ವೆಸ್ಟ್ ಇಂಡೀಸ್​ನ ಈ ಮೂವರು ಕ್ರಿಕೆಟಿಗರು ಸಹ IPL ಆಡಿದ್ದರು..!

ಹೊಸ ಸೀಸನ್...ಹೊಸ ಆಟಗಾರರು...ಹೀಗೆ ಐಪಿಎಲ್ 12 ಸೀಸನ್​ಗಳನ್ನು ದಾಟಿ ಮುನ್ನುಗ್ಗುತ್ತಿದೆ. ಈಗಾಗಲೇ ವಿಶ್ವದ ಶ್ರೀಮಂತ ಕ್ರಿಕೆಟ್​ ಲೀಗ್​ನಲ್ಲಿ ಹಲವಾರು ವಿದೇಶಿ ಆಟಗಾರರು ಪಾಲ್ಗೊಂಡಿದ್ದಾರೆ.

ಕೆಲವರು ಐಪಿಎಲ್​ನಲ್ಲಿ ಯಶಸ್ಸು ಸಾಧಿಸಿದ್ರೆ, ಮತ್ತೆ ಕೆಲವರು ಒಂದೇ ಸೀಸನ್​ಗೆ ಸೀಮಿತವಾಗಿದ್ದರು. ಅದರಲ್ಲೂ ವೆಸ್ಟ್ ಇಂಡೀಸ್ ಆಟಗಾರರು ಐಪಿಎಲ್​ನಲ್ಲಿ ಮಿಂಚಿದ್ದೇ ಹೆಚ್ಚು. ಆದರೆ ಕೆಲ ವಿಂಡೀಸ್ ಆಟಗಾರರು ಐಪಿಎಲ್ ಪ್ರತಿನಿಧಿಸಿದ್ದಾರೆ ಎಂಬುದು ಅನೇಕರಿಗೆ ತಿಳಿದಿಲ್ಲ.

ಇದಕ್ಕೆ ಒಂದು ಕಾರಣ ವೈಫಲ್ಯ. ಹೌದು, ವೆಸ್ಟ್ ಇಂಡೀಸ್​ ತಂಡದಲ್ಲಿ ಮಿಂಚಿ ಐಪಿಎಲ್​ಗೆ ಎಂಟ್ರಿ ಕೊಟ್ಟಿದ್ದ ಮೂವರು ಆಟಗಾರರು ಇಂಡಿಯನ್ ಪ್ರೀಮಿಯರ್ ಲೀಗ್ ಪ್ರತಿನಿಧಿಸಿದ್ದರು. ಆದರೆ ಒಂದೇ ವರ್ಷದಲ್ಲಿ ಈ ಆಟಗಾರರು ಟೂರ್ನಿಯಿಂದ ಹೊರಬಿದ್ದಿದ್ದರು. ಅಂತಹ ಮೂವರು ಕೆರಿಬಿಯನ್ ಕ್ರಿಕೆಟಿಗರ ಪರಿಚಯ ಇಲ್ಲಿದೆ.

ರಾಮ್ ನರೇಶ್ ಸರವಣ್:  ವೆಸ್ಟ್ ಇಂಡೀಸ್ ತಂಡದ ಮಾಜಿ ಆಟಗಾರ ರಾಮ್​ ನರೇಶ್ ಸರವಣ್ ಅಂತರಾಷ್ಟ್ರೀಯ ಮಟ್ಟದಲ್ಲಿ ಗಮನ ಸೆಳೆದ ಕ್ರಿಕೆಟಿಗ. ಅದರಲ್ಲೂ ಒಂದು ಕಾಲದಲ್ಲಿ ವಿಂಡೀಸ್ ತಂಡದ ಮಧ್ಯಮ ಕ್ರಮಾಂಕದ ಬಲಿಷ್ಠ ಬ್ಯಾಟ್ಸ್​ಮನ್​ ಆಗಿ ಗುರುತಿಸಿಕೊಂಡಿದ್ದರು. ಹೀಗಾಗಿಯೇ 2008ರ ಐಪಿಎಲ್​ನಲ್ಲಿ ಸರವಣ್ ಸ್ಥಾನ ಪಡೆದಿದ್ದರು.

ಕಿಂಗ್ಸ್ ಇಲೆವೆನ್ ಪಂಜಾಬ್ ಪರ ಚೊಚ್ಚಲ ಐಪಿಎಲ್ ಪಂದ್ಯವನ್ನಾಡಿದರು. ನಾಲ್ಕು ಪಂದ್ಯಗಳಲ್ಲಿ ಕಣಕ್ಕಿಳಿದಿದ್ದ ಸರವಣ್ ಮ್ಯಾಜಿಕ್ ಭಾರತದಲ್ಲಿ ನಡೆಯಲಿಲ್ಲ. 4 ಇನಿಂಗ್ಸ್​ನಲ್ಲಿ ಕೇವಲ 73 ರನ್ ಗಳಿಸಿದ್ದರಿಂದ ಮುಂದಿನ ವರ್ಷ ತಂಡದಿಂದ ಕೈ ಬಿಡಲಾಯಿತು.

ಫಿಡೆಲ್ ಎಡ್ವರ್ಡ್ಸ್

ವೆಸ್ಟ್ ಇಂಡೀಸ್ ವೇಗದ ಬೌಲರ್​ 2009 ರಲ್ಲಿ ಡೆಕ್ಕನ್ ಚಾರ್ಜರ್ಸ್ ತಂಡಕ್ಕೆ ಆಯ್ಕೆಯಾಗಿದ್ದರು. ವೇಗ ಮತ್ತು ನಿಖರ ದಾಳಿಯ ದಾಳಿ ಮೂಲಕ ವಿಶ್ವ ಬ್ಯಾಟ್ಸ್​ಮನ್​ ನಡುಗಿಸಿದ್ದ ಎಡ್ವರ್ಡ್ಸ್, ಐಪಿಎಲ್‌ನಲ್ಲಿ ಆರು ಪಂದ್ಯಗಳಲ್ಲಿ ಕಣಕ್ಕಿಳಿದಿದ್ದರು. 6 ಪಂದ್ಯಗಳಲ್ಲಿ ಎಡ್ವರ್ಡ್ಸ್ ಉರುಳಿಸಿದ್ದು 5 ವಿಕೆಟ್ ಮಾತ್ರ. ಇದಾಗ್ಯೂ ಡೆಕ್ಕನ್ ಚಾರ್ಜರ್ಸ್ ಪರ ಚಾಂಪಿಯನ್ಸ್ ಲೀಗ್ ಟಿ20 ಯಲ್ಲೂ ಆಡಿದ್ದರು. ಆದರೆ ನಿರೀಕ್ಷಿತ ಯಶಸ್ಸು ಸಾಧಿಸಿರದ ಕಾರಣ ತಂಡದಿಂದ ಕೈ ಬಿಡಲಾಯಿತು.

ಆಡ್ರಿಯನ್ ಭರತ್

2010 ರಲ್ಲಿ ಕಿಂಗ್ಸ್ ಇಲೆವೆನ್ ಪಂಜಾಬ್ ಪರ ಆಡ್ರಿಯನ್ ಭರತ್ ಅವಕಾಶ ಪಡೆದಿದ್ದರು. ಆ ಸೀಸನ್​ನಲ್ಲಿ ಮೂರು ಪಂದ್ಯಗಳನ್ನು ಆಡಿದ ಭರತ್ ಗಳಿಸಿದ್ದು 42 ರನ್​ಗಳು ಮಾತ್ರ. ಮುಂಬೈ ವಿರುದ್ಧ 27 ಎಸೆತಗಳಲ್ಲಿ 33 ರನ್ ಗಳಿಸಿರುವುದು ಗರಿಷ್ಠ ಮೊತ್ತವಾಗಿತ್ತು. ಉಳಿದ 2 ಪಂದ್ಯಗಳಲ್ಲಿ ವಿಫಲವಾಗಿದ್ದೇ ತಡ ಕಿಂಗ್ಸ್ ಇಲೆವೆನ್ ಪಂಜಾಬ್ ಭರತ್​ರನ್ನು ತಂಡದಿಂದ ಕೈಬಿಟ್ಟಿತು.