Aishwarya Rai: ದೀಪಿಕಾ-ರಣವೀರ್ ಅಲ್ಲ! ಬಾಜಿರಾವ್ ಮಸ್ತಾನಿಯಲ್ಲಿ ಸಲ್ಮಾನ್-ಐಶ್ವರ್ಯಾ ನಟಿಸ್ಬೇಕಿತ್ತು!

ಸಂಜಯ್ ಲೀಲಾ ಬನ್ಸಾಲಿ ಅವರ ಸೂಪರ್ ಹಿಟ್ ಸಿನಿಮಾ ಬಾಜಿರಾವ್ ಮಸ್ತಾನಿ ಭಾರತದಲ್ಲಿ ಪ್ರಸಿದ್ಧ ಸಿನಿಮಾಗಳಲ್ಲಿ ಒಂದು. ಬಾಲಿವುಡ್​ನಲ್ಲಿ ದೊಡ್ಡ ಹವಾ ಸೃಷ್ಟಿ ಮಾಡಿದ್ದ ಈ ಸಿನಿಮಾ ಬನ್ಸಾಲಿ ಅವರ ದೊಡ್ಡ ಕನಸಾಗಿತ್ತು. ಈ ಸಿನಿಮಾದ ಸ್ಟಾರ್ಸ್ ಆಯ್ಕೆ ಎಷ್ಟು ಸಲ ಬದಲಾಗಿದೆ ಗೊತ್ತೇ?

ಈ ಸಿನಿಮಾವನ್ನು ಬನ್ಸಾಲಿ ಮಾಡಿದ್ದು ಸಲ್ಮಾನ್ ಖಾನ್ ಹಾಗೂ ಐಶ್ವರ್ಯಾ ರೈಗಾಗಿ. ಸಲ್ಮಾನ್ ಖಾನ್ ಜೊತೆಗೆ ಖಾಮೋಷಿ ಸಿನಿಮಾದ ಶೂಟಿಂಗ್ ಸಂದರ್ಭ ಬನ್ಸಾಲಿ ಅವರು ಈ ಸಿನಿಮಾ ಪ್ಲಾನ್ ಮಾಡಿದ್ದರು. ಇದರಲ್ಲಿ ಐಶ್ ಹಾಗೂ ಸಲ್ಲೂ ಭಾಯ್ ನಟಿಸಬೇಕೆಂದು ಅವರು ಬಯಸಿದ್ದರು.

ಖಾಮೋಷಿ ಸಿನಿಮಾದ ನಂತರ ಐಶ್ವರ್ಯಾ ರೈ ಹಾಗೂ ಸಲ್ಮಾನ್ ಖಾನ್ ಹಮ್ ದಿಲ್ ದೇ ಚುಕೆ ಸನಮ್ ಸಿನಿಮಾದ ಶೂಟಿಂಗ್​ನಲ್ಲಿ ಬ್ಯುಸಿಯಾದರು. ಬನ್ಸಾಲಿ ತಮ್ಮ ಸಿನಿಮಾಗಾಗಿ ಇದೇ ಜೋಡಿಯನ್ನು ಪ್ಲಾನ್ ಮಾಡಿಕೊಂಡಿದ್ದರು. ಆನ್​ಸ್ಕ್ರೀನ್​ನಲ್ಲಿ ಸಲ್ಮಾನ್ ಖಾನ್ ಹಾಗೂ ಐಶ್ ಜೋಡಿ ಅದ್ಭುತವಾಗಿತ್ತು.

ಆದರೆ ಬನ್ಸಾಲಿ ಅವರ ಈ ಕನಸು ನನಸಾಗಲಿಲ್ಲ. ಈ ಸಂದರ್ಭ ಸಲ್ಲು ಹಾಗೂ ಐಶ್ ಭಾರೀ ದೊಡ್ಡ ಜಗಳವಾಗಿ ದೂರಾದರು. ಒಟ್ಟಿಗೆ ನಟಿಸುವುದಿರಲಿ ಪರಸ್ಪರ ಮುಖ ನೋಡಿಕೊಳ್ಳಲು ಸಾಧ್ಯವಿಲ್ಲ ಎನ್ನುವ ಮಟ್ಟಿಗೆ ಈ ಜೋಡಿಯ ಮಧ್ಯೆ ದೊಡ್ಡ ಬಿರುಕು ಬಂತು.

ಆದರೆ ಸಲ್ಮಾನ್ ಖಾನ್ ಅವರಿಗೆ ಬಾಜಿರಾವ್ ಮಸ್ತಾನಿ ಸಿನಿಮಾದಲ್ಲಿ ನಟಿಸಲು ಭಾರೀ ಆಸೆ ಇತ್ತು. ಐಶ್ವರ್ಯಾ ಅವರು ತಮ್ಮದೇ ಕಾರಣಗಳಿಂದಾಗಿ ಈ ಸಿನಿಮಾ ಒಪ್ಪಿಕೊಳ್ಳಲಿಲ್ಲ. ಆದರೆ ಸರಿಯಾದ ಹೀರೋಯಿನ್ ಸಿಗದೆ ಸಿನಿಮಾ ಮಾಡಲು ಸಿದ್ಧರಿರಲಿಲ್ಲ ಬನ್ಸಾಲಿ. ಈ ಸಂದರ್ಭ ಸಲ್ಮಾನ್ ಖಾನ್ ಕತ್ರೀನಾ ಕೈಫ್ ಅವರನ್ನು ಕರೆದುಕೊಂಡು ಬನ್ಸಾಲಿ ಮನೆಗೆ ಬಂದರು.

ಇಲ್ಲಿದ್ದಾರೆ ನೋಡಿ ನಿಮ್ಮ ಮಸ್ತಾನಿ ಎಂದು ಕತ್ರೀನಾ ಕೈಫ್ ಅವರನ್ನು ಪರಿಚಯಿಸಿದರು. ಸುಭಾಶ್ ಕೆ ಜಾ ಅವರು ಬಾಜಿರಾವ್ ಮಸ್ತಾನಿಯಲ್ಲಿ ಹೀರೋ - ಹೀರೋಯಿನ್ ಆಯ್ಕೆ ಬಗ್ಗೆ ಆಸಕ್ತಿಕರ ವಿಚಾರಗಳನ್ನು ಬರೆದಿದ್ದಾರೆ. ಐಶ್-ಸಲ್ಮಾನ್ ಜೋಡಿಯನ್ನು ಒಂದು ಮಾಡುವುದು ಸಾಧ್ಯವಾಗದೆ ಇದ್ದಾಗ ಸಲ್ಮಾನ್ ಅವರು ಇದರಲ್ಲಿ ಕತ್ರೀನಾ ನಟಿಸಬೇಕೆಂದು ಬಯಸಿದರು. ಹಾಗಾಗಿ ಕತ್ರೀನಾ ಅವರನ್ನು ತಾವೇ ಖುದ್ದಾಗಿ ಕರೆದುಕೊಂಡು ಬನ್ಸಾಲಿ ಮನೆಗೆ ಬಂದಿದ್ದರು.

ಆದರೆ ಇದು ಸೆಟ್ ಆಗಲಿಲ್ಲ. ಕತ್ರೀನಾ ಅವರನ್ನು ಒಂದು ಕುದುರೆ ಮೇಲೆ ಕುಳಿತಿರುವುದನ್ನು ಇಮ್ಯಾಜಿನ್ ಮಾಡಬಹುದು. ಆದರೆ ಆ ದೇಸಿ ಹಿಂದಿ ಹಾಗೂ ಉರ್ದು ಭಾಷೆಯನ್ನು ನಿರರ್ಗಳವಾಗಿ ಮಾತನಾಡುವುದನ್ನು ಊಹಿಸಬಹುದೇ? ನೋ ಛಾನ್ಸ್. ಅಲ್ಲಿಗೇ ಕತ್ರೀನಾ ಬಾಜಿರಾವ್ ಮಸ್ತಾನಿ ಅವಕಾಶ ಕಳೆದುಕೊಂಡರು.

ಬನ್ಸಾಲಿ ಖಂಡಿತವಾಗಿಯೂ ಕತ್ರೀನಾ ಅವರನ್ನು ಮಸ್ತಾನಿಯಾಗಿ ಆಯ್ಕೆ ಮಾಡುವ ಮೂಡ್​ನಲ್ಲಿ ಇರಲಿಲ್ಲ. ಪುನಃ ಈ ಪ್ರಾಜೆಕ್ಟ್ ಆರಂಭಿಸಲು ಯೋಚಿಸಿದರು. 2003ರಲ್ಲಿ ಸಲ್ಮಾನ್ ಹಾಗೂ ಕರೀನಾ ಅವರ ಜೋಡಿಯಲ್ಲಿ ಬಾಜಿರಾವ್ ಮಸ್ತಾನಿ ಮಾಡಲು ಯೋಚಿಸಿದರು. ಬಾಜಿರಾವ್ ಮೊದಲ ಪತ್ನಿಯಾಗಿ ಸಲ್ಮಾನ್ ಭೂಮಿಕಾ ಚಾವ್ಲಾ ಅವರ ಹೆಸರು ಸೂಚಿಸಿದರು.

ಭೂಮಿಕಾಗೆ ಬನ್ಸಾಲಿ ಒಂದು ಸ್ಕ್ರೀನ್ ಟೆಸ್ಟ್ ಇಟ್ಟರು. ಆದರೆ ಇದರಲ್ಲಿ ಭೂಮಿಕಾ ಅವರ ಸೀರೆಗೆ ಬೆಂಕಿ ತಾಗಿತು. ಅಲ್ಲಿಗೆ ಭೂಮಿಕಾ ಅಡಿಷನ್ ಖತಂ. ಈ ಘಟನೆಯಾಗಿ ಬರೋಬ್ಬರಿ 12 ವರ್ಷಗಳ ನಂತರ ಬನ್ಸಾಲಿ ಮತ್ತೊಮ್ಮೆ ಬಾಜಿರಾವ್ ಮಸ್ತಾನಿ ಪ್ರಾಜೆಕ್ಟ್ ರೀ ಓಪನ್ ಮಾಡಿದರು. ಈ ಸಲ ಅಜಯ್ ದೇವಗನ್ ಅವರ ಆಯ್ಕೆಯಾಗಿದ್ದರು. ಆದರೆ ಅಜಯ್ ಕೇಳಿದ ಸಂಭಾವನೆ ನೀಡಲು ತಂಡ ಸಿದ್ಧವಿರದ ಕಾರಣ ಅವರನ್ನೂ ಕೈಬಿಡಲಾಯ್ತು.

ಆಮೇಲೆ ಕೊನೆಗೆ ದೀಪಿಕಾ ಪಡುಕೋಣೆ, ಪ್ರಿಯಾಂಕಾ ಚೋಪ್ರಾ, ರಣವೀರ್ ಸಿಂಗ್ ಕಾಂಬಿನೇಷನ್​ನಲ್ಲಿ ಬಂದ ಸಿನಿಮಾ ಸೂಪರ್ ಹಿಟ್ ಆಯಿತು. ಭರ್ಜರಿ ಯಶಸ್ವಿ ಕಂಡಿದ್ದಷ್ಟೇ ಅಲ್ಲದೆ ವ್ಯಾಪಕ ಮೆಚ್ಚುಗೆಯನ್ನೂ ಗಳಿಸಿತು. ರಣವೀರ್ ಹಾಗೂ ದೀಪಿಕಾಗಿಂತ ಸಲ್ಮಾನ್ ಹಾಗೂ ಕತ್ರೀನಾ ನಟಿಸಿದ್ದರೆ ಚೆನ್ನಾಗಿತ್ತು ಎಂದು ನಿಮಗನಿಸುತ್ತದೆಯೇ?