ಸ್ಯಾಂಡಲ್ವುಡ್ ನಟಿ ಶೃತಿ ರಾಮಕೃಷ್ಣ ಅಂದರೆ ತುಸು ಯೋಚಿಸಬೇಕಾಗಬಹುದು. ಆದರೆ ಸೋನು ಗೌಡ ಅಂತೇಳಿದರೆ ಇಂತಿ ನಿನ್ನ ಪ್ರೀತಿಯ ಚಿತ್ರದ ಮುದ್ದು ಮುಖದ ಚೆಲುವೆಯೊಬ್ಬಳು ಕಣ್ಮುಂದೆ ಬರುತ್ತಾರೆ.
ಇನ್ನಷ್ಟು ಹತ್ತಿರದ ನೆನಪು ಬೇಕಿದ್ದರೆ ಉಪೇಂದ್ರ ಅಭಿನಯದ ಇತ್ತೀಚಿನ ಸೂಪರ್ ಹಿಟ್ 'ಐ ಲವ್ ಯೂ' ಚಿತ್ರದಲ್ಲಿನ ಗೌರಿಯನ್ನು ನೆನಪಿಸಿಕೊಳ್ಳಬಹುದು.
ಹೌದು, ಅದ್ಭುತ ಅಭಿನಯದ ಮೂಲಕ ತಮಿಳು, ಮಲಯಾಳಂನಲ್ಲಿ ಅವಕಾಶ ಗಿಟ್ಟಿಸಿಕೊಂಡ ಕನ್ನಡತಿ ಈಗ ಮತ್ತೊಮ್ಮೆ ಸುದ್ದಿಯಾಗಿದ್ದಾರೆ.
ಕೆಲ ದಿನಗಳ ಹಿಂದೆ ಸರ್ಕಾರದ ನೂತನ ಸಾರಿಗೆ ಸಂಚಾರ ನಿಯಮದ ಬಗ್ಗೆ ಧ್ವನಿಯೆತ್ತಿದ ಸೋನು ರಸ್ತೆ ಗುಂಡಿಗಳನ್ನು ಮುಚ್ಚದಿರುವ ಸರ್ಕಾರಕ್ಕೆ ಎಷ್ಟು ದಂಡ ವಿಧಿಸಬೇಕೆಂದು ಪ್ರಶ್ನಿಸಿದ್ದರು.
ಅಲ್ಲದೆ ಸಂಚಾರಿ ನಿಯಮವನ್ನು ಜಾರಿಗೆ ತರುವ ಮೊದಲು ಉತ್ತಮ ರಸ್ತೆ ನಿರ್ಮಾಣ ಮಾಡಿ. ಸಾಮಾನ್ಯ ಜನರ ದುಡಿಮೆಯನ್ನು ದಂಡದ ರೂಪದಲ್ಲಿ ಪಡೆದು ಅವರ ಜೀವನವನ್ನು ಹಾಳು ಮಾಡಬೇಡಿ ಎಂದು ವಿನಂತಿಸಿಕೊಂಡಿದ್ದರು.
ಅಭಿಮಾನಿಗಳು ಕಳುಹಿಸುವ ಐ ಲವ್ ಯು..ನಿಮ್ಮನ್ನು ಮದುವೆಯಾಗಬೇಕು ಎಂಬಿತ್ಯಾದಿ ಮೆಸೇಜ್ ಪ್ರಶ್ನೆಗಳಿಗೆ ಸೋನು ಉತ್ತರ ನೀಡಿದ್ದಾರೆ.
ಪ್ರಸ್ತುತ ನನ್ನ ಕೆರಿಯರ್ ಹಾಗೂ ಸಂತೋಷದ ಜೀವನದ ಬಗ್ಗೆ ಗಮನ ನೀಡುತ್ತಿದ್ದೇನೆ. ಹೀಗಾಗಿ ಮದುವೆ ವಿಚಾರ ಬಗ್ಗೆ ಯೋಚಿಸುತ್ತಿಲ್ಲ.
ನಾನು ಖುಷಿಯಾಗಿದ್ದರೆ, ನಮ್ಮ ಪೋಷಕರು ಸಹ ಸಂತೋಷವಾಗಿರುತ್ತಾರೆ. ಹಾಗಾಗಿ ನಾನು ನನ್ನ ಖುಷಿಯ ಬಗ್ಗೆ ಹೆಚ್ಚು ಯೋಚಿಸುತ್ತೇನೆ ಎಂದು ಸೋನು ಗೌಡ ತಿಳಿಸಿದರು.
ಅಭಿಮಾನಿಗಳು ಸಹ ನನಗೆ ತುಂಬಾ ಪ್ರೋತ್ಸಾಹ ನೀಡುತ್ತಾರೆ. ಇಷ್ಟು ವರ್ಷ ಬೆಳೆಸಿದ ಕನ್ನಡ ಚಿತ್ರರಂಗಕ್ಕೆ ಚಿರಋಣಿಯಾಗಿದ್ದೇನೆ ಎಂದು ನಗುವಿನ ರಾಣಿ ತಿಳಿಸಿದರು.
