IPL ನಲ್ಲಿ 6 ತಂಡಗಳನ್ನು ಪ್ರತಿನಿಧಿಸಿದ ನಾಲ್ವರು ಭಾರತೀಯ ಕ್ರಿಕೆಟಿಗರು ಇವರೇ..!

IPL ಸೀಸನ್ 13 ಆರಂಭಕ್ಕೆ ದಿನಗಣನೆಗೆ ಶುರುವಾಗಿದೆ. ಸೆಪ್ಟೆಂಬರ್ 19ರಿಂದ ಬಹುನಿರೀಕ್ಷಿತ ಕ್ರಿಕೆಟ್ ಟೂರ್ನಿಗೆ ದುಬೈನಲ್ಲಿ ಚಾಲನೆ ದೊರೆಯಲಿದೆ. ಈಗಾಗಲೇ 8 ತಂಡಗಳು ಅರಬ್ ದೇಶಕ್ಕೆ ಪ್ರಯಾಣಿಸಿದ್ದು, 6 ದಿನಗಳ ಕ್ವಾರಂಟೈನ್​ನಲ್ಲಿದ್ದಾರೆ.

ಬಹುತೇಕ ತಂಡಗಳ ಕ್ವಾರಂಟೈನ್ ಆಗಸ್ಟ್ 28 ಕ್ಕೆ ಮುಗಿಯಲಿದ್ದು, 29 ರಿಂದ ಅಭ್ಯಾಸಗಳು ಶುರುವಾಗಲಿದೆ. ಇನ್ನು ವೆಸ್ಟ್ ಇಂಡೀಸ್ ಆಟಗಾರರು ಕೆರಿಬಿಯನ್ ಪ್ರೀಮಿಯರ್ ಲೀಗ್ ಮುಗಿದ ಬಳಿಕ ತಂಡವನ್ನು ಸೇರ್ಪಡೆಗೊಳ್ಳಲಿದ್ರೆ, ಆಸ್ಟ್ರೇಲಿಯಾ-ಇಂಗ್ಲೆಂಡ್ ಸರಣಿ ಮುಗಿದ ಬಳಿಕ ಸೆಪ್ಟೆಂಬರ್​ನಲ್ಲಿ ನೇರವಾಗಿ ದುಬೈಗೆ ಬಂದಿಳಿಯಲಿದೆ.

ಹೀಗೆ ಒಂದಲ್ಲ ಒಂದು ರೀತಿಯಲ್ಲಿ ಈ ಬಾರಿಯ ಇಂಡಿಯನ್ ಪ್ರೀಮಿಯರ್ ಲೀಗ್ ವಿಶೇಷವೆನಿಸುತ್ತಿದ್ದು, 8 ತಂಡಗಳ ಕದನದಲ್ಲಿ ವಿದೇಶಿ ಪಿಚ್​ನಲ್ಲಿ ಯಾವ ತಂಡ ಚಾಂಪಿಯನ್ ಪಟ್ಟ ಅಲಂಕರಿಸಲಿದೆ ಎಂಬ ಕುತೂಹಲ ಕ್ರಿಕೆಟ್ ಪ್ರೇಮಿಗಳಲ್ಲಿ ಮನೆ ಮಾಡಿದೆ.

ಆದಾಗ್ಯೂ, ಐಪಿಎಲ್‌ನಲ್ಲಿ ಶಾಶ್ವತ ತಂಡವನ್ನು ಪಡೆಯಲು ಸಾಧ್ಯವಾಗದ ಅನೇಕ ಆಟಗಾರರಿದ್ದಾರೆ. ಈ ಆಟಗಾರರು ಪ್ರತಿ ಒಂದು ಅಥವಾ ಎರಡು ಸೀಸನ್​ಗಳಲ್ಲಿ ಬೇರೆ ಬೇರೆ ತಂಡಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಹೀಗೆ 6 ವಿವಿಧ ತಂಡಗಳ ಪರ ಆಡಿದ ನಾಲ್ವರು ಭಾರತೀಯ ಕ್ರಿಕೆಟಿಗರ ಪರಿಚಯ ಇಲ್ಲಿದೆ ನೋಡಿ.

ದಿನೇಶ್ ಕಾರ್ತಿಕ್: ಕೋಲ್ಕತಾ ನೈಟ್ ರೈಡರ್ಸ್ ವಿಕೆಟ್ ಕೀಪರ್ ಬ್ಯಾಟ್ಸ್‌ಮನ್ ದಿನೇಶ್ ಕಾರ್ತಿಕ್ ಕೂಡ ಈವರೆಗೆ ಐಪಿಎಲ್‌ನಲ್ಲಿ 6 ವಿವಿಧ ತಂಡಗಳ ಪರ ಆಡಿದ್ದಾರೆ. 182 ಪಂದ್ಯಗಳನ್ನು ಆಡಿರುವ ದಿನೇಶ್ ಕಾರ್ತಿಕ್ 2008ರಲ್ಲಿ ದೆಹಲಿ ಡೇರ್ ಡೆವಿಲ್ಸ್ ಜೊತೆ ತಮ್ಮ ಐಪಿಎಲ್ ವೃತ್ತಿಜೀವನವನ್ನು ಪ್ರಾರಂಭಿಸಿದರು.

2010 ರ ವೇಳೆಗೆ ಅವರು ದೆಹಲಿ ತಂಡದ ಭಾಗವಾದರು. ಇದರ ನಂತರ, 2011 ರಲ್ಲಿ ಅವರು ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದ ಪರ ಕಣಕ್ಕಿಳಿದಿದ್ದರು. ಮರು ವರ್ಷವೇ ಅಂದರೆ 2012 ಮತ್ತು 2013 ಐಪಿಎಲ್ ಸೀಸನ್​ಗಳಲ್ಲಿ ಮುಂಬೈ ಇಂಡಿಯನ್ಸ್ ತಂಡವನ್ನು ಪ್ರತಿನಿಧಿಸಿದ್ದರು. 2014 ರಲ್ಲಿ ಮತ್ತೆ ದೆಹಲಿ ಡೇರ್‌ಡೆವಿಲ್ಸ್ ತಂಡಕ್ಕೆ ಮರಳಿದ ಕಾರ್ತಿಕ್​ 2015 ರಲ್ಲಿ ಆರ್​ಸಿಬಿ ಪರ ಕಣಕ್ಕಿಳಿದರು. ಗುಜರಾತ್ ಲಯನ್ಸ್ ಪರ 2016 ಮತ್ತು 2017 ಸೀಸನ್​ಗಳಲ್ಲಿ ಗುಜರಾತ್ ಲಯನ್ಸ್ ತಂಡ ಆಟಗಾರರಾಗಿದ್ದರು. 2018 ರಿಂದ ಕೆಕೆಆರ್ ತಂಡದ ನಾಯಕರಾಗಿ ಕಾಣಿಸಿಕೊಂಡಿದ್ದಾರೆ.

ಪಾರ್ಥಿವ್ ಪಟೇಲ್:  ಪಾರ್ಥಿವ್ ಪಟೇಲ್ ಕೂಡ ಐಪಿಎಲ್‌ನಲ್ಲಿ 6 ವಿವಿಧ ತಂಡಗಳ ಪರ ಆಡಿದ್ದಾರೆ. 2008 ರಿಂದ 2010 ರವರೆಗೆ ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ಭಾಗವಾಗಿದ್ದ ಪಟೇಲ್, 2011 ರಿಂದ 2013 ರವರೆಗಿನ ಮೂರು ವರ್ಷಗಳಲ್ಲಿ ಕೊಚ್ಚಿ ಟಸ್ಕರ್ಸ್ ಕೇರಳ, ಡೆಕ್ಕನ್ ಚಾರ್ಜರ್ಸ್ ಹೈದರಾಬಾದ್ ಮತ್ತು ಸನ್‌ರೈಸರ್ಸ್ ಹೈದರಾಬಾದ್ ತಂಡಗಳನ್ನು ಪ್ರತಿನಿಧಿಸಿದ್ದರು.

2014 ರಲ್ಲಿ ಅವರು ಆರ್‌ಸಿಬಿ ತಂಡಕ್ಕೆ ಸೇರಿದ ಪಾರ್ಥಿವ್ ಪಟೇಲ್, 2015 ರಿಂದ 2017 ರವರೆಗೆ ಸತತ 3 ಸೀಸನ್​ಗಳಲ್ಲಿ ಮುಂಬೈ ಇಂಡಿಯನ್ಸ್ ತಂಡವನ್ನು ಪ್ರತಿನಿಧಿಸಿದರು. 2018 ರಲ್ಲಿ ಮತ್ತೆ ಆರ್​ಸಿಬಿ ಮರಳಿದ ಪಾರ್ಥಿವ್ ಪಟೇಲ್ ಕೊಹ್ಲಿ ಪಡೆಯ ಆರಂಭಿಕ ಆಟಗಾರನಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ.

ಇಶಾಂತ್ ಶರ್ಮಾ:  2008 ರಿಂದ ಕೆಕೆಆರ್ ಪರ 3 ಸೀಸನ್​ ಆಡಿದ ಇಶಾಂತ್ ಶರ್ಮಾ 2011 ರಲ್ಲಿ ಡೆಕ್ಕನ್ ಚಾರ್ಜರ್ಸ್ ತಂಡದ ಭಾಗವಾದರು. ಇದರ ನಂತರ ಸನ್‌ರೈಸರ್ಸ್ ಹೈದರಾಬಾದ್‌ಗೆ ಸೇರಿಕೊಂಡ ಬಲಗೈ ವೇಗಿ, ಆ ಬಳಿಕ ರೈಸಿಂಗ್ ಪುಣೆ ಸೂಪರ್‌ ಜೈಂಟ್ಸ್ ಪಾಲಾದರು.

2018 ರಲ್ಲಿ ಕಿಂಗ್ಸ್ ಇಲೆವೆನ್ ಪಂಜಾಬ್ ಪರ ಸಹಿ ಹಾಕಿದ ಇಶಾಂತ್ ಶರ್ಮಾರನ್ನು ಮರು ವರ್ಷವೇ ಬಿಡುಗಡೆ ಮಾಡಲಾಯಿತು. 2019 ರ ಹರಾಜಿನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಪಾಲಾದ ಇಶಾಂತ್ ಪ್ರಸ್ತುತ ದೆಹಲಿ ಪರ ಕಣಕ್ಕಿಳಿಯುತ್ತಿದ್ದಾರೆ.

ಯುವರಾಜ್ ಸಿಂಗ್:  ಅಚ್ಚರಿ ಅನಿಸಿದರೂ ಯುವರಾಜ್ ಸಿಂಗ್ ಕೂಡ 12 ಸೀಸನ್​ಗಳಲ್ಲಿ 6 ತಂಡಗಳನ್ನು ಪ್ರತಿನಿಧಿಸಿದ್ದರು. 2008 ರಿಂದ 2010ರವರೆಗೆ ಕಿಂಗ್ಸ್ ಇಲೆವೆನ್ ಪಂಜಾಬ್ ಪರ ಕಣಕ್ಕಿಳಿದ ಯುವಿ, 2011 ರಿಂದ 2013ರ ತನಕ ಪುಣೆ ವಾರಿಯರ್ಸ್ ಇಂಡಿಯಾ ತಂಡದ ಭಾಗವಾಗಿದ್ದರು.

2014 ರಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡಕ್ಕೆ ಎಂಟ್ರಿ ಕೊಟ್ಟ ಸಿಕ್ಸರ್ ಸಿಂಗ್, 2015 ರಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಪಾಲಾದರು. ಮರುವರ್ಷವೇ ಸನ್​ರೈಸರ್ಸ್ ಹೈದಾರಾಬಾದ್​ನೊಂದಿಗೆ ಸಹಿ ಹಾಕಿದ ಯುವಿ 2016-17 ರಲ್ಲಿ ಎಸ್​ಆರ್​ಹೆಚ್​ ತಂಡವನ್ನು ಪ್ರತಿನಿಧಿಸಿದ್ದರು. 2018 ರಲ್ಲಿ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡಕ್ಕೆ ಮರಳಿದ ಯವಿ, 2019 ರಲ್ಲಿ ಮುಂಬೈ ಇಂಡಿಯನ್ಸ್ ಪರ ಕಣಕ್ಕಿಳಿದ್ದರು.