HBD Chikkanna: ಸ್ಯಾಂಡಲ್​ವುಡ್​ನ ಉಪಾಧ್ಯಕ್ಷರಿಗೆ ಜನ್ಮದಿನದ ಸಂಭ್ರಮ, ಮದ್ವೆ ಯಾವಾಗ ಆಗ್ತೀರಾ ಕಾಮಿಡಿ ಕಿಂಗ್​ ಎಂದ ಫ್ಯಾನ್ಸ್​

ಇವರು ತೆರೆ ಮೇಲೆ ಬಂದ್ರೆ ಸಾಕು ಶಿಳ್ಳೆ, ಚಪ್ಪಾಳೆ, ನಗು ಎಲ್ಲವೂ ಬರುತ್ತದೆ. ಇವರ ಡಿಫರೆಂಟ್ ನಟನೆಯಿಂದ ಕನ್ನಡ ಸಿನಿ ರಸಿಕರನ್ನು ನಗೆಗಡಲಲ್ಲಿ ತೇಲಿಸುತ್ತಾರೆ. ಇಂತಹ ಸ್ಯಾಂಡಲ್​ವುಡ್​ನ ಉಪಾಧ್ಯಕ್ಷ ಚಿಕ್ಕಣ್ಣನವರು ಇಂದು ತಮ್ಮ 36ನೇ ವಸಂತಕ್ಕೆ ಕಾಲಿಟ್ಟಿದ್ದಾರೆ. ಇವರ ಕುರಿತಾದ ಇಂಟ್ರಸ್ಟಿಂಗ್ ಸ್ಟೋರಿ ಇಲ್ಲಿದೆ ನೋಡಿ.

ಸಿನಿಮಾಗೆ ಬರುವ ಮೊದಲು ಹಾಸ್ಯ ನಟ ಚಿಕ್ಕಣ್ಣ ಗಾರೆ ಕೆಲಸ ಮಾಡುತ್ತಿದ್ದರು. ಮೇಸ್ತ್ರಿ ಕೈ ಕೆಳಗೆ ಕೆಲಸ ಮಾಡುತ್ತಿದ್ದ ಚಿಕ್ಕಣ್ಣ ನಟನಾಗುವ ಕನಸು ಹೊತ್ತು ಬೆಂಗಳೂರಿಗೆ ಬಂದು ಕಷ್ಟಪಟ್ಟು ಶ್ರಮದಿಂದ ಇಂದು ಸ್ಯಾಂಡಲ್​ವುಡ್​ನ ಸ್ಟಾರ್​ ಕಾಮಿಡಿಯನ್ ಆಗಿ ಮಿಂಚುತ್ತಿದ್ದಾರೆ,

ಚಿಕ್ಕಣ್ಣ 1986,ಜೂನ್ 22 ರಂದು ಮೈಸೂರು ಜಿಲ್ಲೆಯ ಬಲ್ಲಹಳ್ಳಿಯಲ್ಲಿ ಜನಿಸಿದರು.ಮೈಸೂರಿನ ದೃಶ್ಯ ಕಲಾವಿದೆ ತಂಡದಲ್ಲಿ ಕಾಮಿಡಿ ಶೋಗಳನ್ನು ಮಾಡುತ್ತಾ ತಮ್ಮ ಕಲಾಜೀವನ ಆರಂಭಿಸಿದರು. ಮೊದಲಿನಿಂದಲೂ ನಟನೆಯಲ್ಲಿ ಆಸಕ್ತಿ ಇದ್ದ ಚಿಕ್ಕಣ್ಣ, ನಂತರ ನಿಧಾನವಾಗಿ ಚಿತ್ರರಂಗದತ್ತ ಕಾಲಿಟ್ಟರು.

ಚಿಕ್ಕಣ್ಣ ನಂತರ ಉದಯ ಟಿವಿಯಲ್ಲಿ ಒಂದು ಕಾಮಿಡಿ ಶೋನಲ್ಲಿ ಭಾಗವಹಿಸಿ ತಮ್ಮ ನಟನೆಯ ಮೂಲಕ ಎಲ್ಲರ ಮನೆ ಮಾತಾದರು. ಅದಲ್ಲದೇ ಚಿಕ್ಕಣ್ಣ ಕಿರುತೆರೆಯಲ್ಲಿಯೂ ಸಹ ಖಳನಾಯಕನಾಗಿ ನಟಿಸುವ ಮೂಲಕ ಕನ್ನಡಿಗರನ್ನು ರಂಜಿಸಿದರು.

ಕನ್ನಡ ಚಿತ್ರರಂಗದ ಅಮೃತ ಮಹೋತ್ಸವ ಕಾರ್ಯಕ್ರಮದ ನಿರೂಪಣೆ ಮmಾಡುವ ವೇಳೆ ಕನ್ನಡದ ರಾಕಿಂಗ್ ಸ್ಟಾರ್​ ಯಶ್ ಅವರ ಕಣ್ಣಿಗೆ ಬಿದ್ದ ಚಿಕ್ಕಣ್ಣಅವರು ನಂತರದಲ್ಲಿ ಕಿರಾತಕ ಚಿತ್ರದ ಮೂಲಕ ಸ್ಯಾಂಡಲ್​ವುಡ್​ಗೆ ಪಾದಾರ್ಪಣೆ ಮಾಡಿದರು.

.ತದನಂತರ ತೆರೆಕಂಡ `ರಾಜಾ ಹುಲಿ',`ಅಧ್ಯಕ್ಷ' ಚಿತ್ರಗಳು ಇವರಿಗೆ ದೊಡ್ಡ ಮಟ್ಟದ ಯಶಸ್ಸನ್ನು ತಂದುಕೊಟ್ಟಿತು. ಅದಲ್ಲದೇ ಅಧ್ಯಕ್ಷ ಚಿತ್ರದಲ್ಲಿ ಉಪಾಧ್ಯಕ್ಷನ ಪಾತ್ರದ ನಂತರ ಅವರನ್ನು ಜನರು ಪ್ರೀತಿಯಿಂದ ಸ್ಯಾಂಡಲ್​ವುಡ್​ನ ಉಪಾಧ್ಯಕ್ಷರು ಎಂದೇ ಕರೆಯಲಾರಂಭಿಸಿದರು.

ಮಾಸ್ಟರ್ ಪೀಸ್, ನನ್ನ ನಿನ್ನ ಪ್ರೇಮ ಕಥೆ ಸೇರಿದಂತೆ ಅನೇಖ ಚಿತ್ರಗಳಿಗೆ ಹಿನ್ನಲೆ ಗಾಯಕರಾಗಿ ಕಾಣಿಸಿಕೊಂಡರೆ, ಶಾರ್ಪ್ ಶೂಟರ್ ಚಿತ್ರಕ್ಕೆ ಗೀತೆರಚನೆyನ್ನೂ ಮಾಡಿದರು. ಅಲ್ಲದೇ ಶರಣ್ ಅಭಿನಯದ ರ್ಯಾಂಬೋ 2 ಚಿತ್ರದ ನಿರ್ಮಾಪಕರಲ್ಲಿ ಚಿಕ್ಕಣ್ಣ ಕೂಡ ಒಬ್ಬರು. ಇವರೆಗೂ 50ಕ್ಕೂ ಹೆಚ್ಚಿನ ಚಿತ್ರಗಳಲ್ಲಿ ನಟಿಸಿರುವ ಚಿಕ್ಕಣ್ಣ ಅವರಿಗೆ ಅತ್ಯುತ್ತಮ ಹಾಸ್ಯನಟಕ್ಕಾಗಿ SIIMA ಪ್ರಶಸ್ತಿ, IIFA ಪ್ರಶಸ್ತಿ ಸೇರಿದಂತೆ ಅನೇಕ ಪ್ರಶಸ್ತಿಗಳು ದೊರಕಿದೆ. ನ್ಯೂಸ್ 18 ಕನ್ನಡ ಕಡೆಯಿಂದ ಚಿಕ್ಕಣ್ಣ ಅವರಿಗೆ ಹುಟ್ಟುಹಬ್ಬದ ಶುಭಾಷಯಗಳು.