IPL ಆಡಿದ್ದ 11 ಪಾಕಿಸ್ತಾನಿ ಕ್ರಿಕೆಟರುಗಳು ಯಾರು ಗೊತ್ತಾ?

2008 ರಿಂದ ಆರಂಭವಾದ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) ನಿಸ್ಸಂದೇಹವಾಗಿ ವಿಶ್ವದ ಅತ್ಯಂತ ರಂಗೀನ್ ಕ್ರಿಕೆಟ್ ಕಾರ್ನೀವಲ್ ಎಂದರೆ ತಪ್ಪಾಗಲಾರದು.

ಯುವ ಪ್ರತಿಭೆಗಳನ್ನು ಸ್ಟಾರ್‌ ಆಟಗಾರರನ್ನಾಗಿ ವಿಶ್ವಕ್ಕೆ ಪರಿಚಯಿಸಿದ ಕೀರ್ತಿ ಕೂಡ ಐಪಿಎಲ್​ಗೆ ಸಲ್ಲಬೇಕು. ಅದರಲ್ಲೂ ಐಪಿಎಲ್​ನಿಂದಾಗಿಯೇ 2011 ರ ವಿಶ್ವಕಪ್ ಗೆಲ್ಲುವಲ್ಲಿ ಟೀಂ ಇಂಡಿಯಾಗೆ ಸಾಧ್ಯವಾಯಿತು ಎಂಬುದನ್ನು ಅಲ್ಲಗೆಳೆಯುವಂತಿಲ್ಲ. ಏಕೆಂದರೆ ಚುಟುಕು ಕ್ರಿಕೆಟ್​ನಲ್ಲಿ ಮಿಂಚುತ್ತಿದ್ದ ಆಟಗಾರರನ್ನು ಮತ್ತು ಅನುಭವಿಗಳನ್ನು ಸೇರಿಸಿ ಧೋನಿ  ಎರಡನೇ ಬಾರಿ ಭಾರತಕ್ಕೆ ವರ್ಲ್ಡ್​ ಕಪ್ ಕಿರೀಟ  ತೊಡಿಸಿದ್ದರು.

ಇಷ್ಟೇ ಅಲ್ಲದೆ ವಿಶ್ವದ ಅನೇಕ ಆಟಗಾರರು ಕೂಡ ಐಪಿಎಲ್​ನಲ್ಲಿ ಭಾಗವಹಿಸುವುದನ್ನು ಎದುರು ನೋಡುತ್ತಿರುತ್ತಾರೆ. ಇದಕ್ಕೆ ಒಂದು ಕಾರಣ ಈ ಟೂರ್ನಿಯಲ್ಲಿ ಮಿಂಚಿದರೆ ರಾಷ್ಟ್ರೀಯ ತಂಡಗಳ ಆಯ್ಕೆಗಳಿಗೆ ಪರಿಗಣಿಸಲಾಗುತ್ತಿರುವುದು.

ಚುಟುಕು ಕ್ರಿಕೆಟ್​ಗೆ ವಿಶ್ವ ಮಟ್ಟದಲ್ಲಿ ಹೊಸ ಸ್ವರೂಪ ನೀಡಿದ್ದ ಐಪಿಎಲ್​​ ಆರಂಭದಲ್ಲಿ ಕ್ರಿಕೆಟ್ ಆಡುವ ಎಲ್ಲಾ ದೇಶಗಳ ಆಟಗಾರರಿಗೆ ಅವಕಾಶ ನೀಡಲಾಗಿತ್ತು. ಅದರಂತೆ ಪಾಕಿಸ್ತಾನ ಸೇರಿದಂತೆ ವಿಶ್ವ ಕ್ರಿಕೆಟಿಗರು ಇಂಡಿಯನ್ ಪ್ರೀಮಿಯರ್ ಲೀಗ್​ನಲ್ಲಿ ಭಾಗವಹಿಸಿದ್ದರು. ಅದರಲ್ಲೂ ಪಾಕ್ ತಂಡದ  11 ಸ್ಟಾರ್ ಆಟಗಾರರು ಮೊದಲ ಆವೃತ್ತಿಯಲ್ಲೇ ಐಪಿಎಲ್​ನಲ್ಲಿ ಕಾಣಿಸಿಕೊಂಡಿದ್ದರು. ಅವರೆಂದರೆ...

#1 ಶಾಹಿದ್ ಅಫ್ರಿದಿ

ಐಪಿಎಲ್‌ನ ಮೊದಲ ಆವೃತ್ತಿಯಲ್ಲಿ ಆಡಂ ಗಿಲ್‌ಕ್ರಿಸ್ಟ್ ನೇತೃತ್ವದ ಡೆಕ್ಕನ್ ಚಾರ್ಜರ್ಸ್‌ ತಂಡದಲ್ಲಿ ಶಾಹಿದ್ ಅಫ್ರಿದಿ ಕಾಣಿಸಿಕೊಂಡಿದ್ದರು. ಟಿ20 ವಿಶ್ವಕಪ್- 2007 ರ ರನ್ನರ್ಸ್ ತಂಡವಾಗಿದ್ದ ಪಾಕಿಸ್ತಾನದ ಆಟಗಾರನ ಮೇಲೆ ಫ್ರಾಂಚೈಸಿಗಳಿಗೆ ಭಾರೀ ನಿರೀಕ್ಷೆಗಳಿದ್ದವು.

ಆದರೆ  ಆಡಿದ  10 ಪಂದ್ಯಗಳಲ್ಲಿ 10.12 ಸರಾಸರಿಯಲ್ಲಿ ಒಟ್ಟಾರೆ  81 ರನ್ ಗಳಿಸಲು ಮಾತ್ರ  ಬೂಮ್ ಬೂಮ್ ಅಫ್ರಿದಿ ಶಕ್ತರಾಗಿದ್ದರು. ಇನ್ನು ಲೆಗ್ ಸ್ಪಿನ್ ಬೌಲಿಂಗ್ ಮಾಡುವ ಅಫ್ರಿದಿ ಐಪಿಎಲ್​ನಲ್ಲಿ 28ಕ್ಕೆ 3 ವಿಕೆಟ್​ನೊಂದಿಗೆ  ಒಟ್ಟು 9 ವಿಕೆಟ್​ಗಳನ್ನು ಕಬಳಿಸಿದ್ದಾರೆ. ವಿವಿಎಸ್ ಲಕ್ಷ್ಮಣ್, ರೋಹಿತ್ ಶರ್ಮಾ, ಆಡಂ ಗಿಲ್‌ಕ್ರಿಸ್ಟ್ ಮತ್ತು ಆಂಡ್ರ್ಯೂ ಸೈಮಂಡ್ಸ್‌ರಂತಹ ಸ್ಟಾರ್ ಆಟಗಾರರಿದ್ದರೂ ಡೆಕ್ಕನ್ ಚಾರ್ಜರ್ಸ್ ಸಾಂಘಿಕ ಪ್ರದರ್ಶನ ನೀಡುವಲ್ಲಿ ವಿಫಲವಾಗಿತ್ತು.

#2 ಯೂನಿಸ್ ಖಾನ್

ಐಪಿಎಲ್ ​ 2008ರಲ್ಲಿ ಪಾಕ್ ತಂಡದ ಮಾಜಿ ನಾಯಕ ಯೂನಿಸ್ ಖಾನ್ ರಾಜಸ್ಥಾನ್ ರಾಯಲ್ಸ್ ತಂಡವನ್ನು ಪ್ರತಿನಿಧಿಸಿದ್ದರು. ಕೇವಲ ಒಂದು ಪಂದ್ಯವಾಡುವ ಅವಕಾಶ ಪಡೆದಿದ್ದ ಯೂನಿಸ್ ಅದರಲ್ಲೂ ತಮ್ಮ ಸಾಮರ್ಥ್ಯ ತೋರಿಸುವಲ್ಲಿ ವಿಫಲರಾಗಿದ್ದರು.

ಶೇನ್ ವಾರ್ನ್ ನೇತೃತ್ವದ ರಾಯಲ್ಸ್ ತಂಡದಲ್ಲಿ ಆ ವೇಳೆ ಗ್ರೇಮ್ ಸ್ಮಿತ್, ಡೇಮಿಯನ್ ಮಾರ್ಟಿನ್, ಸ್ವಾಪ್ನಿಲ್ ಅಸ್ನೋಡ್ಕರ್ ಮತ್ತು ಶೇನ್ ವ್ಯಾಟ್ಸನ್ ಮತ್ತು ಯೂಸುಫ್ ಪಠಾಣ್ ಅವರಂತ ಶ್ರೇಷ್ಠ ಆಟಗಾರರು ಕಾಣಿಸಿಕೊಂಡಿದ್ದರು. ಅಲ್ಲದೆ ರಾಜಸ್ಥಾನ್ ರಾಯಲ್ಸ್ ತಂಡವೇ ಮೊದಲ ಐಪಿಎಲ್ ಕಿರೀಟವನ್ನು ತಮ್ಮದಾಗಿಸಿಕೊಂಡಿದ್ದು ಈಗ ಇತಿಹಾಸ.

#3 ಮಿಸ್ಬಾ-ಉಲ್-ಹಕ್

ಅನಿಲ್ ಕುಂಬ್ಳೆ ನೇತೃತ್ವದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡವನ್ನು ಪಾಕಿಸ್ತಾನದ ಆಟಗಾರ ಮಿಸ್ಬಾ ಉಲ್ ಹಕ್ ಪ್ರತಿನಿಧಿಸಿದ್ದರು. ಆರ್​ಸಿಬಿ ಪರ  8 ಪಂದ್ಯಗಳನ್ನು ಆಡಿದ್ದ ಮಿಸ್ಬಾ ಗಳಿಸಿದ್ದು ಒಟ್ಟಾರೆ  117 ರನ್​ಗಳನ್ನು ಮಾತ್ರ.

#4 ಸೊಹೈಲ್ ತನ್ವೀರ್

ಚೊಚ್ಚಲ ಇಂಡಿಯನ್ ಪ್ರೀಮಿಯರ್ ಲೀಗ್​ನ ಅತ್ಯಂತ ಯಶಸ್ವಿ ಆಟಗಾರನೆಂದರೆ ಸೊಹೈಲ್ ತನ್ವೀರ್. ರಾಜಸ್ಥಾನ ರಾಯಲ್ಸ್ ತಂಡವನ್ನು ಪ್ರತಿನಿಧಿಸಿದ್ದ ಈ ಪಾಕ್ ಆಟಗಾರ ಮೊದಲ ಐಪಿಎಲ್​ ಪರ್ಪಲ್ ಕ್ಯಾಪ್ ವಿನ್ನರ್ ಆಗಿದ್ದರು.

ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ 14ಕ್ಕೆ 6 ವಿಕೆಟ್ ಉರುಳಿಸಿದ್ದ ಸೊಹೈಲ್ ತನ್ವೀರ್  11 ಪಂದ್ಯಗಳಿಂದ 22 ವಿಕೆಟ್‌ಗಳನ್ನು ಕಬಳಿಸಿದ್ದರು. ವಾರ್ನ್​ ನೇತೃತ್ವದ ರಾಜಸ್ಥಾನ್ ರಾಯಲ್ಸ್‌ ಚಾಂಪಿಯನ್ ಪಟ್ಟ ಅಲಂಕರಿಸುವಲ್ಲಿ ಸೊಹೈಲ್ ಅವರ ಎಡಗೈ  ಅಸ್ತ್ರ ಕೂಡ ಪ್ರಮುಖ ಪಾತ್ರವಹಿಸಿತ್ತು.

#5 ಉಮರ್ ಗುಲ್

ಐಪಿಎಲ್ 2008 ರಲ್ಲಿ ಉಮರ್ ಗುಲ್ ಶಾರುಖ್ ಖಾನ್ ಒಡೆತನದ ಕೋಲ್ಕತಾ ನೈಟ್ ರೈಡರ್ಸ್‌ ತಂಡದ ಭಾಗವಾಗಿದ್ದರು. ಕೆಕೆಆರ್ ತಂಡದ ಪ್ರಮುಖ ವೇಗಿಯಾಗಿ ಕಾಣಿಸಿಕೊಂಡ ಗುಲ್ ಹೇಳಿಕೊಳ್ಳುವಂತಹ ಪ್ರದರ್ಶನ ತೋರಿರಲಿಲ್ಲ.

ಸೌರವ್ ಗಂಗೂಲಿ ನೇತೃತ್ವದಲ್ಲಿ 6 ಪಂದ್ಯಗಳನ್ನು ಆಡಿದ್ದ ಉಮರ್ ಗುಲ್ ಕೆಕೆಆರ್ ಪರ  12 ವಿಕೆಟ್​ಗಳನ್ನು ಕಬಳಿಸಿದ್ದರು. ಕಿಂಗ್ಸ್ ಇಲೆವೆನ್ ಪಂಜಾಬ್ ವಿರುದ್ಧದ ಕೊನೆಯ ಪಂದ್ಯದಲ್ಲಿ 23ಕ್ಕೆ 4 ವಿಕೆಟ್ ಉರುಳಿಸಿ ಗಮನ ಸೆಳೆದಿದ್ದರು.

#6 ಶೋಯೆಬ್ ಮಲಿಕ್

ಪಾಕಿಸ್ತಾನದ ತಂಡದ ಅತ್ಯಂತ ವಿಶ್ವಾಸಾರ್ಹ ಬ್ಯಾಟ್ಸ್‌ಮನ್ ಶೋಯೆಬ್ ಮಲಿಕ್ ಐಪಿಎಲ್‌ ವೀರೇಂದ್ರ ಸೆಹ್ವಾಗ್ ನೇತೃತ್ವದ ಡೆಲ್ಲಿ ಡೇರ್‌ ಡೆವಿಲ್ಸ್ ಪರ ಆಡಿದ್ದರು. ಪಾಕ್ ತಂಡದ ಆಲ್‌ರೌಂಡರ್ ಆಗಿದ್ದ ಶೋಯೆಬ್ ಐಪಿಎಲ್​ನಲ್ಲಿ ಬ್ಯಾಟ್ ಮತ್ತು ಬಾಲ್ ಎರಡರಲ್ಲೂ ನಿಷ್ಪರಿಣಾಮಕಾರಿಯಾಗಿದ್ದರು.

ಒಟ್ಟು 7 ಪಂದ್ಯಗಳನ್ನಾಡಿದ್ದ ಶೋಯೆಬ್ ಕೇವಲ  52 ರನ್ ಗಳಿಸಿದ್ದರು. ಇನ್ನು ಬೌಲಿಂಗ್ ವಿಭಾಗದಲ್ಲಿ ಕೇವಲ  2 ವಿಕೆಟ್​ಗಳನ್ನು ಪಡೆದು ನಿರಾಸೆ ಮೂಡಿಸಿದ್ದರು.

#7 ಶೋಯೆಬ್ ಅಖ್ತರ್

ರಾವಲ್ಪಿಂಡಿ ಎಕ್ಸ್‌ಪ್ರೆಸ್ ಖ್ಯಾತಿಯ ಶೋಯೆಬ್ ಅಖ್ತರ್ ಕೊಲ್ಕತ್ತಾ ನೈಟ್ ರೈಡರ್ಸ್ ಪರ  3 ಪಂದ್ಯಗಳನ್ನು ಆಡಿದ್ದರು. ತಮ್ಮ ಬೌಲಿಂಗ್ ಮೂಲಕ ಗಮನ ಸೆಳೆದಿದ್ದ ಅಖ್ತರ್ ಆ ಬಳಿಕ ಟೂರ್ನಿಯಿಂದ ಹೊರ ನಡೆದಿದ್ದರು.

ಬೌನ್ಸರ್ ಎಸೆತಗಳೊಂದಿಗೆ ಬ್ಯಾಟ್ಸ್‌ಮನ್‌ಗಳಿಗೆ ದುಃಸ್ವಪ್ನವಾಗಿ ಕಾಡಿದ್ದ ಅಖ್ತರ್ ಡೆಲ್ಲಿ ಡೇರ್ ಡೆವಿಲ್ಸ್ ವಿರುದ್ಧ 11 ಕ್ಕೆ 4 ವಿಕೆಟ್ ಕಿತ್ತು ಮಿಂಚಿದ್ದರು. ಹಾಗೆಯೇ ಒಟ್ಟಾರೆ ಐಪಿಎಲ್​ನಲ್ಲಿ 5 ವಿಕೆಟ್ ಉರುಳಿಸಿದ್ದರು.

# 8 ಸಲ್ಮಾನ್ ಬಟ್

ಪಾಕಿಸ್ತಾನದ ಮಾಜಿ ನಾಯಕ ಸಲ್ಮಾನ್ ಬಟ್  2008 ರಲ್ಲಿ ಕೆಕೆಆರ್ ತಂಡದ ಭಾಗವಾಗಿದ್ದರು. ಎಡಗೈ ಓಪನರ್ ಆಗಿದ್ದ ಸಲ್ಮಾನ್ ಕೆಕೆಆರ್​ ಪರ ಇನಿಂಗ್ಸ್ ಆರಂಭಿಸಿದ್ದರು.

ಕೆಕೆಆರ್ ಪರ  7 ಪಂದ್ಯಗಳಲ್ಲಿ ಕಣಕ್ಕಿಳಿದಿದ್ದ ಸಲ್ಮಾನ್ ಬಟ್  193 ರನ್ ಗಳಿಸಿದ್ದರು. ಎಂಎಸ್ ಧೋನಿಯ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ 54 ಎಸೆತಗಳಲ್ಲಿ 73 ರನ್ ಗಳಿಸಿರುವುದು ಅವರ ಐಪಿಎಲ್​ನ ಅತ್ಯುತ್ತಮ ಪ್ರದರ್ಶನವಾಗಿದೆ.

# 9 ಕಮ್ರಾನ್ ಅಕ್ಮಲ್

ಪಾಕಿಸ್ತಾನದ ವಿಕೆಟ್ ಕೀಪರ್ ಕಮ್ರಾನ್ ಅಕ್ಮಲ್ ರಾಜಸ್ಥಾನ್ ರಾಯಲ್ಸ್ ತಂಡವನ್ನು ಪ್ರತಿನಿಧಿಸಿದ್ದರು. ಸ್ಲಾಗ್ ಓವರ್‌ಗಳಲ್ಲಿ ಅಕ್ಮಲ್ ಭರ್ಜರಿ ಬ್ಯಾಟಿಂಗ್ ನಡೆಸಿ ಗಮನ ಸೆಳೆದಿದ್ದರು. ಅದರಲ್ಲೂ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ  28 ಎಸೆತಗಳಲ್ಲಿ 53 ರನ್ ಬಾರಿಸಿ ಮಿಂಚಿದ್ದರು.

ರಾಜಸ್ಥಾನ್ ರಾಯಲ್ಸ್ ಪರ  6 ಪಂದ್ಯಗಳನ್ನಾಡಿದ್ದ ಕಮ್ರಾನ್ ಅಕ್ಮಲ್ ಒಂದು ಅರ್ಧಶತಕದೊಂದಿಗೆ 164.1 ಸ್ಟ್ರೈಕ್ ರೇಟ್​ನಲ್ಲಿ 128 ರನ್​ಗಳಿಸಿದ್ದರು.

#10 ಮೊಹಮ್ಮದ್ ಆಸಿಫ್

ಐಪಿಎಲ್‌ನ ಪ್ರಥಮ ಆವೃತ್ತಿಯಲ್ಲಿ ಪಾಕಿಸ್ತಾನದ ಮಧ್ಯಮ ವೇಗಿ ಮೊಹಮ್ಮದ್ ಆಸಿಫ್ ಡೆಲ್ಲಿ ಡೇರ್‌ ಡೆವಿಲ್ಸ್ ಪರ ಕಣಕ್ಕಿಳಿದಿದ್ದರು. 8 ಪಂದ್ಯಗಳನ್ನು ಆಡಿದ್ದ ಪಾಕ್ ಆಟಗಾರನಿಂದ ಹೇಳಿಕೊಳ್ಳುವಂತಹ ಪ್ರದರ್ಶನ ಮೂಡಿ ಬಂದಿರಲಿಲ್ಲ.

ಡೆಕ್ಕನ್ ಚಾರ್ಜರ್ಸ್ ವಿರುದ್ಧ 4 ಓವರ್‌ಗಳಲ್ಲಿ 9 ರನ್​ಗೆ  2 ವಿಕೆಟ್ ಕಬಳಿಸಿರುವುದೇ ಆಸಿಫ್​ರ ಶ್ರೇಷ್ಠ ಸಾಧನೆ. ಇದಾಗ್ಯೂ ಡೆಕ್ಕನ್ ಚಾರ್ಜಸ್ ವಿರುದ್ಧದ ಪಂದ್ಯದಲ್ಲಿ 4 ಓವರ್​ಗಳಲ್ಲಿ 51 ರನ್​ ಬಿಟ್ಟುಕೊಟ್ಟಿರುವ ಹೀನಾಯ ದಾಖಲೆ ಆಸಿಫ್ ಹೆಸರಿನಲ್ಲಿದೆ.

#11 ಮೊಹಮ್ಮದ್ ಹಫೀಜ್

ಪಾಕಿಸ್ತಾನದ ಆಲ್‌ರೌಂಡರ್ ಮೊಹಮ್ಮದ್ ಹಫೀಜ್ ಕೊಲ್ಕತ್ತಾ ನೈಟ್ ರೈಡರ್ಸ್ ತಂಡವನ್ನು ಪ್ರತಿನಿಧಿಸಿದ್ದರು. ಗಂಗೂಲಿ ನಾಯಕತ್ವದಲ್ಲಿ 8 ಪಂದ್ಯಗಳನ್ನು ಆಡಿದ್ದ ಹಫೀಜ್ ಗಳಿಸಿದ್ದು ಮಾತ್ರ ಕೇವಲ  64 ರನ್​ಗಳು.

ಇನ್ನು ಮೂರು ಪಂದ್ಯಗಳಲ್ಲಿ ಬೌಲಿಂಗ್ ಮಾಡಿದ್ದ ಹಫೀಜ್ ಕೇವಲ 1 ವಿಕೆಟ್ ಉರುಳಿಸುವಲ್ಲಿ ಮಾತ್ರ ಶಕ್ತರಾಗಿದ್ದರು.

2008 ರಲ್ಲಿ ಐಪಿಎಲ್​ ಪ್ರತಿನಿಧಿಸಿದ್ದ ಪಾಕಿಸ್ತಾನ ಆಟಗಾರರನ್ನು ಆ ಬಳಿಕ ನಿಷೇಧಿಸಲಾಗಿತ್ತು. ಮುಂಬೈ ದಾಳಿ ನಡೆದ ನಂತರ ಸಂಪೂರ್ಣವಾಗಿ ಪಾಕ್ ಆಟಗಾರರನ್ನು ಟೂರ್ನಿಯಿಂದ ಕೈ ಬಿಡಲು ಭಾರತ ಸರ್ಕಾರ ನಿರ್ದೇಶಿಸಿತ್ತು. ಅದರಂತೆ ಕಳೆದ  10 ವರ್ಷಗಳಿಂದ ಇಂಡಿಯನ್ ಪ್ರೀಮಿಯರ್ ಲೀಗ್​ನಲ್ಲಿ ಪಾಕ್ ಆಟಗಾರರಿಗೆ ನಿಷೇಧ ಹೇರಲಾಗಿದೆ.