IPL 2021: ಮುಂಬೈ ಇಂಡಿಯನ್ಸ್ ಈ ಮೂವರನ್ನು ಕೈ ಬಿಡುವುದು ಬಹುತೇಕ ಖಚಿತ..!

ಇಂಡಿಯನ್ ಪ್ರೀಮಿಯರ್ ಲೀಗ್​ನ ಅತ್ಯಂತ ಯಶಸ್ವಿ ತಂಡ ಎನಿಸಿಕೊಂಡಿರುವ ಮುಂಬೈ ಇಂಡಿಯನ್ಸ್ ಮುಂದಿನ ಸೀಸನ್​ಗಾಗಿ ಸಿದ್ಧತೆಗಳನ್ನು ಆರಂಭಿಸಿದೆ. ಕಳೆದ ಸೀಸನ್​ನಲ್ಲಿ ಭರ್ಜರಿ ಪ್ರದರ್ಶನ ನೀಡಿದ್ದ ರೋಹಿತ್ ಪಡೆ 5ನೇ ಬಾರಿ ಚಾಂಪಿಯನ್ ಪಟ್ಟಕ್ಕೇರಿತು.

ಇನ್ನು ಮುಂಬೈ ಪರ ಕಳೆದ ಸೀಸನ್​ನಲ್ಲಿ ಕಣಕ್ಕಿಳಿದ ಬಹುತೇಕ ಆಟಗಾರರು ಉತ್ತಮ ಪ್ರದರ್ಶನ ನೀಡಿದ್ದರು. ಇದಾಗ್ಯೂ ಕೆಲ ಹಿರಿಯ ಆಟಗಾರರನ್ನು ಈ ಬಾರಿ ಮುಂಬೈ ಇಂಡಿಯನ್ಸ್ ಕೈ ಬಿಡಲಿದೆ. ಅದರಲ್ಲೂ ಇಬ್ಬರು ವಿದೇಶಿ ಆಟಗಾರರನ್ನು ಕೈ ಬಿಡುವುದು ಬಹುತೇಕ ಖಚಿತ ಎನ್ನಲಾಗುತ್ತಿದೆ.

ಹಾಗಿದ್ರೆ ಮುಂಬೈ ತಂಡದಿಂದ ಹೊರಬೀಳಲಿರುವ ಮೂವರು ಆಟಗಾರರು ಯಾರು ಎಂದು ನೋಡುವುದಾದರೆ...

# 3 ನಾಥನ್ ಕೌಲ್ಟರ್-ನೈಲ್: ಆಸ್ಟ್ರೇಲಿಯಾದ ವೇಗಿ ನಾಥನ್ ಕೌಲ್ಟರ್ ನೈಲ್ ಅವರನ್ನು ಮುಂಬೈ ಇಂಡಿಯನ್ಸ್ 8 ಕೋಟಿ ನೀಡಿ ಖರೀದಿಸಿತ್ತು. ಆದರೆ ಕಳೆದ ಸೀಸನ್​ನಲ್ಲಿ ಬಲಗೈ ವೇಗಿಯಿಂದ ನಿರೀಕ್ಷಿತ ಮಟ್ಟದ ಪ್ರದರ್ಶನ ಮೂಡಿಬಂದಿರಲಿಲ್ಲ. ಇನ್ನು 2020ರಲ್ಲಿ ಜೇಮ್ಸ್ ಪ್ಯಾಟಿನ್ಸನ್ ಆಗಮನದೊಂದಿಗೆ ನೈಲ್ ಸೈಡ್​ಗೆ ಸರಿದಿದ್ದರು. ಇನ್ನು ಸಿಕ್ಕ ಅವಕಾಶವನ್ನು ಬಳಸಿಕೊಳ್ಳುವಲ್ಲಿ ವಿಫಲರಾದ ನಾಥನ್ ಕೌಲ್ಟರ್​ ನೈಲ್ 7 ಪಂದ್ಯಗಳಿಂದ ಪಡೆದಿದ್ದು ಕೇವಲ 5 ವಿಕೆಟ್ ಮಾತ್ರ. ಹಾಗೆಯೇ ಲಸಿತ್ ಮಾಲಿಂಗ ಅವರು ಮುಂಬೈಗೆ ಹಿಂತಿರುಗುವ ಸಾಧ್ಯತೆ ಹೆಚ್ಚಿದೆ. ಹೀಗಾಗಿ ಮುಂದಿನ ಸೀಸನ್​ನಲ್ಲಿ ಮುಂಬೈ ತಂಡ ನೈಲ್ ಅವರನ್ನು ಉಳಿಸಿಕೊಳ್ಳುವುದಿಲ್ಲ ಎಂದೇ ಹೇಳಬಹುದು.

#2 ಸೌರಭ್ ತಿವಾರಿ: ಮುಂಬೈ ಇಂಡಿಯನ್ಸ್ ತಂಡದ ಮಧ್ಯಮ ಕ್ರಮಾಂಕದ ಬ್ಯಾಟ್ಸ್​ಮನ್ ಸೌರಭ್ ತಿವಾರಿ ಕಳೆದ ಸೀಸನ್​ನಲ್ಲಿ ವಿಫಲರಾಗಿದ್ದರು. ಅದರಲ್ಲೂ ತಿವಾರಿ ಜಾಗದಲ್ಲಿ ಸ್ಥಾನ ಪಡೆದ ಇಶಾಂತ್ ಕಿಶನ್ ಅಬ್ಬರಿಸಿದರು. ಆ ಬಳಿಕ ಸೌರಭ್ ಬೆಂಚ್ ಕಾದಿದ್ದೇ ಬಂತು. ಇನ್ನು ಐಪಿಎಲ್​ 2020ಯಲ್ಲಿ 7 ಪಂದ್ಯಗಳಿಂದ ಸೌರಭ್ ತಿವಾರಿ ಕಲೆಹಾಕಿದ್ದು ಬರೀ 103 ರನ್​ಗಳು ಮಾತ್ರ. ಹೀಗಾಗಿ ಮುಂಬೈ ಇಂಡಿಯನ್ಸ್ ತಿವಾರಿಯನ್ನು ಕೈಬಿಟ್ಟು ಅವರ ಸ್ಥಾನಕ್ಕೆ ಮತ್ತೋರ್ವ ಯುವ ಆಟಗಾರರನನ್ನು ಆಯ್ಕೆ ಮಾಡಲಿದೆ.

#1 ಕ್ರಿಸ್ ಲಿನ್: 2020ರ ಐಪಿಎಲ್​ ಹರಾಜಿನಲ್ಲಿ ಆಸ್ಟ್ರೇಲಿಯಾದ ಸ್ಪೋಟಕ ಬ್ಯಾಟ್ಸ್​​ಮನ್ ಕ್ರಿಸ್ ಲಿನ್ ಅವರನ್ನು ಮುಂಬೈ ಇಂಡಿಯನ್ಸ್ 2 ಕೋಟಿ ನೀಡಿ ಖರೀದಿಸಿತ್ತು. ಆದರೆ ಒಂದೇ ಒಂದು ಪಂದ್ಯದಲ್ಲಿ ಕಣಕ್ಕಿಸಿರಲಿಲ್ಲ. ಮುಂಬೈ ಆರಂಭಿಕ ಕ್ವಿಂಟನ್ ಡಿಕಾಕ್ ಅಬ್ಬರದ ನಡುವೆ ಕ್ರಿಸ್ ಲಿನ್ ಇಡೀ ಟೂರ್ನಿಯಲ್ಲಿ ಬೆಂಚ್ ಕಾದಿದ್ದೇ ಬಂತು. ಅಂದರೆ ಕಳೆದ ಸೀಸನ್​ನಲ್ಲಿ ಮುಂಬೈಗೆ ಲಿನ್ ಅವಶ್ಯಕತೆಯೇ ಬರಲಿಲ್ಲ ಎನ್ನಬಹುದು. ಇನ್ನು ಇಶಾಂತ್ ಕಿಶನ್ ಕೂಡ ಆರಂಭಿಕರಾಗಿ ಕಣಕ್ಕಿಳಿಯುವ ಸಾಮರ್ಥ್ಯ ಹೊಂದಿದ್ದಾರೆ. ಹೀಗಾಗಿ ಈ ಬಾರಿ ಕ್ರಿಸ್ ಲಿನ್ ಅವರನ್ನು ಮುಂಬೈ ಇಂಡಿಯನ್ಸ್ ಕೈ ಬಿಡುವುದು ಬಹುತೇಕ ಖಚಿತ ಎಂದೇ ಹೇಳಬಹುದು.