Hubballi: ಮಾರ್ಚ್ 6 ರಿಂದ ಧಾರವಾಡ-ಬೆಳಗಾವಿ ರೈಲು ಆರಂಭ, ಇಲ್ಲಿದೆ ನೋಡಿ ಫುಲ್ ಡೀಟೇಲ್ಸ್

ರೈಲು ಸಂಖ್ಯೆ 07357 ಧಾರವಾಡ ಬೆಳಗಾವಿ ರೈಲು ಧಾರವಾಡದಿಂದ ಬೆಳಗ್ಗೆ 8:15 ಕ್ಕೆ ಹೊರಟು 10:45 ಕ್ಕೆ ಬೆಳಗಾವಿ ತಲುಪುತ್ತದೆ. ಸದ್ಯದ ಮಾಹಿತಿ ಪ್ರಕಾರ ಮಾರ್ಚ್ 6, 2023 ರಿಂದ ಸೆಪ್ಟೆಂಬರ್ 6, 2023 ರವರೆಗೆ ಈ ವೇಳಾಪಟ್ಟಿ ಜಾರಿಯಲ್ಲಿರುತ್ತದೆ.

ಇನ್ನು ರೈಲು ಸಂಖ್ಯೆ 07358 ಬೆಳಗಾವಿ ಧಾರವಾಡ ರೈಲು ಬೆಳಗಾವಿಯಿಂದ ಸಂಜೆ 7:30ಕ್ಕೆ ಹೊರಟು ರಾತ್ರಿ 9:55ಕ್ಕೆ ಧಾರವಾಡ ತಲುಪುತ್ತದೆ. ಮಾರ್ಗದಲ್ಲಿ, ರೈಲು ಅಳ್ನಾವರ, ಲೋಂಡಾ ಮತ್ತು ಖಾನಾಪುರ ನಿಲ್ದಾಣದಲ್ಲಿ ಸ್ಟಾಪ್ ನೀಡಲಿದೆ.

ರೈಲು 22 ಕೋಚ್​ಗಳನ್ನು ಹೊಂದಿದ್ದು, ಅದರಲ್ಲಿ 11 ಸ್ಲೀಪರ್ ಕೋಚ್​ಗಳು, 7 ಜನರಲ್ ಕೋಚ್​ಗಳು, 2 ಥೀ ಟೈರ್ ಎಸಿ ಕೋಚ್​ಗಳು, 1 ಟು ಟೈರ್ ಎಸಿ ಕೋಚ್ ಮತ್ತು ಒಂದು ಎಸಿ 1 ಟೈರ್ ಕೋಚ್ ಇರಲಿದೆ.

ಈ ಬದಲಾವಣೆಯ ಕಾರಣದಿಂದ ಮಾರ್ಚ್ 6 ರಿಂದ ರೈಲು ಸಂಖ್ಯೆ 07363/07364 ಧಾರವಾಡ ಹುಬ್ಬಳ್ಳಿ ಧಾರವಾಡ ಪ್ಯಾಸೆಂಜರ್ ವಿಶೇಷ ರೈಲನ್ನು ರದ್ದು ಮಾಡಲು ನೈಋತ್ಯ ರೈಲ್ವೆ ನಿರ್ಧರಿಸಿದೆ.

ರೈಲು ಬೆಳಗಾವಿಯಲ್ಲಿ ಪ್ರಾಥಮಿಕ ನಿರ್ವಹಣೆ ಮತ್ತು ಮೈಸೂರು ಅಥವಾ ಬಾಗಲಕೋಟೆಯಲ್ಲಿ ದ್ವಿತೀಯ ನಿರ್ವಹಣೆಯನ್ನು ಹೊಂದಿರುತ್ತದೆ ಎಂದು ಇಲಾಖೆ ಮಾಹಿತಿ ನೀಡಿದ್ದು. ಈ ರೈಲು ಮೈಸೂರು, ಹಾಸನ ಜನರಿಗೆ ಬೆಳಗಾವಿಗೆ ನೇರ ಸಂಪರ್ಕವನ್ನು ಒದಗಿಸುತ್ತದೆ.

ಆದರೆ, ಈ ರೈಲಿನಲ್ಲಿ ಸೀಟ್ ರಿಸರ್ವ್ ಮಾಡಲು ಬರದ ಕಾರಣ ಮೈಸೂರು ಅಥವಾ ಹಾಸನದಿಂದ ಬೆಳಗಾವಿಗೆ ನೇರವಾಗಿ ಟಿಕೆಟ್ ಬುಕ್ ಮಾಡಲು ಸಾಧ್ಯವಿಲ್ಲ. ಪ್ರಯಾಣಿಕರು ಕೇವಲ ಧಾರವಾಡದವರೆಗೆ ಟಿಕೆಟ್ ಅನ್ನು ರಿಸರ್ವ್ ಮಾಡಬಹುದು ಹಾಗೂ ಬೆಳಗಾವಿ ಕಡೆಗೆ ಕಾಯ್ದಿರಿಸದ ಟಿಕೆಟ್ ಖರೀದಿಸಬೇಕು.

ರೈಲು ಸಂಖ್ಯೆ 17301/17302 ಮೈಸೂರು ಧಾರವಾಡ ಮೈಸೂರು ಹುಬ್ಬಳ್ಳಿಯಲ್ಲಿ ಪ್ರಾಥಮಿಕ ನಿರ್ವಹಣೆಯನ್ನು ಹೊಂದಿತ್ತು. ಈಗ ಅದೇ ರೈಲಿನ ಪ್ರಾಥಮಿಕ ನಿರ್ವಹಣೆಯನ್ನು ಬೆಳಗಾವಿಗೆ ಸ್ಥಳಾಂತರಿಸಲಾಗಿದೆ.

ಅಲ್ಲದೇ, ಹುಬ್ಬಳ್ಳಿ ಅಥವಾ ಧಾರವಾಡದಿಂದ ಹೊಸ ರೈಲನ್ನು ಪ್ರಾರಂಭಿಸಲು ಹುಬ್ಬಳ್ಳಿ ಪಿಟ್ಲೈನ್ನಲ್ಲಿ ರೈಲು ಸಂಖ್ಯೆ 17301/17302 (ಧಾರವಾಡ ಮೈಸೂರು ಧಾರವಾಡ ಎಕ್ಸ್ಪ್ರೆಸ್) ಸ್ಲಾಟ್ ಅನ್ನು ಖಾಲಿ ಮಾಡಲಾಗಿದೆ.