಿಣ ಸಮರಾಭ್ಯಾಸ ನಡೆಸಲಿದ್ದಾರೆ.

ಆಟಗಾರರು ಕಳೆದ ಕೆಲವು ತಿಂಗಳುಗಳನ್ನು ವಿವಿಧ ಪರಿಸರದಲ್ಲಿ ಕಳೆದಿದ್ದಾರೆ ಮತ್ತು ಫಿಟ್ನೆಸ್ ಹಾಗೂ ತರಬೇತಿಯ ವಿವಿಧ ಹಂತಗಳಲ್ಲಿದ್ದಾರೆ. ಆದ್ದರಿಂದ ಮುಂಬರುವ ಟೂರ್ನಿಗೆ ಸಜ್ಜಾಗಲು ಈ ಏಕೈಕ ತರಬೇತಿ ವಿಧಾನ ಅತ್ಯುತ್ತಮ ಮಾರ್ಗ ಎಂದು ಆರ್​ಸಿಬಿ ಕಾರ್ಯಾಚರಣೆಗಳ ನಿರ್ದೇಶಕ ಮೈಕ್ ಹೇಸನ್ ಹೇಳಿದ್ದಾರೆ.

13ನೇ ಆವೃತ್ತಿಯ ಐಪಿಎಲ್ ಆರಂಭಕ್ಕೂ ಮುನ್ನ ಆರ್​​ಸಿಬಿ 3 ವಾರಗಳ ಅಭ್ಯಾಸದಲ್ಲಿ ಪಾಲ್ಗೊಳ್ಳಲಿದೆ. ಗುರುವಾರ(ಆಗಸ್ಟ್ 27)ದಿಂದ ಬೆಂಗಳೂರು ತಂಡದ ಅಭ್ಯಾಸ ಶುರುವಾಗಲಿದೆ.

ಐಸಿಸಿ ಕ್ರಿಕೆಟ್ ಅಕಾಡೆಮಿಯಲ್ಲಿ ಶಿಬಿರ ನಡೆಯಲಿದ್ದು, ಆಟಗಾರರು ಯುಎಇಯ ಬಿಸಿಲಿನ ವಾತಾವರಣದಲ್ಲಿ ಆಟಗಾರರು ಬ್ಯಾಟಿಂಗ್ ಮತ್ತು ಬೌಲಿಂಗ್​ನಲ್ಲಿ ಲಯ ಕಂಡುಕೊಳ್ಳುವ ನಿಟ್ಟಿನಲ್ಲಿ ಸ್ಪರ್ಧಾತ್ಮಕವಾದ ತರಬೇತಿ ಇದಾಗಿರಲಿದೆ.

ಟೂರ್ನಿಗೆ ಮುನ್ನ ಅಭ್ಯಾಸ ಪಂದ್ಯಗಳನ್ನೂ ಆಡಲಾಗುವುದು ಎಂದು ತಂಡದ ಮುಖ್ಯ ಕೋಚ್ ಸೈಮನ್ ಕಾಟಿಚ್ ತಿಳಿಸಿದ್ದಾರೆ. ಈ ಅವಧಿಯಲ್ಲಿ ತಮ್ಮ ಸಾಮರ್ಥ್ಯ ಮತ್ತು ಫಿಟ್ನೆಸ್ ಕಡೆಗೆ ಕೆಲಸ ಮಾಡುವ ಮೂಲಕ ಯಾವುದೇ ರೀತಿಯ ಗಾಯದ ಸಮಸ್ಯೆಗಳು ಎದುರಾಗದಂತೆ ಆಟಗಾರರು ಎಚ್ಚರ ವಹಿಸಲಿದ್ದಾರೆ ಎಂದಿದ್ದಾರೆ.

ಇನ್ನೂ ಕಿಂಗ್ಸ್ ಇಲೆವೆನ್ ಪಂಜಾಬ್ ಮತ್ತು ರಾಜಸ್ಥಾನ್ ರಾಯಲ್ಸ್ ತಂಡಗಳ ಕ್ರಿಕೆಟಿಗರು 6 ದಿನಗಳ ಕ್ವಾರಂಟೈನ್ ಮುಗಿಸಿ ಈಗಾಗಲೇ ಮೊದಲ ಸುತ್ತಿನ ಅಭ್ಯಾಸ ನಡೆಸಿದರು.

ಇತ್ತಂಡಗಳ ಆಟಗಾರರು ಬುಧವಾರ ಸಂಜೆ ಐಸಿಸಿ ಗ್ರೌಂಡ್​ನಲ್ಲಿ ದೈಹಿಕ ಕಸರತ್ತಿಗೆ ಸಂಬಂಧಿಸಿದ ವ್ಯಾಯಾಮ ನಡೆಸಿದರು ಎಂದು ಮೂಲಗಳು ತಿಳಿಸಿವೆ.

ಕ್ವಾರಂಟೈನ್ ಅವಧಿಯಲ್ಲಿ ಕ್ರಿಕೆಟಿಗರಿಗೆ, ತಂಡದ ಸಹಾಯಕ ಸಿಬಂದಿ ಮತ್ತು ಅಧಿಕಾರಿಗಳಿಗೆ 3 ಸುತ್ತಿನ ಕೋವಿಡ್-19 ಟೆಸ್ಟ್ ನಡೆಸಲಾಗಿತ್ತು. ಎಲ್ಲರ ವರದಿಯೂ ನೆಗೆಟಿವ್ ಬಂದಿದೆ. ಈ 6 ದಿನಗಳ ಕಾಲ ಯಾವ ಕ್ರಿಕೆಟಿಗರೂ ತಮ್ಮ ಕೊಠಡಿಯಿಂದ ಹೊರಗೆ ಕಾಲಿಟ್ಟಿರಲಿಲ್ಲ.