KGF-Yash: ಕೆಜಿಎಫ್ ಬಿಗ್ ಸಕ್ಸಸ್ ನಂತರ ಮೀಡಿಯಾದಿಂದ ದೂರ ಉಳಿದಿದ್ದೇಕೆ ರಾಕಿಂಗ್ ಸ್ಟಾರ್?

ರಾಕಿಂಗ್ ಸ್ಟಾರ್ ಯಶ್ ಅವರು ಕೆಜಿಎಫ್ ಸಿನಿಮಾಗಳ ಬ್ಲಾಕ್‌ಬಸ್ಟರ್ ಯಶಸ್ಸಿನ ಬಗ್ಗೆ ಮಾತನಾಡಿದ್ದಾರೆ. ಎರಡನೇ ಚಿತ್ರವು 2022 ರ ಅತಿದೊಡ್ಡ ಹಿಟ್ ಆದ ನಂತರ ಲೋ ಪ್ರೊಫೈಲ್ ಅವರು ಸ್ವತಃ ನಿರ್ಧರಿಸಿದ್ದರು ಎನ್ನುವುದನ್ನು ರಿವೀಲ್ ಮಾಡಿದ್ದಾರೆ.

ತಾವು ಪ್ರಜ್ಞಾಪೂರ್ವಕವಾಗಿ ಈ ತೀರ್ಮಾನ ತೆಗೆದುಕೊಂಡಿದ್ದಾಗಿ ಹೇಳಿದ್ದಾರೆ. RRR ಮತ್ತು ಕಾಂತಾರ ಚಿತ್ರಗಳ ಭಾರೀ ಯಶಸ್ಸಿನ ಹೊರತಾಗಿಯೂ, KGF: ಅಧ್ಯಾಯ 2 ಈ ವರ್ಷದ ಅತಿದೊಡ್ಡ ಹಿಟ್ ಸಿನಿಮಾ ಆಗಿ ಉಳಿದಿದೆ. ಇದು ಬಾಕ್ಸ್​ ಆಫೀಸ್​ನಲ್ಲಿ 1200 ಕೋಟಿ ರೂಪಾಯಿಗಳಿಗಿಂತ ಹೆಚ್ಚು ಕಲೆಕ್ಷನ್ ಮಾಡಿದೆ.

ಫಿಲ್ಮ್ ಕಂಪ್ಯಾನಿಯನ್‌ಗೆ ನೀಡಿದ ಇಂಟರ್​ವ್ಯೂನಲ್ಲಿ ಮಾತನಾಡಿದ ನಟ ಯಶ್ ಕೆಜಿಎಫ್ 2 ರಿಲೀಸ್ ನಂತರ ತಮ್ಮ ಮೈಂಡ್‌ಸ್ಪೇಸ್ ಬಗ್ಗೆ ಮತ್ತು ಅವರ ಮುಂದಿನ ನಡೆಯ ಬಗ್ಗೆ ಮುಕ್ತವಾಗಿ ಮಾತನಾಡಿದ್ದಾರೆ. ಮುಂದಿನ ತಿಂಗಳು ನಟನ ಬರ್ತ್​ಡೇ ದಿನ ಅವರ ಅಭಿಮಾನಿಗಳು ಹೊಸ ಸಿನಿಮಾ ಅನೌನ್ಸ್​ಮೆಂಟ್ ಎದುರು ನೋಡುತ್ತಿದ್ದಾರೆ ಎನ್ನುವುದನ್ನೂ ಹೇಳಿದ್ದಾರೆ. ಆದರೆ ತಾಳ್ಮೆಯಿಂದ ಇರಿ ಎಂದು ಅಭಿಮಾನಿಗಳನ್ನು ಕೇಳಿಕೊಂಡಿದ್ದಾರೆ.

ಕೆಜಿಎಫ್ 2 ಯಶಸ್ಸನ್ನು ಸೋಷಿಯಲ್ ಮೀಡಿಯಾದಲ್ಲಿ ಸೆಲೆಬ್ರೇಟ್ ಮಾಡದೆ ಯಾಕೆ ಇಂಟರ್​ವ್ಯೂಗಳಿಗೆ ಅಷ್ಟಾಗಿ ಹೋಗುತ್ತಿಲ್ಲ ಎಂಬ ಪ್ರಶ್ನೆಗೆ ಉತ್ತರಿಸಿದ್ದಾರೆ ನಟ. ಹೊರಗೆ ಹೋಗಿ ನಿಮ್ಮ ಬಗ್ಗೆ ನೀವೇ ಮಾತನಾಡುವುದರಲ್ಲಿ ನನಗೆ ನಂಬಿಕೆ ಇಲ್ಲ ಎಂದಿದ್ದಾರೆ.

ನೀನು ರಾಜನಾಗಿದ್ದರೆ, ನೀನು ಹೋಗಿ ರಾಜನೆಂದು ಹೇಳಿದರೆ ನೀನು ರಾಜನಲ್ಲ ಎಂಬ ಮಾತಿದೆ. ಯಾರಾದರೂ ಯಶಸ್ವಿಯಾಗಿದ್ದಾರೆ ಅಥವಾ ಜೀವನದಲ್ಲಿ ನಿಜವಾಗಿಯೂ ಉತ್ತಮ ಸಾಧನೆ ಮಾಡುತ್ತಿದ್ದರೆ, ನಾನು ಸಕ್ಸಸ್ ಆಗಿದ್ದೇನೆಂದು ಹೊರಗೆ ಹೋಗಿ ತೋರಿಸಬೇಕಾಗಿಲ್ಲ. ಜನರು ಅದನ್ನು ತಿಳಿದುಕೊಳ್ಳುತ್ತಾರೆ ಎಂದಿದ್ದಾರೆ.

ತಮ್ಮ ಮುಂದಿನ ನಡೆಯನ್ನು ಇನ್ನೂ ಘೋಷಿಸದಿರುವ ಬಗ್ಗೆ ಸ್ನೇಹಿತರು ಸಹ ಕಳವಳ ವ್ಯಕ್ತಪಡಿಸಿದ್ದಾರೆ. ಕೆಜಿಎಫ್ ನಂತರ ಬೇರೆ ಸಿನಿಮಾಗಳಲ್ಲಿ ಜನರು ಅವರನ್ನು ಸ್ವೀಕರಿಸುತ್ತಾರೆಯೇ ಎಂದು ಎಲ್ಲರೂ ಕೇಳುತ್ತಿರುವುದಾಗಿ ನಟ ಒಪ್ಪಿಕೊಂಡಿದ್ದಾರೆ.

ಯಶ್ ಹಾಗೂ ಪ್ರಶಾಂತ್ ನೀಲ್ ಅವರು ಕೆಜಿಎಫ್ 3 ಸಿನಿಮಾಗಾಗಿ ಮತ್ತೆ ಒಂದಾಗುವ ಸಾಧ್ಯತೆ ಇದೆ. ಆದರೆ ಸದ್ಯ ನೀಲ್ ಅವರು ಸಲಾರ್ ಸಿನಿಮಾದಲ್ಲಿ ಬ್ಯುಸಿಯಾಗಿದ್ದಾರೆ.