IPL ನಲ್ಲಿ 200 ಕ್ಕೂ ಹೆಚ್ಚು ಸಿಕ್ಸರ್ ಸಿಡಿಸಿದ ಮೂವರು ಬ್ಯಾಟ್ಸ್​ಮನ್​ಗಳು ಇವರೇ..!

ಐಪಿಎಲ್‌...ರಂಗು ರಂಗಿನ ಕ್ರಿಕೆಟ್ ಟೂರ್ನಿ ಅನೇಕ ಸ್ಪೋಟಕ ಇನಿಂಗ್ಸ್​ಗಳಿಗೆ ಸಾಕ್ಷಿಯಾಗಿದೆ. ಕಳೆದ 12 ಸೀಸನ್​ಗಳಲ್ಲಿ ಅನೇಕ ಬ್ಯಾಟ್ಸ್​ಮನ್​ಗಳು ಬೌಂಡರಿ-ಸಿಕ್ಸರ್​ಗಳ ಸುರಿಮಳೆಗೈದಿದ್ದಾರೆ.

ಒಂದಾರ್ಥದಲ್ಲಿ ಐಪಿಎಲ್ ಆರಂಭವಾಗಿದ್ದೇ ಬಿರುಗಾಳಿಯಂತಹ ಬ್ಯಾಟಿಂಗ್ ಮೂಲಕ. ಹೌದು, 2008ರ ಮೊದಲ ಐಪಿಎಲ್​ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ವಿರುದ್ಧ ಕೆಕೆಆರ್ ತಂಡದ ಬ್ರೆಂಡನ್ ಮೆಕಲಮ್ ಸ್ಪೋಟಕ 158 ರನ್ ಸಿಡಿಸಿ ಬಿರುಸಿನ ಆಟಕ್ಕೆ ಚಾಲನೆ ನೀಡಿದ್ದರು.

ಅಲ್ಲಿಂದ ಶುರುವಾದ ಬಿರುಸಿನ ಇನಿಂಗ್ಸ್​ನ್ನು ಇಂದು ಹಾರ್ದಿಕ್ ಪಾಂಡ್ಯ, ವಿರಾಟ್ ಕೊಹ್ಲಿ, ರಾಹುಲ್,  ಕ್ರಿಸ್ ಗೇಲ್, ಎಬಿ ಡಿವಿಲಿಯರ್ಸ್, ಶೇನ್ ವ್ಯಾಟ್ಸನ್, ಸುರೇಶ್ ರೈನಾ, ಎಂಎಸ್ ಧೋನಿ, ಜೋಸ್ ಬಟ್ಲರ್, ಆರೋನ್ ಫಿಂಚ್ ಸೇರಿದಂತೆ ಅನೇಕ ಆಟಗಾರರು ಮುಂದುವರೆಸಿದ್ದಾರೆ. ಹೀಗೆ ಐಪಿಎಲ್​ನಲ್ಲಿ ಚೆಂಡನ್ನು ಅತೀ ಹೆಚ್ಚು ಬಾರಿ ಸಿಕ್ಸರ್​ಗೆ ಅಟ್ಟಿದ ಮೂವರು ಪ್ಲೇಯರ್​ಗಳಿದ್ದಾರೆ. ಅವರೆಂದರೆ...

3- ಮಹೇಂದ್ರ ಸಿಂಗ್ ಧೋನಿ

ಚೆನ್ನೈ ಸೂಪರ್ ಕಿಂಗ್ಸ್ ತಂಡದ ನಾಯಕ ಮಹೇಂದ್ರ ಸಿಂಗ್ ಧೋನಿ ಕೆಳ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿ ಅತೀ ಹೆಚ್ಚು ರನ್ ಕಲೆಹಾಕಿದ ಆಟಗಾರರಲ್ಲಿ ಒಬ್ಬರು. 190 ಐಪಿಎಲ್ ಪಂದ್ಯಗಳಲ್ಲಿ 170 ಬಾರಿ ಧೋನಿ ಬ್ಯಾಟ್​ ಬೀಸಿದ್ದಾರೆ.

ಇದರಲ್ಲಿ ವೈಯುಕ್ತಿಕ ಗರಿಷ್ಠ ಮೊತ್ತ ಅಜೇಯ 84 ರನ್ ಗಳಿಸಿರುವ ಧೋನಿ, ಇದುವರೆಗೂ ಸಿಡಿಸಿದ ಸಿಕ್ಸರ್​ಗಳ ಸಂಖ್ಯೆ 209. ಹಾಗೆಯೇ ಐಪಿಎಲ್​ನಲ್ಲಿ 200 ಸಿಕ್ಸರ್​ ಬಾರಿಸಿದ ಏಕೈಕ ಭಾರತೀಯ ಆಟಗಾರ ಎಂಬ ಹೆಗ್ಗಳಿಕೆ ಕೂಡ ಧೋನಿದು.

2. ಎಬಿ ಡಿವಿಲಿಯರ್ಸ್

ಐಪಿಎಲ್‌ನಲ್ಲಿ 200 ಕ್ಕೂ ಹೆಚ್ಚು ಸಿಕ್ಸರ್‌ಗಳನ್ನು ಸಿಡಿಸಿದ ಆಟಗಾರರ ಪಟ್ಟಿಯಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಅನುಭವಿ ಬ್ಯಾಟ್ಸ್‌ಮನ್ ಎಬಿ ಡಿವಿಲಿಯರ್ಸ್ ಎರಡನೇ ಸ್ಥಾನದಲ್ಲಿದ್ದಾರೆ. ತಮ್ಮ ಸ್ಫೋಟಕ ಇನ್ನಿಂಗ್ಸ್ ಮೂಲಕ ಹಲವು ಬಾರಿ ಎಬಿಡಿ ಆರ್​ಸಿಬಿ ತಂಡಕ್ಕೆ ಜಯ ತಂದುಕೊಟ್ಟಿದ್ದಾರೆ.

ಐಪಿಎಲ್‌ನಲ್ಲಿ ವೈಯುಕ್ತಿಕವಾಗಿ ಅಜೇಯ  133 ರನ್ ಸಿಡಿಸಿರುವ ಎಬಿ ಡಿವಿಲಿಯರ್ಸ್​, ಇದುವರೆಗೆ  154 ಪಂದ್ಯಗಳನ್ನು ಆಡಿದ್ದಾರೆ. ಇದರಲ್ಲಿ ಮೂಡಿ ಬಂದಿರುವುದು ಬರೋಬ್ಬರಿ 212 ಸಿಕ್ಸರ್​ಗಳು. ಒಟ್ಟಾರೆ ಐಪಿಎಲ್‌ನಲ್ಲಿ ಎರಡನೇ ಅತಿ ಹೆಚ್ಚು ಸಿಕ್ಸರ್ ಸಿಡಿಸಿದ ರ್ಯಾಕಿಂಗ್ ಪಟ್ಟಿಯಲ್ಲಿ ಎಬಿಡಿ 2ನೇ ಸ್ಥಾನ ಅಲಂಕರಿಸಿದ್ದಾರೆ.

1. ಕ್ರಿಸ್ ಗೇಲ್

ಕ್ರಿಸ್ ಗೇಲ್ ಐಪಿಎಲ್‌ನಲ್ಲಿ ಅತಿ ಹೆಚ್ಚು ಸಿಕ್ಸರ್ ಸಿಡಿಸಿದ ಬ್ಯಾಟ್ಸ್‌ಮನ್. ಐಪಿಎಲ್‌ನ ಸಿಕ್ಸರ್ ವಿಷಯದಲ್ಲಿ ವೆಸ್ಟ್ ಇಂಡೀಸ್ ಆಟಗಾರನಿಗೆ ಪೈಪೋಟಿ ನೀಡುವ ಮತ್ತೊಬ್ಬ ಬ್ಯಾಟ್ಸ್‌ಮನ್‌ ಇಲ್ಲ. 125 ಐಪಿಎಲ್ ಪಂದ್ಯವನ್ನಾಡಿರುವ ಗೇಲ್ ಪುಣೆ ವಾರಿಯರ್ಸ್ ವಿರುದ್ಧ ಅಜೇಯ 175 ರನ್ ಸಿಡಿಸಿ ದಾಖಲೆ ಬರೆದಿದ್ದರು.

ಇದಲ್ಲದೆ ಸಿಕ್ಸರ್ ವಿಷಯದಲ್ಲೂ ಐಪಿಎಲ್ ದಾಖಲೆ ಕ್ರಿಸ್ ಗೇಲ್ ಹೆಸರಿನಲ್ಲಿದೆ. 125 ಪಂದ್ಯಗಳಿಂದ ಗೇಲ್ ಸಿಡಿಸಿರುವುದು ಬರೋಬ್ಬರಿ  326 ಸಿಕ್ಸರ್. ಅಂದರೆ ಐಪಿಎಲ್​ನಲ್ಲಿ ಮುನ್ನೂರು ಸಿಕ್ಸ್ ಬಾರಿಸಿದ ಏಕೈಕ ಆಟಗಾರ ಗೇಲ್. ಸದ್ಯ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದ ಭಾಗವಾಗಿರುವ ಗೇಲ್ ಈ ಬಾರಿ ಹೇಗೆ ಆರ್ಭಟಿಸಲಿದ್ದಾರೆ ಕಾದು ನೋಡಬೇಕಿದೆ.