Chris Gayle: IPL ನಲ್ಲಿ ಹೊಸ ದಾಖಲೆ ಬರೆದ ಯುನಿವರ್ಸ್ ಬಾಸ್ ಕ್ರಿಸ್ ಗೇಲ್..!

ಟಿ20 ಕ್ರಿಕೆಟ್​ನ ಯುನಿವರ್ಸ್ ಬಾಸ್ ಕ್ರಿಸ್ ಗೇಲ್ ಐಪಿಎಲ್​ನಲ್ಲಿ ಮತ್ತೊಂದು ದಾಖಲೆ ಬರೆದಿದ್ದಾರೆ. ರಾಜಸ್ಥಾನ್ ರಾಯಲ್ಸ್ ವಿರುದ್ಧದ ಪಂದ್ಯದಲ್ಲಿ 3ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಗೇಲ್ 28 ಎಸೆತಗಳಲ್ಲಿ 40 ರನ್​ ಸಿಡಿಸಿದ್ದರು.

ಈ ಇನಿಂಗ್ಸ್​ನಲ್ಲಿ ಗೇಲ್ ಬ್ಯಾಟ್​ನಿಂದ 2 ಸಿಕ್ಸರ್ ಹಾಗೂ 4 ಬೌಂಡರಿಗಳು ಮೂಡಿ ಬಂದಿದ್ದವು. ಈ ಎರಡು ಸಿಕ್ಸರ್​ಗಳೊಂದಿಗೆ ಐಪಿಎಲ್ ಇತಿಹಾಸದಲ್ಲಿ ಯಾರು ಮಾಡದ ದಾಖಲೆಯನ್ನು ಗೇಲ್ ತಮ್ಮ ಹೆಸರಿಗೆ ಬರೆದುಕೊಂಡರು.

ಹೌದು, ರಾಜಸ್ಥಾನ್ ರಾಯಲ್ಸ್​ ವಿರುದ್ದ ಪಂದ್ಯದ 8ನೇ ಓವರ್​ನಲ್ಲಿ ಕ್ರಿಸ್​ ಗೇಲ್ ಡೀಪ್ ಲೆಗ್‌ಸ್ಕ್ವೇರ್‌ನತ್ತ ಭರ್ಜರಿ ಸಿಕ್ಸರ್ ಸಿಡಿಸಿದ್ದರು. ಈ ಸಿಕ್ಸ್​ನೊಂದಿಗೆ ಐಪಿಎಲ್​ ಇತಿಹಾಸದಲ್ಲಿ 350 ಸಿಕ್ಸ್​ ಬಾರಿಸಿದ ಮೊದಲ ಬ್ಯಾಟ್ಸ್​​ಮನ್, ಹಾಗೂ ಈ ಸಾಧನೆ ಮಾಡಿದ ಏಕೈಕ ಆಟಗಾರ ಎಂಬ ದಾಖಲೆಯನ್ನು ಗೇಲ್ ತಮ್ಮದಾಗಿಸಿಕೊಂಡರು. ಹಾಗೆಯೇ ಈ ಎರಡು ಸಿಕ್ಸ್​ನೊಂದಿಗೆ ಟಿ20 ಕ್ರಿಕೆಟ್​ನ ಸಿಕ್ಸ್​ಗಳ ಸಂಖ್ಯೆಯನ್ನು 1009ಕ್ಕೇರಿಸಿದ್ದಾರೆ ಯುನಿವರ್ಸ್ ಬಾಸ್.

ಇನ್ನು ಐಪಿಎಲ್​ನ ಸಿಕ್ಸರ್​ ಸರದಾರರ ಪಟ್ಟಿಯಲ್ಲಿ 351 ಸಿಕ್ಸ್ ಬಾರಿಸಿರುವ ಕ್ರಿಸ್ ಗೇಲ್ ಅಗ್ರಸ್ಥಾನದಲ್ಲಿದ್ದಾರೆ.

ದ್ವಿತೀಯ ಸ್ಥಾನದಲ್ಲಿ ಆರ್​ಸಿಬಿ ತಂಡದ ಸ್ಪೋಟಕ ಬ್ಯಾಟ್ಸ್​​ಮನ್ ಎಬಿ ಡಿವಿಲಿಯರ್ಸ್ ಇದ್ದು, ಎಬಿಡಿ ಇದುವರೆಗೆ 237 ಸಿಕ್ಸ್ ಸಿಡಿಸಿದ್ದಾರೆ.

3ನೇ ಸ್ಥಾನದಲ್ಲಿ ಸಿಎಸ್​ಕೆ ನಾಯಕ ಮಹೇಂದ್ರ ಸಿಂಗ್ ಧೋನಿ, ಇದುವರೆಗೆ ಧೋನಿ 216 ಸಿಕ್ಸ್ ಬಾರಿಸಿದ್ದಾರೆ.

4ನೇ ಸ್ಥಾನದಲ್ಲಿ ಮುಂಬೈ ಇಂಡಿಯನ್ಸ್ ನಾಯಕ ರೋಹಿತ್ ಶರ್ಮಾ ಇದ್ದು, ಇದುವರೆಗೆ 214 ಸಿಕ್ಸ್ ಸಿಡಿಸಿದ್ದಾರೆ.

5ನೇ ಸ್ಥಾನವನ್ನು ಆರ್​​ಸಿಬಿ ನಾಯಕ ವಿರಾಟ್ ಕೊಹ್ಲಿ ಅಲಂಕರಿಸಿದ್ದು, ಕಿಂಗ್ ಕೊಹ್ಲಿ ಇದುವರೆಗೆ 201 ಸಿಕ್ಸ್ ಸಿಡಿಸಿದ್ದಾರೆ.